“Nam Utom Fo Ma”
“Nam Utom Fo Ma”
“Nam utom fo ọyọhọ ọyọhọ.”—2 TIMOTHY 4:5, Byington.
1, 2. Okposụkedi kpukpru mme Christian ẹdide mme ọkwọrọ-gospel, nso idi n̄kpọ oro N̄wed Abasi oyomde oto mbiowo?
NTE afo edi anditan̄a Obio Ubọn̄? Edieke edide ntre, nọ Jehovah Abasi ekọm ke utịbe utịbe ifet emi. Nte afo edi ebiowo ke esop? Oro edi ifetutom efen efen oro Jehovah ọnọde fi. Edi inaha nnyịn ifre nte ke ubọ ukpep ererimbot m̀mê ukeme editịn̄ ikọ udọn udọn inamke owo nnyịn ndomokiet odot ndikwọrọ ikọ m̀mê ndise enyịn ke esop. Jehovah anam nnyịn ikeme ndidi mme ọkwọrọikọ, ndien edi koro ndusụk irenowo ke otu nnyịn ẹsịmde mme akpan n̄kpọ N̄wed Abasi oro ẹyomde, emi anamde mmọ ẹdot ndinam utom nte mme esenyịn.—2 Corinth 3:5, 6; 1 Timothy 3:1-7.
2 Kpukpru mme Christian oro ẹma ẹkeyak idem ẹnọ ẹnam utom nte mme ọkwọrọ-gospel, edi ana mme esenyịn, m̀mê mbiowo akpan akpan ẹnịm eti uwụtn̄kpọ ke utom edikwọrọ ikọ. Abasi ye Christ ọkọrọ ye ekemmọ Mme Ntiense Jehovah ẹdiọn̄ọ mbiowo oro “ẹkpade utom ke ukwọrọ-ikọ ye ukpepn̄kpọ.” (1 Timothy 5:17; Ephesus 5:23; Mme Hebrew 6:10-12) Ke kpukpru idaha, ana ukpepn̄kpọ oro ebiowo ọnọde enyene ufọn ke n̄kan̄ eke spirit, koro apostle Paul ọkọdọhọ esenyịn oro Timothy ete: “Koro ini ọmọn̄ edi eke mme owo mîdibọhọ eti ukpep-n̄kpọ; ndien sia utọn̄ edebede mmọ ndikop isio ikọ, mmọ ẹyekọ mme andikpep ẹnọ idem nte ekemde ye mme idiọk udọn̄ mmọ, ẹyenyụn̄ ẹsio utọn̄ ẹfep ke akpanikọ, ẹnyụn̄ ẹwọn̄ọde ẹbịne ikpîkpu mbụk. Edi ama edi afo, fara ke idem ke kpukpru n̄kpọ, biom ukụt, nam utom ọkwọrọ-gospel, nam utom fo ma.”—2 Timothy 4:3-5.
3. Oyom ẹnam nso mbak nsunsu ukpepn̄kpọ edisịn idaha eke spirit esop ke itiendịk?
3 Man okụt ke nsunsu ukpepn̄kpọ isịnke idaha eke spirit esop ke itiendịk, ana esenyịn anam item Paul emi: “Fara ke idem ke kpukpru n̄kpọ, . . . nam utom fo ọyọhọ ọyọhọ.” (2 Timothy 4:5, Byington) Ih, oyom ebiowo ‘anam utom esie ama.’ Ana enye anam utom esie ofụri ofụri, ọyọhọ ọyọhọ, m̀mê ke ọyọhọ udomo. Ebiowo oro anamde utom esie ama enen̄ede etịn̄ enyịn ke kpukpru mbiomo esie, ifụmike n̄kpọ ndomokiet m̀mê ndinam ndusụk n̄kpọn̄ ndusụk. Utọ ebiowo owo oro anam akpanikọ idem ke n̄kpri n̄kpọ.—Luke 12:48; 16:10.
