“Ọbọn̄, Kpep Nnyịn Ndibọn̄ Akam”

“Kiet ke otu mbet Esie ọdọhọ Enye ete, Ọbọn̄, kpep nnyịn ndibọn̄ akam.”—LUKE 11:1.

1. Ntak emi kiet ke otu mbet Jesus ekeben̄ede enye ete ekpep mmimọ ndibọn̄ akam?

 KE IDAHA kiet ke 32 E.N., kiet ke otu mbet Jesus ama okụt nte Enye ọbọn̄de akam. Enye ikokopke se Jesus eketịn̄de ye Ete esie, koro eyedi enye ikọbọn̄ke akam oro uyo ọwọrọ. Edi ke Jesus ama okokụre, mbet oro ama eben̄e enye ete: “Ọbọn̄, kpep nnyịn ndibọn̄ akam.” (Luke 11:1) Ntak ẹkenamde eben̄e emi? Akam ekedi edinam ofụri ini ke uwem ye utuakibuot mme Jew. Ata ediwak akam ẹdu ke Psalm ye ke mme itie efen ke N̄wed Abasi Usem Hebrew. Ntre, mbet oro ikọdọhọke Jesus ekpep imọ n̄kpọ oro imọ mîkọdiọn̄ọke n̄kpọ ndomokiet iban̄a m̀mê n̄kpọ oro akanam imọ mîkanamke. Nte eyịghe mîdụhe, enye ama emehe ye enyọn̄ enyọn̄ akam mme adaiso Ido Ukpono mme Jew. Edi ke emi, enye ama okụt nte Jesus ọbọn̄de akam, ndien eyedi enye ama okụt ke akwa ukpụhọde odu ke usụn̄ oro Jesus ọkọbọn̄de akam ye akam n̄wụtidem oro mme rabbi ẹkesibọn̄de.—Matthew 6:5-8.

2. (a) Nso iwụt ke Jesus ikoyomke nnyịn ifiak itịn̄ ukem ikọ ke akam uwụtn̄kpọ oro? (b) Ntak emi ọdọn̄de nnyịn ndifiọk nte ikpọbọn̄de akam?

² Ke ini enye ọkọkwọrọde ikọ ke Obot ke n̄kpọ nte isua kiet ye ubak ke mbemiso, Jesus ama ọnọnọ mme mbet esie uwụtn̄kpọ ke nte mmọ ẹkpebọn̄de akam. (Matthew 6:9-13) Eyedi mbet emi ikodụhe ini oro, ntre Jesus ama owụt mfọnido ke ndifiak ntịn̄ mme akpan n̄kpọ ke akam uwụtn̄kpọ oro. Odot ẹtịm ẹfiọk nte ke enye ikafiakke itịn̄ ukem ikọ ke akam oro, emi owụtde ke enye ikọnọhọ mmọ akam oro ẹnyenede nditịn̄ ke ibuot. (Luke 11:1-4) Kpa nte mbet oro owo mîsiakke enyịn̄ mi, nnyịn n̄ko imoyom ẹkpep nnyịn nte ikpọbọn̄de akam man akam nnyịn enen̄ede odụri nnyịn ekpere Jehovah. Ke ntre, ẹyak nnyịn idụn̄ọde akam uwụtn̄kpọ oro Matthew ewetde ọyọhọ ọyọhọ. Enye esịne eben̄e itiaba, emi ita ẹban̄ade uduak Abasi ke ini inan̄ ẹban̄ade mme udọn̄ n̄kpọ eke obụk ye eke spirit nnyịn. Ke ibuotikọ emi, nnyịn idineme iban̄a akpa eben̄e ita oro.

Ima Ima Ete

3, 4. Nso ke nnyịn ndikot Jehovah “Ete nnyịn” ọwọrọ?

³ Toto ke ntọn̄ọ, Jesus ama owụt ke mme akam nnyịn ẹkpenyene ndiwụt ntotụn̄ọ itie ebuana emi inyenede ye Jehovah ye ukpono oro inyenede inọ Enye. Ke etịn̄de akpan akpan ke ufọn mme mbet esie oro ẹkekande enye ẹkụk ke obot, Jesus ọkọdọhọ mmọ ẹkot Jehovah “Ete nnyịn emi odude ke heaven.” (Matthew 6:9) Nte eyen ukpepn̄kpọ kiet etịn̄de, edide Jesus akada ọsọ usem Hebrew m̀mê Aramaic etịn̄ ikọ, udorienyịn̄ oro “Ete” emi enye akadade etịn̄ ikọ edi ukem ye ima ima ikọ oro nsekeyen esidade okot ete ke ‘ikọ eyenọwọn̄.’ Ndikot Jehovah “Ete nnyịn”  owụt ke nnyịn imenyene eti itie ebuana inyụn̄ ibuọt idem ye enye.

