Jehovah Okpon Ima
Jehovah Okpon Ima
“Jehovah . . . okpon ima.”—PSALM 145:8.
1. Ima Abasi otụn̄ọ adan̄a didie?
“ABASI edi ima.” (1 John 4:8) Inem inem udịmikọ oro owụt nte ke Jehovah akara ke ima. Kamse, idem mbon oro mîkopke uyo esie ẹbọ ufọn ẹto utịn ye ọfiọn̄ oro enye ọnọde ke ima! (Matthew 5:44, 45) Ke ntak ima oro Abasi amade ererimbot, idem mme asua esie ẹkeme ndikabade esịt, ẹwọn̄ọde ẹbịne enye, ẹnyụn̄ ẹnyene uwem. (John 3:16) Nte ededi, ke mîbịghike Jehovah oyosobo ndiọi owo oro mîkabakede esịt man mbon oro ẹmade enye ẹkeme ndidara uwem nsinsi ke edinen obufa ererimbot.—Psalm 37:9-11, 29; 2 Peter 3:13.
2. Didie ke Jehovah ama mbon oro ẹyakde idem ẹnọ enye ke san̄asan̄a usụn̄?
2 Jehovah ama ata mme andituak ibuot nnọ enye ke san̄asan̄a usụn̄ oro ebịghide. Ẹda ikọ Hebrew oro ẹkabarede “ima-mfọnido” m̀mê “ima nsọn̄ọnda” ẹtịn̄ ẹban̄a utọ ima oro. Edidem David eke Israel eset ama enen̄ede owụt esịtekọm aban̄a ima-mfọnido Abasi. Ke ntak ifiọk n̄kpọntịbe esie ye enye nditie n̄kere nte Abasi anamde n̄kpọ ye mme owo, David ama ekeme ndikwọ ye uko ete: “Jehovah . . . okpon ima [m̀mê, “ima nsọn̄ọnda” NW].”—Psalm 145:8.
Ndidiọn̄ọ Mbon Ima Abasi
3, 4. (a) Didie ke Psalm 145 an̄wam nnyịn ndidiọn̄ọ mbon ima Jehovah? (b) Didie ke mbon ima Abasi “ẹtoro” enye?
3 Hannah, eka prọfet Samuel ama etịn̄ aban̄a Jehovah Abasi ete: “Enye eyekpeme ukot mbon ima esie.” (1 Samuel 2:9) Mmanie ẹdi utọ “mbon ima” oro? Edidem David ọbọrọ. Ke ama okotoro mme utịbe edu Jehovah, enye ama ọdọhọ ete: “Mbon-ima fo ẹnyụn̄ ẹtoro fi.” (Psalm 145:10) Nnyịn itoro Abasi akpan akpan ke nditịn̄ eti ikọ mban̄a enye.
4 Ẹkeme ndidiọn̄ọ mbon ima Jehovah nte mbon oro ẹdade inua mmọ ẹtịn̄ eti ikọ ẹban̄a enye. Ke mme mboho n̄kaowo ye ke mme mbono esop Christian, nso ke mmọ ẹsiwak ndineme? Mmọ ẹsiwak ndineme mban̄a Obio Ubọn̄ Jehovah. Etie mme anam-akpanikọ asan̄autom Abasi nte eketiede David, emi ọkọkwọde ete: “Mmọ ẹbụk ubom ubọn̄ fo [Jehovah], ẹnyụn̄ ẹtịn̄ ẹban̄a odudu fo.”—Psalm 145:11.
5. Nnyịn isan̄a didie ifiọk ke Jehovah esikpan̄ utọn̄ ke ini mbon ima esie ẹtorode enye?
5 Ndi Jehovah esikpan̄ utọn̄ ke ini mbon ima esie ẹtorode enye? Ih, enye esikpan̄ utọn̄ ke se mmọ ẹtịn̄de. Ke ntịn̄nnịm ikọ oro aban̄ade utuakibuot akpanikọ ke eyo nnyịn, Malachi ekewet ete: “Ndien mme abak Jehovah ẹneme kiet ye kiet: ndien Jehovah akpan̄ utọn̄, onyụn̄ okop, mmọ ẹnyụn̄ ẹwet n̄wed editi ke iso esie ẹnọ mme abak Jehovah ye mme ẹkere enyịn̄ esie.” (Malachi 3:16) Jehovah esinen̄ede enem esịt ke ini mbon ima esie ẹtorode enye, ndien enye esiti mmọ.
