Ata Ido Ukpono Christ ke Ọkọri
Ata Ido Ukpono Christ ke Ọkọri
UTOM ukwọrọikọ Jesus Christ ama otụk ofụri ererimbot ke akpa isua ikie. Etop esie ama edemede mme owo udọn̄, ọnọ un̄wana, onyụn̄ otụk mmọ ke ata ndyọ ndyọ usụn̄. Ikọ esie ama enen̄ede otụk ediwak mbon oro ẹkekpan̄de utọn̄ ẹnọ enye.—Matthew 7:28, 29.
Jesus ama esịn ndibuana ke ukara ufịk ido ukpono ye eke ukaraidem eyo esie ndien emi ama anam mme usụhọde owo ẹkeme ndisan̄a n̄kpere enye. (Matthew 11:25-30) Enye ama etịn̄ in̄wan̄-in̄wan̄ aban̄a nte ndiọi spirit ẹkopde odudu ke isọn̄ onyụn̄ owụt ke Abasi ọnọ imọ odudu ndikan mmọ. (Matthew 4:2-11, 24; John 14:30) Jesus ama ada usọ owụt nte ke idiọkn̄kpọ edi ntak ndutụhọ, onyụn̄ ada ima ima usụn̄ owụt ke Obio Ubọn̄ Abasi edida nsinsi ubọhọ idi. (Mark 2:1-12; Luke 11:2, 17-23) Enye ama osio ekịm oro mîkayakke mme owo ẹtịm ẹfiọk Ete esie efep ofụri ofụri, ayararede enyịn̄ Abasi ọnọ mbon oro ẹkeyomde ndinyene ọkpọkpọ itie ebuana ye Enye.—John 17:6, 26.
Ke ntre, ikpaha owo idem nte mme mbet Jesus ẹkesuande okopodudu etop esie usọp usọp ntre kpa ye ọkpọsọn̄ ukọbọ oro okotode ukara ye ido ukpono. Ke n̄kpọ nte isua 30 kpọt, ẹma ẹsiak esop Christian oro ọsọn̄de idem ke Africa, Asia, ye Europe. (Colossae 1:23) Mmemmem akpanikọ oro Jesus ekekpepde ama esịn un̄wana ke esịt mbon nsụhọdeidem oro ẹkenyenede eti esịt ke ofụri Obio Ukara Rome.—Ephesus 1:17, 18.
Nte ededi, didie ke kpukpru mbufa mbet emi ẹkenyenede nsio nsio edu, mîkonyụn̄ inyeneke n̄kpọ ukem ukem, ẹkesemde nsio nsio usem, ẹkenyụn̄ ẹdude ke nsio nsio ido ukpono ke mbemiso ẹkekeme ndinyene “mbuọtidem kiet,” nte apostle Paul eketịn̄de? (Ephesus 4:5) Mmọ ẹdisan̄a didie “ẹnyene ikọ-inua kiet” man ubahade okûdu ke otu mmọ? (1 Corinth 1:10) Ke ikerede iban̄a akwa ubahade oro odude mfịn ke otu inua-okot Christian, ọfọn idụn̄ọde se Jesus ke idemesie ekekpepde.
Se Inamde Mme Christian Ẹdiana Kiet
Ke ini akadade ke ikpe ke iso Pontius Pilate, Jesus ama etịn̄ se inamde mme Christian ẹdiana kiet. Enye ọkọdọhọ ete: “N̄kamana kaban̄a ntak emi, n̄konyụn̄ ndụk ke ererimbot kaban̄a n̄kpọ emi, man ndi ntiense nnọ akpanikọ. Kpukpru mmọ eke ẹdide eke akpanikọ ẹkop uyo Mi.” (John 18:37) Ntre, se inen̄erede inam mme ata mbet Christ ẹdiana kiet edi ndinyịme ukpepn̄kpọ Jesus ọkọrọ ye kpukpru se idude ke Ikọ Abasi oro ẹkedade odudu spirit Abasi ẹwet, kpa Bible.—1 Corinth 4:6; 2 Timothy 3:16, 17.
