Unọ Ikọ Ntiense Ido Nneme ke Efakutom Ikọmbakara Mexico

APOSTLE Paul ama ada ini oro enye eketiede ebet mbon oro ẹkesan̄ade ye enye ẹka isan̄ ke Athens ọnọ ikọ ntiense ido nneme. Bible ọtọt ete: “Enye ebuen ikọ . . . kpukpru usen ke an̄wa-urua ye mmọ eke ẹsobode ye enye.” (Utom 17:17) Ke ini Jesus okotode Judea aka Galilee, enye ama ọnọ n̄wan Samaria kiet ikọ ntiense ido nneme ke mben obube mmọn̄. (John 4:3-26) Ndi afo emesida kpukpru ifet oro ẹbererede ọnọ ikọ ntiense aban̄a eti mbụk Obio Ubọn̄ Abasi?

Ikọ ntiense ido nneme enen̄ede ọfọn ke efakutom Ikọmbakara Mexico. Mbonisan̄ ẹsika mme ebiet nduọkodudu, nditọ ufọkn̄wed ntaifiọk ẹsidi ẹnyụn̄ ẹnyọn̄ọ, ndien isenowo emi ẹma ẹkekpọn̄ utom ke Mexico ẹsiwak ndika mme itie unọ idem nduọkodudu ye mme itie unyamudia. Ediwak Mme Ntiense Jehovah emi ẹdiọn̄ọde Ikọmbakara ẹnen̄ede ẹfiọk nditọn̄ọ nneme ye mme orụk owo emi. Ke nditịm ntịn̄, mmọ ẹnen̄ede ẹfiọk nditọn̄ọ nneme ye owo ekededi emi etiede nte esenowo m̀mê emi etịn̄de Ikọmbakara. Ẹyak ise nte mmọ ẹsinamde oro.

Ediwak ini mbon oro ẹtode esenidụt ẹdinam utom ke efakutom Ikọmbakara ẹsitịn̄ owo emi mmọ ẹdide ẹnọ mbon oro etiede nte ẹdi isenowo ẹnyụn̄ ẹbụp m̀mê mmọ ẹto m̀mọ̀n̄. Emi esinam mmọ ẹbụp Ntiense oro se enye anamde ke Mexico onyụn̄ ọnọ Ntiense oro ifet ndibuana mme edinịm ke akpanikọ esie. Ke uwụtn̄kpọ, esidi mmemmem n̄kpọ ọnọ Gloria emi anamde utom ke ebiet emi udọn̄ okponde ke efakutom Ikọmbakara Oaxaca, ndida usụn̄ oro ntọn̄ọ nneme. Ke adan̄aemi ọkọnyọn̄de ufọk ke ama ọkọnọ ikọ ntiense ido nneme okụre ke an̄wa obio, n̄wan ye ebe emi ẹtode England ẹma ẹkot Gloria. N̄wan oro ama ofiori ete: “N̄kpenịmke ke obubịt owo odu mi ke Oaxaca!” Utu ke ndiyat esịt, Gloria ama asak, ekem mmọ ẹma ẹtọn̄ọ ndineme mban̄a ntak emi enye ekedide Mexico. N̄wan oro ama okot Gloria ete edi ufọk mmimọ edin̄wọn̄ kọfi. Ke ẹma ẹkedori usen, Gloria ama ọnọ enye Enyọn̄-Ukpeme ye Awake!, edi enye ama esịn, ọdọhọde ke imọ inịmke ke Abasi odu. Gloria ama ọbọrọ ete ke imọ imesima ndinyene nneme ye mbon oro mînịmke ke Abasi odu onyụn̄ ọdọhọ ke imọ ikpama ndifiọk se enye ekerede aban̄a ibuotikọ emi “Mme Itie Utuakibuot—Ndi Nnyịn Imoyom Mmọ?” N̄wan oro ama enyịme onyụn̄ ọdọhọ ete: “Edieke afo edikemede ndinam mi nnịm ke Abasi odu, do afo akpanam akaha.” Nte mmọ ẹken̄wọn̄de kọfi, mmọ ẹma ẹneme mme inem inem n̄kpọ efen. Ekem ebe ye n̄wan oro ẹma ẹnyọn̄ England, edi mmọ ẹma ẹka iso ndida leta ilektrọnik nneme nneme.

