Liberia—N̄kọri Obio Ubọn̄ Kpa ye Ekọn̄

EKỌN̄ mbio obio aman̄wana ke se ibede isua duop ke Liberia. Ke ufọt ufọt isua 2003, mbon nsọn̄ibuot ẹma ẹda ekọn̄ ẹdụk Monrovia, kpa ibuot obio Liberia. Ẹma ẹnyịk ediwak Mme Ntiense Jehovah ndifen̄e n̄kpọn̄ ufọk mmọ, ndusụk ini ẹfen̄ede ndien ndien. Ẹma ẹsibụme inyene mmọ ediwak ini.

Ke mfụhọ, ẹma ẹwot ediwak tọsịn owo ke ini ẹken̄wanade ekọn̄ ke ibuot obio oro. Ntiense iba, eren ye n̄wan ẹma ẹsịne ke otu mbon oro ẹkewotde. Didie ke nditọete eken ẹkenam n̄kpọ ẹban̄a afanikọn̄ emi, ndien nso ke ẹkenam ndin̄wam mmọ?

Ndin̄wam Mbon Oro Ẹyomde Un̄wam

Ke ofụri ini afanikọn̄ oro, ọfis n̄kọk itieutom eke Mme Ntiense Jehovah ke Liberia ama anam ndutịm ndin̄wam mbon oro ẹyomde un̄wam. Ẹma ẹnọ udia, n̄kpọ ndụn̄ufọk, ye ibọkusọbọ. Udia ama ọsọbọ ke ini mbon nsọn̄ibuot ẹkedude ke esụkmbehe. N̄kọk itieutom ama ebebem iso ọfiọk ke emi eyetịbe ndien ama ananam mme n̄kpọ oro ẹdiyomde ẹdu ẹnọ Mme Ntiense tọsịn iba oro ẹkefen̄ede ẹkedu ke mme Ufọkmbono Obio Ubọn̄ ke ofụri obio oro. Nditọete ẹma ẹdeme udia emi nsịt nsịt tutu ẹfiak ẹberede esụkmbehe. N̄kọk itieutom ke Belgium ye Sierra Leone ẹma ẹnọ ibọkusọbọ ke ubomofụm ẹdi, ndien n̄kọk itieutom ke Britain ye France ẹma ẹsịn mme ọfọn̄ ke nsụn̄ikan̄ ẹnọ ẹdi.

Kpa ye nnanenyịn oro, nditọete nnyịn ẹma ẹnyene in̄wan̄-in̄wan̄ edu ẹnyụn̄ ẹkop inemesịt. Se owo kiet emi ekefehede ọkpọn̄ ufọk esie utịm ikata eketịn̄de owụt nte etiede ediwak mmọ ke idem. Enye ọkọdọhọ ete: “Se nnyịn isikwọrọde edi emi; nnyịn idu uwem ke ukperedem ini.”

Nte Ẹnamde N̄kpọ Ẹban̄a Eti Mbụk

Kpa ye ndutịme emi odude ke idụt oro, Mme Ntiense emi ẹka iso ndinyene nti utịp ke an̄wautom. Ẹma ẹnyene n̄wakn̄kan ibat mme asuanetop 3,879 ke January 2003, ndien ke February mmọ ẹma ẹnịm ukpepn̄kpọ Bible 15,227.

Mme owo ẹsọp ndinam n̄kpọ mban̄a eti mbụk. Imenyene uwụtn̄kpọ kiet ke obio-in̄wan̄ ke n̄kan̄ ufọt edem usụk ye edem usiahautịn idụt oro. Esop kiet ama odiomi ndinịm Editi n̄kpa Christ ke akamba obio-in̄wan̄ Bewahn, emi ẹkemede ndisan̄a ke n̄kpọ nte hour ition n̄kesịm ọtọn̄ọde ke itie oro mmọ ẹkesisopde idem. Mbemiso nditọete ẹkekade Bewahn ndinọ mme owo ikot ndidụk Editi, mmọ ẹma ẹnọ ọbọn̄ obio oro n̄wedikot. Ke ini enye ọkọbọde n̄wedikot emi, enye ama emen Bible esie, aka ebịne mbio obio oro, okot itie N̄wed Abasi kiet emi odude ke n̄wedikot oro, onyụn̄ esịn udọn̄ ọnọ mmọ ndidụk Editi oro. Ntre ke ini nditọete nnyịn ẹkekade ẹkesịm, mmọ ẹma ẹkụt ke ẹnanam utom oro ẹnọ mmimọ! Ọbọn̄ obio oro ama asan̄a ye nditọ esie ye iban esie iba edi Editi. Ke ofụri ofụri, owo 27 ẹkedụk Editi oro. Tọn̄ọ ke ini oro, ọbọn̄ obio emi ama ọwọrọ ọkpọn̄ Ufọkabasi Methodist, ọtọn̄ọ ndikpep n̄kpọ ye  Mme Ntiense, onyụn̄ ọnọ isọn̄ ndida mbọp Ufọkmbono Obio Ubọn̄.

