Mụm Edisana Ido Kama Ebe ke Ndikpeme Esịt Fo
Mụm Edisana Ido Kama Ebe ke Ndikpeme Esịt Fo
“Tịm kpeme esịt fo kan kpukpru se ekpemede; koro uwem otode enye.”—MME N̄KE 4:23.
1-3. (a) Didie ke mme owo ẹsiwụt ke mmimọ idaha edisana ido mmimọ ke ọsọn̄urua n̄kpọ? Nam an̄wan̄a. (b) Ntak edide akpan n̄kpọ ndidụn̄ọde ufọn edisana ido?
EKEME ndidi ndise oro eketie akani akani. Eyedi enye ikodotke se ẹdade ẹbana ufọk. Ke idaha ekededi, ama ana in̄wan̄-in̄wan̄ nte ke andinyene enye ikoyomke enye aba. Ẹma ẹmen ndise emi ẹkenịm ke itie unyam n̄kani n̄kpọ, ẹwetde dollar 29 (U.S.) ẹdian nte ekọmurua. Nte ededi, ke isua ifan̄ ke ukperedem, ẹma ẹdi ẹdikụt ke ekọmurua ndise oro ama ekpere ndisịm miliọn dollar kiet! Ih, enye ekenen̄ede edi anana-mbiet ndise. Kere nte eketiede akpa andinyene ndise emi ke idem, emi mîkadaha enye ke akpan n̄kpọ!
2 Ukem n̄kpọ emi esitịbe ye edisana ido, oro edi edisana idaha eke ido uwem oro owo enyenede. Ata ediwak owo mfịn idaha edisana ido ke ọsọn̄urua n̄kpọ. Ndusụk owo ẹda enye nte ekikere eset emi mîdotke aba ye usụn̄ udu uwem eyomfịn. Ntem, mmọ ẹsibiat enye ke ntak ekpri udori. Ndusụk owo ẹsimen edisana ido mmọ ẹkpụhọ ye ediyụhọ udọn̄ idan̄ ke ekpri ini. Mbon eken ẹsitop enye ẹduọk ye idotenyịn edinyene uku ke iso ubọkn̄ka mmọ m̀mê ke iso owo isio uduot.—Mme N̄ke 13:20.
3 Ediwak owo ẹsidi ẹdifiọk ke ata idiọk ini nte ke edisana ido mmọ ekenen̄ede edi ata n̄kpọ-uto. Mmọ ndiduọk edisana ido mmọ esiwak ndikama mmọn̄eyet. Nte Bible ọdọhọde, utịp oro oburobụt ido esikamade ekeme nditie nte ibọkn̄kpa, “odoro nte etidot ekpe.” (Mme N̄ke 5:3, 4) Ke ikerede iban̄a nte idaha ido uwem ọdiọkde mfịn, didie ke afo ekeme ndikpeme nnyụn̄ mmụm edisana ido fo n̄kama? Nnyịn iyowụk ntịn̄enyịn ke n̄kpọ ita oro nnyịn ikemede ndinam.
Tịm Kpeme Esịt Fo
4. Nso idi ndamban̄a esịt, ndien ntak emi nnyịn ikpetịmde ikpeme enye?
4 Se ẹyomde man imụm edisana ido ikama edi nditịm n̄kpeme esịt nnyịn. Bible ọdọhọ ete: “Tịm kpeme esịt fo kan kpukpru se ekpemede; koro uwem otode enye.” (Mme N̄ke 4:23) Nso idi “esịt fo” oro ẹtịn̄de ẹban̄a mi? Enye idịghe ata ata esịt. Esịt enye emi edi ndamban̄a esịt. Enye ada aban̄a owo emi afo edide ke esịtidem, esịnede ekikere ye ntụk fo, ye se inụkde fi anam n̄kpọ. Bible ọdọhọ ete: ‘Ma ndien Abasi fo ke ofụri esịt fo, ye ke ofụri ukpọn̄ fo, ye ke ofụri odudu fo.’ (Deuteronomy 6:5) Jesus ọkọdọhọ ke ibet emi edi n̄kponn̄kan. (Mark 12:29, 30) Nte an̄wan̄ade, esịt nnyịn enye emi enen̄ede ọsọn̄ urua. Odot ẹkpeme enye.
