Buọt Idem ke Spirit Abasi nte Ọyọde Mme Ukpụhọde ke Uwem

“Sịn ifịk wụt Abasi idem fo, ete idi owo eke ẹdomode ẹfiọk.”—2 TIMOTHY 2:15.

1. Mme ukpụhọde ewe ẹkeme ndisịn idaha eke spirit nnyịn ke itiendịk?

 ERERIMBOT oro akande nnyịn okụk aka iso ndikpụhọde. Nnyịn imokụt ikpọ n̄kọri ke ifiọk ntaifiọk ye ke ifiọk ubotn̄kpọ emi asan̄ade ye eti ido uwem ndisụhọde usọp usọp. Nte nnyịn ikenemede ke ibuotikọ oro ekebemde iso, ana mme Christian ẹbiọn̄ọ spirit ererimbot oro edide isio ye spirit Abasi. Nte ededi, nte ererimbot emi akade iso ndikpụhọde, nnyịn n̄ko imokpụhọde ke ediwak usụn̄. Nnyịn imọkọri nte uyen ikabade ikpọ owo. Nnyịn imekeme ndinyene mîdịghe itaba inyene, nsọn̄idem, ye mbonima. Inyeneke se nnyịn ikeme ndinam mban̄a ediwak ke otu mme ukpụhọde emi, ndien mmọ ẹkeme ndidemede mbufa ye n̄kpọsọn̄ idaha, nnyụn̄ nsịn idaha eke spirit nnyịn ke itiendịk.

2. Didie ke uwem David okokpụhọde?

² Ibat ibat owo ke uwem mmọ ẹsisobo mme utọ ikpọ ukpụhọde oro David, eyen Jesse, okosobode. David ama ọsọsọp oto usụhọde itie nte  akparawa ekpemerọn̄ oro owo mîkọfiọkke akabade edi ọwọrọetop owo uko oro ẹkediọn̄ọde ke ofụri idụt. Ekem, enye ama akabade owo nyon̄, emi efịbe-ufụp edidem okoyomde. Ke oro ebede, David ama akabade edi edidem ye andikan. Enye ama ọyọ ubiak utịp akwa idiọkn̄kpọ. Enye ama osobo nnanenyịn ye ubahade ke ubon esie. Enye ama ọkọ inyene, ọsọn̄, onyụn̄ okop mmemidem oro esisan̄ade ye usọn̄. Nte ededi, kpa ye ediwak ukpụhọde ke uwem esie, David ama ọkọn̄ mbuọtidem onyụn̄ eberi edem ke Jehovah ye ke spirit Esie ke ofụri uwem esie. David ama esịn ifịk ndiwụt ‘Abasi idem esie, ete idi owo eke ẹdomode ẹfiọk,’ ndien Abasi ama ọdiọn̄ enye. (2 Timothy 2:15) Okposụkedi mme idaha nnyịn mîdịghe ukem ye eke David, nnyịn imekeme ndikpep n̄kpọ nto usụn̄ oro enye ekesede aban̄a mme mfịna ke uwem esie. Uwụtn̄kpọ esie ekeme ndin̄wam nnyịn ndifiọk nte ikemede ndika iso nnyene un̄wam spirit Abasi nte nnyịn isobode mme ukpụhọde ke uwem nnyịn.

Nsụhọdeidem David—Eti Uwụtn̄kpọ

3, 4. Didie ke David akadaha ke usụhọde itie nte ekpemerọn̄ akabade edi ọwọrọetop owo ke idụt?

³ Ke ini ekedide eyenọwọn̄, David ikọwọrọke iso idem ke ubon esie. Ke ini prọfet Samuel ekedide Bethlehem, ete David okowụt enye nditọiren itiaba ke otu itiaita emi enye ekenyenede. Ẹma ẹkpọn̄ David emi ekekpride akan ẹte ekpeme mme erọn̄. Edi, Jehovah ama emek David nte edidem ini iso Israel. Ẹma ẹdọn̄ ẹkekot David ke in̄wan̄. Ekem, n̄wetnnịm n̄kpọ Bible ọdọhọ ete: “Samuel ada nnụk aran eyet enye idem ke otu nditọ-ete esie: ndien spirit Jehovah odụk David ke idem toto ke usen oro, aka iso.” (1 Samuel 16:12, 13) David ama eberi edem ke spirit oro ke ofụri uwem esie.