6. Nso utom ke ẹda ẹdiọn̄ọ mbon ima Abasi?
6 N̄kpọ efen oro ẹdade ẹdiọn̄ọ mme anam-akpanikọ asan̄autom Jehovah edi uko oro mmọ ẹnyenede nditọn̄ọ nneme ye mbon oro mîtuakke ibuot inọ ata Abasi. Ke akpanikọ, mbon ima Abasi “ẹnam nditọ owo ẹfiọk ese esie, ye ubom uyai [ubọn̄] esie.” (Psalm 145:12) Ndi afo emesiyom mme ifet nditịn̄ ikọ nnọ mbon oro mînịmke ke akpanikọ mban̄a ubọn̄ Jehovah onyụn̄ ada mme ifet emi anam n̄kpọ nte ọfọnde? Ke mîbietke mme ukara owo oro ẹdibede ẹfep, itie ukara esie ada ke nsinsi nsinsi. (1 Timothy 1:17) Enen̄ede oyom mme owo ẹkpep ẹban̄a nsinsi itie edikara Jehovah ẹnyụn̄ ẹda ẹnọ enye. David ọkọkwọ ete: “Ubọn̄ fo edi ata nsinsi ubọn̄, afo onyụn̄ akara ke ofụri emana.”—Psalm 145:13.
7, 8. Nso iketịbe ke 1914, ndien nso iwụt nte ke Abasi ke akara idahaemi ke Obio Ubọn̄ Eyen esie?
7 Toto ke 1914, ntak efen ama odu ndibụk ubọn̄ Jehovah. Ke isua oro, Abasi ama owụk Obio Ubọn̄ Messiah eke heaven, emi Jesus Christ Eyen David akarade nte Edidem. Ke ntem, Jehovah ama osu se enye ọkọn̄wọn̄ọde nte ke ẹyenam itie ubọn̄ David ọsọn̄ọ ada ke nsinsi.—2 Samuel 7:12, 13; Luke 1:32, 33.
8 Idiọn̄ọ edidu Jesus Christ oro akade iso osu owụt nte ke Jehovah ke akara idahaemi ke Obio Ubọn̄ Eyen esie. Ata n̄wọrọnda ikpehe idiọn̄ọ oro edi utom emi Jesus ekebemde iso etịn̄ ete ke kpukpru mbon ima Abasi ẹyenam ke ini enye ọkọdọhọde ete: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” (Matthew 24:3-14) Sia mbon ima Abasi ẹsude ntịn̄nnịm ikọ emi ifịk ifịk, se iwakde ibe iren, iban, ye nditọwọn̄ miliọn itiokiet ke ẹnam akwa utom oro owo mîdifiakke inam aba mi. Ke mîbịghike, ẹyesobo kpukpru mme andibiọn̄ọ Obio Ubọn̄ Jehovah ẹfep.—Ediyarade 11:15, 18.
Ndibọ Ufọn Nto Itie Edikara Jehovah
9, 10. Nso ukpụhọde idu ke ufọt Jehovah ye mme andikara ẹdide owo?
9 Edieke nnyịn idide mme Christian oro ima ikayak idem inọ, itie ebuana nnyịn ye Jehovah oro edide Ọbọn̄ Andikara ada ediwak ufọn ọsọk nnyịn. (Psalm 71:5; 116:12) Ke uwụtn̄kpọ, sia nnyịn ibakde Abasi inyụn̄ inamde se inende, nnyịn imenyene unyịme esie inyụn̄ isan̄a ikpere enye ke n̄kan̄ eke spirit. (Utom 10:34, 35; James 4:8) Ke edide isio ye oro, ẹsiwak ndikụt mme andikara ẹdide owo nte ẹdụkde ndụk ye mme ọwọrọiso owo utọ nte ikpọ mbonekọn̄, mme anam mbubehe oro ẹnyenede okụk, m̀mê mbon mbre mbuba ye mbon oro ẹwọrọde etop ke unọ idem inemesịt. Nte n̄wedmbụk n̄kpọntịbe Africa oro Sowetan ọdọhọde, ọwọrọiso akwa owo ukara eketịn̄ aban̄a itie oro mbon unana ẹdude ke obio esie ete: “Mmọfiọk ntak emi ediwak nnyịn mîyomke ndika utọ itie oro. Nnyịn inam oro n̄kukụre man ifre ke utọ mme itie oro ẹdu. Ọsọn̄urua [ubomisọn̄] emi nnyịn iwatde esinam nnyịn bụt onyụn̄ otụhọde ubieresịt nnyịn.”