5. Didie ke esịt ekeme ndinyene ufọn nnyụn̄ n̄kama n̄kpọndịk kpa ke ukem ini oro?
5 Nte ededi, Bible ọdọhọ n̄ko ete ke “esịt abian̄a akan kpukpru n̄kpọ, onyụn̄ abiara fap.” (Jeremiah 17:9) Didie ke esịt ekeme ndibian̄a—anamde nnyịn idu ke itiendịk? Ọfọn, ke uwụtn̄kpọ, ubomisọn̄ edi eti n̄kpọ, idem se ikemede ndinyan̄a uwem ke ini mbabuat n̄kpọntịbe. Edi edieke awat-ubomisọn̄ mîkarake ubomisọn̄ emi, ekpemede ubọi esie kpukpru ini, ubomisọn̄ emi ekeme ndisọsọp n̄kabade ndi n̄kpọ oro akamade n̄kpa. Kpasụk ntre, ibọhọke afo ekpeme esịt fo, kpukpru udọn̄ esịtidem ye ntụk fo ẹkeme ndikara fi, ndien usụn̄ uwem fo ekeme ndida fi n̄ka nsobo. Ikọ Abasi ọdọhọ ete: “Owo eke ọbuọtde idem ye esịt esiemmọ edi ndisịme owo: edi owo eke asan̄ade ke ifiọk ọyọbọhọ.” (Mme N̄ke 28:26) Ih, afo emekeme ndisan̄a ke ifiọk nnyụn̄ mbọhọ afanikọn̄ edieke afo ayakde Ikọ Abasi ọnọ fi ndausụn̄, ukem nte afo okpoyomde ndausụn̄ oto n̄wed ndise usụn̄ mbemiso akade isan̄.—Psalm 119:105.
6, 7. (a) Nso idi edisana idaha, ndien ntak emi enye edide akpan n̄kpọ ọnọ mme asan̄autom Jehovah? (b) Nnyịn isan̄a didie ifiọk ke mme anana-mfọnmma owo ẹkeme ndinyene edisana idaha Jehovah?
6 Idịghe ndammana n̄kpọ owo ndisan̄a ke usụn̄ edisana ido. Ana iwọn̄ọde esịt nnyịn isịn ke usụn̄ oro. Usụn̄ kiet ndinam emi edi ndikere ata ufọn oro edisana ido enyenede. Edu emi enyene n̄kpet n̄kpet ebuana ye edisana idaha, emi ọwọrọde usanaidem, ediden̄i, edidian̄ade n̄kpọn̄ idiọkn̄kpọ. Edisana idaha edi ọsọn̄urua edu oro edide ubak edu Jehovah Abasi. Ata ediwak ufan̄ikọ Bible ẹbuan edu emi ye Jehovah. Ke nditịm ntịn̄, Bible ọdọhọ ke “Edisana idaha enyene Jehovah.” (Exodus 28:36, NW) Nte ededi, nso ke ata eti edu oro enyene ndinam ye nnyịn mme anana-mfọnmma owo?
