“Asan̄autom Emi Anamde Akpanikọ” Ebe Udomo!

“Ekem ini nte ikpe editọn̄ọde ke ufọk Abasi.”—1 Peter 4:17.

1. Nso ke Jesus okokụt ke ini edide edidụn̄ọde “asan̄autom” oro?

 KE Pentecost 33 E.N., Jesus ama emek “asan̄autom” oro edinọde “mbonufọk” esie udia ke edikem ini. Ke 1914, ẹma ẹdori Jesus ke ebekpo nte Edidem, ndien ikebịghike ini ama ekem enye ndidi ndidụn̄ọde se “asan̄autom” oro akanamde. Enye ama okụt ke ata ediwak mme andibuana ke otu “asan̄autom” oro ẹma ‘ẹnam akpanikọ ẹnyụn̄ ẹnyene ọniọn̄.’ Ntem, enye ama emek asan̄atuom oro ndise mban̄a “kpukpru se enye enyenede.” (Matthew 24:45-47) Nte ededi, idiọk asan̄autom ama odu, emi mîkanamke akpanikọ mîkonyụn̄ inyeneke ọniọn̄.

“Idiọk Asan̄autom Oro”

2, 3. “Idiọk asan̄autom oro” okoto m̀mọ̀n̄, ndien oro akasan̄a didie etịbe?

² Ke ndondo oro Jesus okụrede nditịn̄ mban̄a “asan̄autom emi anamde akpanikọ, onyụn̄ enyenede ọniọn̄,” enye ama etịn̄ n̄ko aban̄a idiọk asan̄autom. Enye ọkọdọhọ ete: “Edi edieke idiọk asan̄autom oro edidọhọde ke esịt esie ete, Ete mi ebịghi edidi; edinyụn̄ ọtọn̄ọde ndimia ekemmọ mme asan̄autom esie, edinyụn̄ adiade onyụn̄ ọn̄wọn̄de ye mbon mmịn; ete-ufọk owo oro eyedi ke usen eke enye mîdorike enyịn, ye ke hour eke enye mîfiọkke, oyonyụn̄ amia enye akamba ufen, onyụn̄ ọnọ enye udeme ye mbon mbubịk: do ke editua eyet ye edita edet oyodu.” (Matthew 24:48-51) Ikọ emi, “idiọk asan̄autom oro” anam iti se Jesus ekebemde iso etịn̄ aban̄a asan̄autom emi anamde akpanikọ, onyụn̄ enyenede ọniọn̄. Ke akpanikọ, “idiọk asan̄autom oro” okodu ke otu asan̄autom emi anamde akpanikọ. * Didie?

³ Mbemiso 1914, ediwak mme andibuana ke otu asan̄autom emi anamde akpanikọ ẹma ẹnyene ọkpọsọn̄ idotenyịn edika n̄kodu ye Ebendọ ke heaven isua oro, edi idotenyịn mmọ ama akpa mfụhọ. Emi ye mme n̄kpọ eken oro ẹketịbede, ama anam ediwak mmọ ẹkụt edikpu ẹnyụn̄ ẹyat esịt. Ndusụk mmọ ẹma ẹda ikọ isụn̄i ‘ẹmia’ n̄kani nditọete mmọ ẹnyụn̄ ẹdụk ndụk ye “mbon mmịn,” kpa mbon ido ukpono Christendom.—Isaiah 28:1-3; 32:6.

4. Didie ke Jesus akanam n̄kpọ ye “idiọk asan̄autom” oro ye kpukpru mbon oro ẹnyenede ukem edu oro?

⁴ Ẹkedidiọn̄ọ n̄kani Christian emi nte “idiọk asan̄autom,” ndien Jesus ama amia mmọ “akamba ufen.” Didie? Enye ama esịn mmọ, ndien mmọ ẹma ẹtaba idotenyịn Obio Ubọn̄ heaven. Nte ededi, owo ikosoboke mmọ ke ebe oro. Mmọ ẹkenyene ndibem iso ntua eyet nnyụn̄ nta edet ke ‘ekịm ke an̄wa’ oro ọwọrọde ọkpọn̄ esop Christian. (Matthew 8:11b) Toto ke eyo oro, ndusụk mbon oro ẹyetde aran ẹmenyene ukem idiọk edu oro, ẹwụtde nte idide ubak “idiọk asan̄autom.” Ndusụk “mme erọn̄ en̄wen” ẹkpebe unana edinam akpanikọ mmọ. (John 10:16) Kpukpru mme utọ asua Christ oro ẹdidu ke ukem “ekịm” eke spirit oro “ke an̄wa.”

