Mme Uyen, Nte Mbufo ke Ẹsịn Itiat Idakisọn̄ Ẹnọ Ini Iso?
Mme Uyen, Nte Mbufo ke Ẹsịn Itiat Idakisọn̄ Ẹnọ Ini Iso?
“Koro ami mmọfiọk ekikere emi n̄kerede mban̄a mbufo, . . ekikere emem, idịghe eke idiọk, man nnọ mbufo [“ini iso,” NW] ye idori-enyịn.”—JEREMIAH 29:11.
1, 2. Nso idi nsio nsio usụn̄ oro ẹkemede ndise mme isua uyen?
ATA ediwak ikpọ owo ẹda ini uyen nte n̄wọrọnda ini ndidu uwem. Mmọ ẹsiti odudu ye nduaidem oro mmọ ẹkenyenede ke ini mmọ ẹkedide uyen. Mmọ ẹsinyụn̄ ẹti inem inem ini oro mmọ mîkenyeneke ediwak mbiomo, kpa ini oro mmọ ẹkesikopde inem uwem ẹkenyụn̄ ẹnyenede ekese ifet oro ẹnade ẹbet mmọ ke ofụri eyouwem.
2 Eyedi mbufo oro ẹdide uyen ẹse ini uyen ke isio isio usụn̄. Ekeme ndisọn̄ mbufo ndise mban̄a mme ukpụhọde eke ntụk ye eke ikpọkidem ini uyen. Mbufo ẹmekeme ndisobo ọkpọsọn̄ mfịghe ubọkn̄ka ke ufọkn̄wed. Ekeme ndiyom mbufo ẹsịn ọkpọsọn̄ ukeme man ẹbiọn̄ọ edida n̄kpọsọn̄ ibọk ke idiọk usụn̄, n̄kpọsọn̄ mmịn, ye oburobụt ido. Ediwak mbufo ẹmesobo n̄ko eneni aban̄ade edida san̄asan̄a m̀mê eneni eken oro ẹnyenede ebuana ye mbuọtidem mbufo. Ih, ini uyen ekeme ndidi ini afanikọn̄. Kpa ye oro, enye edi ini oro ẹnyenede ifet ndinam nsio nsio n̄kpọ. Mbụme odude edi, Mbufo ẹdida mme ifet emi ẹnam n̄kpọ didie?
Dara ke Uyen Fo
3. Nso ke Solomon eketeme mme uyen, ndien enye okodụri mmọ utọn̄ aban̄a nso?
3 Ikpọ owo ẹkeme ndisian fi nte ke ini uyen isibịghike, ndien mmọ ẹnen. Ke isua ifan̄ ẹbede afo ududịghe aba uyen. Ntre dara ke uyen fo! Ntre ke Edidem Solomon eketeme ke ini enye ekewetde ete: “O akparawa, dara ke uyen fo; yak esịt fo onyụn̄ enem fi ke usen emi afo edide akparawa, nyụn̄ tiene usụn̄ esịt fo, ye se enyịn fo okụtde.” Nte ededi, Solomon ama odụri mme uyen utọn̄ ete: “Sio iyatesịt ke esịt fo fep, ndien, nyụn̄ bịn se idiọkde ke obụkidem fo fep.” Enye ama aka iso ọdọhọ ete: “Uyen ye usiere uwem [ẹdi] ikpîkpu.”—Ecclesiastes 11:9, 10.
4, 5. Ntak owụtde eti ibuot mme uyen nditịm idem nnọ ini iso? Nọ uwụtn̄kpọ.
4 Ndi se Solomon eketịn̄de an̄wan̄a fi? Ke uwụtn̄kpọ, kere ban̄a uyen emi ọbọde ata akamba enọ, yak idọhọ ediwak okụk. Nso ke enye edida okụk oro inam? Enye ekeme ndida okụk oro ndia uwem—ukem nte idiọk udọ ke n̄ke oro Jesus okotopde. (Luke 15:11-23) Edi nso iditịbe ke ini okụk oro okụrede? Ke akpanikọ, enye ayatua n̄kpọfiọk nte ke imọ ikabatke ibuot! Ke n̄kan̄ eken, yak idọhọ ke enye ada okụk oro esịn itiat idakisọn̄ ọnọ ini iso, eyedi ada ọniọn̄ esịn ekese okụk oro ke mbubehe. Ke akpatre, ke ini enye edidiade udori mbubehe oro, ndi afo emekere ke enye ayatua n̄kpọfiọk ke ntak oro imọ mîkadaha ofụri okụk imọ idia uwem ke ini uyen? Ke akpanikọ idituaha!