4. Nso ikeme ndin̄wam nnyịn ndinam utom nnyịn mma?
4 Ndinam utom ukwọrọikọ nnyịn mma isiyomke ekese ini, edi esiyom ẹda ini ẹnam n̄kpọ nte ọfọnde. Eti ndutịm ekeme ndin̄wam kpukpru mme Christian ndinam ekese ke utom ukwọrọikọ. Man esịn ekese ini ke an̄wautom, oyom ebiowo enyene eti ọkpọkpọ ndutịm oro adade ukem ukem onyụn̄ ọfiọk utom oro anade enye ayak ọnọ owo efen ye nte enye edinamde oro. (Mme Hebrew 13:17) Nte ido edide, ebiowo oro ẹkponode esinam udeme esie n̄ko, kpa nte Nehemiah, oro ekesịnde idem ke nditiene mbọp ibibene Jerusalem. (Nehemiah 5:16) Ndien kpukpru mme asan̄autom Jehovah ẹkpenyene ndibuana kpukpru ini ke utom edikwọrọ Obio Ubọn̄.—1 Corinth 9:16-18.
5. Didie ke nnyịn ikpese utom ukwọrọikọ?
5 Nso idara idara utom ke nnyịn inyene ntem nte mme anditan̄a Obio Ubọn̄ heaven oro ẹma ẹkewụk! Ke akpanikọ, nnyịn imada ifet oro inyenede ndibuana ke edikwọrọ gospel ke ofụri ekondo mbemiso utịt edide, ke ọsọn̄urua. (Matthew 24:14) Okposụkedi nnyịn idide mme anana-mfọnmma, ikọ Paul emi ekeme ndinọ nnyịn nsịnudọn̄: “Nnyịn ikama ọsọn̄-urua n̄kpọ [utom ukwọrọikọ] emi ke aban̄ mbat, man akwa ubom odudu esie okpoto Abasi, itoho nnyịn.” (2 Corinth 4:7) Ih, nnyịn imekeme ndinam utom emi ẹnyịmede—edi idinam emi n̄kukụre ke odudu ye ifiọk oro Abasi ọnọde.—1 Corinth 1:26-31.
Ndiwụt Ubọn̄ Abasi
6. Nso ukpụhọde idu ke ufọt Israel eke obụk ye Israel eke spirit?
6 Ke etịn̄de aban̄a mme Christian oro ẹyetde aran, Paul ọdọhọ ete ke Abasi ‘anam mmimọ ikeme ndidi mme asan̄autom obufa ediomi.’ Apostle emi ama owụt ukpụhọde emi odude ke ufọt obufa ediomi oro ẹkenamde ye Israel eke spirit ebe ke Jesus Christ ye akani Ibet ediomi oro ẹkenamde ye Israel eke obụk ebe ke Moses. Paul adian do ete ke ini Moses okotode Obot Sinai osụhọde ye itiatn̄wed oro esịnede Ibet Duop, iso esie ama enen̄ede ayama tutu nditọ Israel ikemeke ndiwụk enyịn nse enye. Nte ededi, nte ini akakade, ata idiọk idaha ama edemerede koro ‘esịt mmọ ama akabade ọsọn̄’ ndien ufụkiso ama ofụk esịt mmọ. Nte ededi, ke ini mmọ ẹkewọn̄ọrede ẹtiene utuakibuot Jehovah ke ofụri esịt, ẹma ẹmen ufụkiso oro ẹfep. Ekem ke etịn̄de aban̄a utom ukwọrọikọ oro ẹkenọde mbon oro ẹdude ke obufa ediomi, Paul ọdọhọ ete: “Edi kpukpru nnyịn imada iso emi mîkwihi imụm ubọn̄ Ọbọn̄ ikama.” (2 Corinth 3:6-8, 14-18; Exodus 34:29-35) “Mme erọn̄ en̄wen” Jesus eke mfịn ẹnyene ifet ndiwụt ubọn̄ Jehovah n̄ko.—John 10:16.
7. Didie ke mme owo ẹkeme ndiwụt ubọn̄ Abasi?
7 Didie ke mme anamidiọk ẹkeme ndiwụt ubọn̄ Abasi, ke ini owo ndomokiet mîkemeke ndikụt Abasi iso ndu uwem? (Exodus 33:20) Ọfọn, ke ẹsiode ọkpọkpọ ubọn̄ Jehovah ẹfep, enye enyene n̄ko ubọn̄ ubọn̄ uduak ndida Obio Ubọn̄ esie n̄wụt unen itie edikara esie. Akpanikọ oro enyenede ebuana ye Obio Ubọn̄ edi ubak “ata n̄kpọsọn̄ utom Abasi” oro mbon oro ẹken̄wan̄ade edisana spirit ẹduọk ke Pentecost 33 E.N. ẹketọn̄ọde nditan̄a. (Utom 2:11) Ebede ke ndausụn̄ eke spirit, mmọ ẹma ẹkeme ndinam utom oro ẹkeyakde ẹsịn mmọ ke ubọk mma.—Utom 1:8.
