Mme Asan̄autom Abasi Ẹbiet Eto—Didie?

KE ETỊN̄DE aban̄a owo emi mme edumbet Bible ẹdatde enye esịt, enye onyụn̄ adade mme edumbet emi odu uwem, andiwet Psalm ọdọhọ ete: “Enye ebiet eto eke ẹtọde ke mben akpa mmọn̄, eke osion̄ode mfri esie ke ekem ini; ikọn̄ esie inyụn̄ iken̄eke; ndien kpukpru se enye anamde ọwọrọ usụn̄.” (Psalm 1:1-3) Ntak odotde ndimen owo ndomo ye eto?

Mme eto ẹkeme ndidu uwem ke ata anyan ini. Ke uwụtn̄kpọ, ẹdọhọ ke ndusụk eto olive emi ẹdude ke ikpehe Mediterranean ẹdu uwem tọn̄ọ ke isua tọsịn kiet ẹsịm iba. Ukem ntre, mme ukịm emi ẹdude ke ufọt ufọt Africa ẹsidu uwem ẹbịghi etieti, ndien ẹdọhọ ke eto ofụm oro odude ke California odu uwem ke n̄kpọ nte isua 4,600. Ikpọ eto ẹsinyene ufọn ẹnọ akai. Ke uwụtn̄kpọ, nnyan eto ẹsisio mfụt ẹfụk n̄kpri eto, ndien mme ikọn̄ emi ẹken̄ede ke eto ẹsinọ isọn̄ udia.

Ẹsiwak ndikụt mme eto oro ẹniọn̄de ẹkan ke ererimbot ẹkọride ọtọkiet ke akai, ndien eto kiet kiet esinọ kiet eken un̄wam. Sia orụn̄ mmọ ẹsikọmọde ye kiet eken, mme eto emi ẹkeme ndisọn̄ọ nda ke ini oyobio ẹkan eto kiet emi adade ikpọn̄. Ikpọ orụn̄ n̄ko ẹsinam eto enyene mmọn̄ ye udia oro ekemde oto isọn̄. Ke ndusụk idaha, orụn̄ oro odụkde isọn̄ esiniọn̄ akan idem eto, m̀mê nditara n̄kan mme n̄kọk eto oro.

Ekeme ndidi apostle Paul ekenyene eto ke ekikere ke ini enye ọkọdọhọde ke mme Christian ẹkpenyene ‘ndisan̄a ke Christ, mmụm n̄kam, nnyụn̄ n̄kọri ndaha nda ke Enye, nnyụn̄ ndọdiọn̄ nsọn̄ọ nda ke mbuọtidem.’ (Colossae 2:6, 7) Ke akpanikọ, mme Christian ẹkeme ndisọn̄ọ nda n̄kukụre edieke mmọ ẹmụmde n̄kam ke Christ.—1 Peter 2:21.

Ke mme usụn̄ efen ewe ke ẹkeme ndimen mme asan̄autom Abasi ndomo ye eto? Nte ededi, nte mme eto oro ẹdade ọtọkiet ẹsinọde kiet eken un̄wam, kpukpru mbon emi ẹdude ke esop Christian ẹsinyene un̄wam ẹto ekemmọ mme andinịm ke akpanikọ. (Galatia 6:2) Mme anam-akpanikọ Christian oro ẹkọride ẹsịm ọyọhọ idaha, ẹnyụn̄ ẹnen̄erede ẹdọn̄ n̄kam ke n̄kan̄ eke spirit, ẹsin̄wam mbufa mme andinịm ke akpanikọ ndisọn̄ọ nda ke mbuọtidem, idem ke ini ọkpọsọn̄ ubiọn̄ọ. (Rome 1:11, 12) Mbufa mme Christian ẹkeme ndikọri ke idak “mfụt” ukpeme otode mme asan̄autom Abasi emi ẹma ẹkedu ke esop ẹbịghi. (Rome 15:1) Ndien kpukpru mme andibuana ke esop Christian ke ofụri ererimbot ẹbọ ufọn ẹto ọnọ-nsịnudọn̄ udia eke spirit emi otode “ofriyo eti ido,” kpa mme nsụhọ oro ẹyetde aran.—Isaiah 61:3.

Edi n̄kpọ inemesịt didie ntem nte ke kpukpru mme asan̄autom Abasi ẹnyene idotenyịn edikụt nte un̄wọn̄ọ emi odude ke Isaiah 65:22 osude, emi ọdọhọde ete: ‘Usen ikọt mi edibiet usen eto.’

[Ebiet Ẹdade Ndise Ẹto ke page 28]

Ndise-Godo