“Nam Utom Ọkwọrọ-Gospel”

“Fara ke idem ke kpukpru n̄kpọ, . . . nam utom ọkwọrọ-gospel.”—2 TIMOTHY 4:5.

1. Nso utom ke Jesus ọkọdọn̄ mme anditiene enye?

 KE ẸTAN̄A enyịn̄ Jehovah ye mme uduak esie ke ofụri isọn̄. Emi edi koro ikọt Abasi oro ẹyakde idem ẹnọ ẹnen̄erede ẹsịn idem ke utom emi Jesus Christ ọkọdọn̄de mme anditiene enye ke ini enye ọkọdọhọde ete: “Mbufo ẹka ẹkenam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ Ete ye Eyen ye Edisana Spirit: ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo.”—Matthew 28:19, 20.

2. Esenyịn oro Timothy ọkọbọ nso item, ndien nso idi usụn̄ kiet emi mme esenyịn Christian ẹkemede ndinam utom mmọ mma?

² Mme mbet Jesus eke akpa isua ikie ẹma ẹnen̄ede ẹsịn idem ke utom emi. Ke uwụtn̄kpọ, apostle Paul ama eteme Timothy, kpa ekemmọ esenyịn Christian ete: “Nam utom ọkwọrọ-gospel, nam utom fo ma.” (2 Timothy 4:5) Mfịn, usụn̄ kiet oro esenyịn anamde utom esie ama edi ke ndidi ifịk ifịk anditan̄a Obio Ubọn̄ oro abuanade kpukpru ini ke utom ukwọrọikọ. Ke uwụtn̄kpọ, esenyịn Ukpepn̄kpọ N̄wed Esop enyene eti ifet ndida usụn̄ ke utom ukwọrọikọ nnyụn̄ nnọ mbon en̄wen ukpep. Paul ama anam utom editan̄a eti mbụk emi ẹkenọde enye, onyụn̄ an̄wam ndikpep mbon en̄wen ndikwọrọ ikọ.—Utom 20:20; 1 Corinth 9:16, 17.

Ifịk Ifịk Mme Ọkwọrọ-Gospel eke Eset

3, 4. Mme ifiọkutom ewe ke Philip ekenyene nte ọkwọrọ-gospel?

³ Ẹma ẹdiọn̄ọ akpa mme Christian nte ifịk  ifịk mme ọkwọrọ-gospel. Da ke uwụtn̄kpọ, Philip oro ekedide ọkwọrọ-gospel. Enye ekedi kiet ke otu “owo itiaba, emi ẹnyenede eti enyịn̄, ẹnyụn̄ ẹyọhọde ye Edisana Spirit ye ifiọk,” oro ẹkemekde ndideme udia ye unana asari nnọ mme ebeakpa oro ẹkesemde usem Greek ye usem Hebrew ke Jerusalem. (Utom 6:1-6) Ke ẹma ẹkekụre akpan utom oro, ukọbọ ama okonyụn̄ asuan kpukpru mme Christian ke mîbọhọke mme apostle, Philip ama adaha aka Samaria. Enye ama atan̄a eti mbụk do, ndien edisana spirit ama ọnọ enye odudu ndibịn mme demon nnyụn̄ nnam mme mbụn̄ọ ye mbon akpauben̄ ẹkop nsọn̄idem. Ediwak mbon Samaria ẹma ẹnyịme etop Obio Ubọn̄ ẹnyụn̄ ẹna baptism. Ke ẹkopde ẹban̄a emi, mme apostle ke Jerusalem ẹma ẹdọn̄ apostle Peter ye John ẹka Samaria man mme andinịm ke akpanikọ emi ẹnade baptism obufa mi ẹkpebọ edisana spirit.—Utom 8:4-17.

