Edinam Oro Otụkde Fi

KE INI enye okodude ke isọn̄, Jesus Christ ama ọtọn̄ọ edinam oro akadade ukpono ọsọk Abasi. Emi ekedi n̄kukụre edinam ido ukpono oro enye ọkọnọde mme anditiene enye ewụhọ nnennen nnennen ete ẹnam. Enye ekedi Udia Mbubịteyo Ọbọn̄, oro ẹdiọn̄ọde n̄ko nte Akpatre Udia Mbubịteyo.

Yak idọhọ ke afo omokụt mme n̄kpọntịbe oro ẹdade ẹsịm edinam oro. Jesus ye mme apostle esie ẹsop idem ke ubet enyọn̄ ke Jerusalem ndidia Passover mme Jew. Mmọ ẹkụre ndidia Passover oro ekesidide ido mmọ ndidia, esịnede ọfọp eyenerọn̄, ndotndot ikọn̄, uyo eke leaven mîdụhe, ye ndatndat wine. Ẹdọhọ Judas Iscariot kpa apostle oro mînamke akpanikọ ẹte ọwọrọ, ndien ibịghike enye ọmọn̄ ada Eteufọk esie ọnọ. (Matthew 26:17-25; John 13:21, 26-30) Jesus odu ikpọn̄ ye mme anam-akpanikọ apostle esie 11. Matthew edi owo kiet ke otu mmọ.

Nte Matthew emi okokụtde n̄kpọ emi ewetde, Jesus ọtọn̄ọ Udia Mbubịteyo Ọbọn̄ ntem: “Jesus emen uyo [eke leaven mîdụhe], ọdiọn̄ onyụn̄ obụn̄, ọnọ mbet Esie ete, Ẹbọ, ẹta; emi edi ikpọkidem Mi. Ndien Enye emen cup [wine], onyụn̄ ọkọm Abasi, onyụn̄ ọnọ mmọ ete, Mbufo kpukpru ẹda ẹn̄wọn̄; koro emi edi iyịp Mi, eke ediomi, emi ẹduọkde ẹban̄a ediwak owo, man ẹfen mme idiọk-n̄kpọ mmọ.”—Matthew 26:26-28.

Ntak emi Jesus ọkọtọn̄ọde Udia Mbubịteyo Ọbọn̄? Ke ini enye akanamde emi, ntak emi enye akadade uyo eke leaven mîdụhe ye ndatndat wine? Ndi kpukpru mme anditiene Christ ẹkenyene ndidia mme n̄kpọ idiọn̄ọ emi? Ikafan̄ ke ẹkenyene ndidia Udia Mbubịteyo Ọbọn̄ emi? Ndien, nte enye enen̄ede enyene se ọwọrọde ọnọ fi?