5. Didie ke asan̄autom emi anamde akpanikọ, onyụn̄ enyenede ọniọn̄ akanam n̄kpọ okpụhọde ye “idiọk asan̄autom”?

⁵ Nte ededi, asan̄autom emi anamde  akpanikọ, onyụn̄ enyenede ọniọn̄ ama osobo ukem udomo oro “idiọk asan̄autom” okosobode. Nte ededi, utu ke ndiyat esịt, asan̄autom emi ama anam ukpuhọde. (2 Corinth 13:11, NW) Enye ama ọsọn̄ọ ima oro enye amade Jehovah ye nditọete esie. Nte utịp, asan̄autom emi edidi “adaha ye isọn̄ eke akpanikọ Abasi odorode ke esịt” ke idiọk “ukperedem ini” emi.—1 Timothy 3:15; 2 Timothy 3:1.

Mme Asian ye Mme Ndisịme Nditọiban

6. (a) Didie ke Jesus okowụt nte otu asan̄autom esie enyenede ọniọn̄? (b) Mbemiso 1914, nso etop ke ediwak Christian oro ẹyetde aran ẹketan̄a?

⁶ Ke ama eketịn̄ aban̄a “idiọk asan̄autom oro,” Jesus ama eke n̄ke iba ndiwụt ntak emi ndusụk Christian oro ẹyetde aran ẹdinamde akpanikọ ke adan̄aemi mbon eken mîdinamke. * Man owụt ufọn edinyene ọniọn̄, enye ama ọdọhọ ete: “Ẹyeda Obio Ubọn̄ Heaven ẹdomo ye nditọ-iban duop, eke ẹmende utuenikan̄ mmọ, ẹwọn̄ọ ẹka ẹkesobo ye ọdọ-ndọ. Ndien owo ition ke otu mmọ ẹdi ndisịme, ition ẹnyụn̄ ẹdi asian. Koro mme ndisịme ẹmen utuenikan̄ mmọ, edi idaha aran idian ye mmọ; edi mme asian ẹda aran ke ekpeme ye mme utuenikan̄ mmọ.” (Matthew 25:1-4) Nditọiban duop oro ẹti nnyịn ẹban̄a mme Christian oro ẹkeyetde aran mbemiso 1914. Ubatini oro mmọ ẹkebatde ama anam mmọ ẹfiọk nte ke Jesus Christ, kpa ebendọ, ọmọn̄ edisịm. Ntem, mmọ ẹma “ẹwọn̄ọ ẹka” ndisobo ye enye, ẹtan̄ade uko uko ẹte ke “ini mme Gentile” ọmọn̄ ọyọhọ ke 1914.—Luke 21:24.

7. Ini ewe ke mme Christian oro ẹyetde aran ‘ẹkeyet idap,’ ke n̄kan̄ eke spirit ndien ntak-a?

⁷ Mmọ ẹma ẹnen. Ini mme Gentile ama ọyọhọ ke 1914, ndien Christ Jesus ama ọtọn̄ọ ndikara ke Obio Ubọn̄ Abasi. Edi emi akada itie ke heaven. Mi ke isọn̄, ubonowo ama ọtọn̄ọ ndibọ ufen oro ẹkebemde iso ẹtịn̄ ẹban̄a. (Ediyarade 12:10, 12) Ini udomo ama ọtọn̄ọ. Sia mme n̄kpọ mîketịmke in̄wan̄a mmọ, mme Christian oro ẹyetde aran ẹma ẹkere ke ‘ebendọ ebịghi ndidi.’ Usua otode ererimbot ye editịmede esịt ẹma ẹnam mmọ ẹtehede ube ẹnyụn̄ ẹyom nditre an̄wan̄wa utom ukwọrọikọ mmọ. Ukem nte nditọiban oro ke n̄ke oro, mmọ ẹma “ẹyet idap” ke n̄kan̄ eke spirit, kpa nte mbon oro ẹdọhọde nte idide Christian, edi oro mînamke akpanikọ, ẹkedede ke ini mme apostle Jesus ẹma ẹkekpan̄a.—Matthew 25:5; Ediyarade 11:7, 8; 12:17.