⁴ Ikebịghike, akparawa ekpemerọn̄ emi ama akabade edi ọwọrọiso owo ke idụt esie. Ẹma ẹkot enye ẹte edinam n̄kpọ ọnọ edidem onyụn̄ ebre ikwọ ọnọ enye. Enye ama owot an̄wanaekọn̄ oro Goliath, kpa ata anyan okopidem owo oro eketiede afai afai tutu nta mbonekọn̄ Israel ẹkop ndịk ndin̄wana ye enye. Ke ẹkemekde ẹte ese aban̄a udịmekọn̄, David ama an̄wana akan mme Philistine. Mme owo ẹma ẹma enye. Mmọ ẹma ẹkwọ ikwọ ẹtoro enye. Mbemiso emi, owo kiet oro ekesinọde Edidem Saul item ama ọdọhọ ke David edi owo emi “ọfiọkde ndibre” harp, onyụn̄ edi “owo uko, ye owo ekọn̄, onyụn̄ edi asian ke n̄kpọ, ye owo uyai.”—1 Samuel 16:18; 17:23, 24, 45-51; 18:5-7.

5. Nso ikpakanam David atan̄ idem, ndien nnyịn isan̄a didie ifiọk ke enye ikatan̄ke?

⁵ Uwọrọetop, uyai, nsehe uyen, udọnikọ, usọ ikwọ, mbufiọk un̄wana ekọn̄, ye mfọn Abasi—etie nte David ama enyene kpukpru n̄kpọ emi. Kiet ke otu n̄kpọ emi akpakanam enye atan̄ idem, edi baba kiet ke otu mmọ ikanamke. Tịm fiọk ibọrọ emi David ọkọnọde Edidem Saul, oro ọkọnọde David adiaha esie ke ndọ. Ye ata nsụhọdeidem, David ama ọdọhọ ete: “Ami ndi anie? uwem mi onyụn̄ edi nso, ye orụk ete mi ke Israel, eke ami n̄kpedide ukot edidem?” (1 Samuel 18:18) Ke etịn̄de aban̄a ufan̄ikọ emi, eyen ukpepn̄kpọ kiet ekewet ete: “Ikọ David ọkọwọrọ nte ke imọ ndikabade ndi ukot edidem ikedịghe ke ntak ọkpọkpọ n̄kpọ oro ẹnamde imọ idot, m̀mê ke ntak idaha oro imọ ikenyenede ke obio, m̀mê ke ntak ubon oro imọ ikotode.”

6. Ntak emi nnyịn ikpọkọride edu nsụhọdeidem?

⁶ Nsụhọdeidem David ọkọkọn̄ọ ke enye ndidiọn̄ọ nte ke Jehovah enen̄ede okon̄ akan mme anana-mfọnmma owo ke kpukpru usụn̄. Idem ama akpa David nte ke Abasi akam ekere aban̄a owo. (Psalm 144:3) David ama ọfiọk n̄ko nte ke uforo ekededi oro imọ  inyenede akakam edi ke ntak oro Jehovah okowụtde nsụhọdeidem, enịmde idemesie ke usụhọde man omụm imọ akama, ekpeme, onyụn̄ ese aban̄a imọ. (Psalm 18:35) Nso eti ukpepn̄kpọ ke inyene ntem! Ndammana ifiọk nnyịn, se nnyịn inamde, ye mme ifetutom nnyịn ikpedehede inam nnyịn ikohode idem. Apostle Paul ekewet ete: “Nso n̄kpọ ke onyụn̄ enyene eke mûkọbọhọ bọ? Ndien, edieke ọkọbọde bọ, nsinam obụrede mbụre nte n̄kpọ eke mûkọbọhọ”? (1 Corinth 4:7) Man inyene edisana spirit ye unyịme Abasi, ana nnyịn ikọri inyụn̄ ika iso inyene edu nsụhọdeidem.—James 4:6.

“Ẹkûsio Usiene Ẹnọ Idem Mbufo”

7. Nso ifet ikeberede inọ David ndiwot Edidem Saul?

⁷ Ke adan̄aemi David mîkatan̄ke idem ke ntak uwọrọetop esie, emi ama edemede afai afai ufụp ke esịt Edidem Saul, emi mîkenyeneke aba spirit Abasi. Okposụkedi David mîkeduehe, enye ama efehe okodụn̄ ke wilderness ke ntak itọn̄ uwem esie. Ini kiet, ke adan̄aemi Edidem Saul ekebịnede David ke mbrenyịn, enye ama ebe odụk abaitiat, ifiọkke ite ke David ye nsan̄a esie ẹkedịbe do. Ikọt David ẹma ẹkpak enye ẹte ada ifet oro eketiede nte Abasi ọnọ do owot Saul. Nnyịn imekeme ndikụt mmọ ke enyịn ikike nte ẹdọn̄de odu ye David ke n̄kịmn̄kịm abaitiat oro, ẹte: “Sese, emi edi usen emi Jehovah ọkọdọhọde fi, ete, Sese, nyada usua fo nsịn fi ke ubọk, man anam enye kpa nte afo amade.”—1 Samuel 24:2-6.