7 Jehovah asian nnyịn ke Ikọ esie ete: “Mbufo ẹdisana, koro Ami ndide edisana.” (1 Peter 1:16) Ih, nnyịn imekeme ndikpebe edisana idaha Jehovah; nnyịn imekeme ndisana ke iso esie, imụmde edisana ido nnyịn ikama. Ntre, ke ini nnyịn itrede ndibuana ke mme ndedehe, edinam oro ẹsabarede owo, nnyịn inyanade ibịne ata eti ifetutom oro aduaide owo idem—ediwụt nti edu Abasi Andikon̄ N̄kan! (Ephesus 5:1) Nnyịn ikpekereke ke oro ọsọn̄ akan nnyịn ndinam, koro Jehovah edide Eteutom oro enyenede ọniọn̄ ye eti ibuot emi akanam mîyomke n̄kpọ ikan se nnyịn ikemede ndinam. (Psalm 103:13, 14; James 3:17) Edi akpanikọ, oyom ukeme man ika iso isana ke n̄kan̄ eke spirit ye n̄kan̄ eke ido uwem. Nte ededi, apostle Paul ama etịn̄ ete ke ‘esịt akpanikọ ye edisana ido ẹdu ye Christ.’ (2 Corinth 11:3) Nte nnyịn ikamake Christ ye Ete esie isọn edisịn ofụri ukeme ndisana ke n̄kan̄ eke ido uwem? Kamse, mmọ ẹnen̄ede ẹma nnyịn ke usụn̄ oro nnyịn mîdikemeke ndinọ usiene. (John 3:16; 15:13) Odot nnyịn iwụt esịtekọm ebe ke ndidu edisana uwem. Ke ndikere mban̄a edisana ido nnyịn ke usụn̄ emi, nnyịn iyada enye ke ọsọn̄urua n̄kpọ, inyụn̄ itịm ikpeme esịt nnyịn.
8. (a) Didie ke ikeme ndibọk ndamban̄a esịt nnyịn? (b) Nso ke nneme nnyịn ekeme ndiyarade mban̄a nnyịn?
8 Nnyịn itịm ikpeme esịt nnyịn n̄ko ebe ke usụn̄ oro nnyịn ibọkde idem nnyịn. Oyom nnyịn ida nti udia eke spirit ibọk ekikere ye esịt nnyịn kpukpru ini, iwụkde ntịn̄enyịn ke eti mbụk Obio Ubọn̄ Abasi. (Colossae 3:2) Nneme nnyịn ekpenyene ndikam n̄wụt ke nnyịn iwụk ntịn̄enyịn do. Edieke ẹdiọn̄ọde nnyịn nte mbon oro ẹsinemede oburobụt nneme obụkidem, nnyịn iwụt nte idaha esịt nnyịn etiede. (Luke 6:45) Utu ke oro, yak ẹdiọn̄ọ nnyịn nte mbon oro ẹsinemede nneme eke spirit oro ọbọpde-bọp. (Ephesus 5:3) Man itịm ikpeme esịt nnyịn, ikpọ n̄kpọndịk ẹdu emi anade nnyịn ifep. Ẹyak nnyịn ineme iba ke otu emi.
Fehe Bọhọ Use
9-11. (a) Ntak emi mbon oro ẹfụmide item eke 1 Corinth 6:18 ẹnen̄erede ẹdu ke idaha ediduọ ndụk ata oburobụt ido? Nam an̄wan̄a. (b) Edieke nnyịn ifehede ibọhọ use, nso ke nnyịn ifep? (c) Nso eti uwụtn̄kpọ ke anam-akpanikọ owo oro Job ekenịm ọnọ nnyịn?
9 Jehovah ama ọnọ apostle Paul odudu spirit ndiwet item emi an̄wamde ediwak owo nditịm n̄kpeme esịt mmọ nnyụn̄ mmụm edisana ido n̄kama. Paul ọkọdọhọ ete: “Mbufo ẹfehe ẹbọhọ use.” (1 Corinth 6:18) Tịm fiọk ke enye ikakam idọhọke, “Ẹfep use.” Mme Christian ẹkpenyene ndinam se ikande oro. Mmọ ẹkpenyene ndifehe mbọhọ mme utọ oburobụt edinam oro, kpa nte mmọ ẹkpefehede ẹbọhọ n̄kpọ oro esịnde uwem mmọ ke itiendịk. Edieke nnyịn ifụmide item oro, nnyịn imekeme ndinen̄ede ndu ke idaha ediduọ ndụk ata oburobụt ido nnyụn̄ ntaba mfọn Abasi.