8. Nso ikada ikesịm mfiori oro: “Sese, ọdọ-ndọ!” ndien nso ke mme Christian oro ẹyetde aran ẹkenyene ndinam adan̄aoro?

⁸ Ekem ke 1919 n̄kpọ emi owo mîkodorike enyịn ama etịbe. Nnyịn ikot ite: “Edi ke ufọt okoneyo ẹfiori ẹte, Sese, ọdọ-ndọ! Mbufo ẹwọn̄ọ ẹka ẹkesobo ye enye. Ekem kpukpru nditọ-iban oro ẹdaha ke enyọn̄, ẹdiọn̄ utuenikan̄ mmọ.” (Matthew 25:6, 7) Ke ini eketiede nte idotenyịn mmọ ama akpa mfụhọ, ẹma ẹdọhọ mmọ ẹtọn̄ọ utom! Ke 1918, Jesus, “angel ediomi,” ama edi temple Jehovah eke spirit ndidụn̄ọde nnyụn̄ nnam esop Abasi asana. (Malachi 3:1) Idahaemi, mme Christian oro ẹyetde aran ẹkenyene ndiwọrọ n̄kosobo ye enye ke ikpehe temple oro ke isọn̄. Ini ama ekem mmọ ‘ndiyama.’—Isaiah 60:1; Philippi 2:14-16.

9, 10. Ke 1919, ntak emi ndusụk Christian ẹkedide “mme asian” ke ini mbon eken ẹkedide “mme ndisịme”?

⁹ Edi yak kan̄a ise! Ke n̄ke oro, ndusụk nditọiban ẹma ẹnyene mfịna. Jesus ama aka iso ete: “Edi mme ndisịme ẹdọhọ mme asian ẹte, Ẹnọ  nnyịn aran mbufo esisịt; koro mme utuenikan̄ nnyịn ẹmọn̄ ẹnịme.” (Matthew 25:8) Edieke aran okụrede, utuenikan̄ ẹyenịme. Ke ntem aran ikan̄ eti nnyịn Ikọ Abasi oro edide akpanikọ ye edisana spirit esie, emi ẹnọde mme ata andituak ibuot odudu ndidi mme ọnọ un̄wana. (Psalm 119:130; Daniel 5:14) Mbemiso 1919, mme enyene-ọniọn̄ Christian oro ẹyetde aran ẹma ẹsịn ifịk ẹyom ndifiọk se Abasi oyomde mmọ ẹnam kpa ye oro idem ekememde mmọ ke esisịt ini. Ntem, ke ini ẹkenọde ikot edinam un̄wana ayama, mmọ ẹma ẹben̄e idem.—2 Timothy 4:2; Mme Hebrew 10:24, 25.

¹⁰ Nte ededi, ndusụk mbon oro ẹyetde aran ikeben̄eke idem ndinam n̄waidem oro ẹkeyomde m̀mê ndisịn̄ede idem—okposụkedi mmọ ẹkenen̄erede ẹyom ndidu ye Ebendọ. Ntre ke ini ama ekedi edikem ndisịn ifịk n̄kwọrọ gospel, mmọ ikeben̄eke idem. (Matthew 24:14) Mmọ ẹma ẹdomo ndinam mme ifịk ifịk nsan̄a mmọ ẹtehede ube ke ndidọhọ mmọ ẹnọ mmimọ aran ikan̄. Didie ke mme asian nditọiban ke n̄ke Jesus oro ẹkebọrọ? Mmọ ẹkedọhọ ẹte: “Ndusụk aran idikemke nnyịn ye mbufo: ẹkam ẹka ke ọtọ mme anyam-aran ẹkedep ke idem mbufo.” (Matthew 25:9) Kpasụk ntre, mme anam-akpanikọ Christian oro ẹyetde aran ikenyịmeke ndinam n̄kpọ ekededi oro ekemede ndibiọn̄ọ mmọ ndinọ un̄wana ke 1919. Ntem, mmọ ẹma ẹbe udomo.

