Nte Afo ke Owụk Enyịn Ese Utịp?

UDỌN̄Ọ oro esitọn̄ọ ndikọri sụn̄sụn̄. Ke ntọn̄ọ ntọn̄ọ, enye esinam owo okûtịm okụt n̄kpọ. Edieke owo mîsọbọke, enye ekeme ndifụk ofụri n̄kpasịp enyịn. Ke akpatre, enye ekeme ndinam owo ọdọn̄ọ nnan. Nso ke nnyịn itịn̄ iban̄a? Ubiak n̄kpasịp enyịn—ata akpan udọn̄ọ oro esinamde owo edi nnan.

Ukem nte nnyịn ikemede ndidi nnan sụn̄sụn̄, nnyịn imekeme nditaba enyịn oro enen̄erede ọsọn̄ urua akan—kpa enyịn eke spirit nnyịn. Ke ntre, edi akpan n̄kpọ ndinam enyịn nnyịn enen̄ede owụhọ ke mme n̄kpọ eke spirit.

Ndiwụk Enyịn Nse Utịp

Kiet ke otu n̄kpọ oro ‘owo mîkwe’ ke ata ata enyịn edi ubọn̄ ubọn̄ utịp nsinsi uwem emi Jehovah enịmde ọnọ mme anam-akpanikọ ikọt esie. (2 Corinth 4:18) Edi akpanikọ nte ke akpan ntak emi mme Christian ẹtuakde ibuot ẹnọ Abasi edi sia mmọ ẹmade enye. (Matthew 22:37) Kpa ye oro, Jehovah oyom nnyịn inen̄ede idori enyịn ndibọ utịp nnyịn. Enye oyom nnyịn ida imọ nte Ete emi atatde ubọk emi edide “Andinọ mmọ emi ẹyomde Enye utịp.” (Mme Hebrew 11:6) Ntem, mbon oro ẹnen̄erede ẹfiọk Abasi ẹnyụn̄ ẹmade enye ẹda mme edidiọn̄ oro enye ọn̄wọn̄ọde ke ọsọn̄urua n̄kpọ ẹnyụn̄ ẹsọn̄ọ ẹyom mmọ ẹsu.—Rome 8:19, 24, 25.

Ediwak mbon oro ẹsikotde magazine emi ye nsan̄a esie, Awake!, ẹsima mme ndise oro ẹwụtde nte Paradise isọn̄ emi edide, editiede. Ke akpanikọ, nnyịn itịmke ifiọk nte Paradise isọn̄ editiede, ndien mme ndise oro ẹsimịn̄de ẹdi sụk utomusọ ẹkọn̄ọde ke mme utọ ufan̄ikọ Bible nte Isaiah 11:6-9. Nte ededi, Christian an̄wan kiet ọkọdọhọ ete: “Ke ini n̄kụtde mme ndise ke Enyọn̄-Ukpeme ye Awake! ẹban̄ade Paradise oro edidide, mmesidụn̄ọde mmọ ye ntịn̄enyịn, nte owo okpodụn̄ọrede ediye uduot ekpri n̄wed isan̄. Mmesidomo ndikụt idem mi do sia edide do ke nnen̄ede ndori enyịn ndidu ke edikem ini Abasi.”

Eketie apostle Paul ntre ke idem kaban̄a “akwa ikot” esie. Enye ikabatke ke imomụm ikot oro kan̄a ikama, koro akana enye anam akpanikọ tutu esịm akpatre. Edi enye ama aka iso ‘ndinyanade mbịne se ikanade enye ke iso.’ (Philippi 3:13, 14) Ntre n̄ko, Jesus ama ọyọ ubiak n̄kpa ke eto ndutụhọ ‘kaban̄a idatesịt eke akanade Enye ke iso.’—Mme Hebrew 12:2.

Nte akanam afo emeyịk m̀mê imọ iyodụk obufa ererimbot oro? Ke akpanikọ, ifọnke ndibuọt idem ke idem nnyịn n̄kaha, sia nnyịn ndibọ utịp uwem ọkọn̄ọ ke ndinam akpanikọ tutu esịm akpatre. (Matthew 24:13) Nte ededi, edieke nnyịn idomode ofụri ukeme ndinam se Abasi oyomde, nnyịn imenyene kpukpru ntak ndidori enyịn nte ke iyọbọ utịp. Ti ete ke Jehovah “iyomke baba owo kiet atak, edi oyom kpukpru owo ẹtua n̄kpọfiọk ẹkabade esịt.” (2 Peter 3:9) Edieke nnyịn ibuọtde idem ye Jehovah, enye  ayan̄wam nnyịn ndisịm utịtmbuba nnyịn. Ke akpanikọ, idịghe edu Jehovah ndiyom ndinam mbon oro ẹdomode ofụri ukeme ndinem enye esịt, ẹkûdot.—Psalm 103:8-11; 130:3, 4; Ezekiel 18:32.