⁴ Ke ndidọhọ ‘Ete nnyịn,’ nnyịn imenyịme n̄ko ke nnyịn idi ubak akwa ubon emi esịnede iren ye iban oro ẹfiọkde Jehovah nte Ọnọ-Uwem. (Isaiah 64:8; Utom 17:24, 28) Ẹda mme Christian oro ẹbonde ke spirit ẹdisịn nte “nditọ Abasi,” ndien mmọ ẹkeme ‘ndikot Abasi, Abba, Ete.’ (Rome 8:14, 15) Ediwak miliọn mme anam-akpanikọ ẹkabade ẹdi nsan̄a mmọ. Mmọ emi ẹyak uwem mmọ ẹnọ Jehovah ẹnyụn̄ ẹyarade uyakidem mmọ ke ndina baptism. Kpukpru “mme erọn̄ en̄wen” emi ẹkeme n̄ko ndisan̄a n̄kpere Jehovah ke enyịn̄ Jesus nnyụn̄ n̄kot Enye “Ete nnyịn.” (John 10:16; 14:6) Nnyịn imekeme ndika mbịne Ete nnyịn eke heaven ke akam kpukpru ini man itoro enye, ikọm enye ke kpukpru mfọnido eke enye ọfọnde ye nnyịn, inyụn̄ itịn̄ mme n̄kpọ oro ẹfịnade nnyịn inọ enye, inyenede mbuọtidem nte ke enye ke ekere aban̄a nnyịn.—Philippi 4:6, 7; 1 Peter 5:6, 7.

Ima Enyịn̄ Jehovah

5. Ẹtọn̄ọ akam uwụtn̄kpọ oro ye nso eben̄e, ndien ntak emi odotde?

⁵ Ẹtọn̄ọ akam emi ke ndibem iso nsiak mme ebeiso n̄kpọ. Enye ọdọhọ ete: “Yak ẹnam enyịn̄ fo asana.” (Matthew 6:9, NW) Ih, ndinam enyịn̄ Jehovah asana ekpenyene ndidi akpa n̄kpọ oro ebehede nnyịn ke ntak oro nnyịn imade enye inyụn̄ isuade kpukpru esuene oro ẹsuenede enyịn̄ esie. Nsọn̄ibuot Satan ye enye ndikatap akpa eren ye n̄wan ẹsọn̄ ibuot ye Jehovah Abasi ama abiat enyịn̄ Abasi ke ndidemede eyịghe mban̄a usụn̄ oro Abasi akarade ofụri ererimbot. (Genesis 3:1-6) N̄ko-n̄ko, ke ediwak isua ikie emi ẹbede, mbon oro ẹdọhọde nte idade ke ibuot Jehovah ẹda mme esuene esuene edinam ye ukpepn̄kpọ mmọ ẹsuene enyịn̄ esie.

6. Nso ke nnyịn iditre ndinam edieke nnyịn ibọn̄de akam ite ẹnam enyịn̄ Jehovah asana?

⁶ Nnyịn ndibọn̄ akam mben̄e nte ẹnam enyịn̄ Jehovah asana owụt n̄kan̄ oro nnyịn idade ke eneni emi aban̄ade itie edikara ofụri ererimbot—nte ke nnyịn imenen̄ede inyịme ke Jehovah enyene unen ndikara ekondo. Mbon oro Jehovah oyomde ẹdụn̄ ke ekondo ẹdi mme edibotn̄kpọ oro ẹnyenede ifiọk, emi ẹnyịmede ndisụk ibuot ke idatesịt nnọ edinen ukara esie koro mmọ ẹmade enye ẹnyụn̄ ẹmade ofụri se enyịn̄ esie adade aban̄a. (1 Chronicles 29:10-13; Psalm 8:1; 148:13) Ima oro nnyịn imade enyịn̄ Jehovah ayan̄wam nnyịn itre ndinam n̄kpọ ekededi oro ekemede ndida esuene nsọk edisana enyịn̄ esie. (Ezekiel 36:20, 21; Rome 2:21-24) Sia emem ekondo ye mme andidụn̄ enye ọkọn̄ọde ke ndinam enyịn̄ Jehovah asana ye ndisụk ibuot ke ima nnọ itie edikara esie, nnyịn ndibọn̄ akam ndọhọ “yak ẹnam enyịn̄ fo asana” owụt ke imenyene mbuọtidem nte ke uduak Jehovah oyosu onyụn̄ ada itoro ọsọk enye.—Ezekiel 38:23.