Nte ededi, ini ẹsidu oro mme mbet Jesus ẹnyenede nti mbụme ndibụp m̀mê ẹnenide ndusụk n̄kpọ ke otu idemmọ. Nso idin̄wam mmọ? Jesus ama anam an̄wan̄a ete: “Ke adan̄aemi Enye oro edidide, kpa Spirit akpanikọ, Enye ayada mbufo odụk ke ofụri akpanikọ: koro Enye iditịn̄ke ikọ Esiemmọ; edi editịn̄ kpukpru se Enye okokopde: Enye oyonyụn̄ emen se iditịbede ayarade ọnọ mbufo.” (John 16:12, 13) Ntem, edisana spirit Abasi ayan̄wam mme ata mbet Jesus ndifiọk akpanikọ nte Abasi ayararede enye sụn̄sụn̄. Ke adianade do, spirit oro oyosion̄o mme utọ mbun̄wụm nte ima, idatesịt, ye emem, ndien oro ayanam edidianakiet odu ke otu mmọ.—Utom 15:28; Galatia 5:22, 23.
Jesus ikayakke n̄kpọ ndomokiet odu oro edidemerede utọk m̀mê editọde ubahade ke otu mbet esie; enye ikonyụn̄ inọhọ mmọ odudu ndikpep akpanikọ Bible ntiene ido edinam m̀mê ido ukpono mbon oro mmọ ẹdisobode. Utu ke oro, ke akpatre okoneyo oro enye okodude ye mmọ, enye ama ọbọn̄ akam ifịk ifịk ete: “Mben̄eke mban̄a mmọ emi ikpọn̄, edi mben̄e mban̄a mmọ nde eke ẹbuọtde idem ye Ami oto ke ikọ mmọ, man mmọ kpukpru ẹkpekam ẹdi kiet, nte Afo, Ete, odude Mi ke idem, Ami nnyụn̄ ndude ke Afo; man mmọ ẹnyụn̄ ẹdu ke nnyịn: man ererimbot enịm ke akpanikọ ete, edi Afo ọkọdọn̄ Mi.” (John 17:20, 21) Do, ata edidianakiet ke spirit ye ke akpanikọ ke ẹkenyene ndida ndiọn̄ọ mme mbet Christ toto ke ntọn̄ọ Ido Ukpono Christ tutu esịm ini nnyịn. (John 4:23, 24) Nte ededi, mme ufọkabasi mfịn ẹdu ke ubahade, utu ke ndidiana kiet. Nso idi ntak?
Ntak Emi Mme Ufọkabasi Ẹbaharede
Ata akpan ntak oro nsio nsio ukpepn̄kpọ ye edinam ẹyọhọde mfịn ke otu mme inua-okot Christian edi koro mmọ mîsọn̄ọke iyịre ke ukpepn̄kpọ Jesus. Ewetn̄wed kiet ekewet ete: “Kpa nte ekedide ke eset, mfịn mbufa Christian ẹwak ndinyịme sụk se Bible etịn̄de oro mmọ ẹmade—ẹnyụn̄ ẹsịn ikọ Bible ekededi oro atuahade ye edinam ido ukpono mmọ.” Oro edi ata ukem ukem se Jesus ye mme apostle esie ẹkedọhọde ke eyetịbe.
Ke uwụtn̄kpọ, spirit Abasi ama onụk apostle Paul ndiwet ekemmọ esenyịn oro Timothy ete: “Ini ọmọn̄ edi eke mme owo mîdibọhọ eti ukpep-n̄kpọ; ndien sia utọn̄ edebede mmọ ndikop isio ikọ, mmọ ẹyekọ mme andikpep ẹnọ idem nte ekemde ye mme idiọk udọn̄ mmọ, ẹyenyụn̄ ẹsio utọn̄ ẹfep ke akpanikọ, ẹnyụn̄ ẹwọn̄ọde ẹbịne ikpîkpu mbụk.” Ndi ẹdibian̄a kpukpru mme Christian? Baba. Paul ama aka iso ete: “Edi ama edi afo, fara ke idem [m̀mê, du ke edidemede] ke kpukpru n̄kpọ, biom ukụt, nam utom ọkwọrọ-gospel, nam utom fo ma.” (2 Timothy 4:3-5; Luke 21:8; Utom 20:29, 30; 2 Peter 2:1-3) Timothy ye mme anam-akpanikọ Christian eken ẹma ẹdu uwem ekekem ye item eke odudu spirit emi.
Mme Ata Christian ke Ẹsụk Ẹdadiana Kiet
Ukem nte Timothy, edidu ke edidemede anam mme ata Christian mfịn ẹsịn ifiọk owo edi ẹda N̄wed Abasi kpọt nte n̄kukụre nsọn̄ọ ukpepn̄kpọ mmọ. (Colossae 2:8; 1 John 4:1) Ke ndikpebe mme Christian eke akpa isua ikie, Mme Ntiense Jehovah ke ẹnam utom ukwọrọikọ mmọ ke se ibede idụt 230, ẹdade akpasarade etop Jesus, kpa eti mbụk Obio Ubọn̄, ẹsọk mme owo ke kpukpru ebiet. Kere ban̄a akpan usụn̄ inan̄ oro mmọ ẹdianade kiet ẹkpebe Jesus ẹnyụn̄ ẹwụtde ke idi ata Ido Ukpono Christ inamke n̄kpọ m̀mê m̀mọ̀n̄ ke mmọ ẹdụn̄.