11. Nso iketịbe inọ ndisịme nditọiban?

¹¹ Jesus akada ikọ esie ekeberi ntem: “Edi ke ini [mme ndisịme nditọiban oro ẹkade ndidep aran], ọdọ-ndọ edi; ndien mmọ emi ẹben̄ede idem ẹtiene enye ẹdụk ke udia ndọ: ndien ẹberi usụn̄. Edikem nditọ-iban eken ẹdi ẹdidọhọ ẹte, Ọbọn̄, Ọbọn̄, sio usụn̄ nọ nnyịn. Edi enye ọbọrọ ete, Ke akpanikọ ke ndọhọ mbufo, Ndiọn̄ọke mbufo.” (Matthew 25:10-12) Ke akpanikọ, ndusụk owo ikeben̄eke idem inọ edidi Ebendọ. Ntem mmọ ikebehe udomo ndien ẹma ẹtaba ifet edibuana ke usọrọ ndọ ke heaven. Nso n̄kpọ mmọn̄eyet ke emi ekedi ntem!

N̄ke Talent

12. (a) Nso ke Jesus akada ọnọ uwụtn̄kpọ edinam akpanikọ? (b) Anie edi owo oro akakade “idụt efen”?

¹² Ke ama okowụt ufọn edinyene ọniọn̄, Jesus n̄ko ama owụt ufọn edinam akpanikọ. Enye ọkọdọhọ ete: “Etie nte emi owo oyomde ndika idụt efen, ndien enye okot ikọt esie, ayak inyene esie ọnọ mmọ. Ndien enye ọnọ owo kiet talent ition, ọnọ owo efen iba, ọnọ owo efen kiet; ọnọ owo kiet kiet nte ukeme esie edide; ndien enye aka idụt efen.” (Matthew 25:14, 15) Ke n̄ke emi, Jesus ke idemesie edi owo oro akakade “idụt efen” ke ini enye ọkọdọkde heaven ke 33 E.N. Edi mbemiso enye ọdọkde ke enyọn̄, Jesus ama ayak “inyene esie” ọnọ mme anam-akpanikọ mbet esie. Didie?

13. Didie ke Jesus eketịm akaka in̄wan̄ onyụn̄ ọnọ “mme asan̄autom” esie odudu ndinam utom ke esịt?

¹³ Ke ini enye akanamde utom ukwọrọikọ esie ke isọn̄, Jesus ama etịm akaka in̄wan̄ utom ke ndikwọrọ gospel Ubọn̄ Heaven ke ofụri idụt Israel. (Matthew 9:35-38) Mbemiso enye adahade “idụt efen,” enye ama ayak in̄wan̄ oro ọnọ mme anam-akpanikọ mbet esie, ọdọhọde ete: “Mbufo ẹka ẹkenam kpukpru mme idụt ẹdi mbet Mi, ẹnịm mmọ  baptism ẹsịn ke enyịn̄ Ete ye Eyen ye Edisana Spirit: ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo: ndien sese, Ami ndodu ye mbufo kpukpru ini, tutu esịm utịt ererimbot.” (Matthew 28:18-20) Jesus akada mme ikọ emi ọnọ “mme asan̄autom” esie odudu ndinam utom ke in̄wan̄ oro tutu enye edi, “ọnọ owo kiet kiet nte ukeme esie edide.”

14. Ntak emi owo mîkodorike enyịn kpukpru owo ndinyam urua ukem ukem?

¹⁴ Ndinọ owo kiet kiet utom nte ukeme esie edide owụt nte ke kpukpru Christian akpa isua ikie ikenyeneke ukem ifet ye ukeme. Ndusụk mmọ, nte Paul ye Timothy, ẹbuana ọyọhọ ọyọhọ ke utom ukwọrọikọ ye edinọ ukpep. Ekeme ndidi idaha mbon eken ikayakke mmọ ẹnam ekese. Ke uwụtn̄kpọ, ndusụk mme Christian ẹkedi ifịn, mbon eken ẹdọdọn̄ọ, ke ini mbon eken ẹkedide mbon usọn̄, mîdịghe ẹnyene mbiomo ubon. Edi akpanikọ, idịghe kpukpru mbet ẹkenyene ndusụk ifetutom. Iban ye ndusụk iren oro ẹkeyetde aran ikọnọhọ ukpep ke esop. (1 Corinth 14:34; 1 Timothy 3:1; James 3:1) Kpa ye oro, se ededi oro idaha mmọ ekedide, ẹma ẹnọ kpukpru mme mbet Christ oro ẹyetde aran—iren ye iban—utom unyamurua, ndida ifet oro mmọ ẹkenyenede mbuana ke utom ukwọrọikọ Christian nnam n̄kpọ ke usụn̄ oro ọfọnde. Nsan̄a mmọ eke eyomfịn ẹnam kpasụk ntre.

Ini Udomo Ọtọn̄ọ!