Ndifiọk nte Jehovah ekerede aban̄a ikọt esie ọnọ nnyịn idotenyịn—kpa edu emi edide akpan n̄kpọ ukem nte mbuọtidem nnyịn. (1 Corinth 13:13) Ikọ Greek oro ẹkabarede ke Bible nte “idotenyịn” ọnọ ekikere aban̄a “idotenyịn mfọnọn̄kpọ.” Ke ekerede aban̄a utọ idotenyịn oro, apostle Paul ekewet ete: “Ọdọn̄ nnyịn nte kpukpru mbufo ẹwụt kpa orụk ifịk oro, man ẹnyene ọyọhọ idotenyịn tutu esịm utịt: man mbufo ẹkûkop ifem, edi ẹdi mme andikpebe mmọ emi ẹkesan̄ade ke mbuọtidem ye ime ẹbọ mme un̄wọn̄ọ Abasi ẹnyene.” (Mme Hebrew 6:11, 12) Tịm fiọk ete ke edieke nnyịn ikade iso ndinam n̄kpọ Jehovah ke esịt akpanikọ, nnyịn imekeme ndinyene nsọn̄ọ nte ke nnyịn iyenyene se ikodoride enyịn iban̄a. Ke mîbietke ediwak idotenyịn oro mme owo ke ererimbot ẹnyenede, idotenyịn emi “iyakke nnyịn ikụt bụt [“edikpu,” NW].” (Rome 5:5) Ntre, didie ke nnyịn ikeme ndiwụk enyịn nse idotenyịn nnyịn nnyụn̄ nnam enye aka iso ayama?

Nte Ikemede Ndinam Enyịn eke Spirit Nnyịn Enen̄ede Ese

Ata ata enyịn nnyịn ikemeke ndise n̄kpọ iba ini kiet. Ntre ke edi ye enyịn eke spirit nnyịn. Ndiwụk ntịn̄enyịn ke se idude ke editịm n̄kpọ emi idiyakke nnyịn inen̄ede iwụk ekikere ke obufa ererimbot oro Abasi ọn̄wọn̄ọde. Nte ini akade, obufa ererimbot ekeme nditre ndidemede nnyịn udọn̄ onyụn̄ osop ke ekikere nnyịn. Oro edidi n̄kpọ mmọn̄eyet didie ntem! (Luke 21:34) Ke ntre, edi akpan n̄kpọ didie ntem nnyịn ndinyene ‘enyịn oro enen̄erede ese’—kpa enyịn oro owụhọde ke Obio Ubọn̄ Abasi ye utịp nsinsi uwem!—Matthew 6:22.

Esisọn̄ ndinam enyịn enen̄ede ese kpukpru ini. Mme mfịna eke usen ke usen ẹsiyom ntịn̄enyịn nnyịn, ndien nnyịn imekeme ndisobo mme n̄kpọ oro ẹsiwọn̄ọrede owo ntịn̄enyịn—idem mme idomo—ke uwem nnyịn. Ke mme idaha emi, didie ke nnyịn ikeme ndiwụk ntịn̄enyịn ke Obio Ubọn̄ ye ke obufa ererimbot oro Abasi ọn̄wọn̄ọde ye unana edifụmi mme n̄kpọ eken oro anade inam? Ẹyak ikere iban̄a usụn̄ ita emi ikemede ndinam oro.

Kpep Ikọ Abasi ke usen ke usen. Edikot Bible ye edikpep mme n̄wed oro ẹkọn̄ọde ke Bible kpukpru ini ẹn̄wam ndinam ekikere nnyịn owụhọ ke mme n̄kpọ eke spirit. Ke akpanikọ, ekeme ndidi nnyịn imekpep Ikọ Abasi ke ediwak isua idahaemi, edi ana nnyịn ika iso ikpep enye, ukem nte anade ika iso idia udia man idu uwem. Nnyịn itreke ndidia udia n̄kukụre sia ima ikadadia ata ediwak udia ke ini edem. Ntre, inamke n̄kpọ m̀mê nnyịn imehe ye Bible adan̄a didie, oyom nnyịn ika iso idia udia eke spirit otode Bible kpukpru ini man inam idotenyịn nnyịn aka iso ayama, inyụn̄ inam mbuọtidem ye ima nnyịn ẹsọn̄.—Psalm 1:1-3.

