Nte Nnyịn Iwụtde Ima Oro Imade Abasi
Nte Nnyịn Iwụtde Ima Oro Imade Abasi
NDIMA Abasi idịghe ikpîkpu edikpep n̄kpọ mban̄a enye. Nte mme asan̄autom Abasi ke ofụri ererimbot ẹkemede ndiwụt, ata ima oro ẹmade Abasi esikọri nte owo edide edifiọk edu Abasi, ndien ima oro esinen̄ede ọkọri ke ini owo etịmde ọfiọk se Abasi amade, se enye asuade, ye se enye oyomde.
Ke ima, Jehovah ọmọnọ nnyịn Ikọ esie, kpa Bible, emi enye adade ayarade idemesie ọnọ nnyịn. Do ke nnyịn ikụt nte Jehovah akanamde n̄kpọ ke nsio nsio idaha. Ukem nte leta oro ibọde ito owo ima nnyịn ekemede ndinen̄ede nnọ nnyịn inemesịt, kpasụk ntre ke Bible esinọ nnyịn inemesịt nte nnyịn ikụtde ẹyararede mbufa edu Jehovah ẹnọ nnyịn.
Nte ededi, nte nnyịn isiwakde ndikụt ke ini inamde utom ukwọrọikọ, idịghe kpukpru ini ke owo ndikpep n̄kpọ mban̄a Abasi esinam enye ama Abasi. Jesus ọkọdọhọ ndusụk mme Jew eyo esie oro ẹkenanade esịtekọm ete: ‘Mbufo ẹdụn̄ọde N̄wed Abasi koro mbufo ẹsede ẹte oro ayanam mmimọ inyene nsinsi uwem; edi mmọdiọn̄ọ nte mbufo inyeneke ima Abasi ke esịt mbufo.’ (John 5:39, 41, 42) Ndusụk owo ẹbiat ediwak isua ẹkpep ẹban̄a mme ima ima edinam Jehovah edi itịmke inyene ima inọ enye. Ntak-a? Mmọ ikereke iban̄a se mme n̄kpọ oro mmọ ẹkpepde ẹwọrọde. Ke edide isio, ediwak miliọn owo oro nnyịn ikpepde Bible ẹkụt ke ima oro mmimọ imade Abasi ke aka iso ndikọri. Ntak-a? Koro mmọ ẹtienede uwụtn̄kpọ Asaph kpa nte nnyịn iketienede. Ke nso usụn̄?
Da Esịtekọm Tie Kere
Asaph ama ebiere ndima Jehovah ke esịt esie. Enye ekewet ete: “Nyeneme ye esịt mi, . . . Nyatan̄ [ase] Jehovah: koro nyeti mme Psalm 77:6, 11, 12) Ima Abasi ọyọkọri ke esịt owo oro ekerede mme usụn̄ Jehovah nte andiwet psalm ekekerede.
utịbe n̄kpọ fo ke eset. Nyekere kpukpru se afo anamde, nyonyụn̄ n̄kere utom fo.” (Ke adianade do, nditi mme ifiọkutom oro inyenede ke utom oro inamde inọ Jehovah ọyọsọn̄ọ itie ebuana nnyịn ye enye. Apostle Paul ọkọdọhọ ke nnyịn “isan̄a ikpat kiet idi mme anam-utom” m̀mê nsan̄autom Abasi, ndien itie ufan emi mme nsan̄autom ẹsinyenede esinen̄ede enem. (1 Corinth 3:9) Ke ini nnyịn iwụtde ke imama Jehovah, enye esima oro, ndien oro esinam esịt esie adat. (Mme N̄ke 27:11) Ndien ke ini nnyịn iben̄ede un̄wam Jehovah enye onyụn̄ ọnọ nnyịn ndausụn̄ ndikan akpan mfịna, nnyịn iyọfiọk ke enye odu ye nnyịn, ndien oro ayanam nnyịn itetịm ima enye.
Owo iba ẹsitọn̄ọ ufan ke ini mmọ ẹtịn̄de ekikere mmọ ẹnọ kiet eken. Kpasụk ntre, ke ini nnyịn itịn̄de inọ Jehovah ntak emi nnyịn isịnde idem ke utom esie, oro ọyọsọn̄ọ ima oro imade enye. Nnyịn iyọtọn̄ọ ndikere mme ikọ Jesus emi: “Afo nyụn̄ ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri ekikere fo, ye ke ofụri odudu fo.” (Mark 12:30) Nso ke nnyịn ikpanam man ikụt ite ke imaka iso ima Jehovah ke ofụri esịt, ke ofụri ukpọn̄, ke ofụri ekikere, ye ke ofụri odudu nnyịn?
