Mme Un̄wọn̄ọ Oro Afo Ekemede Ndiberi Edem
Mme Un̄wọn̄ọ Oro Afo Ekemede Ndiberi Edem
PRỌFET Abasi oro Micah ama ọfiọk ete ke owo isiwakke ndiberi edem ke mme un̄wọn̄ọ oro owo anamde. Ke eyo esie, owo ikesiberike edem nte ke idem mme ata n̄kpet n̄kpet ufan ẹyenam ikọ mmọ kpukpru ini. Ntre Micah ama odụri owo utọn̄ ete: “Mbufo ẹkûnịm uyo nsan̄a ke akpanikọ, ẹkûbuọt idem ye ata ufan: kpeme usụn̄ inua fo bak n̄wan emi anade fi ke ikpanesịt.”—Micah 7:5.
Ndi Micah ama ayak idiọk idaha emi anam enye okûnịm un̄wọn̄ọ ndomokiet ke akpanikọ? Baba! Enye ama enyene ọyọhọ mbuọtidem ke mme un̄wọn̄ọ oro Abasi esie, kpa Jehovah, akanamde. Micah ekewet ete: “Edi ami nyetịn̄ enyịn ke Jehovah: nyebet Abasi emi anyan̄ade mi: Abasi mi oyokop uyo mi.”—Micah 7:7.
Ntak emi Micah ekenyenede utọ mbuọtidem oro? Koro enye ama ọfiọk ke Jehovah esinam ikọ esie kpukpru ini. Kpukpru Micah 7:20) Jehovah ndikanam akpanikọ ke ini edem ama anam Micah etịm enịm ke akpanikọ ke Enye ayanam ikọ Esie ke ini iso.
n̄kpọ oro Abasi ọkọn̄wọn̄ọde ọnọ mme ete ete Micah ẹma ẹsu. (‘Baba Ikọ Kiet Ikpụhu’
Ke uwụtn̄kpọ, Micah ama ọfiọk ke Jehovah ama anyan̄a nditọ Israel osion̄o ke ufụn̄ ke Egypt. (Micah 7:15) Joshua, emi okokụtde edinyan̄a oro, ama esịn udọn̄ ọnọ ekemmọ nditọ Israel ndinyene mbuọtidem ke kpukpru un̄wọn̄ọ Abasi. Ntak-a? Joshua ama eti mmọ ete: “Mbufo ẹmefiọk ke ofụri esịt mbufo, ye ke ofụri ukpọn̄ mbufo, ẹte ke baba eti ikọ kiet eke Jehovah Abasi mbufo ọkọdọhọde aban̄a mbufo, ikpụhu: kpukpru ẹma ẹsu ẹnọ mbufo, baba ikọ kiet ikpụhu ke esịt.”—Joshua 23:14.
Nditọ Israel ẹma ẹtịm ẹfiọk ke Jehovah ama anam utịbe utịbe n̄kpọ ọnọ mmimọ. Enye ama osu un̄wọn̄ọ oro enye ọkọn̄wọn̄ọde ọnọ ete ete mmọ Abraham nte ke nditọ esie ẹyewak nte ntantaọfiọn̄ ẹyenyụn̄ ẹda isọn̄ Canaan ẹnyene. Jehovah ama ọdọhọ Abraham n̄ko ete ke ẹyefịk mme andito ubon esie ke isua 400 edi mmọ ẹyefiak ẹnyọn̄ọ Canaan “ke ọyọhọ emana inan̄.” Kpukpru emi ẹma ẹtịbe.—Genesis 15:5-16; Exodus 3:6-8.
Ẹma ẹnen̄ede ẹdara nditọ Israel ke Egypt ke eyo Joseph, eyen Jacob. Nte ini akakade, nditọ Egypt ẹma ẹnyịk mmọ ẹnam ọkpọsọn̄ utom nte ifụn, edi nte Abasi ọkọn̄wọn̄ọde, ke ufan̄ emana inan̄ tọn̄ọ nte mmọ ẹkedụk Egypt, ẹma ẹfak mme andito ubon Abraham emi ẹsion̄o ke ufụn Egypt. *
Ke isua 40 oro ẹketienede, nditọ Israel ẹma ẹnyene uyarade efen efen nte ke Jehovah esinam mme un̄wọn̄ọ esie kpukpru ini. Ke ini mbon Amalek ẹkedade en̄wan ẹtiene nditọ Israel ye unana ntak, Abasi ama an̄wana ọnọ ikọt esie onyụn̄ ekpeme mmọ. Enye ama oyụhọ kpukpru udọn̄ eke obụk mmọ ke isua 40 oro mmọ ẹkesan̄ade ke wilderness ndien ke akpatre anam mmọ ẹda Isọn̄ Un̄wọn̄ọ ẹnyene. Nte Joshua okodụn̄ọrede mbụk aban̄ade edinam Jehovah ye mme andito ubon Abraham emi, enye ama etịn̄ ye uko ete: “Baba ikọ kiet ke kpukpru nti ikọ oro Jehovah ọkọdọhọde ye ufọk Israel ikpụhu; kpukpru ẹsu.”—Joshua 21:45.