10 Edi akpanikọ, ndusụk mme andikara ẹdide owo ẹsinen̄ede ẹnyene udọn̄ ke mfọnọn̄kpọ mbon oro mmọ ẹkarade. Edi idem ata nti andikara isitịmke ifiọk mbon oro mmọ ẹkarade. Ke ntre, nnyịn imekeme ndibụp ite: Ndi odu andikara oro ekerede aban̄a kpukpru mme andidu ke idak esie tutu enye oyom ndisọsọp n̄n̄wam mmọ ke ini afanikọn̄? Ih, odu. David ekewet ete: “Edi Jehovah omụm mmọ eke ẹduọn̄ọde, akama, onyụn̄ emenede mmọ eke ẹnụhọde.”—Psalm 145:14.
11. Nso mme idomo ẹsisịm mbon ima Abasi, ndien nso un̄wam ke mmọ ẹnyene?
11 Ediwak idomo ye afanikọn̄ ẹsisịm mbon ima Jehovah Abasi ke ntak unana mfọnmma mmọ ye koro mmọ ẹdude ke ererimbot emi esịnede ke ubọk “andidiọk,” kpa Satan. (1 John 5:19; Psalm 34:19) Mme Christian ẹsobo ukọbọ. Ndusụk mmọ ẹkop ubiak ke ntak uyịre uyịre udọn̄ọ m̀mê ke ntak emi owo ima mmọ akpade. Ke ndusụk idaha, ndudue oro mbon ima Jehovah ẹnamde ekeme ndinam mmọ ẹkop mmemidem ẹnyụn̄ ‘ẹfụhọ.’ Nte ededi, Jehovah eben̄e idem ndinọ ndọn̄esịt ye odudu eke spirit ke idomo ekededi oro esịmde mmọ kiet kiet. Ọbọn̄ Jesus Christ onyụn̄ enyene ukem ima oro ọnọ mbon ima esie oro ẹdude ke idak esie.—Psalm 72:12-14.
Nti Udia ke Edikem Ini
12, 13. Adan̄a didie ke Jehovah ọnọ “kpukpru mme andidu uwem” se mmọ ẹmade?
12 Jehovah ọnọ se mme asan̄autom esie ẹyomde ke ntak akwa ima-mfọnido esie. Emi esịne edinọ mmọ nti udia ẹyụhọ. Edidem David ekewet ete: “Enyịn kpukpru n̄kpọ ẹse fi [Jehovah] ẹbet; ndien afo osụk ọnọ mmọ udia mmọ ke edikem ini. Afo atat ubọk fo, onyụn̄ ọnọ kpukpru mme andidu uwem se mmọ ẹmade, ẹyụhọ.” (Psalm 145:15, 16) Idem ke mme ini afanikọn̄, Jehovah ekeme ndinam n̄kpọ man mbon ima esie ẹnyene ‘udia eke ekemde ke usen.’—Luke 11:3; 12:29, 30.
13 David ọkọdọhọ ke “kpukpru mme andidu uwem” ẹyụhọ. Oro esịne mme unam. Ke mîkpedịghe akpakịp eto ye ikọn̄ oro ẹdude ke isọn̄ ye ke mmọn̄, mme iyak ye unam mmọn̄, inuen, ye unam ikọt ikpenyeneke ofụm ndin̄wek m̀mê udia ndidia. (Psalm 104:14) Nte ededi, Jehovah okụt ete ke ẹnọ kpukpru se mmọ ẹyomde ẹyụhọ.
14, 15. Didie ke ẹnọ udia eke spirit mfịn?