8. Nso ke Paul ekebiere ndinam mban̄a utom ukwọrọikọ?
8 Paul ama ebiere nditre ndiyak n̄kpọ ekededi ọbiọn̄ọ enye ndinam utom esie mma. Enye ekewet ete: “Sia nnyịn inyenede utom emi ite inam, kpa nte Abasi akatuade nnyịn mbọm, esịt iduọhọ nnyịn: edi imakpan̄a nsa ye ndịbe-ndịbe ido eke enyenede bụt, isan̄ake ke n̄kari, inyụn̄ idaha nsu ibuak ye ikọ Abasi; edi ke edisian se idide akpanikọ an̄wa-an̄wa, ke inam kpukpru owo ẹfiọk ke esịt mmọ, ẹte nnyịn inanam se inende ke iso Abasi.” (2 Corinth 4:1, 2) Ebede ke se Paul okotde “utom emi,” ẹnam mme owo ẹkụt akpanikọ ndien un̄wana eke spirit ke ayama ke ediwak ebiet.
9, 10. Didie ke ẹkeme ndiwụt ubọn̄ Jehovah?
9 Kaban̄a Ebiet oro ata ata un̄wana ye un̄wana eke spirit ẹtode, Paul ewet ete: “Abasi, emi ọkọnọde uyo ete, Yak un̄wana ayama ke ekịm, akayama nnyịn ke esịt, man Enye an̄wan̄ade owo enyịn ndifiọk ubọn̄ Abasi ke iso Jesus Christ.” (2 Corinth 4:6; Genesis 1:2-5) Sia ẹnọde nnyịn anana-mbiet ifet eke edidi mme asan̄autom Abasi, ẹyak inam idem nnyịn asana man ukem nte ukụtiso, ikeme ndiwụt ubọn̄ Jehovah.
10 Mme owo oro ẹdude ke ekịm eke spirit ikemeke ndikụt ubọn̄ Jehovah, m̀mê ndikụt un̄wana esie oro Jesus Christ, kpa Akamba Moses ọnọde. Edi nte mme asan̄autom Jehovah, nnyịn imokụt ubọn̄ ubọn̄ un̄wana otode N̄wed Abasi inyụn̄ inam enye ayama ọnọ mbon en̄wen. Edieke anade mbon oro ẹdude ke ekịm eke spirit idahaemi ẹbọhọ nsobo, mmọ ẹyom un̄wana oro otode Abasi. Ntem, ye akwa idatesịt ye ifịk, nnyịn imanam ewụhọ Abasi ndiyak un̄wana ayama ke ekịm, inọde Jehovah ubọn̄.
Yak Un̄wana Fo Ayama ke Ndinịm Ukpepn̄kpọ Bible
11. Nso ke Jesus ọkọdọhọ aban̄a ediyak un̄wana nnyịn ayama, ndien nso idi usụn̄ kiet ndinam emi ke utom ukwọrọikọ nnyịn?
11 Jesus ọkọdọhọ mme anditiene enye ete: “Mbufo ẹdi un̄wana ererimbot. Obio eke ẹbọpde ke enyọn̄ obot ikemeke ndidịbe. Owo inyụn̄ idomoke utuenikan̄ ida aban̄ ifụk, edi owụk ke uwụk-utuenikan̄; ntem ke un̄wana ayama ọnọ kpukpru owo eke ẹdude ke ufọk. Kpa ntre yak un̄wana mbufo ayama ke iso owo, man mmọ ẹkụt nti utom mbufo, ẹnyụn̄ ẹtoro Ete mbufo emi odude ke heaven.” (Matthew 5:14-16) Eti ido nnyịn ekeme ndinam mbon efen ẹnọ Abasi ubọn̄. (1 Peter 2:12) Nsio nsio ikpehe utom ukwọrọ gospel ẹnọ nnyịn ekese ifet ndiyak un̄wana nnyịn ayama. Kiet ke otu akpan uduak nnyịn edi ndinọ un̄wana eke spirit emi otode Ikọ Abasi ebe ke ndinịm ukpepn̄kpọ Bible oro enyenede uforo. Emi edi ata akpan usụn̄ ndinam utom nnyịn mma. Mme ekikere ewe ikeme ndin̄wam nnyịn ndinịm ukpepn̄kpọ Bible oro ẹsịmde esịt mbon oro ẹyomde akpanikọ?