8. Ntak oro David mîkosioho usiene?

⁸ David ama esịn ndiwot Saul. Ke ntak mbuọtidem ye ime oro enye ekenyenede, enye ama enyịme ndiyak kpukpru n̄kpọ nsịn Jehovah ke ubọk. Ke edidem ama ọkọwọrọ ke abaitiat oro, David ama ofiori okot enye onyụn̄ ọdọhọ ete: “Jehovah osụk ekpe ikpe ke ufọt mi ye afo, Jehovah osụk onyụn̄ osio usiene ye afo ọnọ mi: edi ubọk mi iditụkke fi.” (1 Samuel 24:12) Kpa ye oro enye ọkọdiọn̄ọde ke Saul ama edue imọ, David ikosioho usiene inọ idemesie; enye ikonyụn̄ isụn̄ike Saul m̀mê nditịn̄ idiọk ikọ ndian enye. Ke ediwak idaha efen, David ama omụm idemesie akama onyụn̄ etre ndinam n̄kpọ ke odudu idemesie. Utu ke oro, enye ama ọbuọt idem ke Jehovah ndinen̄ede mme n̄kpọ.—1 Samuel 25:32-34; 26:10, 11.

9. Ntak emi nnyịn mîkposioho usiene edieke nnyịn isobode ubiọn̄ọ m̀mê ukọbọ?

⁹ Ukem nte David, afo emekeme ndikụt idemfo ke mme idaha oro etiede idomo idomo. Eyedi mme nsan̄a ufọkn̄wed, ekemmọ mbonutom, mbonubon, m̀mê mmọ en̄wen oro mînịmke se afo enịmde ke akpanikọ ẹbiọn̄ọ m̀mê ẹkọbọ fi. Kûsio usiene. Bet Jehovah, yom un̄wam edisana spirit esie. Eyedi eti edu uwem  fo ekeme nditụk mmọ oro mînịmke ke akpanikọ onyụn̄ anam mmọ ẹkabade ẹdi mme andinịm ke akpanikọ. (1 Peter 3:1) Ke usụn̄ ekededi, tịm fiọk ete ke Jehovah okụt itie fo, oyonyụn̄ anam n̄kpọ aban̄a oro ke ekemini esie. Apostle Paul ekewet ete: “Ẹkûsio usiene ẹnọ idem mbufo, ndima mme ufan mi, edi ẹbọk idem ke usụn̄ ẹnọ iyatesịt Abasi: koro ẹwet ẹte, Jehovah ete, Usiene enyene Mi, Ami nyosio usiene.”—Rome 12:19.

“Ẹkop Item”

10. Didie ke David ọkọduọ odụk idiọkn̄kpọ, ndien didie ke enye akan̄wana ndidịp idiọkn̄kpọ oro?

¹⁰ Mme isua ẹma ẹbe. David ama akabade edi ata akamba ọwọrọiso edidem oro ẹkemade. N̄wọrọnda usụn̄ oro enye akanamde akpanikọ, ke adianade ye mme inem inem psalm oro enye ekewetde ndida n̄kwọ itoro nnọ Jehovah ekeme ndisọsọp nnam nnyịn ikere nte ke utọ owo emi ikemeke ndiduọ ndụk akwa idiọkn̄kpọ. Edi enye ama ọduọ odụk. Usen kiet, edidem ama ada ke enyọn̄ ufọk esie okụt nte ediye eyenan̄wan eyerede mmọn̄. Enye ama obụp aban̄a enye. Ke ọfiọkde ke eyenan̄wan oro edi Bath-sheba, n̄ko nte ke Uriah, ebe esie, ama aka ndin̄wana ekọn̄, David ama ọdọn̄ ẹkekot enye edi, onyụn̄ enyene ebuana idan̄ ye enye. Ekem, David ama edifiọk ke enye oyomo. Nso idiọk etop ke emi edidi ntem edieke ẹyararede n̄kpọ emi! Ke idak Ibet Moses, efịbe ekedi idiọkn̄kpọ oro akasan̄ade ye ufen n̄kpa. Edidem ama ekere ke imọ imekeme ndidịp idiọkn̄kpọ emi. Ntre enye ama ọdọn̄ ẹkedọhọ mbonekọn̄ ẹte ẹyak Uriah ọnyọn̄ edi Jerusalem. Idotenyịn David ekedi nte ke Uriah ayadan̄ ye Bath-sheba ke okoneyo oro, edi enye ikadan̄ke. David ke mbrenyịn ama afiak ọdọn̄ Uriah aka ekọn̄ onyụn̄ ọnọ enye leta ada ọsọk Joab, etubom ekọn̄. Leta oro ọkọdọhọ ẹsịn Uriah ke iso ekọn̄ ke ebiet oro ẹdiwotde enye. Joab ama anam ntre, ndien ẹma ẹwot Uriah. Ke Bath-sheba ama okofụhọ ebe esie nte ido edide, David ama emen enye ọdọ.—2 Samuel 11:1-27.