15, 16. (a) Ini ewe ke akana ẹnam ibat? (b) Mbufa ifet ewe ke ẹkenọ mme anam-akpanikọ ‘ndinyam urua’?

¹⁵ N̄ke oro aka iso ete: “Ekem ke anyan ini ama ekebe, ete ikọt oro edi edibat ibat ye mmọ.” (Matthew 25:19) Ke 1914—ata anyan ini toto nte 33 E.N. ekebe—Christ Jesus ama ọtọn̄ọ ubọn̄ ubọn̄ edidu esie. Ke 1918, isua ita ye ubak ke ukperedem, enye ama edi temple Abasi eke spirit ndisu mme ikọ Peter emi: “Koro ekem ini nte ikpe editọn̄ọde ke ufọk Abasi.” (1 Peter 4:17; Malachi 3:1) Oro ekedi ini ndinam ibat.

¹⁶ Nso ke ifịn, nditọete Jesus oro ẹyetde  aran, ẹkeda “talent” Edidem ẹnam? Tọn̄ọ ke 33 E.N. sịm 1914, ediwak mmọ ẹma ẹnen̄ede ẹsịn idem ‘ẹnyam urua’ ẹnọ Jesus. (Matthew 25:16) Idem ke ini akpa ekọn̄ ererimbot, mmọ ẹma ẹnyene ọkpọsọn̄ udọn̄ ndinam utom Eteufọk mmọ. Idahaemi, ama odot ndinọ mme anam-akpanikọ oro ifet ‘ndinyam urua.’ Utịt editịm n̄kpọ emi ama asan̄a ekpere. Ẹkenyene ndikwọrọ gospel ke ofụri ekondo. Ẹkenyụn̄ ẹnyene ndikpen̄e “mbun̄wụm isọn̄.” (Ediyarade 14:6, 7, 14-16) Akana ẹtan̄ akpatre otu ibokpot ẹbok ẹnyụn̄ ẹtan̄ “akwa otu owo” eke mme erọn̄ en̄wen ẹbok ọtọkiet.—Ediyarade 7:9; Matthew 13:24-30.

17. Didie ke mme anam-akpanikọ Christian oro ẹyetde aran ‘ẹkedụk ke idara ọbọn̄ mmọ’?

¹⁷ Ini idọk edi ini idara. (Psalm 126:5b, 6) Do, odot nte ke 1919 emi Jesus ọkọnọde mme anam-akpanikọ nditọete esie oro ẹyetde aran mbiomo oro okponde, enye ọkọdọhọ ete: “Afo akanam akpanikọ ke se mîwakke; nyenịm fi ekpeme ediwak n̄kpọ; dụk ke idara ọbọn̄ fo.” (Matthew 25:21, 23; sịghisịghi ubọkn̄wed edi eke nnyịn) Akan oro, inua nnyịn ikemeke nditịn̄ idatesịt emi Eteufọk oro enyenede nte obufa Edidem Obio Ubọn̄ Abasi. (Psalm 45:1, 2, 6, 7) Otu asan̄autom emi anamde akpanikọ abuana ke idatesịt oro ke ndida ke ibuot Edidem oro nnyụn̄ nnam inyene esie ọtọt ke isọn̄. (2 Corinth 5:20) Ntịn̄nnịm ikọ Isaiah 61:10 emi owụt idatesịt mmọ: “Nyadat esịt eti-eti ke Jehovah, ukpọn̄ mi eyebre aban̄a Abasi mi: koro enye emesịne mi edisịnen̄kpọ edinyan̄a ke idem.”

18. Nso ikanam ndusụk owo ẹkûbe udomo, ndien ye nso utịp?

¹⁸ Ke mfụhọ, ndusụk mmọ ikebehe udomo. Nnyịn ikot ite: “Ndien owo emi ọkọbọde talent kiet edi edidọhọ ete, Ọbọn̄, mmọfiọk fi, nte afo edi owo nsọn̄ido, ọdọdọk ke ọtọ nte mûkọtọhọ, onyụn̄ atatan̄ ke ọtọ nte mûkasuanke; ndien ndịk anam mi, nnyụn̄ ndaha n̄kedịp talent fo ke isọn̄: se, . . . se inyenede fi do.” (Matthew 25:24, 25) Kpasụk ntre, ndusụk mme Christian oro ẹyetde aran ikamaha nditiene ‘nnyam urua.’ Mmọ ikabuanake idotenyịn mmọ ye mbon efen mbemiso 1914, mmọ ikonyụn̄ iben̄eke idem nditọn̄ọ emi ke 1919. Didie ke Jesus akanam n̄kpọ aban̄a usọn̄enyịn mmọ? Enye ama ọbọ mmọ kpukpru ifetutom. Ẹma ẹtomo mmọ ẹduọn̄ọ ke ‘ekịm ke an̄wa, do ke editua eyet ye edita edet mmọ ẹdidu.’—Matthew 25:28, 30.