 Obio Ubọn̄ Oro Nnyịn Ibọn̄de Akam Iben̄e

7, 8. (a) Nso idi Obio Ubọn̄ oro Jesus ekekpepde nnyịn ndibọn̄ akam mben̄e? (b) Nso ke nnyịn ikpep iban̄a Obio Ubọn̄ emi ke n̄wed Daniel ye Ediyarade?

⁷ Udiana eben̄e ke akam uwụtn̄kpọ emi edi: “Yak Ubọn̄ Fo edi.” (Matthew 6:10) Eben̄e emi eyịre kiet ye akpa eben̄e oro. Obio Ubọn̄ Messiah, kpa ukara esie eke heaven, emi Jesus Christ Eyen esie edide Edidem oro ẹmekde, ke Jehovah edida anam edisana enyịn̄ esie etetịm asana. (Psalm 2:1-9) Ntịn̄nnịm ikọ Daniel owụt Obio Ubọn̄ Messiah nte “itiat” emi ẹsiakde ẹsio ke “akamba obot.” (Daniel 2:34, 35, 44, 45) Akamba obot oro ada aban̄a itie edikara ofụri ekondo Jehovah, ntre itiat Obio Ubọn̄ oro edi obufa usụn̄ ndiwụt itie edikara ofụri ekondo Jehovah. Ke ntịn̄nnịm ikọ oro, itiat oro “akabade edi akamba obot, onyụn̄ ọyọhọ ke ofụri isọn̄,” emi owụtde ke Obio Ubọn̄ Messiah edida ke ibuot Abasi ndikara ofụri isọn̄.

⁸ Owo 144,000 en̄wen ‘emi ẹkedepde ẹsion̄o ke isọn̄’ man ẹkara ye enye nte ndidem ye mme oku ẹyetiene Christ ẹkara ke Obio Ubọn̄ emi. (Ediyarade 5:9, 10; 14:1-4; 20:6) Daniel etịn̄ aban̄a mmọ emi nte “edisana ikọt Ata Edikon̄,” emi ẹdianade ọtọkiet ye Christ emi edide Ibuot mmọ ẹbọ “itie-edidem, ye ubọn̄, ye ukpono itie-edidem ke idak ofụri enyọn̄ . . . ubọn̄ [mmọ] edi nsinsi ubọn̄, kpukpru mbọn̄ ẹyenyụn̄ ẹnam n̄kpọ [mmọ], ẹnyụn̄ ẹkop uyo [mmọ].” (Daniel 7:13, 14, 18, 27) Oro edi ukara eke heaven oro Christ ekekpepde mme anditiene enye ete ẹbọn̄ akam ẹben̄e.

Ntak Isụk Ibọn̄de Akam Iben̄e Obio Ubọn̄ Edi?

9. Ntak emi odotde nnyịn ndibọn̄ akam ite Obio Ubọn̄ Abasi edi?

⁹ Ke akam uwụtn̄kpọ esie, Christ ekekpep nnyịn ete ibọn̄ akam iben̄e Obio Ubọn̄ Abasi edi. Mme ntịn̄nnịm ikọ Bible oro ẹsude ẹwụt ke ẹma ẹwụk Obio Ubọn̄ Messiah ke heaven ke 1914. * Ke ntre, ndi odot nnyịn ndisụk mbọn̄ akam mben̄e nte Obio Ubọn̄ oro “edi”? Ih, odot. Koro ke ntịn̄nnịm ikọ Daniel, Obio Ubọn̄ Messiah, emi itiat adade aban̄a, odu ke ntuaha ye ukara owo emi akwa mbiet adade aban̄a. Itiat oro ayanuak mbiet oro tutu enye akabade ntọn̄. Ntịn̄nnịm ikọ Daniel ọdọhọ ete: “Idikpọn̄ke ubọn̄ emi inọ mbio efen: enye ayanuak onyụn̄ ama kpukpru mme idụt emi, ndien enye ayada ke nsinsi.”—Daniel 2:44.