Nyene Mbuọtidem ke Mme Un̄wọn̄ọ Abasi
Didie ke afo ekeme ndinyene mbuọtidem ke mme un̄wọn̄ọ Jehovah, nte Micah ye Joshua ẹkenyenede? Ọfọn, afo esinam didie enyene mbuọtidem ke idem mbon en̄wen? Afo enyene ndinen̄ede mfiọk mmọ adan̄a nte ekekeme. Ke uwụtn̄kpọ, afo emekeme ndifiọk nte ke mmọ ẹdi se ẹkemede ndiberi edem ke okụtde nte mmọ ẹdomode ndisu kpukpru un̄wọn̄ọ mmọ. Nte afo enen̄erede ọfiọk mmọ, afo sụn̄sụn̄ eyenyene mbuọtidem ke idem mmọ. Afo emekeme ndinam ukem oro ke ini edide edisịm edinyene mbuọtidem ke mme un̄wọn̄ọ Abasi.
Usụn̄ kiet oro afo ekemede ndinam emi edi nditie n̄kere mme n̄kpọ-obot ye mme ibet oro ẹkarade mmọ. Ntaifiọk ẹsiberi edem ke mme ibet emi, utọ nte mbon oro ẹkarade nte nsen kiet esibaharede onyụn̄ ọtọt akabade edi ediwak nsen triliọn oro ẹdude fi ke idem. Ke Psalm 139:14-16; Isaiah 40:26; Mme Hebrew 3:4.
akpanikọ, anaedi Ọbọp-ibet oro ẹkemede nditịm mberi edem ekenịm mme ibet oro ẹkarade mme n̄kpọ-obot ke ofụri ekondo. Ke akpanikọ afo emekeme ndiberi edem ke mme unwọn̄ọ esie, kpa nte afo akam eberide edem ke mme ibet oro ẹkarade edibotn̄kpọ esie.—Ebede ke prọfet Isaiah, emi okodude ke ukem iduọk ini ye Micah, Jehovah ama ada eyo oro mîsikpụhu ye n̄wọrọnda usụn̄ oro mmọn̄ esisan̄ade akanade owụt nte ekemede ndiberi edem ke ikọ esie. Edịm esidep kpukpru isua. Mmọ ẹsibịt isọn̄ ẹnyụn̄ ẹnam mme owo ẹkeme ndisuan n̄kpasịp nnyụn̄ ndọk mbun̄wụm. Ke afan̄ emi, Jehovah ọkọdọhọ ete: “Kpa nte edịm ye snow ẹtode ke enyọn̄ ẹsụhọde, ndien ifiakke ika do, tutu ẹbịt isọn̄, ẹnyụn̄ ẹnam enye afiari onyụn̄ etịbe, ẹnyụn̄ ẹda n̄kpasịp ẹnọ andisuan, ẹda udia ẹnọ andidia: kpa ntre ke ikọ mi emi ọwọrọde mi ke inua editie: idifiakke itiene mi ubọk-ubọk, tutu enye anam se mmade, onyụn̄ okụt unen ke utom emi ndọn̄de enye.”—Isaiah 55:10, 11.
Mme Un̄wọn̄ọ Paradise Oro Ẹkemede Ndiberi Edem
Ndidụn̄ọde edibotn̄kpọ ekeme ndisọn̄ọ mbuọtidem nnyịn ke Andibot, edi oyom se ikande oro edieke afo oyomde ndikpep n̄kpọ mban̄a mme un̄wọn̄ọ oro ẹdide ubak ‘ikọ emi ọwọrọde enye ke inua.’ Man ekpep aban̄a mme un̄wọn̄ọ emi, onyụn̄ ekeme ndiberi edem ke mmọ, oyom afo odụn̄ọde se n̄wetnnịm n̄kpọ N̄wed Abasi eke odudu spirit etịn̄de aban̄a se idide uduak Abasi kaban̄a isọn̄ ye mme edinam esie ye ubonowo.—2 Timothy 3:14-17.
Prọfet Micah ama enyene mbuọtidem ke mme un̄wọn̄ọ Jehovah. Afo amakam enyene ekese n̄wetnnịm n̄kpọ eke odudu spirit Abasi akan nte Micah ekenyenede. Nte afo okotde Bible onyụn̄ etiede ekere se okotde, afo n̄ko emekeme ndinyene mbuọtidem ke mme un̄wọn̄ọ Abasi oro ẹsude. Mme un̄wọn̄ọ emi ibuanake sụk ata mme andito ubon Abraham kpọt edi abuana ofụri ubonowo. Jehovah ama ọn̄wọn̄ọ ọnọ ete-ekpụk oro akabakde enye ete: “Kpukpru mme idụt ke ererimbot ẹyenyụn̄ ẹkụt mfọn eke otode ke ubon fo, koro afo ama okokop uyo mi.” (Genesis 22:18) Jesus Christ, kpa Messiah, edi akpan ubak “ubon,” Abraham oro.—Galatia 3:16.
