Ndọn̄esịt Ẹnọde Mbon Ukụt

KE INI mme anam-akpanikọ iren ye iban ke eset ẹkesikụtde ukụt, mmọ ẹma ẹsibọn̄ akam ke ofụri esịt ẹnọ Abasi ẹyom ndausụn̄. Nte ededi, mmọ n̄ko ẹma ẹsinam n̄kpọ man ẹsụhọde ukụt oro, utọ nte ndinam n̄kpọ ke ikike man ẹbọhọ mbon ufịk. Ke uwụtn̄kpọ, mbuọtidem ke Jehovah ọkọrọ ye ọkpọkpọ ukeme ama an̄wam David ndiyọ afanikọn̄. Nso kaban̄a nnyịn mfịn?

Ke ini okụtde ukụt, eyedi afo emesinam n̄kpọ ndikọk mfịna fo. Ke uwụtn̄kpọ, edieke mûnyeneke utom, nte afo udusịnke ifịk uyom utom oro odotde, emi edidade ese aban̄a idem ye ubon fo? (1 Timothy 5:8) Mîdịghe, edieke idem mîsọn̄ke fi, nte afo uduyomke usọbọ oro odotde? Edi n̄kpọ udọn̄ nte ke Jesus, oro ekenyenede odudu emi otode Abasi ndikọk kpukpru orụk udọn̄ọ, ama ọdọhọ ete ke ‘mmọ emi ẹdọn̄ọde ẹsiyom abia-ibọk.’ (Matthew 9:12) Kpa ye oro, ekeme ndidi owo idimenke ukụt fo ifep kpukpru ini; ekeme ndidi oyoyom afo aka iso ọyọ mmọ ke ndusụk ini.

Ntak mûmenke n̄kpọ emi ubịne Jehovah Abasi ke akam? Ke uwụtn̄kpọ, ke ini iyomde utom, ndibọn̄ akam nnyụn̄ mberi edem ke Abasi ayan̄wam nnyịn ndikan idomo ekededi ndinyịme utom oro atuahade ye mme edumbet Bible. Nnyịn n̄ko iyefep ndiyak idiọkitọn̄ m̀mê ima okụk anam ‘iyo ikpọn̄ mbuọtidem.’ (1 Timothy 6:10) Ke akpanikọ, ke ini inamde mme akpan ubiere ẹban̄ade utom m̀mê ubon m̀mê nsọn̄idem, nnyịn imekeme nditiene item David emi: “Top mbiomo fo nọ Jehovah, ndien enye ayakama fi: enye idiyakke edinen owo esehede ke nsinsi.”—Psalm 55:22.

Akam ofụri esịt ayan̄wam nnyịn n̄ko ndinyene ekikere oro adade ukem ukem man ukụt nnyịn idikan nnyịn ubọk. Apostle Paul oro ekedide ata Christian ekewet ete: “Ke kpukpru n̄kpọ, ẹsan̄a ye akam ye n̄kpe-ubọk ye ekọm, ẹsian Abasi se mbufo ẹyomde.” Ke nso usụn̄ ke akam ofụri esịt ekeme ndidọn̄ nnyịn esịt? “Emem Abasi, emi ayan̄ade ifiọk owo, eyekpeme mbufo esịt ye ekikere ke Christ Jesus.” (Philippi 4:6, 7) Emem Abasi ‘ayan̄a ifiọk owo.’ Ke ntre, enye ekeme ndinam nnyịn isọn̄ọ ida ke ini mme ntụk oro ẹkamade mfụhọ  ẹfịkde nnyịn. Enye ‘eyekpeme esịt ye ekikere nnyịn,’ ntem an̄wamde nnyịn ndifep ndinam n̄kpọ ibụmede ibụmede ye nte mîwụtke ọniọn̄, emi ekemede ndinam ukụt nnyịn etetịm ọsọn̄ ubọk.

Akam ekeme ndikam nnam ukpụhọde odu ke nte idaha etiede. Ke ini apostle Paul okodude ke ufọk-n̄kpọkọbi ke Rome, enye ama osụhọde idem eben̄e ekemmọ mme Christian ete ẹbọn̄ akam ẹban̄a imọ. Ntak emi Paul ekesịnde eben̄e emi? Enye ekewet ọnọ mmọ ete: “Nsọn̄ọ mben̄e mbufo nte ẹdọdiọn̄ ẹnam ntem, man ẹkpenam n̄wara mfiak ntiene mbufo.” (Mme Hebrew 13:19) Ke ikọ efen, Paul ama ọfiọk ete ke Jehovah ndikop uyịre uyịre akam oro ekemmọ mme andinịm ke akpanikọ ẹbọn̄de ekeme ndinam ẹkpụhọde ini oro ẹdisanade imọ iyak.—Philemon 22.

Nte akam oyokpụhọde utịp oro ukụt nnyịn enyenede? Enye ekeme. Edi, nnyịn ikpenyene ndifiọk nte ke Jehovah Abasi ekeme nditre ndibọrọ akam nnyịn ke usụn̄ oro nnyịn ikpamade. Paul ama ọbọn̄ akam ediwak ini aban̄a “n̄kukịm ke obụkidem” esie, eyedi mfịna ikpọkidem. Nte ededi, utu ke ndimen ukụt oro mfep, Abasi akasian Paul ete: “Mfọn Mi ke ekekem fi, koro ẹnamde odudu Mi ọfọn ama ke mmem-idem.”—2 Corinth 12:7-9.

Ntre, ndien, ukụt nnyịn ekeme nditre ndibe mfep usọp usọp. Nte ededi, nnyịn iyenyene ifet ndiwụt ibetedem nnyịn ke Ete nnyịn eke heaven. (James 1:2-4) Nyene mbuọtidem nte ke ọkpọkọm Jehovah Abasi imenke ukụt oro ifep, enye ekeme ‘ndisiak usụn̄ ubọhọ nnọ nnyịn, man ikeme ndibiom enye.’ (1 Corinth 10:13) Odot ẹtịm ẹfiọk nte ke ẹkot Jehovah “Abasi kpukpru ndọn̄esịt: emi ọdọn̄de nnyịn esịt ke kpukpru ukụt nnyịn.” (2 Corinth 1:3, 4) Abasi ekeme ndinọ se nnyịn iyomde man iyọ, ndien nnyịn imenyene idotenyịn nsinsi uwem.

Ikọ Abasi, kpa Bible, ọn̄wọn̄ọ ete ke Jehovah “ọyọkwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba.” (Ediyarade 21:3, 4) Nte ọsọn̄ ndinịm ke akpanikọ ke ererimbot oro ukụt mîdidụhe oyodu? Ekeme ndisọn̄ ndinịm ke akpanikọ edieke edide afo emesikụt ukụt kpukpru ini. Nte ededi, Abasi ọn̄wọn̄ọ ubọhọ ndịk ye afanikọn̄, ndien nte eyịghe mîdụhe uduak esie oyokụt unen.—Isaiah 55:10, 11.

[Mme ndise ke page 9]

To ke nnanenyịn sịm ubọhọ