12. Didie ke akam enyene ebuana ye utom edinịm ukpepn̄kpọ Bible?
12 Ndibọn̄ akam nnọ Jehovah mban̄a n̄kpọ emi owụt ọkpọsọn̄ udọn̄ oro inyenede ke ndinịm ukpepn̄kpọ Bible. Enye n̄ko owụt nte ke nnyịn imokụt ufọn edin̄wam mbon en̄wen ẹnyene ifiọk Abasi. (Ezekiel 33:7-9) Jehovah iditreke ndibọrọ akam nnyịn nnyụn̄ ndiọn̄ ukeme ofụri esịt oro isịnde ke utom ukwọrọikọ. (1 John 5:14, 15) Edi nnyịn ibọn̄ke akam n̄kukụre man ikụt owo emi idinịmde ukpepn̄kpọ Bible. Ke ima ikenyene ukpepn̄kpọ Bible, edibọn̄ akam nnyụn̄ ntie n̄kere akpan n̄kpọ oro eyen ukpepn̄kpọ Bible oyomde ayan̄wam nnyịn ndinịm ikpehe ukpepn̄kpọ kiet kiet ke usụn̄ oro enyenede uforo.—Rome 12:12.
13. Nso ikeme ndin̄wam nnyịn ndinịm ukpepn̄kpọ Bible oro enyenede uforo?
13 Man inịm ukpepn̄kpọ Bible oro enyenede uforo, ana nnyịn itịm idem nte ọfọnde inọ ikpehe ukpepn̄kpọ kiet kiet. Edieke etiede nte ke nnyịn ikemeke ndinam emi, eyetịm ọfọn ndise nte esenyịn Ukpepn̄kpọ N̄wed Esop enịmde ukpepn̄kpọ ke urua kiet kiet. Ke ndusụk idaha, nnyịn imekeme ndisan̄a ye mme asuanetop Obio Ubọn̄ oro ẹnyenede nti utịp ke ndinịm ukpepn̄kpọ Bible. Nte ededi, enen̄ede odot ikere iban̄a edu ye mme usụn̄ unọ ukpep Jesus Christ.
14. Didie ke nnyịn ikeme ndisịm esịt eyen ukpepn̄kpọ Bible?
14 Jesus ama okop idatesịt ndinam uduak Ete esie eke heaven ye ke nditịn̄ nnọ mbon efen mban̄a Abasi. (Psalm 40:8) Enye ama enyene ifụre ifụre ido onyụn̄ okụt unen ke ndisịm esịt mbon oro ẹkekpan̄de utọn̄ ẹnọ enye. (Matthew 11:28-30) Mmọdo ẹyak nnyịn idomo ndisịm esịt nditọ ukpepn̄kpọ Bible nnyịn. Man inam oro, nnyịn inyene nditịm idem nnọ ukpepn̄kpọ kiet kiet ye akpan idaha eyen ukpepn̄kpọ ke ekikere. Ke uwụtn̄kpọ, edieke enye otode ebiet oro owo mîtịmke imehe ye Bible, ekeme ndiyom inam enye enịm ke Bible edi akpanikọ. Ke edide ntre, ana in̄wan̄-in̄wan̄ nte ke oyoyom ikot ediwak itie N̄wed Abasi inyụn̄ inam mme itien̄wed emi ẹn̄wan̄a mmọ.
N̄wam Ndinam Mme Uwụtn̄kpọ Ẹn̄wan̄a Nditọ Ukpepn̄kpọ
15, 16. (a) Didie ke nnyịn ikeme ndin̄wam eyen ukpepn̄kpọ oro uwụtn̄kpọ emi odude ke Bible mîn̄wan̄ake? (b) Nso ke nnyịn ikeme ndinam edieke kiet ke otu mme n̄wed nnyịn adade uwụtn̄kpọ oro ọsọn̄de eyen ukpepn̄kpọ Bible ndifiọk?