14 Ke mîbietke mme unam, owo enyene udọn̄ n̄kpọ eke spirit. Jehovah oyụhọ mme udọn̄ n̄kpọ eke spirit mbon ima esie ke utịbe utịbe usụn̄ didie ntem! Mbemiso enye akpade, Jesus ama ọn̄wọn̄ọ ete ke “asan̄autom emi anamde akpanikọ, onyụn̄ enyenede ọniọn̄” ọyọnọ mbon ufọk imọ “udia” eke spirit “ke edikem ini.” (Matthew 24:45) Nsụhọ 144,000 oro ẹyetde aran ẹnam otu oro mfịn. Ke akpanikọ, Jehovah ada mmọ ọnọ akpakịp udia eke spirit.
15 Ke uwụtn̄kpọ, ediwak ikọt Jehovah idahaemi ẹnyene obufa nnennen edikabade Bible ke usem mmọ. Nso utịbe edidiọn̄ ke New World Translation of the Holy Scriptures edi ntem! Akan oro, ẹka iso ndimịn̄ ediwak miliọn n̄wed un̄wam ukpep Bible ke se ibede usem 300. Kpukpru udia eke spirit emi ẹdi edidiọn̄ ẹnọ ata mme andituak ibuot ke ofụri isọn̄. Anie odot ndibọ itoro ke kpukpru emi? Jehovah Abasi. Ke akwa ima-mfọnido esie, enye anam otu asan̄autom ekeme ndinọ “udia ke edikem ini.” Ẹda mme utọ ndutịm oro ẹnọ “kpukpru mme andidu uwem” se mmọ ẹmade ẹyụhọ ke paradise eke spirit eke eyomfịn. Ndien mme asan̄autom Jehovah ẹdara didie ntem ndinyene idotenyịn edikụt nte ẹnamde isọn̄ akabade edi ata paradise ke mîbịghike!—Luke 23:42, 43.
16, 17. (a) Nso mme uwụtn̄kpọ ẹdu kaban̄a udia eke spirit oro ẹkenọde ke edikem ini? (b) Didie ke Psalm 145 etịn̄ ekikere mbon ima Abasi kaban̄a akpan eneni oro Satan ekedemerede?
16 Kere ban̄a akpan uwụtn̄kpọ udia eke spirit oro ẹkenọde ke edikem ini. Ke 1939, Ekọn̄ Ererimbot II ama asiaha ke Europe. Kpa isua oro, nsiondi Enyọn̄-Ukpeme [Ikọmbakara] eke November 1 ama esịne ibuotikọ oro “Neutrality” (Edida San̄asan̄a). Nte utịp in̄wan̄-in̄wan̄ ntọt oro ẹkenọde do, Mme Ntiense Jehovah ke ofụri ererimbot ẹma ẹkụt ke oyom inen̄ede ida san̄asan̄a ikpọn̄ mme idụt oro ẹn̄wanade ekọn̄. Emi ama anam ukara edem mbiba ẹsua mmọ ke isua itiokiet oro ekọn̄ oro akan̄wanade. Kpa ye oro ẹkedoride mmọ ukpan ẹnyụn̄ ẹkọbọde mmọ, mbon ima Abasi ẹma ẹka iso ndikwọrọ gospel Obio Ubọn̄. Ọtọn̄ọde ke 1939 esịm 1946, ẹma ẹda n̄kọri edide mbahade 157 eke ikie ẹdiọn̄ mmọ. Akan oro, n̄wọrọnda mbụk nsọn̄ọnda mmọ ke ini ekọn̄ oro aka iso ndin̄wam mme owo ẹfiọk ido ukpono akpanikọ.—Isaiah 2:2-4.