10. Ntak emi inen̄erede iyom Obio Ubọn̄ Abasi edi?

¹⁰ Nnyịn imenen̄ede iyom ndikụt Obio Ubọn̄ Abasi edide edisobo idiọk editịm n̄kpọ Satan emi efep koro emi ediwọrọ ndikpono edisana enyịn̄ Jehovah nnyụn̄ nsobo kpukpru mme andibiọn̄ọ ukara Abasi mfep. Nnyịn ibọn̄ akam ifịk ifịk ite: “Yak Ubọn̄ Fo edi,” ndien idian uyo ye apostle John ite: “Amen. Di, Ọbọn̄ Jesus.” (Ediyarade 22:20) Ih, Jesus akpakam edi edinam enyịn̄ Jehovah asana onyụn̄ owụt ke itie edikara Esie enen, man ikọ andiwet psalm osu, emi ọdọhọde  ete: “Ndien owo ẹyefiọk ẹte ke afo emi enyịn̄ fo ikpọn̄ ekerede Jehovah, edi Ata Edikon̄ ke ofụri ererimbot.”—Psalm 83:18.

“Yak Inam Uduak Fo”

11, 12. (a) Nso ke nnyịn iben̄e ke ini ibọn̄de akam ite, ‘ẹnam uduak Abasi ke isọn̄ kpa nte ẹnamde ke heaven’? (b) Nso efen ke nnyịn ndibọn̄ akam mben̄e nte ẹnam uduak Jehovah ọwọrọ?

¹¹ Ekem Jesus ama ekpep mme mbet esie ndibọn̄ akam ndọhọ: “Yak inam uduak Fo; nte ẹnamde ke heaven, yak inam ke isọn̄ kpasụk ntre.” (Matthew 6:10) Okoto uduak Jehovah ekondo emi edidu. Mme okopodudu edibotn̄kpọ eke heaven ẹfiori ẹte: “Ọbọn̄ ye Abasi nnyịn, Afo omodot ndibọ Ubọn̄ ye ukpono ye odudu, koro Afo okobotde kpukpru n̄kpọ; ndien oto ke uduak Fo ke mmọ ẹdu, ẹkenyụn̄ ẹboro.” (Ediyarade 4:10b) Jehovah enyene uduak ọnọ “n̄kpọ eke ẹdude ke enyọn̄, ye n̄kpọ eke ẹdude ke isọn̄.” (Ephesus 1:8-10) Ke ndibọn̄ akam mben̄e uduak Abasi ndida itie, nnyịn iben̄e ite Jehovah anam se enye aduakde. N̄ko-n̄ko, nnyịn iwụt ke nnyịn imenen̄ede iyom ndikụt ẹnamde uduak Abasi ke ofụri ekondo.

¹² Ke ndibọn̄ akam emi, nnyịn n̄ko iwụt ke imenyịme ndidu uwem nte ekemde ye uduak Jehovah. Jesus ọkọdọhọ ete: “Udia Mi edi ndinam uduak Andidọn̄ Mi, nnyụn̄ mma utom Esie.” (John 4:34) Kpa nte Jesus, nnyịn mme Christian emi ima ikayak idem inọ, imadat esịt ndinam uduak Abasi. Ima oro inyenede inọ Jehovah ye Eyen esie onụk nnyịn itre ndidu uwem nsan̄a ke ‘mme idiọk itọn̄ esịt owo, edi isan̄a nte uduak Abasi edide.’ (1 Peter 4:1, 2; 2 Corinth 5:14, 15) Nnyịn in̄wana ndifep ndinam mme n̄kpọ oro nnyịn idiọn̄ọde ke ẹtuaha ye uduak Jehovah. (1 Thessalonica 4:3-5) Ke ndidep ini nda n̄kot Bible nnyụn̄ n̄kpep n̄kpọ, nnyịn ‘iyaka iso ifiọk se uduak Jehovah edide,’ emi esịnede ndibuana ifịk ifịk ke ndikwọrọ “gospel Ubọn̄ Abasi emi.”—Ephesus 5:15-17, NW; Matthew 24:14.