Mme ukpepn̄kpọ mmọ ẹkọn̄ọ ke Ikọ Abasi. (John 17:17) Oku ederi kiet ke Belgium ekewet aban̄a mmọ ete: “N̄kpọ kiet emi ikemede ndikpep nto [Mme Ntiense Jehovah] edi mmọ ndinam Ikọ Abasi ye uko mmọ ke nditie ntiense mban̄a enye.”
Mmọ ẹdori enyịn ke Obio Ubọn̄ Abasi nte usọbọ mme mfịna ererimbot. (Luke 8:1) Ke Barranquilla, Colombia, Ntiense kiet ama enyene nneme ye Antonio, emi edide owo oro enen̄erede esịn idem ke mbre ukara. Ntiense emi ikadaha inọ ndutịm mbre ukara oro Antonio ekesịnede, ikonyụn̄ idaha inọ ndutịm ukaraidem efen. Utu ke oro, enye ọkọdọhọ ke imọn̄ ikpep Bible ye Antonio ye nditọeka esie iban ke mfọn. Ke mîbịghike, Antonio ama edifiọk ke Obio Ubọn̄ Abasi enen̄ede edi n̄kukụre idotenyịn ọnọ mme ubuene ke Colombia ye ke mme ikpehe eken ke ererimbot.
Mmọ ẹkpono enyịn̄ Abasi. (Matthew 6:9) Ke akpa ini oro Mme Ntiense Jehovah ẹkesobode ye Maria, eyenan̄wan Catholic oro enyenede esịt akpanikọ onyụn̄ odụn̄de ke Australia, enye ama ayak Mme Ntiense oro ẹwụt enye enyịn̄ Abasi ke Bible. Didie ke enye akanam n̄kpọ? Enye ọkọdọhọ: “Ke ini n̄kokụtde enyịn̄ Abasi ke Bible, mma ntua eyet. Ndifiọk nte ke Abasi enyene enyịn̄ ye nte ke mmekeme ndikot ọkpọkpọ enyịn̄ esie ama otụk mi.” Maria ama aka iso ndikpep Bible, ndien emi ekedi akpa ini oro enye ekedide edifiọk utọ owo emi Jehovah edide, emi n̄ko ama an̄wam enye ndikọri itie ebuana oro ebịghide ye enye.
Ima adian mmọ ọtọkiet. (John 13:34, 35) N̄wedmbụk n̄kpọntịbe Canada oro The Ladysmith-Chemainus Chronicle, ọkọdọhọ ete: “Inamke n̄kpọ m̀mê emesika ufọkabasi m̀mê usukaha, afo enyene nditoro Mme Ntiense Jehovah 4,500 oro ẹkenamde utom okoneyo ye uwemeyo urua kiet ye ubak oro ẹkebede ndibọp Ufọk Mbono oro okponde ke mita 2,300 ke Cassidy . . . Ndinam emi idara idara ye unana mfan̄a, utọk m̀mê ndiyom ubọn̄ nnọ idem edi idiọn̄ọ ata Ido Ukpono Christ.”
Ntre kere ban̄a uyarade oro odude. Ke adan̄aemi mme ekpep ukpepn̄kpọ ido ukpono Christendom, mme isụn̄utom mmọ, ye mme aka ufọkabasi ẹkade iso ndin̄wana ye ndutịme oro asakde iso ese ufọkabasi mmọ, ata Ido Ukpono Christ ke ọkọri ke ofụri ekondo. Ke akpanikọ, mme ata Christian ke ẹnam utom edikwọrọ ye edikpep Ikọ Abasi oro ẹkedọn̄de mmọ. (Matthew 24:14; 28:19, 20) Edieke afo esịnede ke otu mbon oro “ẹsemede ẹnyụn̄ ẹtuade” ẹban̄a mme mbubiam ido emi ẹnamde idahaemi, onyụn̄ okopde editịmede esịt aban̄a ubahade oro odude ke ido ukpono Christendom, nnyịn imọnọ fi ikot ndibuana ye Mme Ntiense Jehovah ke ndituak ibuot nnọ ata Abasi kierakiet, kpa Jehovah, nte mme Christian oro ẹdianade kiet.—Ezekiel 9:4; Isaiah 2:2-4.