15 Ekeme ndidi eyen ukpepn̄kpọ Bible imeheke ye akpan uwụtn̄kpọ oro odude ke N̄wed Abasi. Ke uwụtn̄kpọ, ekeme ndidi enye idifiọkke se ikọ Jesus ọkọwọrọde ke ini enye eketịn̄de aban̄a ediwụk utuenikan̄ ke uwụk-utuenikan̄. (Mark 4:21, 22) Jesus eketịn̄ aban̄a utuenikan̄ eset. Ẹkesiwụk utọ utuenikan̄ oro ke san̄asan̄a uwụk-utuenikan̄ ndien enye ama ekeme ndinọ un̄wana ke ndusụk itie ke ufọk. Ẹkeme ndiyom ẹnam ndụn̄ọde ke mme ibuotikọ nte “Lamp” (Utuenikan̄) ye “Lampstand” (Uwụk-Utuenikan̄) ke utọ n̄wed nte Insight on the Scriptures man ẹnam uwụtn̄kpọ Jesus an̄wan̄a. * Edi enyene ufọn didie ntem, ke ini akade ndinịm ukpepn̄kpọ Bible afo ekeme ndinam n̄kpọ an̄wan̄a ke usụn̄ emi ọnọde eyen ukpepn̄kpọ uyụhọ!
16 N̄wed ukpepn̄kpọ Bible ekeme ndinọ uwụtn̄kpọ oro ọsọn̄de eyen ukpepn̄kpọ ndifiọk. Da ini nam enye an̄wan̄a, mîdịghe nọ uwụtn̄kpọ efen oro osiode ukem akpan n̄kpọ oro owụt. Eyedi n̄wed nnyịn ọsọn̄ọ etịn̄ ke eti nsan̄a ye edidiana kiet nnam n̄kpọ ke ndọ edi akpan n̄kpọ. Ke ndinam an̄wan̄a, ẹkeme nditịn̄ mban̄a akwaikwọ oro ọkwọde ikwọ, enye eberi edem ke mme amia ekọmọ man ikwọ esie enem. Ke usụn̄ efen, ẹkeme ndimen ufọn eti nsan̄a ye edidiana kiet nnam n̄kpọ ndomo ye usụn̄ oro mme anamutom edianade kiet ẹnam utom ke nditop katọn nnọ kiet eken ke ini ẹsion̄ode katọn ke ubomisọn̄.
17. Nso ke nnyịn ikeme ndikpep nto Jesus ke se iban̄ade mme uwụtn̄kpọ?
17 Ndida uwụtn̄kpọ efen ekeme ndiyom mbemiso ntịmidem. Edi, emi edi usụn̄ oro ikemede ndiwụt ọkpọkpọ udọn̄ oro nnyịn inyenede inọ eyen ukpepn̄kpọ Bible. Jesus akada mmemmem uwụtn̄kpọ ndinam ibuotikọ oro ọsọn̄de an̄wan̄a. Ukwọrọikọ esie Oro ke Obot esịne mme uwụtn̄kpọ emi, ndien Bible owụt ete ke ukpepn̄kpọ esie ama enyene eti utịp ke idem mme andikpan̄ utọn̄ nnọ enye. (Matthew 5:1-7:29) Jesus ama ada ime anam mme n̄kpọ ẹn̄wan̄a koro enye ekenyenede ọkpọsọn̄ udọn̄ ke idem mbon efen.—Matthew 16:5-12.