5 Da mme isua uyen fo nte enọ Abasi, koro se mmọ ẹdide ẹdi oro. Afo edida mmọ anam n̄kpọ didie? Afo emekeme ndida ofụri odudu ye nduaidem ini uyen oyụhọ udọn̄ idemfo ebe ubọk, adiade uwem aka mi ye ko unyụn̄ ukereke uban̄a ini iso. Edieke afo anamde oro, do “uyen ye usiere uwem” fo ẹdidi “ikpîkpu.” Akpakam enen̄ede ọfọn didie ntem ndida ini uyen fo ntịm idem nnọ ini iso!
6. (a) Ewe item Solomon ọnọ mme uyen ndausụn̄? (b) Nso ke Jehovah akpama ndinam nnọ mme uyen, ndien didie ke uyen ekeme ndibọ ufọn nto emi?
6 Solomon ama etịn̄ edumbet oro ekemede ndin̄wam fi ada ini uyen fo anam n̄kpọ ke mfọnn̄kan usụn̄. Enye ọkọdọhọ ete: “Nyụn̄ ti Andibot fi ke ini afo edide akparawa.” (Ecclesiastes 12:1) Item oro edi ukpọhọde edikụt unen—kop uyo Jehovah nyụn̄ nam uduak esie. Jehovah ama asian Israel eset se enye okoyomde ndinam nnọ mmọ: “Ami mmọfiọk ekikere emi n̄kerede mban̄a mbufo, . . . ekikere emem, idịghe eke idiọk, man nnọ mbufo [“ini iso,” NW] ye idori-enyịn.” (Jeremiah 29:11) Jehovah akpama ndinọ fi n̄ko “ini iso ye idori-enyịn.” Edieke afo etide enye ke mme edinam, mme ekikere, ye mme ubiere fo, ini iso ye idotenyịn oro ẹdidi okwo.—Ediyarade 7:16, 17; 21:3, 4.
“Ẹsan̄a Ẹkpere Abasi”
7, 8. Didie ke uyen ekeme ndisan̄a n̄kpere Abasi?
7 James ekesịn udọn̄ ọnọ nnyịn ete iti Jehovah ke ini enye ọkọdọhọde ete: “Ẹsan̄a ẹkpere Abasi, ndien enye ayasan̄a ekpere mbufo.” (James 4:8) Jehovah edi Andibot, kpa Andikara eke heaven, emi odotde ndibọ ofụri utuakibuot ye itoro. (Ediyarade 4:10b) Kpa ye oro, edieke nnyịn isan̄ade ikpere enye, enye ayasan̄a ekpere nnyịn. Nte utọ ima ima udọn̄ oro idatke nnyịn esịt?—Matthew 22:37.
8 Nnyịn imesisan̄a ikpere Jehovah ke ediwak usụn̄. Ke uwụtn̄kpọ, apostle Paul ọdọhọ ete: “Ẹyịre ke akam; ẹda ekọm ẹtịn̄ enyịn ndinam ntre.” (Colossae 4:2) Ke ikọ en̄wen, ma ndibọn̄ akam. Kûsudọhọ amen kpọt ke ini ete fo m̀mê Christian en̄wen ke esop ọbọn̄de akam, edi sibọn̄ akam n̄ko ke idemfo. Ndi akanam afo aman̄wan̄a esịt fo ọnọ Jehovah onyụn̄ asian enye se afo ekerede, se itịmede fi esịt, ye se idide mfịna fo? Ndi akanam afo amasian enye mme n̄kpọ oro afo okpokopde bụt ndineme ye owo efen ekededi? Akam ofụri esịt esinam owo enyene emem. (Philippi 4:6, 7) Utọ akam oro esin̄wam nnyịn ndisan̄a n̄kpere Jehovah onyụn̄ anam nnyịn ifiọk ke enye asan̄a ekpere nnyịn.