Ndima Jehovah ke Ofụri Esịt Nnyịn
N̄wed Abasi etịn̄ aban̄a ndamban̄a esịt, emi edide owo esịtidem—mme udọn̄, edu uwem, ye ekikere nnyịn. Ntre, ndima Jehovah ke ofụri esịt nnyịn ọwọrọ ke ana nnyịn iyom nte ikpenemde enye esịt ikan n̄kpọ efen ekededi. (Psalm 86:11) Nnyịn ndidu uwem oro enye amade owụt ke imenyene utọ ima oro inọ enye. ‘Ndisua se idiọkde, nnyụn̄ nyịre se ifọnde’ oyowụt ke nnyịn ke idomo ndikpebe Abasi.—Rome 12:9.
Ima oro imade Abasi otụk nte nnyịn isede kpukpru n̄kpọ. Ke uwụtn̄kpọ, nnyịn imekeme ndinen̄ede n̄kop inem utom oro inamde mîdịghe enye ekeme ndibọ nnyịn ini ofụri ofụri, edi ndi ebiet emi esịt nnyịn owụhọde edi oro? Baba. Sia nnyịn imade Jehovah ke ofụri esịt nnyịn, akpa n̄kpọ ke uwem nnyịn edi ifetutom nnyịn nte mme asan̄autom Abasi. Nnyịn n̄ko iyoyom ndinem mme ete ye eka nnyịn esịt, mme nsan̄a ndọ nnyịn, mme eteutom nnyịn, edi nnyịn idiwụt ke imama Jehovah ke ofụri esịt ke ndibem iso nnem enye esịt mbemiso inemde mbon eken. Kamse, enye odot ndinyene akpa itie ke esịt nnyịn.—Matthew 6:24; 10:37.
Ndima Jehovah ke Ofụri Ukpọn̄ Nnyịn
Ke N̄wed Abasi, ikọ oro “ukpọn̄” enen̄ede ọwọrọ ofụri idem nnyịn ọkọrọ ye uwem oro nnyịn idude. Ntre ndima Jehovah
ke ofụri ukpọn̄ nnyịn ọwọrọ ndida uwem nnyịn ntoro enye nnyụn̄ n̄wụt ke imama enye.Edi akpanikọ, nnyịn imekeme ndinyene mme n̄kpọ efen oro imade ke uwem, utọ nte ndikpep utom, ndinam mbubehe, m̀mê nditọn̄ọ ubon. Edi ke ukem ini oro, nnyịn iwụt ke imama Jehovah ke ofụri ukpọn̄ ebe ke ndinam n̄kpọ nte enye amade nnyụn̄ nnịm mme n̄kpọ eken ke nnennen itie mmọ ke uwem nnyịn, ntem ‘ibemde iso iyom Obio Ubọn̄ Esie ye edinen ido Esie.’ (Matthew 6:33) Ndituak ibuot ke ofụri ukpọn̄ ọwọrọ n̄ko ndinyene ifịk. Nnyịn iwụt ke imama Jehovah ebe ke ndisịn ifịk n̄kwọrọ etop Obio Ubọn̄, inọde mme ibọrọ oro ẹbọpde-bọp ke mme mbono esop, m̀mê ndin̄wam nditọete nnyịn iren ye iban. Ke kpukpru n̄kpọ, nnyịn iyaka iso ‘ndinam se Abasi amade ye esịt kiet,’ m̀mê ke ofụri ukpọn̄.—Ephesus 6:6.
Jesus ama owụt ke imama Abasi ke ofụri ukpọn̄ ebe ke nditụk idemesie. Enye ekenịm uduak Abasi akpa ndien se enye amade ekedi udiana. Jesus ọkọdọhọ nnyịn itiene uwụtn̄kpọ imọ. Enye ọkọdọhọ ete: “Edieke owo ekededi oyomde nditiene Mi, yak enye otụk idem esie, onyụn̄ emen [“eto ndutụhọ,” NW] esie, etiene Mi.” (Matthew 16:24, 25) Nditụk idem ọwọrọ ndiyak idem nnọ. Enye ọwọrọ ke owo enen̄ede ama Abasi tutu enye ayak idemesie ọnọ enye, kpa nte eyen Israel ke eyo Bible oro ekenen̄erede ama eteufọk esie tutu ayak idemesie taktak nte ofụn ọnọ enye. (Deuteronomy 15:16, 17) Ndiyak idem nnyịn nnọ Jehovah edi ata uyarade nte ke imama enye.