Gloria ama ọtọn̄ọ nneme n̄ko ye Saron, eyen ufọkn̄wed emi otode  Washington, D.C., emi akanamde utom unyịmesịt ye mme amanaisọn̄ iban ke Oaxaca man okụre ukpep ndibọ udiana n̄weditoro ufọkn̄wed ntaifiọk. Ke ama okotoro Saron aban̄a utom esie, Gloria ama etịn̄ ntak emi imọ ikedide Mexico. Emi ama ada ekesịm inem inem nneme aban̄ade Bible ye se Abasi edinamde ọnọ kpukpru owo, idịghe mme ubuene kpọt. Saron ama ọdọhọ ke ekedi n̄kpọ imam nte ke akanam imọ inyeneke nneme ye Mme Ntiense ke ini imọ ikodude ke United States, edi akpa owo emi imọ isobode ke Mexico edi kiet ke otu Mme Ntiense Jehovah! Saron ama enyịme ukpepn̄kpọ Bible onyụn̄ ọtọn̄ọ ndidụk mme mbono esop Christian ye unana ubiatini.

Ediwak isenowo emi ẹyomde ebiet emi etiede nte paradise ẹwọrọ ẹkedụn̄ ke esụk ke Mexico. Laurel esida emi ọtọn̄ọ nneme ke Acapulco, obụpde mme owo m̀mê Acapulco enen̄ede ebiet paradise akan ebiet oro mmọ ẹtode ẹdi, onyụn̄ obụp se mmọ ẹmade ke Acapulco. Ekem enye ayanam an̄wan̄a nte ke mîbịghike ofụri isọn̄ ayakabade ata paradise. Ndida usụn̄ emi ntọn̄ọ nneme ye n̄wan Canada kiet emi enye okosobode ke itie unọ unam usọbọ ama ada ekesịm ukpepn̄kpọ Bible. Ndi usụn̄ emi ekeme ndifọn ke edem mbufo?

‘Ke Efak ye ke An̄wa’

Ẹsiwak nditọn̄ọ nneme ke efak ye ke an̄wa obio ebe ke ndibụp: “Nte afo ọmọfiọk Ikọmbakara?” Ediwak mbon Mexico ẹfiọk Ikọmbakara ke ntak ubọkọkọ mmọ m̀mê ke ntak oro mmọ ẹkedụn̄de ke United States.

Ebe ye n̄wan ẹdide Mme Ntiense ẹma ẹsan̄a ẹbịne akanian̄wan kiet emi nurse akakpatde ke n̄kpọisan̄ mbon n̄kpọnnam. Mmọ ẹma ẹbụp mma oro m̀mê enye ọfiọk Ikọmbakara. Enye ama ọdọhọ ke imọ imọfiọk koro imọ ikodụn̄de ediwak isua ke United States. Enye ama ọbọ Enyọn̄-Ukpeme ye Awake!, emi akanam enye mîkotke, ọdọhọ ke imọ ikere Consuelo, onyụn̄ ọnọ mmọ adres esie. Ke ini mmọ ẹkekade ebiet oro ẹkewetde ke adres emi ke usen inan̄ ẹma ẹkebe, mmọ ẹma ẹkụt ke enye ekedi ufọk ukpeme emi mme nun Catholic ẹkesede ẹban̄a. Ke akpa, ikememke utom ndisobo ye Consuelo koro mme nun oro ẹkenyenede eyịghe ẹban̄a Mme Ntiense oro, ẹnyụn̄ ẹdọhọ ke Consuelo idikemeke ndikama mmọ esen. Mmọ ẹma ẹkpe ye mme nun oro ẹte ẹdọhọ Consuelo ke mmimọ idi ndikọm enye. Consuelo ama enen̄ede adara mmọ. Toto ke ini oro, akanian̄wan emi edide isua 86 mi omokop inem ukpepn̄kpọ Bible ofụri ini, kpa ye ikpîkpu ndutịn̄ mme nun. Enye omodụk ndusụk mbono esop Christian n̄ko.

