Ndi ke Ẹnam Uduak Abasi?

“Yak inam uduak Fo; nte ẹnamde ke heaven, yak inam ke isọn̄ kpasụk ntre.”—Matthew 6:10.

 N̄KPEN̄EYEN̄ ama omụm Julio ye Christina nte mmọ ẹkedade ẹse nte ikan̄ atade nditọ mmọ inan̄ owot. Akpammịn kiet ama awat ọkọtọ ubomisọn̄ oro mmọ ẹkenịmde ke mbenusụn̄, ndien ikan̄ ama obụbede. Ẹma ẹnyan̄a Marcos, ọyọhọ eyen mmọ ition, ẹsio ke akwa ikan̄ oro, edi ikan̄ oro ama ata enye, enịmde enye nsinsi ndo. Enye ekedi isua usụkkiet. Idem ama enen̄ede emem ete esie. Edi, enye ama ada mme ikọ emi ọdọn̄ idemesie ye ubon esie esịt: “Nnyịn inyene ndifiọk ke emi edi uduak Abasi, edide eti, idiọk, m̀mê n̄kpọ efen ekededi.”

Ediwak owo ẹsinyene ukem ekikere oro ke ini utọ n̄kpọ mmọn̄eyet emi etịbede. Mmọ ẹsikere ẹte: ‘Edieke Abasi enen̄erede okop odudu onyụn̄ ekerede aban̄a nnyịn, anaedi se itịbede edi ke ufọn nnyịn ke ndusụk usụn̄, okposụkedi ekemede ndisọn̄ nnyịn ndifiọk.’ Ndi afo emenyịme ye ekikere emi?

Ikọ Jesus ke se ẹkotde Akam Ọbọn̄, oro ẹkotde ẹsịn ke enyọn̄ emi, esinam ẹdọhọ ke se ededi oro etịbede, eti m̀mê idiọk, edi uduak Abasi. Nte owo inamke uduak Abasi ke heaven? Ke ini ibọn̄de akam ite ‘Yak inam uduak Fo ke isọn̄,’ ndi nnyịn inyịmeke nte ke se idade itie ke isọn̄ edi uduak Abasi?

Ekikere emi etịmerede ediwak owo. Enye anam mmọ ẹda Abasi nte owo emi mîkereke iban̄a mme ntụk owo emi enye okobotde. Mmọ ẹsibụp ẹte: ‘Abasi ima akpasasan̄a didie oyom enyene-ndịk n̄kpọ etịbe ọnọ mme owo emi mîduehe? Edieke edide odu se Abasi oyomde nnyịn ikpep ito ndiọi n̄kpọ emi ẹtịbede, nso orụk ukpepn̄kpọ ekpedi oro?’ Eyedi afo ekere ntre.

Ke afan̄ emi, mbet oro James, kpa eyeneka Jesus, ekewet ete: “Ke ini idomo iduọ esịmde owo, enye okûdọhọ ete, ke edi Abasi odomo imọ: koro idomo iduọ ikemeke ndisịm Abasi, Enye ke Idem Esie inyụn̄ idomoke owo man enye ọduọ.” (James 1:13) Idịghe Abasi edi ntak idiọkn̄kpọ. Nte an̄wan̄ade ndien, idịghe kpukpru se itịbede mfịn ke isọn̄ ẹdi uduak Abasi. N̄wed Abasi etịn̄ n̄ko aban̄a uduak owo, uduak mme idụt, ye idem uduak Devil. (John 1:13, NW; 2 Timothy 2:26, NW; 1 Peter 4:3, NW) Ndi afo emenyịme nte ke se iketịbede inọ ubon Julio ye Christina ikedịghe uduak ima ima Ete nnyịn eke heaven?

Ntre, nso ke ikọ Jesus ọkọwọrọ ke ini enye ekekpepde mme mbet esie ete ẹbọn̄ akam ntem: “Yak inam uduak Fo”? Ndi emi ekedi sụk ediben̄e Abasi anam n̄kpọ aban̄a mme akpan idaha, mîdịghe ndi Jesus ekekpep nnyịn ndibọn̄ akam mban̄a se inen̄erede idi akpan n̄kpọ inyụn̄ ifọnde ikan, kpa ukpụhọde oro kpukpru owo ẹkemede ndidori enyịn mban̄a? Ẹyak idụn̄ọde n̄kpọ efen efen oro Bible enyenede nditịn̄.

[Mme ebiet ẹdade ndise ẹto ke page 3]

Ubomisọn̄: Ndise Dominique Faget-STF/AFP/Getty; eyenọwọn̄: Foto FAO/B. Imevbore