Nte Mbuọtidem Ekeme Ndikọk Udọn̄ọ?

KE INI idọn̄ọde, nnyịn imesiyom udọn̄ọ oro okụre nnyịn. Eyedi afo omokụt ke Bible nte ke ediwak ini Jesus Christ ama esikọk kpukpru orụk udọn̄ọ, anamde udọn̄ọ okụre ediwak owo. Ẹkesan̄a didie ẹkọk mme udọn̄ọ emi? Bible ọdọhọ ke ẹkeda “odudu Abasi.” (Luke 9:42, 43, NW; Utom 19:11, 12) Ntem, edi edisana spirit Abasi ke ẹkeda ẹnam udọn̄ọ okụre mme owo, ikedịghe sụk mbuọtidem mbon udọn̄ọ. (Utom 28:7-9) Ntak edi oro Jesus mîkebetke tutu mbon udọn̄ọ ẹwụt ke imọbuọt idem ke imọ mbemiso enye ọkọkde mmọ udọn̄ọ.

Afo emekeme ndibụp: ‘Nte utịbe utịbe ukọkudọn̄ọ idụhe aba idahaemi, mîdịghe nte ẹyefiak ẹnam mme utọ ukọkudọn̄ọ oro Jesus ekesinamde? Nso idotenyịn idu inọ mbon oro ẹdọn̄ọde ubiak ubiak udọn̄ọ m̀mê udọn̄ọ oro owo mîkemeke ndikọk?’

Bible anam an̄wan̄a nte ke edinen obufa ererimbot Abasi, ẹyefiak ẹda odudu Abasi ẹnam mme utọ utịbe utịbe ukọkudọn̄ọ oro Jesus ekesinamde ke ini enye okodude ke isọn̄. Mme Ntiense Jehovah ke n̄kann̄kụk mbufo ẹyekop inemesịt ndiwụt fi usụn̄ ye ini emi Abasi edinamde se ọkọkudọn̄ọ mbuọtidem ndomokiet mîkemeke ndinam—ndisio kpukpru orụk udọn̄ọ ye n̄kpa mfep. Ih, Abasi “eyemen n̄kpa ke nsinsi.”—Isaiah 25:8.