11. Nso mfịna ke Nathan ekemen owụt David, ndien didie ke enye akanam n̄kpọ?

¹¹ Etie nte ekikere oro ama ọfọn, okposụkedi akpakanade David ọfiọk nte ke kpukpru n̄kpọ ẹna in̄wan̄ ke iso Jehovah. (Mme Hebrew 4:13) Ediwak ọfiọn̄ ẹma ẹbe, eyen oro onyụn̄ amana. Ekem, ke ndausụn̄ Abasi, prọfet Nathan ama aka ebịne David. Prọfet oro ama etịn̄ ọnọ edidem aban̄a imọ owo oro ọkọkpọn̄de ediwak nditọ erọn̄ esie, onyụn̄ owotde edima erọn̄ kiet oro eyen ubuene ekenyenede. Mbụk oro ama edemede ekikere unenikpe ke esịt David, edi enye ikọfiọkke se n̄ke oro akadade aban̄a ke ata ata usụn̄. David ama ebiere ikpe usọp usọp ọnọ imọ owo oro. Ye ifụtesịt, David ama ọdọhọ Nathan ete: “Owo oro akanamde ntre enyene ndikpa.”—2 Samuel 12:1-6.

12. Nso ubiereikpe ke Jehovah ọkọnọ David?

¹² Prọfet oro ama ọdọhọ ete: “Edi afo edi owo oro.” David ama ebiere ikpe ọnọ idemesie. Nte eyịghe mîdụhe, ifụtesịt David ama ọsọsọp akabade akwa mfụhọ ye bụt. Ye n̄kpaidem, enye ama akpan̄ utọn̄ okop nte Nathan atan̄ade ubiereikpe Jehovah oro owo mîkemeke ndimen mfep. Mme ikọ ndọn̄esịt ikodụhe. David ama esịn uyo Jehovah ke ndek ebe ke ndinam se idiọkde. Ndi enye ikadaha ofụt mme asua iwot Uriah? Ofụt idikpọn̄ke ufọk David. Ndi enye  ikadaha n̄wan Uriah ke ndịbe? Ukem idiọk oro eyesịm enye, idịghe ke ndịbe, edi ke eferife.—2 Samuel 12:7-12.

13. Didie ke David akanam n̄kpọ aban̄a ntụnọ Jehovah?

¹³ David ama anam ọfọn koro enye ikakan̄ke idiọkn̄kpọ oro. Enye ikọtọhọke ye prọfet Nathan. Enye ikọduọhọke mbon en̄wen m̀mê ndiyom unen ke se enye akanamde. Ke ini ẹkemende idiọkn̄kpọ esie ẹwụt enye, David ama enyịme nduduọhọ, ọdọhọde ete: “Mmanam idiọk ido ye Jehovah.” (2 Samuel 12:13) Psalm 51 owụt nte enye okofụhọde aban̄a idiọkn̄kpọ esie ye udomo edikabade esịt esie. Enye ama ekpe Jehovah ubọk ete: “Kûmen mi ke iso fo uduọk; kûnyụn̄ ubọ mi edisana spirit fo.” Enye ama enịm nte ke Jehovah, ke mbọm esie, idisịnke ke ndek esịt oro ‘obụn̄ọde onyụn̄ anuahade’ ke ntak idiọkn̄kpọ. (Psalm 51:11, 17) David ama aka iso ndiberi edem ke spirit Abasi. Jehovah ama efen ọnọ David ke idiọkn̄kpọ esie kpa ye oro enye mîkekpemeke enye ibiọn̄ọ mme ndotndot utịp idiọkn̄kpọ oro.

