Mme Mbụme Ẹtode Mme Andikot

Sia mme Levite mîkenyeneke udeme isọn̄ ndomokiet ke Israel eset, owo Levite oro Hanamel akasan̄a didie anyam in̄wan̄ ọnọ Jeremiah eyen eyeneka ete esie emi ekedide Levite n̄ko, nte ẹtịn̄de ke Jeremiah 32:7?

Kaban̄a mme Levite, Jehovah ọkọdọhọ Aaron ete: “Afo udunyeneke udeme ke isọn̄ [Israel], udunyụn̄ unyeneke ubak ke otu mmọ.” (Numbers 18:20) Kpa ye oro, ẹma ẹnọ mme Levite obio 48 ọkọrọ ye mben isọn̄ mme obio emi, oro ẹkedude ke nsio nsio itie ke Isọn̄ Un̄wọn̄ọ oro. Obio emana Jeremiah ekedi Anathoth, kpa kiet ke otu mme obio oro ẹkenọde “nditọ Aaron, mme oku.”—Joshua 21:13-19; Numbers 35:1-8; 1 Chronicles 6:54, 60.

Ke Leviticus 25:32-34, nnyịn imokụt ke Jehovah ama ọnọ mme akpan item ẹban̄ade ‘unen edifak’ inyene mme Levite. Nte an̄wan̄ade, mme ubon Levite kiet kiet ẹma ẹnyene unen edinyene isọn̄, edida isọn̄ oro nnam n̄kpọ, ye edinyam enye. Utọ unen oro ama abuana edinyam ye edifak inyene. * Ke ediwak usụn̄, mme Levite ẹma ẹnyene inyene ẹnyụn̄ ẹda inyene mmọ ẹnam n̄kpọ nte mme esien Israel eken.

Eyedi utọ inyene Levite oro ekedi n̄kpọ-akpa ubon. Nte ededi, kaban̄a ‘unen edifak,’ ẹma ẹnyịme mme Levite ẹnam mbubehe emi ke ufọt idemmọ kpọt. N̄ko, etie nte ẹkenyam ẹnyụn̄ ẹfak isọn̄ ke esịt obio kpọt, koro owo ikenyeneke ndinyam ‘in̄wan̄ emi akakande obio mmọ okụk: koro enye ekedide nsinsi udeme mmọ.’—Leviticus 25:32, 34.

Ntem, etie nte in̄wan̄ oro Jeremiah akafakde ke ubọk Hanamel ekedi enye oro ẹkekemede ndifak. Eyedi in̄wan̄ emi okodu ke esịt obio oro. Jehovah ke idemesie ama ọsọn̄ọ ke “in̄wan̄” oro ẹtịn̄de ẹban̄a mi ekenyene Hanamel ndien ke Jeremiah ama ‘enyene unen ndifak’ in̄wan̄ oro. (Jeremiah 32:6, 7) Jehovah akada mbubehe emi ke ndamban̄a usụn̄ ndisọn̄ọ un̄wọn̄ọ esie nte ke nditọ Israel ẹyefiak ẹdida isọn̄ mmọ ẹnyene ke ini mmọ ẹnyọn̄de ntan̄mfep ke Babylon ẹdi.—Jeremiah 32:13-15.

N̄kpọ ndomokiet idụhe ndiwụt ke Hanamel ekedinyene isọn̄ ke Anathoth ke idiọk usụn̄. N̄kpọ ndomokiet inyụn̄ idụhe ndiwụt ke enye ama abiat ibet Jehovah ke ndidọhọ Jeremiah edep in̄wan̄ emi ke Anathoth, mîdịghe ke Jeremiah akada unen edifak esie anam n̄kpọ ke idiọk usụn̄ ke ndidep in̄wan̄ emi.—Jeremiah 32:8-15.

[Ikọ idakisọn̄]