Ukpụhọde Edu

Edu uwem nditọete nnyịn an̄wam n̄ko ndinam mme andibiọn̄ọ ẹkpụhọde ekikere mmọ kaban̄a akpanikọ. Ke uwụtn̄kpọ, kere ban̄a owo oro ekerede Opoku. Akpan asiakusụn̄ kiet ama osobo ye enye ke an̄wautom onyụn̄ ọnọ enye Enyọn̄-Ukpeme. Opoku ama enyene udọn̄ ke ibuotikọ kiet ke Enyọn̄-Ukpeme oro edi ikenyeneke okụk ndibọ. Ke anamde an̄wan̄a nte ke mme magazine oro inyeneke ekọmurua, asiakusụn̄ emi ama ọkpọn̄ magazine oro ọnọ enye onyụn̄ odiomi ndifiak n̄ka. Ke afiakde aka, Opoku ama obụp asiakusụn̄ oro ete: “Nte afo ọmọdiọn̄ọ owo emi ami ndide? Ata ediwak mbon mbufo ke obio Harper ẹfiọk mi. Mma nsibịn nditọ Mme Ntiense nsion̄o ke ufọkn̄wed!” Do enye ama etịn̄ nte ke imọ ikedi etubom ufọkn̄wed sekọndri kiet ke obio oro ndien ke imọ ima isikọbọ nditọ Mme Ntiense Jehovah ke ntak mmọ ẹkesịnde ndikọm ọfọn̄ etakubom.

Nte ededi, Mme Ntiense Jehovah ẹma ẹnam n̄kpọ ikata ndiwụt ima Christian ndien emi ama anam Opoku afiak odụn̄ọde idem esie. Akpa, enye ama okụt nte Mme Ntiense ẹkesede ẹban̄a eyenete mmọ eke spirit emi ọkọdọn̄ọde n̄kpa n̄kpa. Mmọ ẹma ẹkam ẹnam enye aka ọkọbọ usọbọ ke idụt efen. Opoku ekekere ke eyenete oro ọkọdọn̄ọde mi ekedi “ọwọrọiso owo” ke otu Mme Ntiense, edi ama edifiọk nte ke enye ekedi ukem ye Mme Ntiense eken. Ọyọhọ iba, ke iduọk isua 1990, Opoku ama efehe aka Côte d’Ivoire okodu ke ntak ekọn̄. Usen kiet ke ini itọn̄ akasatde enye, enye ama aka ndibọ akparawa kiet mmọn̄ ndep. Akparawa oro ikenyeneke ndian̄ade ndinọ Opoku, ntre enye ama ayak Opoku emen mmọn̄ oro ọkọn̄wọn̄ ke mfọn. Ke ama ọkọnọ Opoku mmọn̄ oro, akparawa emi ama obụp ete: “Nte afo emekere ke tutu amama ini oyodu emi owo nte ami ye afo idinọde kiet eken n̄kpọ ye unana edibọ okụk?” Opoku ama obụp m̀mê enye edi kiet ke otu Mme Ntiense Jehovah, ndien akparawa oro ama enyịme. Mfọnido ye ntatubọk eyenete oro ama otụk enye. Ke akpatre, akpan asiakusụn̄ oro ndinyịme ndinọ enye magazine oro ke mfọn ama anam Opoku enịm ke se imọ ikekerede iban̄a Mme Ntiense ikenenke ndien ke ana imọ inam ukpụhọde. Enye ama anam n̄kọri ke n̄kan̄ eke spirit ndien idahaemi enye edi asuanetop oro mînaha baptism.

Okposụkedi nditọete ke Liberia ẹkade iso ndisobo ata n̄kpọsọn̄ idaha, mmọ ẹbuọt idem ye Abasi ẹnyụn̄ ẹka iso ndikwọrọ eti mbụk aban̄ade nti idaha emi ẹdidude ke edinen ukara Obio Ubọn̄ Abasi. Tutu amama Jehovah idifreke ọkpọsọn̄ utom mmọ ye ima enyịn̄ Esie eke mmọ ẹwụtde.—Mme Hebrew 6:10.

[Mme ndise obio ke page 30]

(Ama oyom ndikụt nte enye enen̄erede etie, se n̄wed)

MONROVIA

[Mme ndise ke page 31]

Ke mme ini afanikọn̄, ikọt Jehovah ẹsin̄wam mbon oro ẹyomde un̄wam ke n̄kan̄ eke spirit ye ke n̄kan̄ eke obụk