⁴ Ekem edisana spirit Abasi ama anam Philip okosobo ye eunuch owo Ethiopia ke usụn̄ akade Gaza. Ke Philip ama akanam ntịn̄nnịm ikọ Isaiah enen̄ede an̄wan̄a, ‘owo emi okodude ke idak Candace ọbọn̄-an̄wan mbon Ethiopia’ mi ama ọbuọt idem ke Jesus Christ onyụn̄ ana baptism. (Utom 8:26-38) Ke oro ebede, Philip ama adaha aka Ashdod ndien ekem aka Caesarea, ‘ọkwọrọde gospel ọnọ kpukpru mme obio’ emi ẹdude ke usụn̄ oro. (Utom 8:39, 40) Enye ke akpanikọ ama enịm eti uwụtn̄kpọ ke ndinam utom ọkwọrọ-gospel!

5. Ẹketịm ẹdiọn̄ọ nditọiban Philip inan̄ kaban̄a nso?

⁵ Philip ke okosụk ananam utom ukwọrọikọ ifịk ifịk ke Caesarea ke n̄kpọ nte isua 20 efen. Ke ini Paul ye Luke ẹkedude ke ufọk Philip, enye ama “enyene nditọiban inan̄, emi mîdọhọ ndọ, emi ẹtịn̄de prophecy.” (Utom 21:8-10) Ana in̄wan̄-in̄wan̄ nte ke mmọ ẹma ẹtịm ẹbọ ukpep ke n̄kan̄ eke spirit, ẹnyene ifịk ke utom ukwọrọikọ, idem ẹnyenede ifet ndibuana ke nditịn̄ ntịn̄nnịm ikọ. Ifịk oro ete ye eka ẹsịnde ke utom ukwọrọikọ ekeme ndinyene eti utịp ke idem nditọ mmọ iren ye iban mfịn, onụkde mmọ ndinam edikwọrọ gospel ifịk ifịk edi utom ofụri eyouwem mmọ.

Ifịk Ifịk Mme Ọkwọrọ-Gospel Mfịn

6. Nso unen ke mme ọkwọrọ-gospel eke akpa isua ẹkekụt?

⁶ Ke akwa ntịn̄nnịm ikọ esie oro aban̄ade usen nnyịn ye utịt ini, Jesus Christ ọkọdọhọ ete: “Ẹnyene ndibem iso n̄kwọrọ gospel nnọ kpukpru mme idụt.” (Mark 13:10) Utịt eyedi ke ẹma ẹkekwọrọ gospel ke “ofụri ekondo.” (Matthew 24:14) Nte Paul ye mme ọkwọrọ-gospel eken ke akpa isua ikie ẹketan̄ade eti mbụk, ediwak owo ẹma ẹkabade ẹdi mme andinịm ke akpanikọ, ndien ẹma ẹtọn̄ọ mme esop ke ediwak ebiet ke ofụri Obio Ukara Rome. Mbiowo oro ẹkemekde ndinam utom ke mme esop emi ẹma ẹbuana ye nditọete mmọ ke utom edikwọrọ gospel ẹnyụn̄ ẹnam utom ukwọrọikọ atara esịm kpukpru ebiet. Ikọ Jehovah ama aka iso ọkọri ọkpọsọn̄ onyụn̄ akara ke ini oro, ukem nte edide mfịn sia ediwak miliọn Mme Ntiense Jehovah ke ẹnam utom edikwọrọ gospel. (Utom 19:20) Nte afo edi kiet ke otu mme okop-inemesịt anditoro Jehovah?

7. Nso ke mme anditan̄a Obio Ubọn̄ ẹnam mfịn?

⁷ Ediwak mme anditan̄a Obio Ubọn̄ eyomfịn ke ẹda ifet emi nditat utom mmọ eke edikwọrọ gospel. Ediwak tọsịn owo ke ẹnam utom isụn̄utom, ndien ediwak tọsịn ke mme itie ikie ke ẹbuana ke utom edikwọrọ gospel uyọhọ ini nte mme asiakusụn̄ ofụri ini ye nte mme asiakusụn̄ unọ un̄wam. Ndien nso eti utom ke iren, iban, ye nditọwọn̄ ẹnam ntem nte ifịk ifịk mme asuanetop Obio Ubọn̄! Ke akpanikọ, kpukpru ikọt Jehovah ke ẹbọ akwa edidiọn̄ esie nte mmọ ẹnamde utom ke esịt kiet nte mme Christian oro ẹdide mme ọkwọrọ-gospel.—Zephaniah 3:9.