17 Udia eke spirit oro Jehovah ọnọde idịghe ke edikem in kpọt, edi enen̄ede ọnọ uyụhọ. Ke adan̄aemi mme idụt ẹkenyịnede ke Ekọn̄ Ererimbot II, ẹma ẹn̄wam ikọt Jehovah ndiwụk ntịn̄enyịn ke se idide akpan n̄kpọ ikan edinyan̄a mmọ. Jehovah ama an̄wam mmọ ndifiọk nte ke akpan eneni oro abuanade ofụri ekondo aban̄a unen itie edikara esie. Enem didie ntem ndifiọk nte ke Ntiense Jehovah kiet kiet ada nsọn̄ọnda esie etịp esịn ke ndiwụt unen itie edikara Jehovah nnyụn̄ n̄wụt ke Devil edi osu nsu! (Mme N̄ke 27:11) Ke mîbietke Satan, emi eketịn̄de ikọ abiat Jehovah ye unen itie edikara esie, mbon ima Jehovah ẹka iso nditan̄a an̄wan̄wa nte: “Jehovah emenen ke kpukpru usụn̄ esie.”—Psalm 145:17.
18. Nso uwụtn̄kpọ ndondo emi iwụt udia eke spirit oro edide ke edikem ini onyụn̄ etịmde ọnọ uyụhọ?
18 Uwụtn̄kpọ udia eke spirit efen emi ọnọde uyụhọ, oro ẹkenọde ke edikem ini edi n̄wed oro San̄a Kpere Jehovah, oro ẹkesiode ke ediwak Mbono District “Ifịk Ifịk Mme Anditan̄a Obio Ubọn̄” oro ẹkenịmde ke ofụri ererimbot ke 2002/03. N̄wed emi “asan̄autom emi anamde akpanikọ, onyụn̄ enyenede ọniọn̄” osiode, emi Mme Ntiense Jehovah ẹmịn̄de, owụk ntịn̄enyịn ke nti edu Jehovah Abasi, ẹsịnede mbon oro ẹsiakde ke Psalm 145. Ke akpanikọ, ediye n̄wed emi ayanam ufọn ke ndin̄wam mbon ima Abasi ẹsan̄a ẹkpere enye.
Ini Ndisan̄a N̄kpere Jehovah
19. Nso akpan ini asan̄a ekpere, ndien didie ke nnyịn ikeme ndinam n̄kpọ mban̄a enye?
19 Akpan ini ndibiere unen itie edikara Jehovah ke asan̄a ekpere. Nte ẹkebemde iso ẹtịn̄ ke Ezekiel ibuot 38, Satan ọyọsọp okụre utom esie nte “Gog, isọn̄ Magog.” Emi ayabuana en̄wan oro ẹdin̄wanade ye ikọt Jehovah ke ofụri ererimbot. Satan eyesịn ofụri ukeme ndibiat nsọn̄ọnda mbon ima Abasi. Oyom mme andituak ibuot nnọ Jehovah ẹnen̄ede ẹseme ẹkot enye ẹyom un̄wam. Ndi mbak ẹnyenede ẹnọ Abasi ye ima oro mmọ ẹmade enye ẹdidi ke ikpîkpu? Ihih, koro Psalm 145 ọdọhọ ete: “Jehovah emekpere kpukpru mmọ eke ẹsemede ẹnọ enye, kpukpru mmọ eke ẹsemede ẹnọ enye ke akpanikọ. Enye ayanam se mme andibak enye ẹmade: onyụn̄ okop eseme mmọ, onyụn̄ anyan̄a mmọ. Jehovah ekpeme kpukpru mmọ eke ẹmade enye: onyụn̄ osobo kpukpru mme idiọk owo.”—Psalm 145:18-20.
20. Didie ke mme ikọ Psalm 145:18-20 ẹdisu ke n̄kpet n̄kpet ini iso?
20 Edinem didie ntem ndikụt nte Jehovah odude ekpere nnyịn nnyụn̄ n̄kụt odudu edinyan̄a esie ke ini enye osobode kpukpru mme idiọk owo! Ke akpan ini oro asan̄ade ekpere mi, Jehovah oyokop uyo mmọ eke “ẹsemede ẹnọ enye ke akpanikọ.” Enye idikpan̄ke utọn̄ inọ mbon mbubịk. Ikọ Abasi owụt in̄wan̄-in̄wan̄ nte ke ufọn ididụhe inọ idiọk owo ekededi oro edikotde enyịn̄ Abasi ke ata idiọk ini.—Mme N̄ke 1:28, 29; Micah 3:4; Luke 13:24, 25.