Mme N̄ke 1:20 ọdọhọ ete: “Eti ibuot ofiori ke esien [“efak,” NW]; emenede uyo esie ke an̄wa.” Se nte oro eketịbede ke an̄wa obio San Miguel de Allende. Tụhi-tụhi usenubọk kiet, Ralph ama asan̄a ebịne eren kiet emi odude ke ufọt ufọt isua uwem esie, emi eketiede ke anyan n̄kpọitie. Idem ama akpa eren oro ke ini ẹkenọde enye Enyọn̄-Ukpeme ye Awake! Enye ama onyụn̄ ọnọ Ralph mbụk uwem esie.

Enye ekedi akani owoekọn̄ Vietnam emi editịmede esịt oro enye okokopde ke ntak ediwak n̄kpan̄a emi enye okokụtde akanamde enye enyene udọn̄ọ ibuot. Ẹma ẹsio enye ke iso ekọn̄ ẹnọ ọnyọn̄ itienna. Ẹkenọ enye utom do ndiyet okpo mbonekọn̄ man ẹnọ ẹka United States. Idem idahaemi, ke isua 30 ẹma ẹkebe, enye osụk okokop ọkpọsọn̄ ndịk. Nte  enye okosụk etiede ke an̄wa obio usenubọk oro, enye ama ọbọn̄ akam ke ndopuyo oyom un̄wam.

Akani owoekọn̄ oro ama ọbọ mme n̄wed onyụn̄ eyere ikot oro ẹkenọde enye ẹte edi Ufọkmbono Obio Ubọn̄. Ke enye ama okodụk mbono esop, enye ọkọdọhọ ke akpa ini emi imọ ikenyenede emem ke isua 30 emi ẹkebede ekedi hour iba oro imọ ikodude ke Ufọkmbono Obio Ubọn̄. Eren emi ikodụhe ke San Miguel de Allende ibịghi, edi ẹma ẹnịm ukpepn̄kpọ Bible ifan̄ ye enye, enye onyụn̄ odụk mme mbono esop tutu enye afiak ọnyọn̄ edem mmọ. Ẹma ẹnam ndutịm man ẹka iso ẹkpep enye n̄kpọ.

Ndinọ Ikọ Ntiense Ido Nneme ke Itieutom ye ke Ufọkn̄wed

Nte emesinam ẹfiọk fi nte kiet ke otu Mme Ntiense Jehovah ke itieutom fo? Adrián, emi esinọde mme akaisan̄ ufọk ke ukpeokụk ke Cape San Lucas, esinam ntre. Nte utịp, Judy nsan̄autom esie ọdọhọ ete: “Ke n̄kpasịp isua ita emi ẹkebede, edieke afo ọkpọdọhọde mi ete ke nyakabade ndi kiet ke otu Mme Ntiense Jehovah, n̄kpọkọdọhọ, ‘Tutu amama!’ Edi mma mbiere ke mmọn̄ n̄kot Bible. N̄kekere nte, ‘Idisọn̄ke, sia nsimade ndikot n̄wed.’ Edi n̄kokotke mbe page itiokiet ke ini n̄kedide ndifiọk nte ke mmoyom un̄wam. N̄kukụre owo oro n̄kekerede ke ekeme ndin̄wam mi ekedi nsan̄autom mi oro ekerede Adrián. Mma nsima ndinyene nneme ye enye koro enye ekedi n̄kukụre eti owo ke itieutom oro.” Adrián ama ọsọsọp ọdọhọ ke imọ iyasan̄a ye Katie, n̄wan emi imọ ididọde idi, mmọ ẹma ẹnyụn̄ ẹbọrọ kpukpru mbụme Judy. Katie ama ọtọn̄ọ ukpepn̄kpọ Bible ye enye, ndien ikebịghike Judy ama akabade edi Ntiense oro ama akana baptism.