Uduak Jehovah ke Heaven

13. Didie ke ẹkenam uduak Abasi ke anyan ini mbemiso Satan ọkọsọn̄de ibuot?

¹³ Ẹma ẹnanam uduak Jehovah ke heaven ke anyan ini mbemiso kiet ke otu nditọ esie eke spirit ọkọsọn̄de ibuot onyụn̄ akabarede edi Satan. N̄wed Mme N̄ke etịn̄ aban̄a akpa edibon Eyen Abasi nte eti ibuot emi ẹwụtde nte owo. Enye owụt ete ke ediwak isua emi owo mîdiọn̄ọke ibat, ikpọn̄-ikpọn̄ edibon Eyen Abasi ama ‘adara ke iso esie kpukpru ini,’ enemde esịt ndinam uduak Ete esie. Ke akpatre, enye ama akabade edi “etubom anamutom” (NW) Jehovah ke ndibot kpukpru n̄kpọ “ke enyọn̄ ye ke isọn̄, se enyịn owo okụtde ye se enyịn owo mîkwe.” (Mme N̄ke 8:22-31; Colossae 1:15-17) Jehovah akada Jesus anam n̄kpọ nte Ikọ, m̀mê Etịn̄ikọ ke ibuot esie.—John 1:1-3.

14. Nso ke nnyịn ikeme ndikpep nto Psalm 103 kaban̄a nte mme angel ẹnamde uduak Jehovah ke heaven?

¹⁴ Andiwet psalm owụt ke itie edikara Jehovah edi akakan ye nte ke udịm mme angel ẹkop item ẹnyụn̄ ẹnam mme ewụhọ esie. Nnyịn ikot ite: “Jehovah omowụk ebekpo esie ke heaven; itie ubọn̄ esie omonyụn̄ akara kpukpru. Ẹtoro Jehovah, mbufo mme angel esie, emi ẹdahade uko, emi ẹnamde uyo esie, ẹnyụn̄ ẹkopde uyo ikọ esie. Ẹtoro Jehovah, mbufo ofụri udịm esie, mme asan̄autom esie, emi ẹnamde se enye amade. Ẹtoro Jehovah, mbufo kpukpru se enye anamde ke kpukpru ebiet emi enye akarade.”—Psalm 103:19-22.

15. Didie ke Jesus ndikọbọ odudu Obio Ubọn̄ otụk edinam uduak Jehovah?

¹⁵ Ke enye ama ọkọsọn̄ ibuot, Satan okosụk ekekeme ndidụk heaven, nte ẹwụtde ke n̄wed Job. (Job 1:6-12; 2:1-7) Nte ededi, n̄wed Ediyarade ama ebem iso etịn̄ ete ke ini eyedi oro ẹdibịnde Satan ye mme demon esie ẹsion̄o ke heaven. Nte an̄wan̄ade, ini oro ama edisịm esisịt ini ke Jesus Christ ama ọkọbọ odudu Obio Ubọn̄ ke 1914. Toto ke ini oro, ufan̄ idụhe aba inọ mbon nsọn̄ibuot oro ke  heaven. Ẹkụk mmọ ẹsịn ke ikpehe n̄kan̄ isọn̄. (Ediyarade 12:7-12) Eneni idụhe aba ke heaven, n̄kukụre se ẹkopde edi uyo oro ẹdianade kiet ẹtoro “Eyen Erọn̄,” kpa Jesus Christ, ẹnyụn̄ ẹsụkde ibuot ẹtoro Jehovah. (Ediyarade 4:9, 10) Ke akpanikọ, ke ẹnam uduak Jehovah ke heaven.

Uduak Jehovah Kaban̄a Isọn̄

16. Didie ke akam uwụtn̄kpọ oro atuaha ye ukpepn̄kpọ Christendom kaban̄a idotenyịn ubonowo?

¹⁶ Mme ufọkabasi Christendom ẹsio isọn̄ ẹfep ke uduak Abasi, ẹdọhọde ẹte ke kpukpru nti owo ẹka heaven. Edi Jesus ekekpep nnyịn ndibọn̄ nte: “Yak Ubọn̄ Fo edi; yak inam uduak Fo; nte ẹnamde ke heaven, yak inam ke isọn̄ kpasụk ntre.” (Matthew 6:10) Nte ẹkeme ndidọhọ ke usụn̄ ekededi nte ke ẹnam uduak Jehovah ofụri ofụri mfịn ke isọn̄ emi ọyọhọde ye afai, ukwan̄ikpe, udọn̄ọ, ye n̄kpa? Baba-o! Ke ntre, nnyịn ikpenyene ndibọn̄ akam ifịk ifịk ite ẹnam uduak Abasi ke isọn̄, nte ekemde ye un̄wọn̄ọ oro apostle Peter ekewetde ete: “Nnyịn itie ibet obufa enyọn̄ [ukara Obio Ubọn̄ Messiah ke ubọk Christ] ye obufa isọn̄ [edinen n̄kaowo], nte un̄wọn̄ọ Esie edide; ndien edi do ke edinen ido edidụn̄.”—2 Peter 3:13.

