Mme Mbụme Ẹtode Mme Andikot

Mme idaha ewe ẹkanam Judah enyene ebuana idan̄ ye n̄wan oro enye ekekerede ke edi n̄wan use, nte ẹwụtde ke Genesis 38:15, 16?

Okposụkedi Judah ekenyenede ebuana idan̄ ye n̄wan oro enye ekekerede ke edi n̄wan use, ke nditịm ntịn̄, n̄wan oro ikedịghe n̄wan use. Nte Genesis 38 obụkde, se iketịbede edi emi.

Sia akpan Judah “[ọkọdiọkde] ke iso Jehovah,” ẹma ẹwot enye ke n̄wan esie, Tamar, mîkakam imanke eyen ndomokiet kan̄a inọ enye. (Genesis 38:7) Ekedi ido ini oro owo ndimen n̄wan eyenete esie ndọ ke eyenete esie ama akakpa. Emi ọkọwọrọ ke edieke owo oro mînyeneke eyen akpade, eyenete esie ekenyene ndimen n̄wan esie ndọ man obon eyen ọnọ eyenete esie. Edi udọ Judah, Onan, ikamaha ndinam emi. Ntem, Abasi ama owot enye. Ekem, Judah ama ọnọ n̄wan eyen esie, Tamar, ọnyọn̄ ufọk ete esie tutu udọudọ Judah, Shelah, okpon ekem ndidọ enye. Nte ededi, ke ediwak isua ẹma ẹkebe, Judah ikadaha Shelah inọ Tamar ọdọ. Ntre, ke n̄wan Judah ama akakpa, Tamar ama etịbe n̄kari man aman eyen ọnọ Judah, kpa eyen Israel oro ekedide ete ebe esie. Enye ama esịne n̄kpọ nte n̄wan use etie ke ebiet emi enye ọkọfiọkde ke Judah ayasan̄a ebe.

Ke mîfiọkke ke Tamar eketie oro, Judah ama enyene ebuana idan̄ ye enye. Tamar ama ada mbufiọk ọbọ enye ubiọn̄ ke ndikenyene ebuana idan̄ ye imọ ekem ada emi owụt ke enye ekesịn imọ idịbi. Ke ini ẹkedide ẹdifiọk se iketịbede, Judah ikọduọhọke enye, edi ama osụhọde idem ọdọhọ ete: “Enye enen akan mi: koro mman̄kadaha enye nnọ Shelah eyen mi.” Ndien nte enende, ‘Judah ikọfiọkke aba enye.’—Genesis 38:26.

Judah ama anam ọdiọk ke ndiketre ndimen Tamar nnọ Shelah ọdọ nte enye ọkọn̄wọn̄ọde. Enye n̄ko ama enyene ebuana idan̄ ye n̄wan oro enye ekekerede ke edi n̄wan use. Emi ama atuaha ye uduak Abasi oro oyomde owo enyene ebuana idan̄ ke ndọ kpọt. (Genesis 2:24) Ke nditịm ntịn̄, Judah ikenyeneke ebuana idan̄ ye n̄wan use. Utu ke oro, enye ke unana edidiọn̄ọ akanam se eyen esie Shelah akpakanamde, oro edi, ndida n̄wan eyenete esie ndọ, ntem nditọ oro enye okobonde ikedịghe nditọ akpara.

Se Tamar akanamde ikedịghe oburobụt ido. Owo ikonyụn̄ idaha amanamba nditọ esie nte nditọ akpara. Ke ini owo Bethlehem oro Boaz akanamde ndọ eyenete ebe ye n̄wan Moab oro Ruth, mbiowo Bethlehem ẹma ẹtịn̄ nti ikọ ẹdian Perez, eyen Tamar, ẹdọhọde Boaz ẹte: “Yak ufọk fo onyụn̄ etie nte ufọk Perez emi Tamar [akamande] ọnọ Judah, oto ke nditọ emi Jehovah edinọde fi ke n̄wan emi.” (Ruth 4:12) Ẹsiak Perez n̄ko ẹsịn ke udịm mme ete ete Jesus Christ.—Matthew 1:1-3; Luke 3:23-34.