10 Ke ndinam an̄wan̄a: Eka eyet ekpri eyen esie mmọn̄ ama onyụn̄ esịne enye ọfọn̄ man ẹkpeka akpan edinam. Ekpri eyen emi obụp m̀mê imọ imekeme ndibre mbre ke an̄wa mbemiso mmimọ idahade, eka esie enyịme—edi n̄kukụre edieke eyen emi editrede ndinam n̄kpọ kiet. Eka esie ọdọhọ ete: “Kûsan̄a ukpere mbabari n̄kpọdiọhọ mmọn̄ oro odude do ke an̄wa. Ama eyere mbat, nyamia fi.” Nte ededi, ke ufan̄ minit ifan̄, enye okụt nte ekpri eyen emi eten̄de asan̄a aka mben n̄kpọdiọhọ mmọn̄ oro. Enye iyereke mbat kan̄a. Edi, enye ofụmi item eka esie nditre ndisan̄a n̄kpere mbabari n̄kpọdiọhọ mmọn̄ oro, ndien enye ọmọn̄ odụk mfịna. (Mme N̄ke 22:15) Ediwak uyen ye ikpọ owo emi ẹkpenen̄erede ẹfiọk n̄kpọ ẹnam ukem ndudue oro. Didie ke edi ntre?
11 Ke mme ini emi ata ediwak owo ẹma ẹkeyak idem ẹnọ “ndek ndek udọn̄ [idan̄]” mi, ẹsiak usiakifia ndida nsịn udọn̄ nnọ oburobụt ebuana idan̄. (Rome 1:26, 27) Mme ndise idan̄ ẹyọyọhọ mme magazine, n̄wed, vidio, ye Intanet. Ke akpanikọ, mbon oro ẹmekde ndimụm mme utọ ndise oro ndọn̄ ke esịt mmọ ifeheke ibọhọ use. Mmọ ke ẹda enye ẹnam mbubru, ẹten̄de ẹsan̄a ẹkpere ndinam enye, ẹnyụn̄ ẹfụmide item Bible. Utu ke nditịm n̄kpeme esịt mmọ, mmọ ẹbiat esịt mmọ ebe ke ndise mme oburobụt ndise oro ẹkemede ndida ediwak isua mbemiso ẹfrede. (Mme N̄ke 6:27) Ẹyak nnyịn ikpep n̄kpọ ito anam-akpanikọ owo oro Job, emi akanamde ediomi ye enyịn esie, nditre ndise mme n̄kpọ oro ẹkpeketapde enye ndinam idiọk. (Job 31:1) Oro edi uwụtn̄kpọ ọnọ nnyịn!
12. Didie ke iren ye iban Christian oro ẹyomde ndidọ ndọ ẹkeme ‘ndifehe mbọhọ use’ ke ini uyomima?
12 Enen̄ede edi akpan n̄kpọ ‘ndifehe mbọhọ use’ ke ini uyomima. Ini oro ekpedi ini idatesịt, emi ọyọhọde ye idotenyịn onyụn̄ asan̄ade ye ọkpọsọn̄ udọn̄, edi ndusụk n̄kparawa owo emi ẹyomde ndidọ ndọ ẹsibiat ini emi ke ndida oburobụt ido nnam mbubru. Ke ndinam emi, mmọ isiyakke kiet eken esịn eti itiat idakisọn̄ ọnọ eti ndọ—itie ebuana oro ọkọn̄ọde ke ima unana ibụk, mfara ke idem, ye n̄kopitem nnọ Jehovah Abasi. Eren ye n̄wan ẹdide Christian emi ẹkeyomde ndidọ ndọ ẹma ẹnam oburobụt ido ke ini uyomima mmọ. Ke mmọ ẹma ẹkedọ ndọ, n̄wan emi ama enyịme ete ke ubieresịt ama afịna imọ, idem abiatde idatesịt usen ndọ imọ. Enye ọkọdọhọ ete: “Mmesikpe Jehovah ubọk ediwak ini nte adahado ọnọ mi, edi okposụkedi isua itiaba ẹma ẹkebe tọn̄ọ nte emi eketịbe, esịt mi ke aka iso ndibiom mi ikpe.” Edi akpan n̄kpọ nte mbon oro ẹnamde utọ idiọkn̄kpọ oro ẹyom un̄wam ẹto mbiowo Christian. (James 5:14, 15) Nte ededi, ediwak iren ye iban Christian emi ẹyomde ndidọ ndọ ẹsinam n̄kpọ ye eti ibuot ẹnyụn̄ ẹfep mme afanikọn̄ emi ke ini uyomima. (Mme N̄ke 22:3) Mmọ ẹsinịm adan̄a ke mme edinam uwụt ima mmọ. Mmọ ẹsinam owo efen etiene odu ye mmọ ke ini mmọ ẹdude ọtọkiet, ẹnyụn̄ ẹnen̄ede ẹfep ndidu ikpọn̄ ke mme ndobo ndobo ebiet.