8. Nso utom edinịm idiọn̄ọ ke ẹnam idahaemi, ndien mmanie ẹnam enye?

⁸ Abasi ọmọnọ mme anditiene Jesus oro ẹyetde aran mbiomo nditan̄a eti mbụk ke ofụri isọn̄. “Mme erọn̄ en̄wen” Christ emi ibat mmọ akade-ka iso ndikọri ke ẹn̄wam mbon oro ẹyetde aran ke utom edikwọrọ gospel emi. (John 10:16) Ke ntịn̄nnịm ikọ, ẹmen utom unyan̄a-uwem emi ẹdomo ye ẹdinịm idiọn̄ọ ke ọkpọiso mmọ emi ẹsemede ẹnyụn̄ ẹtuade ẹban̄a mbubiam ido oro adade itie idahaemi. Ibịghike,  ẹyesobo mme idiọkowo ẹfep. Kan̄a ke emi, nso ifet ke edi ntem ndimen ikọ akpanikọ emi anyan̄ade uwem nsọk mme andidụn̄ isọn̄!—Ezekiel 9:4-6, 11.

9. Didie ke ẹkeme ndin̄wam mbufa owo ke an̄wautom?

⁹ Edieke edide nnyịn imabuana ke utom edikwọrọ gospel ke ndusụk ini idahaemi, eyedi nnyịn iyekeme ndinam n̄kpọ ndin̄wam mbufa owo ke esop. Ndusụk ini, nnyịn imekeme ndidọhọ mmọ ẹsan̄a ye nnyịn ke an̄wautom. Ẹsịn udọn̄ ẹnọ mbiowo ndisịn ofụri ukeme mmọ ndinam ekemmọ mme andinịm ke akpanikọ ẹkọri ke n̄kan̄ eke spirit. Eti ukeme oro mme osụhọde-idem esenyịn ẹsịnde ekeme ndinam ekese ndin̄wam mbon en̄wen ndidi ifịk ifịk mme ọkwọrọ-gospel oro ẹkụtde unen.—2 Peter 1:5-8.

Ndinọ Ikọ Ntiense ke Ufọk ke Ufọk

10. Nso uwụtn̄kpọ aban̄ade utom ukwọrọikọ ke Christ ye akpa mme anditiene enye ẹkenịm?

¹⁰ Jesus Christ ama enịm eti uwụtn̄kpọ ọnọ mme anditiene enye nte ọkwọrọ-gospel. Ikọ Abasi etịn̄ aban̄a utom ukwọrọikọ Christ ye mme apostle esie ete: “Enye asan̄a ke ikpọ obio ye obio-in̄wan̄, ọkwọrọ onyụn̄ obụk eti mbụk Ubọn̄ Abasi, mbet duopeba ẹnyụn̄ ẹsan̄a ye Enye.” (Luke 8:1) Nso kaban̄a mme apostle ke idemmọ? Ke ẹma ẹken̄wan̄a edisana spirit ẹduọk mmọ ke Pentecost 33 E.N., “kpukpru usen, ke temple ye ke ufọk, mmọ idopke uyo ndikpep nnyụn̄ n̄kwọrọ, ẹte Jesus edi Christ.”—Utom 5:42.