Udomo ke Aka Iso

19. Ke nso usụn̄ ke udomo oro osụk aka iso, ndien nso ke mme Christian oro ẹyetde aran ẹbiere ndinam?

¹⁹ Edi akpanikọ, ata ediwak mbon oro ẹdide mme asan̄autom Christ oro ẹyetde aran ke utịt ini emi ikọtọn̄ọke kan̄a ndinam n̄kpọ Jehovah ke ini Jesus ọkọtọn̄ọde udomo esie ke 1918. Nte owo ikodomoke mmọ? Ihih. Udomo oro akakam ọtọtọn̄ọ ke 1918 ye 1919, ke ini asan̄autom emi anamde akpanikọ, onyụn̄ enyenede ọniọn̄ nte otu ekebede udomo oro. Christian kiet kiet emi ẹyetde aran ayaka iso osobo udomo emi tutu ẹfịk mmọ idiọn̄ọ. (Ediyarade 7:1-3) Ke ẹfiọkde emi, nditọete Christ oro ẹyetde aran ẹbiere ndika iso ‘nnyam urua.’ Mmọ ẹbiere ndinyene ọniọn̄, ndinyene aran emi ekemde man un̄wana mmọ aka iso ayama. Mmọ ẹfiọk ẹte ke Jesus ayada owo mmimọ ekededi oro anamde akpanikọ tutu esịm n̄kpa, aka heaven.—Matthew 24:13; John 14:2-4; 1 Corinth 15:50, 51.

20. (a) Nso ke mme erọn̄ en̄wen ẹbiere ndinam mfịn? (b) Nso ke mme Christian oro ẹyetde aran ẹfiọk?

 ²⁰ Akwa otuowo eke mme erọn̄ en̄wen ẹkpebe nditọete mmọ oro ẹyetde aran. Mmọ ẹdiọn̄ọ ke ifiọk oro mmimọ inyenede iban̄a uduak Abasi asan̄a ye mbiomo. (Ezekiel 3:17-21) Ntem ye un̄wam Ikọ Jehovah ye edisana spirit esie, se mmọ ẹkpepde ke Bible ye ke mme mbono esop Christian iyakke aran mmọ okụre. Ndien mmọ ẹyak un̄wana mmọ ayama, ẹbuanade ke utom edikwọrọ ikọ ye edikpep owo n̄kpọ, ke ntem ẹtienede nditọete mmọ oro ẹyetde aran ‘ẹnyam urua.’ Nte ededi, mme Christian oro ẹyetde aran ẹtịm ẹfiọk ẹte ke ẹkeyak talent oro ẹsịn mmimọ ke ubọk. Mmọ ẹnyene ndinam ibat ke nte ẹdade inyene Ọbọn̄ ẹnam n̄kpọ ke isọn̄. Okposụkedi mmọ mîwakke aba, mmọ isanake mbiomo mmọ ofụri ofụri inọ akwa otuowo. Ke ẹtide emi, asan̄autom emi anamde akpanikọ, onyụn̄ enyenede ọniọn̄ aka iso ndida usụn̄ ke ndise mban̄a mbubehe Edidem, owụtde esịtekọm aban̄a ibetedem oro ifịk ifịk akwa otuowo ẹnọde. Akwa otuowo ẹfiọk mbiomo emi nditọete mmọ oro ẹyetde aran ẹbiomde ẹnyụn̄ ẹdara ifet edinam utom ke idak ndausụn̄ mmọ.