13. Ntak emi mme Christian mîkpoyomke ima ye owo emi mînamke n̄kpọ Jehovah?
13 Eyedi mme Christian emi ẹtọn̄ọde uyomima ye mbon oro mînamke n̄kpọ Jehovah ẹsisobo ikpọ n̄kpọ-ata. Ke uwụtn̄kpọ, afo akpasasan̄a didie adian idem ye owo emi mîmaha Jehovah Abasi? Edi akpan n̄kpọ mme Christian ndidian idem sụk ye mbon oro ẹmade Jehovah ẹnyụn̄ ẹkponode mme idaha esie kaban̄a edisana ido. Ikọ Abasi asian nnyịn ete: “Ẹkûbọp idem utịn̄e-utịn̄e ye mmọ eke mînịmke ke akpanikọ. Nso udeme ke edinen ido enyene ye ukwan̄ido? Nso ebuana ke un̄wana enyene ye ekịm?”—2 Corinth 6:14, 15.
14, 15. (a) Nso ukwan̄ ekikere ke ndusụk owo ẹnyene ẹban̄a se “use” ọwọrọde? (b)“Use” abuana mme orụk edinam ewe, ndien didie ke mme Christian ‘ẹkpefehe ẹbọhọ use’?
14 Ifiọk edi akpan n̄kpọ n̄ko. Nnyịn ikemeke ndinen̄ede mfehe mbọhọ use edieke nnyịn mîtịmke ifiọk se enye edide. Ndusụk owo ke ererimbot mfịn ẹnyene ukwan̄ ekikere ẹban̄a “use.” Mmọ ẹkere ke mmimọ imekeme ndiyụhọ udọn̄ idan̄ mmimọ ye unana edidọ ndọ, amakam edi mmimọ imefep ndinyene ebuana idan̄. Idem ndusụk mme ọwọrọetop itie ukpepn̄kpọ mban̄a nsọn̄idem oro ẹsịnde ukeme ndisụhọde ibat uyomo idịbi nditọwọn̄ oro owo mîyomke ẹmesịn udọn̄ ẹnọ mme uyen ndinam oburobụt ido idan̄ emi mîdaha ikosụn̄ọ ke uyomo idịbi. Ke mfụhọ, utọ item oro ototụn owo usụn̄. Ndifep uyomo idịbi ye unana edidọ ndọ idịghe ukem n̄kpọ ye edimụm edisana ido uwem n̄kama, ndien “use” enen̄ede abuana se ikande editre ndiyomo idịbi.