11. Nte ekemde ye Utom 20:20, 21, nso ke apostle Paul akanam ke utom ukwọrọikọ esie?

¹¹ Ke ntak ifịk oro enye ekesịnde ndikwọrọ gospel, apostle Paul ama ekeme ndidọhọ mbiowo Christian ke Ephesus ete: “N̄kefeheke ndisian mbufo se ededi eke odorode mbufo n̄kpọ, mma nnyụn̄ n̄kpep mbufo n̄kpọ an̄wa-an̄wa, nnyụn̄ n̄kpep mbufo ke ufọk ke ufọk.” Ke ini Paul ‘ekekpepde n̄kpọ ke ufọk ke ufọk,’ nte enye ama esiwaha ufọk ekemmọ mme andituak ibuot nnọ Jehovah, akanam utom ubọkerọn̄ ke idem mme andinịm ke akpanikọ? Baba, koro enye aka iso ndinam an̄wan̄a ete: “N̄kwọrọ nnọ mme Jew ye mme Greek, nte mmọ ẹkabade esịt ẹtiene Abasi, ẹnyụn̄ ẹbuọt idem ye Ọbọn̄ nnyịn Jesus Christ.” (Utom 20:20, 21) Ke ofụri ofụri, mbon oro ẹma ẹkeyayak idem ẹnọ Jehovah idiyomke ukpepn̄kpọ aban̄ade ‘ẹdikabade esịt ntiene Abasi, nnyụn̄ mbuọt idem ye Ọbọn̄ nnyịn Jesus Christ.’ Paul ama ọnọ mbiowo Christian ke Ephesus ukpep ke nte ẹkpenamde utom ukwọrọikọ ke ufọk ke ufọk ke adan̄aemi ekekpepde mbon oro mînịmke ke akpanikọ aban̄a edikabade esịt ye mbuọtidem. Ke ndinam emi, Paul eketiene usụn̄ unamn̄kpọ oro Jesus ọkọtọn̄ọde.

12, 13. Ke n̄kemuyo ye Philippi 1:7, nso ke ikọt Jehovah ẹnam ẹban̄a unen mmọ ndikwọrọ ikọ?

¹² Utom ukwọrọikọ eke ufọk ke ufọk ekeme ndidi n̄kpọ-ata. Ke uwụtn̄kpọ, ndusụk owo ẹsiyat esịt ke ini nnyịn idade etop Bible iwaha ufọk mmọ. Idịghe uduak nnyịn ndiyat mme owo esịt. Edi utom ukwọrọikọ eke ufọk ke ufọk ekem ye N̄wed Abasi, ndien ima oro imade Abasi ye mbọhọidụn̄ esinụk nnyịn ndinọ ikọ ntiense ke usụn̄ emi. (Mark 12:28-31) Man ‘in̄wana inyụn̄ ida ibet inam’ unen oro inyenede ndikwọrọ ikọ ke ufọk ke ufọk “ọsọn̄ọ ada,” nnyịn imesika mme esopikpe, esịnede N̄kponn̄kan Esopikpe United States, man inyene unen emi. (Philippi 1:7, NW) Ekpere ndidi kpukpru ini esop oro esitebe nnyịn ikpe. Utọ ubiereikpe oro edi emi:

¹³ “Edinọ mme owo tract ido ukpono edi usụn̄ oro mme isụn̄utom ẹkesisuande eti mbụk toto ke eset—tọn̄ọ nte ẹkesio mme ukwak umịn̄n̄wed ẹdi. Enye edi okopodudu usụn̄ oro nsio nsio n̄ka ido ukpono ẹdade ẹnam n̄kpọ ke ediwak isua emi ẹbede. Nsio nsio ido ukpono ẹda ido ukwọrọikọ emi ẹnam n̄kpọ mfịn ke akamba udomo ebe ke mme asuan n̄wed ido ukpono mmọ ndida Gospel nsọk ediwak tọsịn owo ke ufọk mmọ, nnyụn̄ n̄waha ntiene mme owo ke idemmọ man ẹkọ mme owo ẹnọ ido ukpono mmọ. . . . Ido edinam ido ukpono emi osụk enyenyene ukem akamba idaha ke Akpa Edinen̄ede [ke ibet United States] ukem nte utuakibuot ke mme ufọkederi ye edida ke mme mbot utịn̄ikọ n̄kwọrọ ikọ.”—Murdock v. Pennsylvania, 1943.