Nso kaban̄a edinọ ikọ ntiense ido nneme ke ufọkn̄wed? Ntiense iba ẹkebọ ukpep usem Spanish ke ufọkn̄wed ntaifiọk edi ẹma ẹfiak n̄wed usen kiet man ẹkedụk mbono Christian. Ke ini mmọ ẹkefiakde ẹka n̄wed, ẹma ẹdọhọ mmọ ẹda usem Spanish ẹbụk se mmọ ẹkenamde. Mmọ ẹma ẹda ifet oro ẹnọ ikọ ntiense nte mmọ ẹkekeme ke usem Spanish. Silvia, andikpep, ama enen̄ede ama ntịn̄nnịm ikọ Bible. Enye ama enyịme ukpepn̄kpọ Bible ke Ikọmbakara ndien enye edi asuanetop eti mbụk idahaemi. Ndusụk mbonubon esie ke ẹkpep Bible n̄ko. Silvia ọdọhọ ete: “Mmokụt se n̄koyomde ke ofụri eyouwem mi.” Ke akpan, ikọ ntiense ido nneme ekeme ndin̄wụm mfri.

Ndida Mme Ifet Efen Oro Ẹberede Nnam N̄kpọ

Mfọnido ekeme ndinam ẹnọ ikọ ntiense. Jim ye Gail, emi ẹnamde utom ke San Carlos, Sonora, ẹma ẹkụt ke oro edi akpanikọ. N̄wan kiet emi akadade mme ebua esie isan̄ ke n̄kanika itiokiet usenubọk ama atuak ada ese ediye okụre mmọ. Jim ye Gail ẹma ẹkot enye ẹte awaha edin̄wọn̄ kọfi. Ke ofụri isua 60 oro enye odude uwem, akpa ini emi enye okokopde aban̄a Jehovah ye idotenyịn nsinsi uwem ekedi oro. Ẹma ẹtọn̄ọ ukpepn̄kpọ Bible.

Adrienne n̄ko esifọn ido ye isenowo. Enye  akadia udia ke itie unyamudia ke Cancún ke ini ekpri eyeneren kiet ekedide edibụp m̀mê enye oto Canada. Ke ini enye ọkọdọhọde ke imọ ito Canada, ekpri eyeneren oro ama ọdọhọ ke imọ ye eka imọ ikodomo ndin̄wam eyeneka imọ an̄wan emi ẹkenọde utom ke ufọkn̄wed ẹte ewet n̄kpọ aban̄a mbon Canada. Eka esie, emi ekesemde Ikọmbakara ama editie ye Adrienne. Ke ama akada ini ọbọrọ mme mbụme esie ẹban̄ade mbon Canada, Adrienne ama ọdọhọ ete: “Edi odu ata akpan ntak emi akanamde mi n̄kpọn̄ Canada ndi mi—ndin̄wam mme owo ẹkpep Bible. Nte afo emenyene udọn̄ aban̄a oro?” N̄wan oro ama ọdọhọ ke imọ imenyene. Enye ama onyụn̄ ọdọhọ ke imọ ima ikpọn̄ ufọkabasi mmimọ ke isua duop emi ẹkebede inyụn̄ idomo ndikpep Bible ke idem imọ. Enye ama ọnọ Adrienne nọmba urụk ukopikọ ye adres esie, ndien ẹma ẹtọn̄ọ inem inem ukpepn̄kpọ Bible.

“Duọk Uyo Fo ke Enyọn̄ Mmọn̄”

Ndineme mban̄a akpanikọ Bible ke kpukpru ifet esiwak ndida n̄kesịm editịn̄ ikọ ntiense nnọ mbon emi mînyeneke ifet ndikop etop Obio Ubọn̄. Ke itie unyamudia oro esiyọhọde ye mme owo ke Zihuatanejo, Ntiense kiet ama ọdọhọ isenowo ẹditie ke okpokoro imọ sia mme owo ẹkeyọhọde itie unyamudia oro. Ebe ye n̄wan emi ẹsiwat ke nsụn̄ikan̄ ẹto ebiet kiet ẹsịm en̄wen ndien mmọ ẹmenam oro ke ufan̄ isua itiaba. Mmọ ẹma ẹtịn̄ mme n̄kpọ oro mmọ mîmaha iban̄a Mme Ntiense Jehovah. Ke ẹma ẹkesobo ke itie unyamudia, Ntiense oro ama aka ekese ebe ye n̄wan oro ke nsụn̄ikan̄ mmọ onyụn̄ ọdọhọ mmọ ẹdise imọ ke ufọk imọ. Mmọ ẹma ẹbọ se ibede magazine 20 ye n̄wed 5 ẹnyụn̄ ẹdọhọ ke mmimọ iyosobo ye Mme Ntiense ke esụkmbehe efen oro mmimọ ididiande.