Tie kere Ikọ Abasi ye esịtekọm. Ntak emi editie n̄kere edide akpan n̄kpọ? Ntak  iba ẹnam enye edi akpan n̄kpọ. Akpa, editie n̄kere anam se nnyịn ikotde odụk nnyịn esịt onyụn̄ anam iwụt esịtekọm iban̄a enye. Ọyọhọ iba, editie n̄kere iyakke nnyịn ifre Jehovah, mme utịbe utịbe utom esie, ye idotenyịn oro enye enịmde nnyịn ke iso. Ke ndinam an̄wan̄a: Nditọ Israel emi ẹketienede Moses ẹkpọn̄ Egypt ẹma ẹda enyịn mmọ ẹkụt nte Jehovah okowụtde akwa odudu esie. Mmọ n̄ko ẹma ẹkụt ima ima ukpeme esie nte enye akadade mmọ usụn̄ aka isọn̄ oro mmọ ẹdidade ẹnyene. Edi ikebịghike ke ini nditọ Israel ẹsịmde wilderness ke usụn̄ mmọ ndika Isọn̄ Un̄wọn̄ọ, mmọ ẹma ẹwụt ata unana mbuọtidem ebe ke ndikụni n̄kụni. (Psalm 78:11-17) Nso ikedi mfịna mmọ?

Mmọ ikowụkke ntịn̄enyịn aba ke Jehovah ye utịbe utịbe idotenyịn emi enye ekenịmde mmọ ke iso, edi ẹkewụk ke inemesịt ndondo oro ye ke mme n̄kpọ obụkidem. Kpa ye mme utịbe utịbe idiọn̄ọ ye mme utịben̄kpọ oro mmọ ẹkekụtde, ediwak nditọ Israel ẹma ẹkabade ẹdi mbon n̄kụni oro ẹkenanade mbuọtidem. Psalm 106:13 ọdọhọ ke ‘mmọ ẹma ẹsọp ndifre se Jehovah akanamde.’ Utọ unana ntịn̄enyịn oro mîkenyeneke ntak mi ikayakke emana oro odụk Isọn̄ Un̄wọn̄ọ.

Ntem, ke ini okotde N̄wed Abasi m̀mê mme n̄wed un̄wam ukpep Bible, da ini tie kere se okotde. Utọ editie n̄kere oro edi akpan n̄kpọ ọnọ nsọn̄idem ye n̄kọri eke spirit fo. Ke uwụtn̄kpọ, ke ini okotde Psalm 106, oro ẹsiakde ubak ubak ke enyọn̄ emi, tie kere mme edu Jehovah. Se nte enye ekenyenede ime onyụn̄ atuade nditọ Israel mbọm. Se nte enye akanamde kpukpru se enye ekemede man an̄wam mmọ ẹsịm Isọn̄ Un̄wọn̄ọ. Tịm fiọk nte mmọ ẹkekade iso ndisọn̄ ibuot ye enye. Kere nte Jehovah okokopde ọkpọsọn̄ ubiak ke ini mbon oro ẹkenanade esịtekọm ẹkekade iso ndisịn mbọm ye ime esie ke udomo. Ke adianade do, ke nditie n̄kere Ps 106 ufan̄ikọ 30 ye 31, emi etịn̄de aban̄a Phinehas ndisọn̄ọ nda uko uko nnọ edinen ido, ẹsọn̄ọ ẹtịn̄ ẹnọ nnyịn ẹte ke Jehovah ifreke mme anam-akpanikọ ikọt esie, esinyụn̄ ọnọ mmọ ekese utịp.

Da mme edumbet Bible du uwem. Nte nnyịn itienede mme edumbet Bible, nnyịn imokụt ke mme item Jehovah ẹnyene ufọn. Mme N̄ke 3:5, 6 ọdọhọ ete: “Buọt idem fo ye Jehovah ke ofụri esịt fo; ndien kûberi edem ke asian fo. Diọn̄ọ enye ke kpukpru usụn̄ fo, ndien enye eyenen̄ede usụn̄ fo enịm.” Kere nte oburobụt usụn̄ uwem ediwak owo anamde mmọ ẹnyene mme mfịna ke n̄kan̄ ekikere, ntụk, ye ikpọkidem. Ke ndisịn idem ke inemesịt ibio ini, utọ mbon oro ẹsida afanikọn̄ ẹsọk idem mmọ ke ediwak isua—idem ke ofụri eyouwem mmọ. Ke edide ata isio, mbon oro ẹsan̄ade ke “mfafaha inua-otop” ẹtabi ẹse nte uwem editiede ke obufa editịm n̄kpọ, ndien emi esịn udọn̄ ọnọ mmọ ndika iso nsan̄a ke usụn̄ oro adade esịm uwem.—Matthew 7:13, 14; Psalm 34:8.