9. Didie ke uyen ekeme ndikpan̄ utọn̄ nnọ Jehovah?
9 Ikọ eke odudu spirit emi owụt usụn̄ en̄wen ndisan̄a n̄kpere Jehovah: “Kop item, nyụn̄ bọ ntụnọ, man enyene ibuot ke ini iso fo.” (Mme N̄ke 19:20) Ih, edieke afo akpan̄de utọn̄ ọnọ Jehovah onyụn̄ okopde uyo esie, afo esịn itiat idakisọn̄ ọnọ ini iso. Didie ke afo ekeme ndiwụt ke imọ imesikpan̄ utọn̄ inọ Jehovah? Edi akpanikọ nte ke afo emesidụk mme mbono esop Christian onyụn̄ okop se ẹnemede do. N̄ko-n̄ko, afo ‘omokpono usọ ye uka’ ke ndidụk ukpepn̄kpọ Bible ubon. (Ephesus 6:1, 2; Mme Hebrew 10:24, 25) Amanam etieti. Nte ededi, ke adianade do, nte afo ‘emesidep ifet’ etịm idem ọnọ mme mbono esop, okot Bible kpukpru ini, onyụn̄ anam ndụn̄ọde? Nte afo emesidomo ndida se afo okotde nsịn ke edinam, man afo akpasan̄a nte ‘owo eti ibuot’? (Ephesus 5:15-17; Psalm 1:1-3) Edieke afo anamde oro, afo ke asan̄a ekpere Jehovah.
10, 11. Nti ufọn ewe ke mme uyen ẹsibọ ke ini mmọ ẹkpan̄de utọn̄ ẹnọ Jehovah?
10 Ke ntọn̄ọ ntọn̄ọ ikọ n̄wed Mme N̄ke, ewetn̄wed eke odudu spirit etịn̄ uduak n̄wed oro. Enye ọdọhọ ke edi “man owo obụre eti ibuot ye item; man etịm ọfiọk ikọ asian; man owo ada item mbufiọk, eti ido, ye ikpe [m̀mê, asian], ye se inende; man ẹnọ ọkọi ọniọn̄, ẹsịn eyenọwọn̄ [m̀mê, uyen] ifiọk ye nti ekikere.” (Mme N̄ke 1:1-4) Ntem, nte afo okotde onyụn̄ adade ikọ n̄wed Mme N̄ke—ọkọrọ ye ofụri ikpehe eken ke Bible esịn ke edinam—afo eyenyene eti ido ye edinen ido, Jehovah oyonyụn̄ okop inemesịt ndinam fi asan̄a ekpere imọ. (Psalm 15:1-5) Adan̄a nte afo edide asian ye ọniọn̄ onyụn̄ enyenede ifiọk ye nti ekikere, afo ayanam nti ubiere.
11 Ndi akwan̄a ndidori enyịn uyen ndinam n̄kpọ ntem? Baba, koro ediwak uyen Christian ke ẹnam ntre. Ke ntak oro, mbon en̄wen ẹkpono mmọ inyụn̄ ‘isịnke mmọ kaban̄a uyen mmọ.’ (1 Timothy 4:12) Nte odotde, mme ete ye eka mmọ ẹkop inemesịt ẹban̄a mmọ, ndien Jehovah ọdọhọ ke mmọ ẹdat imọ esịt. (Mme N̄ke 27:11) Idem okposụkedi mmọ ẹdide uyen, mmọ ẹkeme nditịm nnịm nte ke ikọ eke odudu spirit emi abuana mmimọ: “Tịn̄ enyịn ke owo eke ọfọnde ama, nyụn̄ se edinen owo: koro (eti) utịt anade ọnọ owo emem.”—Psalm 37:37.
Nam Nti Ubiere
12. Nso idi akpan ubiere kiet oro mme uyen ẹsinamde, ndien ntak emi ubiere oro enyenede nsinsi utịp?
12 Ini uyen edi ini ndinam mme ubiere, emi ediwak ẹnyenede nsinsi utịp. Ndusụk ubiere oro afo anamde idahaemi ẹyetụk fi ke ini iso. Nti ubiere ẹsitịp ẹsịn ke ndidu uwem inemesịt oro okụtde unen. Ndiọi ubiere ẹkeme ndibiat ofụri eyouwem. Kere nte oro edide akpanikọ ke n̄kpọ iba oro afo enyenede ndibiere. Akpa: Anie ke afo emek nte nsan̄a? Ntak oro edide akpan n̄kpọ? Ọfọn, n̄ke eke odudu spirit ọdọhọ ete: “Owo eke asan̄ade ye mme enyene-ibuot eyenyene ibuot: edi nsan̄a mbon ndisịme ọyọdiọn̄ ọdiọk.” (Mme N̄ke 13:20) Ke ikọ en̄wen, nnyịn idikabade itie nte mbon oro nnyịn idade idụk nsan̄a—idide mme enyene-ibuot m̀mê ndisịme. Nso orụk owo ke afo akpama ndidi?