15 Ikọ Greek oro por·neiʹa, emi ẹkabarede “use,” ọwọrọ ekese n̄kpọ. Enye aban̄a ebuana idan̄ oro owo iba emi mîdịghe nsan̄a ndọ ẹnyenede onyụn̄ abuana edida ndido idan̄ nnam n̄kpọ ke idiọk usụn̄. Por·neiʹa abuana mme utọ edinam nte idan̄ inua, idan̄ etịtifuọ, ye edifiọn̄ọ ndido idan̄ owo efen—kpa edinam oro ẹsiwakde ndida itie ke mme ufọk akpara. Mme owo oro ẹkerede ke mme utọ edinam emi idịghe “use” ẹbabian̄a idem ẹnyụn̄ ẹduọ ẹdụk kiet ke otu mme afia Satan. (2 Timothy 2:26) N̄ko-n̄ko, ndimụm edisana ido n̄kama ọwọrọ se ikande sụk editre mme edinam use ekededi. Man ‘ifehe ibọhọ use,’ ana nnyịn ifep kpukpru orụk oburobụt ido edinam ye mbukpo ido emi ẹkemede ndida n̄kosụn̄ọ ke akwa idiọkn̄kpọ edide por·neiʹa. (Ephesus 4:19) Ke usụn̄ emi nnyịn iyomụm edisana ido uwem ikama.
Fep Mme N̄kpọndịk Mfụmmfụm Ima
16. Mbre ima odot ke nso utọ idaha, nte ẹnamde an̄wan̄a ke ewe uwụtn̄kpọ N̄wed Abasi?
16 Edieke anade nnyịn imụm edisana ido ikama, n̄kpọndịk efen oro oyomde nnyịn ikpeme ibiọn̄ọ edi mfụmmfụm ima. Ndusụk owo ẹkeme ndisọn̄ọ ndọhọ ke mfụmmfụm ima edi mbre emi mîdiọkke ke ufọt mbon isio uduot, emi mînyụn̄ inọhọ owo unan. Edi akpanikọ, ini ye idaha ẹdu ndibre ima. Ẹma ẹda ẹkụt nte Isaac ye Rebekah ‘ẹbrede mbre’ ọtọkiet, ndien ama an̄wan̄a mme ndanse nte ke mmọ ikedịghe sụk nditọeka. (Genesis 26:7-9) Edi, mmọ ẹkedi ebe ye n̄wan. Mme edinam uwụt ima oro mmọ ẹkenamde ẹma ẹdot. Mfụmmfụm ima idịghe ukem ye oro.
17. Nso idi mfụmmfụm ima, ndien didie ke ẹkeme ndise mban̄a mfịna emi?
17 Ẹkeme ndikabade mfụmmfụm ima ke usụn̄ emi: ndibre ima ke mbubru ke ini ata uduak edidọ ndọ mîdụhe. Owo edi edibotn̄kpọ oro ọsọn̄de itie, ke ntre eyịghe idụhe anana-ibat usụn̄ ẹdude ndinam ima mbubru, ndusụk ke ata n̄kari n̄kari usụn̄. (Mme N̄ke 30:18, 19) Ntre, ndinam mme ibet oro owo mîkemeke ndikpụhọde ikemeke ndikọk mfịna emi. Utu ke oro, oyom n̄kpọ oro enen̄erede edi akpan n̄kpọ akan ibet—edidụn̄ọde idem ye esịt akpanikọ nnyụn̄ nnen̄ede nda mme edumbet Bible nsịn ke edinam.
18. Nso inyịk ndusụk owo ndinam ima mbubru, ndien ntak emi mfụmmfụm ima ọdiọkde?
18 Edieke nnyịn iyomde nditịn̄ akpanikọ, anaedi ata ediwak nnyịn iyenyịme nte ke idem esiduai nnyịn ke ini ikụtde nte owo isio uduot enyenede udọn̄ ke idem nnyịn. Oro edi ndammana n̄kpọ. Edi nte nnyịn imesinam ima mbubru man inam idem aduai owo—n̄kukụre man inọ idem nnyịn ekpri uku m̀mê man inam owo efen okop nduaidem? Ke edide ntre, nte imekere iban̄a unan oro nnyịn ikemede ndinọ? Ke uwụtn̄kpọ, Mme N̄ke 13:12 ọdọhọ ete: “Idotenyịn eke anamde ubịghi esịn esịt ọdọn̄ọ.” Edieke nnyịn ikoide-koi inam ima mbubru ye owo, ekeme ndidi nnyịn ifiọkke nte emi otụkde owo oro. Owo emi ekeme nditọn̄ọ ndidori enyịn mban̄a uyomima ye ndọ ke akpatre. Edikpu oro editienede ekeme ndinen̄ede mbiak enye. (Mme N̄ke 18:14) Edikokoi nda mme ntụk mbon efen nnam mbubru edi edinam ibak.
