Afanikọn̄ Oro Otode Idaha Eyo Ididụhe Aba!

“MBON eyo emi ikereke aba iban̄a isọn̄ ke ntak idiọkitọn̄ ye ima okụk.” Ntre ke ẹkewet ke edem n̄wed oro 5000 Days to Save the Planet. Utịp idiọkitọn̄ ọyọyọhọ n̄kann̄kụk nnyịn. Edide ẹtịn̄ akpanikọ ke se iban̄ade ufiop ekondo m̀mê owo itịn̄ke, se idude edi nte ke ẹbiat uyai ekondo nnyịn. N̄kukụre idotenyịn nnyịn edi un̄wọn̄ọ Bible ndisu nte ke Abasi ‘oyosobo mmọ emi ẹsobode isọn̄.’—Ediyarade 11:18.

Abasi ayada ata obufa editịm n̄kpọ okpụhọ mbiara editịm n̄kpọ emi. Mbemiso afo ekerede ke oro edi ekikere ido ukpono oro mîsịneke ifiọk, kere ban̄a emi: Anie ọkpọfiọk n̄kpọ aban̄a isọn̄ akan Andibot enye? Nte Andibot, ndi enye inyeneke unen ndibiere se itịbede inọ ekondo emi? Bible anam an̄wan̄a nte ke enye enyene, ọdọhọde ke Isaiah 45:18 ete ke Jehovah “edi Abasi emi obotde isọn̄, onyụn̄ anamde enye; enye owụk enye, ibotke enye ke ikpîkpu, obot enye man ẹdụn̄ ke esịt.” Man osu uduak esie, Abasi ekeme ndinam n̄kpọ, oyonyụn̄ anam.

Abasi edinam emi ke ndida obufa ukara, m̀mê obio ubọn̄, oro edikarade isọn̄, ndi. Ke ini mme Christian ẹbọn̄de se ẹdiọn̄ọde nte Akam Ọbọn̄ ẹnyụn̄ ẹdọhọde ẹte, “Yak Ubọn̄ Fo edi,” mmọ ẹben̄e ẹte ukara emi akara isọn̄. (Matthew 6:9, 10) Obio Ubọn̄, m̀mê ukara, Abasi oyowụt ke Abasi enen̄ede enyene ifiọk aban̄a mme awak-n̄kukọhọ oto-obot n̄kpọ. Ntem ke enye edikeme ndifiak ndiọn̄ ikpehe isọn̄ emi usabaden̄kpọ abiatde. Isaiah 35:1, 6 ọdọhọ ete: “Desert oyonyụn̄ ebre, onyụn̄ asiaha ikọn̄ nte rose. . . . Koro mmọn̄ asiahade ke wilderness, idịm n̄ko ke desert.”

Tutu Abasi Esịbe Odụk

Ke ukwọ eke 2002 ama ekebe, Helmut Schmidt, akani andikara West Germany ekewet ete: “Owo ndomokiet ikemeke nditre oyobio ndibe ubahammọn̄. Afanikọn̄ ayaka iso nditịbe.” Oro edi akpanikọ. Ndien ke ini afanikọn̄ oro otode idaha eyo etịbede, n̄kukụre se mme owo ẹsikemede ndinam edi ndiyọ adan̄a nte mmọ ẹkekeme. Nte ededi, kpa ye ofụri mfụhọ emi utọ akama-nsobo n̄kpọntịbe oro ẹkemede ndida ndi, mmọ ẹkeme ndinyene ufọn. Mmọ ẹkeme ndinụk mme owo ẹwụt ima ye edikere mban̄a ẹnọ mme mbọhọidụn̄  mmọ. (Mark 12:31) Ke uwụtn̄kpọ, ukwọ oro eketịbede ke Europe ama anam ndusụk owo ẹnam emi. N̄wedmbụk n̄kpọntịbe kiet ekewet ete: “Mme ifịk ifịk anamutom unyịmesịt ẹma ẹto kpukpru ebiet ke Germany ẹdinam utom [unọ un̄wam]. Emi edi n̄kponn̄kan utom unyịmesịt emi ẹnamde toto ke ini Ekọn̄ Ererimbot II.”

Ediwak Mme Ntiense Jehovah ẹma ẹsịne ke otu mme anamutom unyịmesịt emi. Mme Ntiense oro ẹma ẹnam utom unọ un̄wam ke idụt inan̄ emi oyobio ọkọnọmọde. Edu uwem mme Christian emi owụt nte uwem editiede ke ini obufa ukara Abasi, emi ima ye edikere mban̄a ẹdiyọhọde, utu ke ọkpọsọn̄ idiọkitọn̄ ye ibụk.—Isaiah 11:9. *

Mme Christian ẹkeme ndibọ ndọn̄esịt nto un̄wọn̄ọ oro Abasi ọkọn̄wọn̄ọde ọnọ nditọ Israel eset: “Ndien nyọnọ edịm isọn̄ mbufo ke ekem ini, akpa edịm ye ekperedem, man afo obon ibokpot fo, ye obufa wine fo, ye aran fo.” (Deuteronomy 11:14) Mbon oro ẹdinyenede ifet ndidu ke obufa ererimbot Abasi, emi afanikọn̄ idaha eyo mîdidụhe aba, ẹyekụt nte un̄wọn̄ọ emi osude.

[Ikọ idakisọn̄]

[Ekebe/Ndise ke page 31]

Ẹyekara Idaha Eyo ke Mfọnmma Usụn̄

Ke obufa ererimbot Abasi, mme owo idikopke ndịk nte ke oyobio ayabiat ufọk m̀mê mbun̄wụm mmimọ. (2 Peter 3:13) Bible anam an̄wan̄a nte ke Abasi ye Eyen esie, Jesus Christ, ẹnen̄ede ẹnyene ukeme ndikara idaha eyo. Kere ban̄a mme itien̄wed oro ẹtienede mi.

◼ Genesis 7:4: “Osụk kan̄a usen itiaba ami nyanam edịm edep ke isọn̄ ke uwemeyo aba ye okoneyo aba.”

◼ Exodus 14:21: “Jehovah anam inyan̄ asan̄a ke ofụm ikọtabak, ke ofụri okoneyo oro, onyụn̄ esịn inyan̄ asat, ndien mmọn̄ abahade.”

◼ 1 Samuel 12:18: “Samuel eseme ọnọ Jehovah, ndien Jehovah anam enyọn̄ oyomo, onyụn̄ anam edịm edep ke usen oro: ndien kpukpru owo ẹbak Jehovah ye Samuel eti-eti.”

◼ Jonah 1:4: “Jehovah ọdọn̄ akwa ofụm utom ke inyan̄, akamba oyobio onyụn̄ odu ke inyan̄, ndien etie nte ubom ọmọn̄ ediwụre.”

◼ Mark 4:39: “Ndien Enye [Jesus emi Abasi ọnọde odudu] edemede asua ọnọ ofụm, onyụn̄ ọdọhọ inyan̄ ete, Dobo, na sụn̄. Ndien ofụm odobo, mmọn̄ onyụn̄ ana sụn̄-n̄.”

[Mme ndise ke page 30, 31]

Ke obufa ererimbot Abasi, nnyịn idifeheke enyene-ndịk idaha eyo