Ndima Jehovah ke Ofụri Ekikere Nnyịn
Ndima Jehovah ke ofụri ekikere ọwọrọ nnyịn ndisịn ofụri ukeme ndifiọk edu Jehovah, mme uduak esie, ye mme n̄kpọ oro enye oyomde. (John 17:3; Utom 17:11) Nnyịn iwụt ke imama Jehovah ebe ke ndida kpukpru ukeme ukere n̄kpọ nnyịn n̄n̄wam mbon en̄wen nditiene mma Jehovah ye ke ndifori usụn̄ unọ ukpep nnyịn. Apostle Peter ekesịn udọn̄ ọnọ nnyịn ete: “Ẹfak ọfọn̄ esịt mbufo.” (1 Peter 1:13) Nnyịn n̄ko iyesịn ukeme ndinyene udọn̄ ke idem mbon en̄wen, akpan akpan ke idem ekemmọ mme asan̄autom Abasi. Nnyịn ikpenyene ndifiọk mme idaha mmọ inyụn̄ ifiọk ini emi oyomde ẹtoro mmọ m̀mê ini emi oyomde ẹnọ ndọn̄esịt.
Nnyịn iwụt ke imama Jehovah ke ofụri ekikere ebe ke ndinam n̄kpọ ekekem ye ekikere esie. Nnyịn idomo ndise n̄kpọ nte enye esede, ikerede iban̄a enye ke adan̄aemi inamde mme ubiere, inyụn̄ inịm ke akpanikọ nte ke usụn̄ esie ọfọn akan. (Mme N̄ke 3:5, 6; Isaiah 55:9; Philippi 2:3-7) Edi nte nnyịn ikade iso ndiwụt ke imama Abasi, didie ke nnyịn ikeme ndida odudu nnyịn n̄wụt emi?
Ndima Jehovah ke Ofụri Odudu Nnyịn
Ediwak uyen ke esop Christian ẹda odudu mmọ ẹtoro Jehovah. (Mme N̄ke 20:29; Ecclesiastes 12:1) Usụn̄ kiet oro ediwak uyen emi ẹwụtde ke imama Jehovah ke ofụri odudu mmọ edi ke ndibuana ke utom usiakusụn̄, kpa utom ukwọrọikọ uyọhọ ini. Ediwak eka nditọ ẹsibuana ke utom emi ke ini nditọ mmọ ẹdude ke ufọkn̄wed. Mme anam-akpanikọ mbiowo oro ẹsinamde utom ubọkerọn̄ ke adianade ye ndise mban̄a mme ubon mmọ ẹwụt ke mmimọ imama Jehovah ke ofụri ukpọn̄ mmimọ. (2 Corinth 12:15) Jehovah ọnọ mbon oro ẹdoride enyịn ke enye odudu, man mmọ ẹkeme ndiwụt ke imama imọ ebe ke ndida ofụri odudu mmọ ntoro enye.—Isaiah 40:29; Mme Hebrew 6:11, 12.
Ima esikọri ke ini ẹtịmde ẹbọk enye. Ke ntre, ẹyak nnyịn ika iso ndisio ini ntie n̄kere ima oro imade Jehovah. Nnyịn iyeti se Jehovah anamde ọnọ nnyịn ye ntak emi odotde nnyịn ikpono enye. Nte mme anana-mfọnmma nditọ Adam, tutu amama nnyịn ikpodotke ndinyene mme n̄kpọ “eke Abasi ekeben̄ede enịm ọnọ mmọ emi ẹmade Enye,” edi nnyịn imekeme ndiwụt ke imama Jehovah ke ofụri ukpọn̄ nnyịn. Ẹyak nnyịn ika iso ndinam ntre!—1 Corinth 2:9.
[Ndise ke page 20]
Mme edinam nnyịn ẹwụt ke imama Abasi