Jeff ye Deb ẹma ẹkụt ubon kiet emi ẹkamade ediye nsek eyenan̄wan ke efak unyamudia ke ufọkurua ke Cancún. Ke ini mmọ ẹketịn̄de n̄kpọ ẹban̄a eyen oro, ete ye eka esie ẹma ẹkot mmọ ẹditiene mmimọ ẹdia udia. Mmọ ẹma ẹdifiọk ke ubon emi ẹketo India. Akananam mmọ ikopke n̄kpọ iban̄a Mme Ntiense Jehovah inyụn̄ ikwe n̄wed nnyịn. Mmọ ẹma ẹbọ mme n̄wed nnyịn do ẹda ẹnyọn̄.

Jeff ama enyene ukem ifiọk n̄kpọntịbe emi ke isuo oro ekperede mbenesụk Yucatán. Obufa ebe ye n̄wan oro ẹtọde China ẹma ẹdọhọ Jeff osio mmimọ ndise, enye ama onyụn̄ osio mmọ ye idatesịt. Ekem enye ama edifiọk ke okposụkedi mmọ ẹma ẹkedụn̄ isua 12 ke United States, akananam mmọ ikekwe m̀mê ndikop n̄kpọ mban̄a Mme Ntiense Jehovah! Mmọ ẹma ẹnyene inem inem nneme. Jeff ama ọdọhọ mmọ ẹsobo ye Mme Ntiense ke ẹma ẹnyọn̄ ẹsịm ufọk.

Akpan edinam ekeme ndida itie ke edem mbufo emi ekemede ndinọ fi ifet ndinọ ikọ ntiense ido nneme. Ke ini adaibuot ukara United States ekedide edise adaibuot ukara Mexico ke in̄wan̄ ufene esie emi ekperede Guanajuato, mme ọkọmbụk ẹma ẹto ofụri ererimbot ẹdi ndikọ mbụk aban̄ade edinam emi. Ebe ye n̄wan ẹdide Ntiense ẹma ẹda ifet emi ẹkwọrọ ikọ ke Ikọmbakara. Mme owo ẹma ẹkpan̄ utọn̄. Ke uwụtn̄kpọ, ọkọmbụk kiet ama ọkọ mbụk aban̄a ediwak ekọn̄, utọ nte ekọn̄ oro ẹken̄wanade ke Kosovo ye Kuwait. Nsan̄autom esie emi andidịbe ntop owo okotopde ama akpa esịne enye ke ubọk. Ke ama okokop aban̄a ediset ke n̄kpa, mmọn̄eyet ama asiaha ọkọmbụk oro ke ini enye ọkọkọmde Abasi ke ndiyak imọ ifiọk ke uwem enyene uduak. Enye ama ọdọhọ ke okposụkedi imọ mîdikwe Mme Ntiense oro aba, ke tutu amama imọ idifreke eti mbụk otode Bible mi.

Nte mme ifiọkutom emi ẹwụtde, owo isiwakke ndifiọk utịp utọ ikọ ntiense oro. Nte ededi, enyene-ọniọn̄ Edidem Solomon ọkọdọhọ ete: “Duọk uyo fo ke enyọn̄ mmọn̄: koro afo oyokụt enye ke ediwak usen ẹbede.” Enye ama ọdọhọ n̄ko ete: “Suan n̄kpasịp fo ke usenubọk; kûnyụn̄ ufara ubọk fo ke mbubịteyo: koro afo mûfiọkke ubak eke ẹdiwọrọde usụn̄, m̀mê emi, m̀mê oro; unyụn̄ ufiọkke m̀mê mbiba ẹdifọn ukem-ukem.” (Ecclesiastes 11:1, 6) Ih, sịn ifịk “duọk uyo fo ke enyọn̄ mmọn̄” nyụn̄ tat ubọk “suan n̄kpasịp fo” nte Paul ye Jesus ẹkenamde ye nte Mme Ntiense eyomfịn ke efakutom Ikọmbakara Mexico ẹnamde.