 Ntak Ẹkade Iso Ndikwọrọ Ikọ?

14. Nso utịp ke utom ukwọrọikọ nnyịn ekeme ndinyene sụn̄sụn̄?

¹⁴ Ediwak ntak ẹdu ndinọ ikọ ntiense ke ufọk ke ufọk. Kpukpru ini oro nnyịn iwahade ufọk owo, nnyịn imesidomo nditọ n̄kpasịp akpanikọ N̄wed Abasi. Ebede ke ndinam mme mfiakn̄ka, nnyịn idomo ndiduọk mmọn̄. Ndien emi ekeme ndinyene nti utịp sụn̄sụn̄ koro Paul ekewetde ete: “Ami n̄kọtọ, Apollos ọkọbọk ke mmọn̄; edi n̄kọri oto Abasi.” (1 Corinth 3:6) Ntre ẹyak nnyịn ika iso ‘ibọk ke mmọn̄,’ inyenede mbuọtidem nte ke Jehovah ‘ayanam enye ọkọri.’

15, 16. Ntak emi nnyịn isiwahade ufọk mme owo ndien ndien?

¹⁵ Nnyịn inam utom ọkwọrọ-gospel koro uwem ediwak owo odude ke itiendịk. Ebede ke ukwọrọikọ, nnyịn imekeme ndinyan̄a idem nnyịn ye mbon oro ẹkopde uyo nnyịn. (1 Timothy 4:16) Edieke nnyịn ifiọkde ite ke uwem owo odu ke itiendịk, nte nnyịn ikpesịn sụk esisịt ukeme ndin̄wam enye? Baba-o! Sia abuanade edinyan̄a, nnyịn imesiwaha ufọk mme owo ndien ndien. Mme idaha ẹka iso ndikpụhọde. Owo oro mînyeneke ifet ndikpan̄ utọn̄ idahaemi ekeme ndinyịme ndikop etop Bible ini efen. Owo efen ke ubon ekeme ndiwụt udọn̄, ndien emi ekeme ndida nsịm nneme N̄wed Abasi.

¹⁶ Mme idaha ye mme edu enyeneufọk ẹkeme ndikpụhọde. Ke uwụtn̄kpọ, ubiak ubiak editaba owo ima ke n̄kpa ekeme ndinụk owo ndikpan̄ utọn̄ nnọ etop Obio Ubọn̄. Nnyịn iyom ndidọn̄ owo emi esịt, ndinam enye ekere aban̄a n̄kpọ eke spirit emi enye ananade, nnyụn̄ n̄wụt nte ẹkemede ndinyene enye.—Matthew 5:3, 4.

17. Nso idi ata akpan ntak oro nnyịn inamde utom ukwọrọikọ?

¹⁷ Udọn̄ ndinam mme owo ẹdiọn̄ọ enyịn̄ Jehovah edi ata akpan ntak ndinọ ikọ ntiense ke ufọk ke ufọk m̀mê ndibuana ke orụk utom ukwọrọikọ Christian eken. (Exodus 9:16; Psalm 83:18) Nso eti utịp ke emi edi ntem ke ini utom edikwọrọ gospel nnyịn an̄wamde mme ama akpanikọ ye edinen ido ndikabade ndi mme anditoro Jehovah! Andiwet psalm ọkọkwọ ete: “N̄kparawa, ye nditọ-iban; n̄kani iren, ye nditọwọn̄: yak mmọ ẹtoro enyịn̄ Jehovah: koro enyịn̄ esie ikpọn̄-ikpọn̄ okon̄de; ubọn̄ esie emenede akan isọn̄ ye enyọn̄.”—Psalm 148:12, 13.

