666—Idịghe Ikpîkpu Ibat Oro Ayan̄ade Owo Ifiọk

“Ẹnyụn̄ ẹnam baba owo kiet okûnyene ukeme ndidep n̄kpọ m̀mê ndinyam n̄kpọ, ke mîbọhọke owo eke enyenede idiọn̄ọ oro, kpa enyịn̄ unam oro m̀mê ibat enyịn̄ esie. Sese, ifiọk mi. Yak owo eke enyenede eti ibuot abat ibat unam oro; koro edi ibat owo. Ndien ibat esie edi ikie itiokiet ye ata ye itiokiet.”—Ediyarade 13:17, 18.

 IWAKKE nneme Bible oro esinen̄erede otụk onyụn̄ edemerede owo udọn̄ nte ntịn̄nnịm ikọ emi aban̄ade ndedịbe idiọn̄ọ, m̀mê enyịn̄, “unam oro”—kpa 666. Ke ekebe ndise ye ke Intanet, ọkọrọ ye ke ndise senima, mme n̄wed, ye mme magazine, ẹnọ ekese ekikere ẹban̄a se idiọn̄ọ unam oro adade aban̄a.

Ndusụk owo ẹnịm ẹte ke 666 edi idiọn̄ọ andibiọn̄ọ Christ oro ẹtịn̄de ẹban̄a ke Bible. Mmọ en̄wen ẹnịm ẹte ke enye ada aban̄a idiọn̄ọ oro ẹnyịkde-nyịk owo ẹnọ, utọ nte edida utịme ikan̄ nnịm owo idiọn̄ọ m̀mê edisiak owo idem nsịn mme n̄kpọ ubọ ntọt ilektrọnik emi anamde ẹdiọn̄ọ owo nte asan̄autom unam oro. Edi mbon en̄wen ẹnịm ke 666 edi idiọn̄ọ ukara pope eke Catholic. Mmọ ẹwọn̄ọde mme abisi oro ẹbietde mbon oro ẹdade ẹwet udorienyịn̄ pope emi, Vicarius Filii Dei (Isụn̄utom Eyen Abasi), ẹsịn ke nọmba oro mbon Rome ẹsidade ẹwet ibat, ẹnyụn̄ ẹkpụhọde mme nọmba oro esisịt, ẹnam enye akabade edi 666. N̄ko, ẹdọhọ ke ẹkeme ndinyene ukem nọmba oro ke enyịn̄ Diocletian, edidem eke Rome, ke usem Latin ye ke enyịn̄ Nero Caesar ke usem Hebrew. *

Nte ededi, edinam an̄wan̄a oro ẹkerede-kere mi edi ata isio ye se Bible ke idemesie etịn̄de aban̄a idiọn̄ọ unam oro, nte nnyịn idikụtde ke ibuotikọ oro etienede. Bible owụt nte ke iyatesịt Abasi oyodoro mbon oro ẹnyenede idiọn̄ọ oro ke idem ke ini enye edidade editịm n̄kpọ oro odude ke emi esịm utịt. (Ediyarade 14:9-11; 19:20) Ke ntre, ndidiọn̄ọ se 666 ọwọrọde esịne se ikande ikpîkpu edinam se iyan̄ade owo ifiọk an̄wan̄a. Edi n̄kpọ inemesịt ndifiọk nte ke Jehovah Abasi, akakan uwụtn̄kpọ ima ye Enye emi un̄wana eke spirit otode, anam mme asan̄autom esie ẹfiọk akpan n̄kpọ emi.—2 Timothy 3:16; 1 John 1:5; 4:8.

[Ikọ idakisọn̄]