Ekeme ndisọn̄ ndida mme edumbet Bible ndu uwem. Ke ndusụk idaha, ekeme nditie nte ke imekeme ndida mme usụn̄ oro mîkemke ye N̄wed Abasi nsọsọp mbọhọ mme idaha oro ẹtiede idomo idomo. Ke uwụtn̄kpọ, ke mme ini unana okụk, ekeme ndidọn̄ nnyịn ndinụk mme ufọn n̄kpọ Obio Ubọn̄ nnịm ke udiana  itie. Nte ededi, ẹsọn̄ọ ẹtịn̄ ẹnọ mbon oro ẹnyenede mbuọtidem, emi ẹnyụn̄ ẹkade iso ndiwụk ntịn̄enyịn ke n̄kpọ eke spirit nte ke akpatre, ‘n̄kpọ ọyọfọn ye mmọ eke ẹbakde Abasi.’ (Ecclesiastes 8:12) Ke ndusụk idaha, Christian ekeme ndinam utom mbe ini, edi tutu amama enye idiyomke nditie nte Esau, emi ekesịnde mme n̄kpọ eke spirit ke ndek, onyụn̄ ada mmọ ke usụhọde.—Genesis 25:34; Mme Hebrew 12:16.

Jesus ama etịn̄ in̄wan̄-in̄wan̄ se idide mbiomo nnyịn nte mme Christian. Ana nnyịn ‘ibem iso iyom Obio Ubọn̄ Abasi ye edinen ido Esie.’ (Matthew 6:33) Edieke nnyịn inamde oro, Jehovah oyowụt ima oro enye amade nnyịn nte Ete ebe ke ndikụt nte ke nnyịn imenyene mme n̄kpọ obụkidem oro iyomde. Ke akpanikọ, enye iyomke nnyịn itịmede esịt iban̄a mme n̄kpọ oro enye ọdọhọde ke imọ iyese iban̄a. Utọ editịmede esịt oro mîdotke mi ekeme nditie nte ubiak enyịn eke spirit—emi edieke ẹfụmide, enye sụn̄sụn̄ ayanam nnyịn iwụk ntịn̄enyịn ke mme n̄kpọ obụkidem kpọt ndien ke akpatre anam nnyịn idi nnan ke n̄kan̄ eke spirit. Edieke nnyịn ikade iso ndidu ke utọ idaha oro, usen Jehovah ayabuat nnyịn “nte ekpọ.” Nso n̄kpọ mmọn̄eyet ke oro ekpedi ntem!—Luke 21:34-36.

Wụk Enyịn Se nte Joshua

Ẹyak nnyịn inen̄ede iwụk enyịn ise ubọn̄ ubọn̄ idotenyịn Obio Ubọn̄, inịmde mme mbiomo eken ke nnennen itie mmọ. Ke ndisọn̄ọ nyịre ke edinam ofụri ini eke edikpep n̄kpọ, editie n̄kere, ye edida mme edumbet Bible ndu uwem, nnyịn imekeme ndinyene ọyọhọ idotenyịn kpa nte Joshua ekenyenede. Ke ama akada nditọ Israel usụn̄ esịm Isọn̄ Un̄wọn̄ọ, enye ọkọdọhọ ete: “Mbufo ẹmefiọk ke ofụri esịt mbufo, ye ke ofụri ukpọn̄ mbufo, ẹte ke baba eti ikọ kiet eke Jehovah Abasi mbufo ọkọdọhọde aban̄a mbufo, ikpụhu: kpukpru ẹma ẹsu ẹnọ mbufo, baba ikọ kiet ikpụhu ke esịt.”—Joshua 23:14.

Idotenyịn Obio Ubọn̄ oro akpakam ọsọn̄ọ fi idem, onyụn̄ adat fi esịt nte ẹkụtde idatesịt emi ke ekikere, ntụk, ubiere, ye edinam fo.—Mme N̄ke 15:15; Rome 12:12.

[Ndise ke page 21]

Nte akanam afo emeyịk m̀mê imọ iyodụk obufa ererimbot?

[Ndise ke page 22]

Editie n̄kere edi akpan ikpehe ke ukpepn̄kpọ Bible

[Mme ndise ke page 23]

Ka iso wụk ntịn̄enyịn ke mme ufọn n̄kpọ Obio Ubọn̄