Ntọt Mme Anditan̄a Obio Ubọn̄

Ndiyom Mme Owo ke Itieutom Mmọ

UKEM n̄kpọ ewe eketịbe ọnọ apostle Matthew, Peter, Andrew, James, ye John? Jesus okokot kpukpru mmọ ke ini mmọ ẹkedude ke itieutom mmọ. Peter, Andrew, James, ye John ẹkesụk ẹnam utom ukọiyak ke ini Jesus okokotde mmọ, ọdọhọde ete: “Ẹtiene Mi.” Matthew okodu ke itie ubọ tax ke ini Jesus ọkọdọhọde enye etiene imọ.—Matthew 4:18-21; 9:9.

Ndikwọrọ ikọ nnọ mme owo ke itieutom mmọ ekeme ndikama utịp. Ke ẹfiọkde emi, Mme Ntiense Jehovah ke Japan ẹma ẹsịn ofụri ukeme ke ndondo emi ndibuana ke ikpehe utom ukwọrọikọ enye emi. Nso ikedi utịp? Ke ufan̄ ọfiọn̄ ifan̄, ẹma ẹnam ata ediwak mfiakn̄ka, ndien ẹma ẹtọn̄ọ n̄kpọ nte ukpepn̄kpọ Bible 250. Kere ban̄a mme ifiọkutom oro ẹtienede mi.

Asan̄autom uyọhọ ini kiet ke Tokyo ama osobo ye etubom itie unyam udia emi ekenyenede nneme ye Ntiense kiet ke ini enye ekedide eyen ufọkn̄wed ke n̄kpọ nte isua 30 emi ẹkebede. Okposụkedi ekese ke se ẹketịn̄de ini oro mîkan̄wan̄ake etubom emi, enye ama enyene udọn̄ ke Bible. Idahaemi, ke ẹfiakde ẹdemede enye udọn̄, enye ama ọsọsọp enyịme ukpepn̄kpọ Bible ke n̄wed Ifiọk Oro Adade Osịm Nsinsi Uwem. * Ke adianade do, enye ama ọtọn̄ọ ndikot Bible ke idemesie kpukpru mbubịteyo mbemiso enye odụkde idap.

Akpan asiakusụn̄ kiet ama aka ọfis kiet. Okposụkedi etubom utom mîkodụhe, n̄kaiferi emi ọkọbọrọde ikot ke urụk ukopikọ etubom oro ama obụp ete, “Nte afo akpama ndinyene nneme ye ami?” Ke ẹma ẹkenyene esisịt nneme ke urụk ukopikọ, n̄kaiferi emi ama ọwọrọ edi onyụn̄ edidọhọ ke imọ imama ndikot Bible. Akpan asiakusụn̄ oro ama odiomi ndida Bible mfiak n̄ka onyụn̄ ọtọn̄ọ ukpepn̄kpọ Bible ye enye, ndien ẹkesinịm ukpepn̄kpọ emi tụhi-tụhi usenubọk ke itie inemesịt emi okodude ekpere mbemiso utom ọtọn̄ọde.

Ke ọfis efen, eren kiet ama okụt nte nsan̄autom esie ọbọde magazine Enyọn̄-Ukpeme ye Awake! edi ọsọsọp otomo mmọ ọduọn̄ọ ke Ntiense oro ama ọkọnyọn̄. Ke ini eren oro ọkọnyọn̄de esịm ufọk, enye ama etịn̄ se iketịbede ọnọ n̄wan esie emi edide Ntiense onyụn̄ ọdọhọ ke imọ ikpakakpan̄ utọn̄ esisịt edieke ekpekedide imọ. Eyen esie an̄wan emi akadade okop se enye eketịn̄de, ama eketịn̄ ọnọ Ntiense kiet emi esikwọrọde ikọ ke efakutom mbubehe oro. Ntiense oro ama ọsọsọp aka ebịne eren emi ke ọfis onyụn̄ ọkọtọn̄ọ ukpepn̄kpọ Bible ye enye. Ikebịghike eren oro ama ọtọn̄ọ ndidụk mme mbono esop Sunday kpukpru ini.

Ndikwọrọ ikọ nnọ mme owo ke itieutom enyene mme ufọn efen. Ediwak mme asuanetop ke Japan ẹnyene usọ ke ndinam mfiakn̄ka ke mme ikpehe oro ufọkurua ẹdude, ke mme usiakifia, ye ke mme ọfis. Ke adianade do, ebede ke usụn̄ unọ ikọ ntiense enye emi, ẹsobo ediwak mbon oro mîkọwọrọke an̄wautom aba ẹnyụn̄ ẹtọn̄ọ ukpepn̄kpọ ye mmọ. Ẹmenyene mme n̄wọrọnda utịp. Esop kiet ke ufọt ufọt Tokyo ọtọt ukpepn̄kpọ Bible 108, ibat emi awak utịm ikaba akan eke isua oko.

[Ikọ idakisọn̄]