17. Nso idi uduak Jehovah kaban̄a isọn̄?

¹⁷ Jehovah ama enyene uduak ke ndikobot isọn̄. Enye ama ọnọ prọfet Isaiah odudu spirit ndiwet ete: “Emi edi uyo Jehovah andibot enyọn̄; enye edi Abasi emi obotde isọn̄, onyụn̄ anamde enye; enye owụk enye, ibotke enye ke ikpîkpu, obot enye man ẹdụn̄ ke esịt: ami ndi Jehovah, ndien efen idụhe.” (Isaiah 45:18) Abasi ekesịn akpa owo iba oro ke in̄wan̄ paradise onyụn̄ eteme mmọ ete: “Mbufo ẹtọt, ẹnyụn̄ ẹwak, ẹnyụn̄ ẹyọhọ ke isọn̄, ẹnyụn̄ ẹkan enye.” (Genesis 1:27, 28; 2:15) Ana ata in̄wan̄-in̄wan̄ nte ke Andibot oyom mbon emi ẹdụn̄de ke isọn̄ ẹdi mfọnmma ekpụk ndinen owo emi ẹsụkde ibuot ke inemesịt ẹnọ itie edikara esie ẹnyụn̄ ẹdude uwem ke nsinsi ke Paradise emi Christ ọkọn̄wọn̄ọde.—Psalm 37:11, 29; Luke 23:43.

18, 19. (a) Nso ke ana ẹnam mbemiso uduak Abasi adade itie ọyọhọ ọyọhọ ke isọn̄? (b) Mme ikpehe efen ewe ke akam uwụtn̄kpọ Jesus ke ẹdidụn̄ọde ke ibuotikọ oro etienede?

¹⁸ Owo ikemeke ndinam uduak Jehovah kaban̄a isọn̄ ọyọhọ ọyọhọ ke adan̄aemi iren ye iban emi ẹmiomde itie edikara esie ẹdụn̄de ke isọn̄. Abasi ayada ọkpọsọn̄ udịmekọn̄ eke spirit ke idak ndausụn̄ Christ ‘ndisobo mmọ emi ẹsobode isọn̄.’ Ẹyesọhi ofụri editịm n̄kpọ Satan, ọkọrọ ye nsunsu ido ukpono, mbiara ukaraidem, ọdiọk-itọn̄ ndutịm unyamurua oro mînamke akpanikọ, ye akama-nsobo ekọn̄ esie ẹfep ke nsinsi. (Ediyarade 11:18; 18:21; 19:1, 2, 11-18) Ẹyewụt ke itie edikara Jehovah enen ẹnyụn̄ ẹnam enyịn̄ esie asana. Kpukpru emi ke nnyịn isiben̄e ke ini nnyịn ibọn̄de akam ite: “Ete nnyịn emi odude ke heaven: yak ikpono enyịn̄ Fo, yak Ubọn̄ Fo edi; yak inam uduak Fo; nte ẹnamde ke heaven, yak inam ke isọn̄ kpasụk ntre.”—Matthew 6:9, 10.

¹⁹ Nte ededi, ke akam uwụtn̄kpọ esie, Jesus ama owụt ke nnyịn imekeme ndibọn̄ akam mban̄a mme ọkpọkpọ n̄kpọ n̄ko. Ẹyedụn̄ọde item akam esie oro aban̄ade mme n̄kpọ emi ke ibuotikọ oro etienede.

[Ikọ idakisọn̄]

Ke Ndidụn̄ọde

• Ntak emi odotde nnyịn ndikot Jehovah “Ete nnyịn”?

• Ntak emi enen̄erede edi akpan n̄kpọ nnyịn ndibọn̄ akam nte ẹnam enyịn̄ Jehovah asana?

• Ntak emi nnyịn ibọn̄de akam ite Obio Ubọn̄ Abasi edi?

• Nso ke nnyịn ndibọn̄ akam mben̄e nte ẹnam uduak Abasi ke isọn̄ nte ẹnamde ke heaven ọwọrọ?

[Mme Mbụme Ukpepn̄kpọ]

[Ndise ke page 9]

Akam Jesus ama esinen̄ede okpụhọde ye akam n̄wụtidem mme Pharisee

[Ndise ke page 10]

Mme Christian ẹbọn̄ akam ẹben̄e Obio Ubọn̄ Abasi edi, ẹnam enyịn̄ esie asana, ẹnyụn̄ ẹnam uduak esie