18. Nso ke ẹsịn udọn̄ ẹnọ nnyịn ndinam mban̄a mme itie N̄wed Abasi oro ẹsiakde ẹsịn ke mme n̄wed nnyịn?
18 Udọn̄ oro inyenede ke idem mbon efen oyonụk nnyịn ‘ndibuen ikọ ke N̄wed Abasi.’ (Utom 17:2, 3) Emi oyom ukpepn̄kpọ ọkọrọ ye akam ye edida mme n̄wed oro “akama ukpọhọde, emi anamde akpanikọ” ọnọde nnam n̄kpọ ọniọn̄ ọniọn̄. (Luke 12:42-44) Ke uwụtn̄kpọ, n̄wed oro Ifiọk Oro Adade Osịm Nsinsi Uwem okot oto ediwak itie N̄wed Abasi. * Ke ntak unana ufan̄, ẹsasiak ndusụk itie N̄wed Abasi ẹsịn. Ke ini ukpepn̄kpọ Bible, edi akpan n̄kpọ ndikot nnyụn̄ nnam ke nsụhọde n̄kaha ndusụk itie N̄wed Abasi oro ẹsiakde ẹsịn do ẹn̄wan̄a. Idem n̄kpọ, ukpepn̄kpọ nnyịn ọkọn̄ọ ke Ikọ Abasi, ndien enye enyene akwa odudu. (Mme Hebrew 4:12) Kot Bible ke kpukpru ini oro enịmde ukpepn̄kpọ nyụn̄ da mme itie N̄wed Abasi oro ẹdude ke mme ikpehe ekikere nam n̄kpọ kpukpru ini. N̄wam eyen ukpepn̄kpọ ndikụt se Bible etịn̄de aban̄a ndusụk ibuotikọ m̀mê usụn̄ edinam. Domo ndiwụt enye nte enye edibọde ufọn oto edisụk ibuot nnọ Abasi.—Isaiah 48:17, 18.
Bụp Mme Mbụme Oro Ẹnamde Owo Ekere N̄kpọ
19, 20. (a) Ntak ẹkpedade mme mbụme ẹdade ẹfiọk ekikere owo ẹnam n̄kpọ ke ini ẹnịmde ukpepn̄kpọ Bible? (b) Nso ke ẹkeme ndinam edieke oyomde ẹfiak ẹneme akpan ibuot nneme?
19 Usọ oro Jesus ekenyenede ke ndida mme mbụme nnam n̄kpọ ama an̄wam mme owo ndikere n̄kpọ. (Matthew 17:24-27) Edieke nnyịn ibụpde mme mbụme oro ẹdade ẹfiọk ekikere owo oro mîdinamke eyen ukpepn̄kpọ okop bụt, ibọrọ oro enye ọnọde ekeme ndiwụt se enye ekerede aban̄a akpan ibuot nneme. Nnyịn imekeme ndikụt ke enye ke osụk enyenyene mme ekikere oro mîkemke ye N̄wed Abasi. Ke uwụtn̄kpọ, enye ekeme ndinịm Abasi-Ita-ke-Kiet ke akpanikọ. Ọyọhọ ibuot 3 ke n̄wed Ifiọk owụt nte ke ikọ oro “Abasi-Ita-ke-Kiet” idụhe ke Bible. N̄wed oro okot oto onyụn̄ asiak mme itie N̄wed Abasi esịn ndiwụt nte ke Jehovah edi isio ye Jesus ye nte ke edisana spirit edi anamutom odudu Abasi, idịghe owo. Ekeme ndidi ndikot nnyụn̄ nneme mme itien̄wed Bible emi eyekem. Edi nso edieke oyomde se ikande oro? Ndusụk ke ima ikokụre ikpehe ukpepn̄kpọ efen, imekeme ndida ndusụk ini nneme ibuot nneme oro ke usụn̄ oro ọnọde ufọn nte ẹkenemede ke n̄wed efen oro Mme Ntiense Jehovah ẹsiode, utọ nte ediye uduot ekpri n̄wed Nte Afo Ekpenyene Ndinịm Abasi-Ita-ke-Kiet ke Akpanikọ? Ke oro ebede, nnyịn imekeme ndifiak ntọn̄ọ ukpepn̄kpọ ke n̄wed Ifiọk.
20 Yak idọhọ ke ibọrọ oro eyen ukpepn̄kpọ ọnọde ke mbụme oro ẹdade ẹfiọk ekikere owo akpa nnyịn idem m̀mê anam ikụt edikpu. Edieke ibuot nneme abuanade edin̄wọn̄ sika, m̀mê n̄kpọ oro oyomde inen̄ede iwụt ukpeme, nnyịn imekeme ndinọ ekikere ndika iso ke ukpepn̄kpọ inyụn̄ ineme n̄kpọ oro ini efen. Ndifiọk ke eyen ukpepn̄kpọ oro ke aka iso ndin̄wọn̄ sika ayanam nnyịn iyom mme ntọt oro ẹmịn̄de man an̄wam enye ndinam n̄kọri ke n̄kan̄ eke spirit. Nte nnyịn idomode ndisịm esịt eyen ukpepn̄kpọ, nnyịn imekeme ndibọn̄ akam ite Jehovah an̄wam enye ọkọri ke n̄kan̄ eke spirit.