13, 14. (a) Ke ẹsiode edidụk nsan̄a ye mme owo ẹfep, nso n̄kpọ efen ke nsan̄a abuana? (b) Nso ndudue ke mme uyen ẹkpefep?
13 Ke ini afo ekerede aban̄a nsan̄a, eyedi afo edikere iban̄a mme owo. Oro enen, edi idịghe mme owo kpọt ẹdi nsan̄a. Ke ini afo esede edinam ekebe ndise, akpan̄de utọn̄ ọnọ ikwọ, okotde n̄wed, akade ekese senima, m̀mê adade Intanet anam n̄kpọ, afo odụk nsan̄a. Edieke nsan̄a oro esịnde udọn̄ ọnọ afai ye oburobụt ido m̀mê edida n̄kpọsọn̄ ibọk ke idiọk usụn̄, ukpammịn, m̀mê n̄kpọ efen ekededi oro atuahade ye mme edumbet Bible, afo odụk nsan̄a ye “ndisịme owo,” emi anamde n̄kpọ nte n̄kpọ eke Jehovah mîdụhe.—Psalm 14:1.
14 Eyedi afo ekere ke sia imọ isidụkde mme mbono esop Christian inyụn̄ isịnde idem ke mme edinam esop, ke afai afai ndise senima m̀mê ikwọ oro asan̄ade ye inem inem n̄kukwak edi esịnede oburobụt ikọ ikemeke ndifịna imọ. Ekeme ndidi afo ekere ke ndiọi utịp ididụhe edieke imọ itopde enyịn ise ikpehe Ndutịm ndise idan̄ ke Intanet. Apostle Paul ọdọhọ ke ekikere fo inenke! Enye ọdọhọ ete: “Idiọk nsan̄a ababiat eti ido.” (1 Corinth 15:33) Ke mfụhọ, idiọk nsan̄a amabiat eti ido ediwak uyen Christian. Do, biere ndifep mme utọ nsan̄a oro. Ke anamde ntre, afo editiene item Paul emi: “Ẹkûnyụn̄ ẹkabade ẹbiet eyo emi, edi ẹyak mbufo ẹkpụhọde oto ke edinam emi ẹnamde esịt mbufo ẹdi obufa, man mbufo ẹdomo ẹfiọk se uduak Abasi edide, uduak Abasi eke edide eti, onyụn̄ enemde owo esịt, onyụn̄ ọfọnde ama.”—Rome 12:2.
15. Nso idi udiana ubiere oro mme uyen ẹnyenede ndinam, ndien ndusụk ini nso ke ẹsinyịk mmọ ẹnam ke n̄kpọ emi?
15 Udiana ubiere oro afo enyenede ndinam edi emi. Ini eyedi oro afo edibierede se afo oyomde ndinam ke ama okokụre n̄wed. Edieke afo odụn̄de ke idụt oro utom ananade, afo emekeme ndisọsọp nnyịme utom oro odude. Edieke afo odụn̄de ke idụt uforo, ediwak utom ẹkeme ndidu, ndusụk ẹnyụn̄ ẹkama idomo. Ke ntak emi ẹnen̄erede ẹkere ẹban̄a mfọnọn̄kpọ fo, mme andikpep m̀mê ete ye eka fo ẹkeme ndisịn udọn̄ nnọ fi ẹte emek ubọkọkọ oro edinamde fi okûnyene mfịna okụk ke ini iso m̀mê akam anamde fi edi imọ. Nte ededi, ndibọ ukpep ke ubọkọkọ oro ekeme ndida ini oro afo akpadade anam n̄kpọ Jehovah.
16, 17. Tịn̄ nte nsio nsio itie N̄wed Abasi ẹkemede ndin̄wam uyen enyene ekikere oro adade ukem ukem kaban̄a utom.