19. Didie ke mfụmmfụm ima ekeme ndisịn ndọ Christian ke itiendịk?
19 Enen̄ede edi akpan n̄kpọ ndikpeme mbiọn̄ọ mfụmmfụm ima ye mbon oro ẹma ẹkedọ ndọ. Ndidemede ima ntụk ke idem owo emi ama ọkọdọ ndọ—m̀mê ọdọ ndọ ndinyene utọ udọn̄ oro ke idem owo emi mîdịghe nsan̄a ndọ esie—ifọnke. Ke mfụhọ, ndusụk Christian ẹnyene ukwan̄ ekikere nte ke odot ndikọri ima ntụk ke idem mbon isio uduot emi mîdịghe nsan̄a ndọ mmimọ. Ndusụk owo ẹsiyarade mme ata udọn̄ esịt mmọ ẹnọ utọ “ufan” oro, idem ẹnemede mme ọkpọkpọ mfịna oro mmọ mînemeke ye nsan̄a ndọ mmọ ẹnọ utọ “ufan” oro. Nte utịp, ima ntụk esikọri esịm idaha edimen esịt n̄kọn̄ ke idem owo en̄wen ndien emi ekeme nditịmede m̀mê idem ndibiat ndọ. Mme Christian oro ẹma ẹkedọ ndọ ẹyenam ọfọn nditi eti item oro Jesus ọkọnọde aban̄a efịbe—enye esitọn̄ọ ke esịt. (Matthew 5:28) Ntre, ẹyak nnyịn itịm ikpeme esịt inyụn̄ ifep mme idaha oro ẹkemede ndida n̄kosụn̄ọ ke mme utọ akama-nsobo utịp oro.
20. Didie ke nnyịn ikpebiere ndise edisana ido nnyịn?
20 Edi akpanikọ, idịghe mmemmem n̄kpọ ndika iso nnyene edisana ido ke ererimbot mfịn oro ọyọhọde ye oburobụt ido mi. Nte ededi, ti ete ke enen̄ede emem ndimụm edisana ido fo n̄kama akan ndifiak nnyene enye ke ama ọkọduọk enye. Edi akpanikọ, Jehovah ‘awak ndidahado’ onyụn̄ ekeme ndinam mbon oro ẹnen̄erede ẹkabade esịt ẹsana ẹbọhọ idiọkn̄kpọ mmọ. (Isaiah 55:7) Nte ededi, Jehovah ikpemeke mbon oro ẹnamde oburobụt ido isio ke mme utịp edinam mmọ. Mme utịp oro emi akamade ẹkeme ndibịghi ke ediwak isua, idem ke ofụri eyo uwem. (2 Samuel 12:9-12) Ke usụn̄ ekededi, mụm edisana ido fo kama ebe ke nditịm n̄kpeme esịt fo. Da edisana idaha fo ke iso Jehovah Abasi nte ọsọn̄urua n̄kpọuto—ndien kûyak enye uduọk tutu amama!
Didie ke Afo Ọkpọbọrọ?
• Nso idi edisana ido, ndien ntak emi enye edide akpan n̄kpọ ntre?
• Didie ke nnyịn ikeme ndikpeme esịt nnyịn?
• Nso ke ndifehe mbọhọ use abuana?
• Ntak emi nnyịn ikpefepde mfụmmfụm ima?
[Mme Mbụme Ukpepn̄kpọ]
[Ndise ke page 11]
Ubomisọn̄ ekeme ndikama n̄kpa edieke owo mîtịmke ikara enye
[Ndise ke page 12]
Nso ikeme nditịbe edieke nnyịn ifụmide item?
[Ndise ke page 13]
Uyomima oro asanade adat owo esịt onyụn̄ ada ukpono ọsọk Abasi