21. Nso ikeme nditịbe edieke ikpụhọrede usụn̄ unọ ukpep nnyịn inam ekekem ye akpan n̄kpọ oro eyen ukpepn̄kpọ Bible oyomde?
21 Ye eti ndutịm ye un̄wam Jehovah, nnyịn nte eyịghe mîdụhe iyekeme ndikpụhọde usụn̄ unọ ukpep nnyịn ekekem ye akpan n̄kpọ oro eyen ukpepn̄kpọ Bible oyomde. Nte ini akade, nnyịn imekeme ndin̄wam enye ndinyene ntotụn̄ọ ima nnọ Abasi. Nnyịn n̄ko imekeme ndikụt unen ke ndinam enye owụt ukpono ye esịtekọm ọnọ esop Jehovah. Ndien edi n̄kpọ inemesịt didie ntem ke ini nditọ ukpepn̄kpọ Bible ẹfiọkde ẹte ‘ke akpanikọ, Abasi odu ke otu nnyịn’! (1 Corinth 14:24, 25) Mmọdo nnyịn ikpakam inịm ukpepn̄kpọ Bible emi enyenede uforo inyụn̄ inam kpukpru se ikekeme ndin̄wam mbon en̄wen ẹkabade ẹdi mme mbet Jesus.
N̄kpọuto Oro Anade Ida ke Ọsọn̄urua
22, 23. Nso ke ẹyom edieke anade nnyịn inam utom nnyịn ima?
22 Man inam utom nnyịn ima, ana nnyịn iberi edem ke odudu oro Abasi ọnọde. Ke etịn̄de aban̄a utom ukwọrọikọ, Paul ama ewet ekemmọ mme Christian oro ẹyetde aran ete: “Nnyịn ikama ọsọn̄-urua n̄kpọ emi ke aban̄ mbat, man akwa ubom odudu esie okpoto Abasi, itoho nnyịn.”—2 Corinth 4:7.
23 Edide nnyịn idi mbon oro ẹyetde aran m̀mê “mme erọn̄ en̄wen,” nnyịn itie nte ọtọ-akpa aban̄ mbat. (John 10:16) Edi, Jehovah ekeme ndinọ nnyịn ukeme oro iyomde man inam utom oro ẹkenọde nnyịn, inamke n̄kpọ m̀mê nso mme mfịghe ke nnyịn isobo. (John 16:13; Philippi 4:13) Mmọdo, ẹyak nnyịn ibuọt idem ye Jehovah ọyọhọ ọyọhọ, ida utom nnyịn ke ọsọn̄urua n̄kpọ, inyụn̄ inam utom nnyịn ima.
Didie ke Afo Ọkpọbọrọ?
• Nso ke mbiowo ẹkeme ndinam man ẹnam utom mmọ ẹma?
• Didie ke nnyịn ikeme ndinam n̄kọri ke ndinịm ukpepn̄kpọ Bible oro ẹnyenede uforo?
• Nso ke nnyịn ikpanam edieke uwụtn̄kpọ mîn̄wan̄ake eyen ukpepn̄kpọ Bible m̀mê oyomde ntọt efen efen ke akpan ibuot nneme?
[Mme Ikọ idakisọn̄]
^ ikp. 15 Mme Ntiense Jehovah ẹsio.
^ ikp. 18 Mme Ntiense Jehovah ẹsio.
[Mme Mbụme Ukpepn̄kpọ]
[Ndise ke page 16]
Mbiowo Christian ẹsinọ ukpep ke esop ẹnyụn̄ ẹn̄wam ndinọ ekemmọ mme andinịm ke akpanikọ ukpep ke utom ukwọrọikọ
[Ndise ke page 18]
Ndinịm ukpepn̄kpọ Bible oro ẹnyenede uforo edi usụn̄ kiet ndiyak un̄wana nnyịn ayama