21. Didie ke mbon ima Jehovah ẹwụt ke mmimọ imama ndikot enyịn̄ Abasi?
21 Enen̄ede oyom mbon oro ẹbakde Jehovah ‘ẹseme ẹkot enye ke akpanikọ’ idahaemi akan nte akanam oyomde. Mbon ima esie ẹma ndikot enyịn̄ esie ke akam mmọ ye ke ini mmọ ẹbọrọde mbụme ke mme mbono esop mmọ. Mmọ ẹsikot enyịn̄ Abasi ke mme nneme mmọ. Ndien mmọ ẹsitan̄a enyịn̄ Jehovah uko uko ke an̄wan̄wa utom ukwọrọikọ mmọ.—Rome 10:10, 13-15.
22. Ntak oyomde nnyịn ika iso ibiọn̄ọ ido ye mme edu ererimbot?
22 Man ika iso ndibọ ufọn nto n̄kpet n̄kpet itie ebuana nnyịn ye Jehovah Abasi, oyom nnyịn n̄ko ika iso ibiọn̄ọ mme n̄kpọ oro ẹbiatde idaha eke spirit nnyịn nte uma inyene, oburobụt unọ idem inemesịt, edu unana edifen nnọ, ye unana edikere mban̄a mme ubuene. (1 John 2:15-17; 3:15-17) Edieke owo mîkpụhọkede, utọ ndiọi edu oro ẹkeme ndida n̄kesịm edinam akwa idiọkn̄kpọ ye editaba unyịme Jehovah. (1 John 2:1, 2; 3:6) Owụt eti ibuot nditi nte ke Jehovah edika iso ndiwụt nnyịn ima-mfọnido, m̀mê ima nsọn̄ọnda n̄kukụre edieke nnyịn ikade iso inam akpanikọ inọ enye.—2 Samuel 22:26.
23. Nso inem inem ini iso ina ibet kpukpru mbon ima Abasi?
23 Ke ntre ẹyak nnyịn iwụk ekikere nnyịn ke akaka utịp oro anade ebet kpukpru mbon ima Jehovah. Ke ndinam ntre, nnyịn iyenyene utịbe utịbe idotenyịn edisịne ke otu mbon oro ẹdikọmde ẹnyụn̄ ẹtoro Jehovah “kpukpru usen” ye “ke nsinsi-nsinsi.” (Psalm 145:1, 2) Ke ntre, ẹyak nnyịn ‘imụm idem nnyịn inịm ke ima Abasi, emi edisụn̄ọde ke nsinsi uwem.’ (Jude 20, 21) Nte nnyịn ikade iso ndibọ ufọn nto mme utịbe utịbe edu Ete nnyịn eke heaven, esịnede akwa ima-mfọnido oro enye owụtde mbon oro ẹmade enye, ẹyak nnyịn inam nte David ẹketịn̄de ke mme akpatre ikọ eke Psalm 145: “Inua mi eyetịn̄ itoro Jehovah: ofụri obụkidem ẹyenyụn̄ ẹkọm edisana enyịn̄ esie ke nsinsi-nsinsi.”
Didie ke Afo Ọkpọbọrọ?
• Didie ke Psalm 145 an̄wam nnyịn ndidiọn̄ọ mbon ima Abasi?
• Didie ke Jehovah “ọnọ kpukpru mme andidu uwem se mmọ ẹmade, ẹyụhọ”?
• Ntak oyomde itetịm isan̄a ikpere Jehovah?
[Mme Mbụme Ukpepn̄kpọ]
[Ndise ke page 16]
Mbon ima Abasi ẹma ndineme mban̄a ikpọ edinam esie
[Ndise ke page 17]
Mme asan̄autom Jehovah ẹsin̄wam mbon oro mînịmke ke akpanikọ ẹkpep ẹban̄a ubọn̄ esie
[Ndise ke page 18]
Jehovah ọnọ “kpukpru mme andidu uwem” udia
[Ebiet Ẹdade N̄kpọ Ẹto]
Mme unam: Parque de la Naturaleza de Cabárceno
[Ndise ke page 19]
Jehovah ọnọ mbon ima esie oro ẹbọn̄de akam ẹben̄e un̄wam esie ukeme ye ndausụn̄