14. Didie ke nnyịn ikpanam n̄kpọ iban̄a ntụnọ Jehovah?

¹⁴ Kpukpru nnyịn idi mme anana mfọnmma, ndien nnyịn kpukpru imesinam idiọkn̄kpọ. (Rome 3:23) Ukem nte David, nnyịn ndusụk ini imekeme ndiduọ ndụk akwa idiọkn̄kpọ. Jehovah esitụnọ mmọ oro ẹyomde ndinam n̄kpọ nnọ enye, kpa nte ima ima ete esitụnọde nditọ esie. Nte ededi, ke adan̄aemi ntụnọ esinyenede ufọn, isidịghe mmemmem n̄kpọ ndibọ enye. Ke akpanikọ, ndusụk ini enye ‘esibabiak.’ (Mme Hebrew 12:6, 11) Edi, edieke nnyịn ‘ikopde item,’ nnyịn imekeme nditie ke emem ye Jehovah. (Mme N̄ke 8:33) Man inyene n̄kaiso edidiọn̄ spirit Jehovah, ana nnyịn inyịme ntụnọ inyụn̄ isịn ifịk man inyene unyịme Abasi.

Kûdori Enyịn ke Inyene Oro Ayan̄ade Owo

15. (a) Ke mme usụn̄ ewe ke mme owo ẹsida inyene mmọ ẹnam n̄kpọ? (b) Ọkọdọn̄ David ndida inyene esie nnam n̄kpọ didie?

¹⁵ N̄kpọ ndomokiet idụhe ndiwụt nte ke David okoto ọwọrọiso ubon m̀mê ndiwụt nte ke ubon esie ama enyene inyene. Nte ededi, ke ini enye ekedide edidem, David ama ọkọ ekese inyene. Nte afo ọfiọkde, ediwak owo ẹsifafam inyene mmọ, ẹyomde ndinam mmọ ẹwak ke ntak idiọkitọn̄ mîdịghe ẹbiat mmọ ke ibụk ibụk usụn̄. Mmọ eken ẹsida okụk mmọ ẹnọ idem ubọn̄. (Matthew 6:2) David ikanamke ntre ye inyene esie. Udọn̄ esie ekedi ndikpono Jehovah. David ama ọdọhọ Nathan ke ikpama ndibọp temple nnọ Jehovah man ẹnịm ekebe ediomi Jehovah oro ‘okodụn̄de ke ufọt ikpehe’ ke Jerusalem. Jehovah ama ama ekikere David, edi ama ada Nathan asian enye nte ke eyen esie, Solomon edibọp temple oro.—2 Samuel 7:1, 2, 12, 13.

16. Nso ndutịm ke David akanam ọnọ edibọp temple?

¹⁶ David ama etịm mme n̄kpọ oro ẹdidade ẹnam akwa utom ubọpn̄kpọ emi obon. David ama ọdọhọ Solomon ete: “Mma mbon tọsịn talent gold ke itie ikie, nnọ ufọk Jehovah, ye tọsịn talent silver ke itie tọsịn; edi idomoke  okpoho ye ukwak: koro mmọ ẹwakde eti-eti; mma nnyụn̄ mbon eto ye itiat; afo oyonyụn̄ adian efen ke mmọ.” Enye ama etịp talent gold 3,000 ye talent silver 7,000 ke idemesie. * (1 Chronicles 22:14; 29:3, 4) Enọ ofụri esịt David ikedịghe edinam n̄wụtidem, edi ekedi uyarade mbuọtidem ye uten̄e oro enye ekenyenede ọnọ Jehovah Abasi. Ke ọfiọkde ebiet oro inyene esie okotode, enye ama ọdọhọ Jehovah ete: “Kpukpru n̄kpọ ẹto fi, nnyịn inyụn̄ inọ fi se itode fi ke ubọk.” (1 Chronicles 29:14) Ama otụk David ke esịt ndinam ofụri se enye ekemede man emenede utuakibuot akpanikọ ke enyọn̄.

