‘Abasi Idụn̄ke ke Mme Temple eke Ubọk Owo Ẹnamde’

NTE eyịghe mîdụhe, Paul ama etịm ọfiọk se ẹkesinamde ke mme temple Athena emi, sia mmọ ẹkedude ke mme obio emi enye ekesikade isan̄ isụn̄utom. Nte The Encyclopædia Britannica ọdọhọde, Athena ekedi abasi-an̄wan oro ọkọwọrọde etop ke ekọn̄ ye ke ọniọn̄, enye ama onyụn̄ enyene “usọ ndinam emem kpukpru ini.”

Temple Athena oro ọkọwọrọde etop akan ekedi Parthenon, emi ẹkebọpde ke Athens, kpa obio emi ẹkekotde ẹdian abasi-an̄wan Athena. Sia ẹkedade enye nte kiet ke otu n̄kponn̄kan temple ke eyo oro, ẹkenịm mbiet Athena emi ekedide mita 12 oro ẹkedade nnụk enịn ye gold ẹbot ke Parthenon. Ke ini Paul akakade Athens, temple emi ẹkedade afia nsemnsem itiat ẹbọp mi ama ọwọwọrọ etop ke obio emi ke n̄kpọ nte isua 500.

Ke adade ekpere Parthenon, Paul ama ọkwọrọ ikọ ọnọ mbon Athens aban̄a ‘Abasi oro mîdụn̄ke ke mme temple eke ubọk owo ẹnamde.’ (Utom 17: 23, 24) Ekeme ndidi uten̄e emi temple Athena ekenyenede m̀mê uku emi ndem esie ẹkenyenede akanam mme andikpan̄ utọn̄ nnọ Paul ẹnen̄ede ẹma enye ẹkan Abasi oro enyịn owo mîkwe emi mmọ mîkọfiọkke. Edi, nte Paul okowụtde, owo ikpesehe ite ke Andibot ubonowo ‘ebiet gold, m̀mê silver, m̀mê itiat, eke owo ọsọide.’—Utom 17:29.

Mme abasi nte Athena—emi mme owo ẹkekponode ke ntak mme mbiet ye temple mmọ—ẹma ẹdu ẹnyụn̄ ẹbe ẹfep. Mbiet Athena ama osop ofụri ofụri ke Parthenon ke ọyọhọ isua ikie ition E.N., ndien edi mme n̄wụre ibat ibat temple esie kpọt ẹsụk ẹdu. Anie mfịn esika ọkọbọ ifiọk ye ndausụn̄ oto Athena?

Enye okpụhọde didie ntem ye Jehovah, kpa “nsinsi Abasi” emi akanam owo ndomokiet mîkwe. (Rome 16:26; 1 John 4:12) Nditọ Korah ẹkewet ẹte: “Abasi emi [edi] Abasi nnyịn ke nsinsi: enye ayada nnyịn usụn̄ tutu esịm ke n̄kpa.” (Psalm 48:14) Usụn̄ kiet ndinyene ndausụn̄ Jehovah Abasi edi ndikpep Ikọ esie, kpa Bible, nnyụn̄ nda item esie nsịn ke edinam.