Edikwọrọ Gospel Ọnọ Nnyịn Ufọn Ọkpọkpọ

18. Didie ke nnyịn ibọ ufọn ito edinam utom edikwọrọ gospel?

¹⁸ Ndinam utom ọkwọrọ-gospel ọnọ nnyịn ufọn ọkpọkpọ ke nsio nsio usụn̄. Ndida eti mbụk nsọk mme owo ke ufọk ke ufọk an̄wam nnyịn ndikọri nsụhọdeidem, akpan akpan ke ini owo mîdarake nnyịn mfọn mfọn. Man idi mme ọkwọrọ-gospel oro ẹnyenede uforo, oyom nnyịn itie nte Paul, emi ‘akakabarede edi kpukpru n̄kpọ ọnọ kpukpru owo, man nte ededi ẹkpekeme ndinyan̄a ndusụk mmọ.’ (1 Corinth 9:19-23) Se isobode ke an̄wautom an̄wam nnyịn ndinyene mbufiọk. Ebede ke ndibuọt idem ke Jehovah nnyụn̄ n̄kpeme nte itịn̄de ikọ, nnyịn imekeme ndinam item Paul emi: “Ẹyak nneme mbufo enyene inem ke esịt kpukpru ini, nte ẹsịnde inụn̄ ke esịt, kpan̄ mbufo ẹdiọn̄ọ nte mbufo ẹkpemende ikọ ẹnọ kpukpru owo ibọrọ.”—Colossae 4:6.

19. Didie ke edisana spirit an̄wam mme ọkwọrọ-gospel?

¹⁹ Utom edikwọrọ gospel onụk nnyịn n̄ko ndiberi edem ke edisana spirit Abasi. (Zechariah 4:6) Nte utịp, ẹyekụt mme mbun̄wụm esie emi ẹdide “ima, ye idatesịt, ye emem, ye ime, ye mfọn-ido, ye eti ido, ye edinam akpanikọ, ye ifụre-ifụre ido, ye mfara ke idem”—ke utom ukwọrọikọ nnyịn. (Galatia 5:22, 23) Enye otụk nte nnyịn inamde n̄kpọ ye mme owo, sia ndiyak spirit ada nnyịn usụn̄ an̄wam nnyịn ndinyene ima, ndikop idatesịt nnyụn̄ ntie emem emem, ndinyene ime nnyụn̄ mfọn ido, ndinyene eti ido nnyụn̄ nnam akpanikọ, ndinyene ifụre ifụre ido ye mfara ke idem ke adan̄aemi itan̄ade eti mbụk.

20, 21. Nso idi ndusụk edidiọn̄ ye mme ufọn eke ediyọhọ kpukpru ini ke utom nte mme ọkwọrọ-gospel?

²⁰ Edidiọn̄ efen oro nnyịn inyenede nte mme ọkwọrọ-gospel edi nte ke imesinen̄ede ikop  mme owo mbọm. Ke ini mme owo ẹtịn̄de mme mfịna mmọ utọ nte—udọn̄ọ, unana utom, mme mfịna ufọk—nnyịn isinamke n̄kpọ nte mme ọnọ-item edi imesibuana nsịnudọn̄ ye ndọn̄esịt N̄wed Abasi ye mmọ. Nnyịn imekere iban̄a mme owo oro ẹnamde enyịn mmọ ekịm ke n̄kan̄ eke spirit, edi etiede nte ke ẹma edinen ido. (2 Corinth 4:4) Ndien nso edidiọn̄ ke edi ntem ndinọ “kpukpru mmọ emi ẹkenịmde ẹnọ nsinsi uwem” un̄wam eke spirit!—Utom 13:48.

²¹ Ndibuana ke utom edikwọrọ gospel kpukpru ini an̄wam nnyịn ndiwụk ekikere nnyịn ke mme n̄kpọ eke spirit. (Luke 11:34) Oro enen̄ede enyene ufọn, sia ke ẹsiode oro ẹfep nnyịn imekeme ndiyak idem nnọ idomo uma inyene obụkidem oro ọyọhọde ke ererimbot emi. Apostle John ama eteme mme Christian ete: “Ẹkûma ererimbot, ye se idude ke ererimbot. Edieke owo ekededi amade ererimbot, ima Ete idụhe enye ke esịt. Koro ofụri-ofụri se idude ke ererimbot, mbumek obụkidem, ye mbumek enyịn, ye ikpîkpu ubọn̄ uwem emi, itoho Ete, edi oto ke ererimbot. Ndien ererimbot ke ebebe efep, ye mbumek esie; edi owo eke anamde se Abasi amade ododu ke nsinsi.” (1 John 2:15-17) Ndika iso nyọhọ kpukpru ini ke utom Ọbọn̄ nte mme ọkwọrọ-gospel an̄wam nnyịn ikûma ererimbot.—1 Corinth 15:58.