17. Didie ke item oro ẹkụtde ke 1 Timothy 6:17-19 otụk ubuene ye imọ owo?

¹⁷ Ukem ntre, nnyịn ikpakam ida inyene nnyịn inam eti n̄kpọ. Utu ke ndibịne usụn̄ uwem uma inyene, enen̄ede ọfọn ndiyom unyịme Abasi—oro edi usụn̄ ndinyene ata ọniọn̄ ye inemesịt. Paul ekewet ete: “Sọn̄ọ dọhọ mme enyene-n̄kpọ ke eyo emi, ete mmọ ẹkûmenede idem, ẹkûnyụn̄ ẹdori enyịn ke se iyan̄ade owo nte ẹnyene, edi ẹdori enyịn ke Abasi, emi ọnọde nnyịn kpukpru n̄kpọ uwak-uwak, ete idara ke esịt. Dọhọ mmọ ete, ẹfọn ido, ẹnyụn̄ ẹnam nti utom uwak-uwak, ẹnyụn̄ ẹtat ubọk, ẹnyịme ndinọ owo n̄kpọ; ẹn̄wana ẹyom eti isọn̄ ẹnọ idem mmọ ke ini iso, man mmọ ẹkpemụm uwem eke edide ata uwem ẹkama.” (1 Timothy 6:17-19) Inamke n̄kpọ m̀mê idaha ndutịm uforo nnyịn etie didie, ẹyak nnyịn iberi edem ke spirit Abasi, inyụn̄ ibịne usụn̄ uwem oro edinamde nnyịn inyene “inyene ke n̄kan̄ Abasi.” (Luke 12:21) Idụhe n̄kpọ ndomokiet oro ọsọn̄de urua nte edinyene eti idaha ye edima Ete nnyịn eke heaven.

Wụt Abasi Idem Ete Idi Owo Emi Ẹdomode Ẹfiọk

18. Didie ke David ekenịm eti uwụtn̄kpọ ọnọ mme Christian?

¹⁸ David ama oyom unyịme Jehovah ke ofụri eyouwem esie. Enye ama ọkwọ ete: “Tua mi mbọm, O Abasi, tua mi mbọm, koro ukpọn̄ mi ọbuọtde idem ye afo.” (Psalm 57:1) Mbuọtidem esie ke Jehovah ikọwọrọke ikpîkpu. David ama ọsọn̄, ‘oyụhọ usen.’ (1 Chronicles 23:1) Okposụkedi David akanamde ikpọ ndudue, ẹti enye nte kiet ke otu ediwak ntiense oro ẹkewụtde n̄wọrọnda mbuọtidem.—Mme Hebrew 11:32.

19. Didie ke nnyịn ikeme ndiwụt idem nnyịn ite idi mme owo emi Abasi odomode ọfiọk?

¹⁹ Nte afo osobode mme ukpụhọde idaha ke uwem, ti ete ukem nte Jehovah ekenịmde David uwem, ọsọn̄ọde enye idem, onyụn̄ otụnọde enye, enye ekeme ndinam kpa ntre ye imọ. Ukem nte David, apostle Paul ama osobo ediwak ukpụhọde ke uwem. Edi, enye n̄ko ama ọsọn̄ọ ada ebe ke ndiberi edem ke spirit Abasi. Enye ekewet ete: “Mmenyene ukeme ndinam kpukpru n̄kpọ ke odudu Andisọn̄ọ mi idem.” (Philippi 4:12, 13) Edieke nnyịn ibuọtde idem ye Jehovah, enye ayan̄wam nnyịn ndikụt unen. Enye oyom nnyịn ikụt unen. Edieke nnyịn ikpan̄de utọn̄ inọ enye, inyụn̄ isan̄ade ikpere enye, enye ọyọnọ nnyịn ukeme ndinam uduak esie. Ndien edieke ikade iso ndiberi edem ke spirit Abasi, nnyịn iyekeme ‘ndisịn ifịk n̄wụt Abasi idem nnyịn, ite idi mme owo eke ẹdomode ẹfiọk,’ idahaemi ye ke nsinsi.—2 Timothy 2:15.

[Ikọ idakisọn̄]

Didie ke Afo Ọkpọbọrọ?

• Didie ke nnyịn ikpọbiọn̄ọ edu ntan̄idem?

• Ntak emi nnyịn mîkposioho usiene inọ idem nnyịn?

• Didie ke nnyịn ikpese ntụnọ?

• Ntak emi nnyịn ikpọbuọtde idem ke Abasi utu ke inyene?

[Mme Mbụme Ukpepn̄kpọ]

[Ndise ke page 16, 17]

David ekeberi edem ke spirit Abasi onyụn̄ oyom unyịme Esie. Nte afo ke anam ntre?

[Ndise ke page 18]

“Kpukpru n̄kpọ ẹto fi, nnyịn inyụn̄ inọ fi se itode fi ke ubọk”