Ebede ke Jesus Christ, Jehovah oyokụt ete ke ẹdiọn̄ mme okopitem ubonowo. Ndien nso ke Abasi ọn̄wọn̄ọ ndinam ke eyo nnyịn? Micah 4:1, 2 ada mme ntịn̄nnịm ikọ emi ọbọrọ ete: “Ama ekem ke akpatre ini oro, obot ufọk Jehovah oyowụhọ ke ibuot ikpọ obot, ẹyenyụn̄ ẹmenede enye ẹkan n̄kpri obot: ndien mme idụt ẹyebụn̄ọ ẹka do. Ndien ediwak mme idụt ẹyeka ẹkedọhọ, ẹte, Ẹdi, nnyịn idọk ke obot Jehovah, ye ke ufọk Abasi Jacob; ndien Enye ayada usụn̄ esie ekpep nnyịn, nnyịn iyenyụn̄ isan̄a ke ọkpọ-usụn̄ esie.”
Mbon oro ẹkpepde ẹban̄a mme usụn̄ Jehovah ẹda “ofụt mmọ ẹdom n̄kpọ ufụn̄-isọn̄, ẹnyụn̄ ẹda eduat mmọ ẹdom ikwa udiọn̄-eto.” Mmọ idinyeneke aba udọn̄ ndin̄wana ekọn̄. Ibịghike, ndinen owo ẹyeyọhọ isọn̄, ndien baba owo kiet eke edinamde mmọ ndịk ididụhe. (Micah 4:3, 4) Ih, Ikọ Abasi ọn̄wọn̄ọ nte ke idak ukara Obio Ubọn̄ ke ubọk Jesus Christ, Jehovah oyosio kpukpru mbon ufịk efep ke isọn̄.—Isaiah 11:6-9; Daniel 2:44; Ediyarade 11:18.
Idem mbon oro ẹbọde ndutụhọ ẹnyụn̄ ẹkpan̄ade nte utịp nsọn̄ibuot owo ye Abasi ẹyeset ye idotenyịn edidụn̄ ke isọn̄ ke nsinsi. (John 5:28, 29) Satan ye mme demon esie, kpa mbon oro ẹsịnde udọn̄ ẹnọ idiọkido ididụhe aba, ndien ẹyeda uwa ufak Jesus ẹsio mme utịp idiọkn̄kpọ Adam ẹfep. (Matthew 20:28; Rome 3:23, 24; 5:12; 6:23; Ediyarade 20:1-3) Ndien nso ididi idaha mme okopitem ubonowo? Kamse, ẹyenọ mmọ nsinsi uwem ye mfọnmma nsọn̄idem ke paradise isọn̄!—Psalm 37:10, 11; Luke 23:43; Ediyarade 21:3-5.
Nso un̄wọn̄ọ ke emi edi ntem! Edi nte afo emekeme ndinịm mmọ ke akpanikọ? Ih, emekeme. Mmọ idịghe mme un̄wọn̄ọ oro mbon emi ẹnyenede nti uduak ẹn̄wọn̄ọde edi ẹnanade odudu ndinam mmọ. Mmọ ẹdi mme un̄wọn̄ọ Ata Ọkpọsọn̄ Abasi, emi mîkemeke ndisu nsu mînyụn̄ “iduọnke ke edinam un̄wọn̄ọ Esie.” (2 Peter 3:9; Mme Hebrew 6:13-18) Afo emekeme ndinyene ọyọhọ ibetedem ke kpukpru un̄wọn̄ọ oro ẹdude ke Bible, koro mmọ ẹtode “Jehovah Abasi akpanikọ.”—Psalm 31:5.
[Ikọ idakisọn̄]
^ ikp. 8 Se Insight on the Scriptures, eboho 1, page 911-912, emi Mme Ntiense Jehovah ẹsiode.
[Se Ẹwetde ke Ikpọ Abisi ke page 6]
“Baba eti ikọ kiet eke Jehovah Abasi mbufo ọkọdọhọde aban̄a mbufo, ikpụhu.”—JOSHUA 23:14
[Mme ndise ke page 4, 5]
Jehovah ama osu un̄wọn̄ọ oro enye ọkọn̄wọn̄ọde ọnọ Israel ke Ididuot Inyan̄ ye ke wilderness
[Mme ndise ke page 7]
Jehovah ama osu un̄wọn̄ọ oro enye ọkọn̄wọn̄ọde ọnọ Abraham. Eyen esie, Jesus Christ, ayada edidiọn̄ ọsọk ubonowo