Ẹbon Mme N̄kpọuto eke Heaven Ẹnọ Idem

22, 23. (a) Mme n̄kpọuto ewe ke mme Christian oro ẹdide mme ọkwọrọ-gospel ẹbon ẹnọ idem? (b) Didie ke ibuotikọ oro etienede mi edin̄wam nnyịn?

²² Ifịk ifịk utom edikwọrọ Obio Ubọn̄ ada mme edidiọn̄ oro ẹbịghide edi. Jesus ama owụt emi ke ini enye ọkọdọhọde ete: “Ẹkûbon n̄kpọ-uto ẹnịm ẹnọ idem ke isọn̄, ke ọtọ nte uta-n̄kpọ ye n̄karafan̄ ẹbiatde n̄kpọ, inọ ẹnyụn̄ ẹbụn̄de, ẹdụk, ẹyịp: edi ẹbon n̄kpọ-uto ẹnịm ẹnọ idem ke heaven, ke ọtọ nte uta-n̄kpọ ye n̄karafan̄ mîbiatke n̄kpọ, inọ mînyụn̄ ibụn̄ke, idụk, iyịp: koro ọtọ nte n̄kpọ-uto fo odude, do ke esịt fo edinyụn̄ odu.”—Matthew 6:19-21.

²³ Nnyịn ikpakam ika iso ndibon n̄kpọuto nnọ idem ke heaven, ifiọkde ite ke nnyịn inyeneke akwa ifet efen ikan edida nnọ Jehovah, kpa Ọbọn̄ Andikara nte Mme Ntiense esie. (Isaiah 43:10-12) Nte nnyịn inamde utom oro ẹnọde nnyịn nte mme asan̄autom Abasi, ekeme nditịm ntie nnyịn ke idem nte eketiede Christian an̄wan kiet emi okodude ke iduọk isua 90 oro eketịn̄de aban̄a ediwak isua emi enye akanamde utom Abasi ete: “Ke kpukpru n̄kpọ mmọkọm Jehovah ke ndinyene ime ye ami ke ofụri isua emi, ndien mbọn̄ akam ke ofụri esịt mben̄e enye ndidi ima ima Ete mi ke nsinsi.” Edieke nnyịn imade itie ebuana nnyịn ye Abasi ukem ntre, ke akpanikọ nnyịn iyoyom ndinam utom ọyọhọ ọyọhọ nte ọkwọrọ-gospel. Ibuotikọ oro etienede ayan̄wam nnyịn ndikụt nte nnyịn ikemede ndinam utom nnyịn mma.

Didie ke Afo Ọkpọbọrọ?

• Ntak emi nnyịn ikpanamde utom ọkwọrọ-gospel?

• Nso ke afo ekeme nditịn̄ mban̄a utom mme ọkwọrọ-gospel eke eset ye eke eyomfịn?

• Ntak emi nnyịn inọde ikọ ntiense ke ufọk ke ufọk?

• Didie ke afo ọbọ ufọn ọkpọkpọ oto edinam utom ọkwọrọ-gospel?

[Mme Mbụme Ukpepn̄kpọ]

[Mme ndise ke page 10]

Mme utọ ọkwọrọ-gospel nte Philip ye nditọ iban esie ẹnyene mme okop-idatesịt mbon oro ẹbietde mmọ mfịn

[Ndise ke page 14]

Didie ke afo ọbọ ufọn ọkpọkpọ nte afo abuanade gospel ye mbon efen?