21. Ewe item ekenyene n̄kpọ ndinam ye kpukpru Christian mbemiso 1919 tutu esịm eyo nnyịn?

²¹ Ke ntre, okposụkedi n̄ke iba emi ẹsịnde un̄wana ke mme n̄kpọntịbe emi ẹkedade itie ke n̄kpọ nte 1919, mmọ ẹnyene ebuana ye kpukpru mme ata Christian ke ukperedem ini emi. Ke ntem, ke adan̄aemi item oro Jesus ọkọnọde ke utịt n̄ke nditọiban duop ebemde iso enyene n̄kpọ ndinam ye mme Christian oro ẹyetde aran oro ẹkedude mbemiso 1919, edumbet esie osụk enyenyene n̄kpọ ndinam ye kpukpru mme Christian. Kpukpru nnyịn ndien ikpakam inam mme ikọ Jesus emi: “Ẹkpeme ndien, koro mbufo mîfiọkke usen m̀mê hour.”—Matthew 25:13.

[Mme Ikọ idakisọn̄]

Nte Afo Emekeme Ndinam An̄wan̄a?

• Ini ewe ke Jesus ekedi edidụn̄ọde se mme anditiene enye ẹkenamde, ndien nso ke enye okokụt?

• Ntak emi ndusụk Christian oro ẹyetde aran ẹkenyenede edu “idiọk asan̄autom”?

• Didie ke nnyịn ikeme ndiwụt nte ke nnyịn idi ọniọn̄ ke n̄kan̄ eke spirit?

• Ke ndikpebe mme anam-akpanikọ nditọete Jesus, ke nso usụn̄ ke nnyịn ikeme ‘ndika iso nnyam urua’?

[Mme Mbụme Ukpepn̄kpọ]

[Ekebe ke page 16]

INI EWE KE JESUS EDI?

Ke Matthew ibuot 24 ye 25, ẹdọhọ ke Jesus “edidi” ke nsio nsio usụn̄. Enye inyeneke ndikpọn̄ heaven nsụhọde ‘ndi’ isọn̄. Utu ke oro, “edidi” esie ọwọrọ ediwọn̄ọde ntịn̄enyịn nse ubonowo m̀mê mme anditiene enye, man ọnọ ubiereikpe. Ntem, ke 1914, enye ama ‘edi’ man editọn̄ọ edidu esie nte Edidem oro ẹdoride ke ebekpo. (Matthew 16:28; 17:1; Utom 1:11) Ke 1918, enye ama ‘edi’ nte angel ediomi onyụn̄ ọtọn̄ọ ndikpe ikpe nnọ mbon oro ẹdọhọde ke inam n̄kpọ Jehovah. (Malachi 3:1-3; 1 Peter 4:17) Ke Armageddon, enye ‘eyedi’ ndibiere ikpe nnọ mme asua Jehovah.—Ediyarade 19:11-16.

Edidi oro ẹtịn̄de ẹban̄a ediwak ini ke Matthew 24:29-44 ye 25:31-46 edi ke “akwa ukụt.” (Ediyarade 7:14) Ke n̄kan̄ eken, edidi oro ẹtịn̄de ẹban̄a ediwak ini ke Matthew 24:45 esịm 25:30 enyene n̄kpọ ndinam ye ndikpe ikpe nnọ mbon oro ẹdọhọde ke idi mbet esie ọtọn̄ọde ke 1918 ka iso. Ke uwụtn̄kpọ, idiwụtke ifiọk ndidọhọ ke ẹdinọ anam-akpanikọ asan̄autom oro utịp, ẹdinyụn̄ ẹbiere ikpe ẹnọ ndisịme nditọiban oro ye asan̄autom ifu oro ekedịpde talent Eteufọk esie, ke ini Jesus ‘edidide’ ke akwa ukụt. Oro ọkpọwọrọ ke ediwak mbon oro ẹyetde aran idinamke akpanikọ ke ini akwa ukụt, ke ntre oyoyom ẹkpụhọ mmọ. Nte ededi, Ediyarade 7:3 owụt nte ke etisịm ini oro, ‘ẹyefịk’ kpukpru mme asan̄autom Christ oro ẹyetde aran ‘idiọn̄ọ.’

[Ndise ke page 14]

“Idiọk asan̄autom” oro ikọbọhọ edidiọn̄ ke 1919

[Ndise ke page 15]

Nditọiban oro ẹkedide asian ẹma ẹben̄e idem ke ini ebendọ ekedide

[Ndise ke page 17]

Asan̄autom emi anamde akpanikọ ama “anyam urua”

Idiọk asan̄autom oro ‘ikanyamke urua’

[Mme ndise ke page 18]

Mbon oro ẹyetde aran ye “akwa otu owo” ẹka iso ndiyak un̄wana mmọ ayama