16 Ti ndidụn̄ọde Bible mbemiso anamde ubiere. Bible esịn udọn̄ ọnọ nnyịn ete inam utom man inyene se idade idu uwem, owụtde ke ana nnyịn ise iban̄a idem nnyịn. (2 Thessalonica 3:10-12) Kpa ye oro, n̄kpọ efen efen ẹbuana ke ndimek ubọkọkọ. Nnyịn isịn udọn̄ inọ fi ite okot mme itie N̄wed Abasi oro ẹtienede mi onyụn̄ ekere aban̄a nte mmọ ẹkemede ndin̄wam uyen ndida ukem ukem ke se iban̄ade edimek ubọkọkọ: Mme N̄ke 30:8, 9; Ecclesiastes 7:11, 12; Matthew 6:33; 1 Corinth 7:31, 32a; 1 Timothy 6:9, 10. Ke ama okokot mme ufan̄ikọ oro, nte afo omokụt ekikere Jehovah ke n̄kpọ emi?
17 Owo ikpayakke utom idịbi udia akabade edi akpan n̄kpọ akan utom Jehovah. Edieke ufọkn̄wed sekọndri ekemede ndinam fi enyene eti utom, oro ọfọn. Edieke afo oyomde ndibọ ukpep efen efen ke ama okokụre ufọkn̄wed sekọndri, afo enyene ndineme oro ye ete ye eka fo. Nte ededi, kûfre enyịn ke “se ifọnde ikan”—kpa n̄kpọ eke spirit. (Philippi 1:10, 11) Kûnam ndudue oro Baruch, ewetn̄wed Jeremiah, akanamde. Enye ikadaha aba ifetutom esie ke akpan n̄kpọ, ama onyụn̄ ọtọn̄ọ ‘ndiyom ikpọ n̄kpọ ke idem esie.’ (Jeremiah 45:5) Enye ama efre ke esisịt ini nte ke baba ‘akwa n̄kpọ’ kiet ke ererimbot emi ikemeke ndinam imọ isan̄a ikpere Jehovah m̀mê ndin̄wam imọ ibọhọ nsobo Jerusalem. Nnyịn idu ke ukem idaha oro mfịn.
Da Mme N̄kpọ eke Spirit ke Akpan N̄kpọ
18, 19. (a) Nso inọmọ ata ediwak mbọhọidụn̄ fo, ndien afo akpanam n̄kpọ didie ye mmọ? (b) Ntak emi ediwak owo mîkopke biọn̄ ke n̄kan̄ eke spirit?
18 Ndi akanam omokụt ndise nditọwọn̄ ke mme idụt akan̄? Edieke edide akanam omokụt, anaedi ama enen̄ede okop mbọm aban̄a mmọ. Ndi afo omokop mbọm ntre aban̄a mme owo ke mbọhọ mbufo? Ntak emi okpokopde? Koro ata ediwak mmọ n̄ko ẹtie biọn̄. Akan̄ oro Amos ekebemde iso etịn̄ aban̄a omụm mmọ: “Ọbọn̄ Jehovah ọdọhọ, ete, Sese, ini ke edi, ndien nyọdọn̄ akan̄ utom ke isọn̄, idịghe akan̄ udia, inyụn̄ idịghe nsat-itọn̄ mmọn̄, edi eke edikop ikọ Jehovah.”—Amos 8:11.
19 Edi akpanikọ, ata ediwak mbon oro ẹtiede biọn̄ ke n̄kan̄ eke spirit ‘ikereke iban̄a unana mmọ ke n̄kan̄ eke spirit.’ (Matthew 5:3, NW) Ediwak mmọ ikopke biọn̄ ke n̄kan̄ eke spirit. Ndusụk mmọ ẹkam ẹkeme ndikere ke mmimọ imadia iyụhọ. Edi edieke mmọ ẹdiade ẹyụhọ, edi koro mmọ ẹdiade ndisịme “ifiọk mbon ererimbot,” emi esịnede uma-inyene, ekikere ifiọk ntaifiọk, nsio nsio ekikere ẹban̄ade ido uwem, ye mme orụk n̄kpọ oro. Ndusụk owo ẹkere ke Bible ikemke ye “ifiọk” eyomfịn. Nte ededi, ‘ererimbot idaha eti ibuot eke mmọ ifiọk Abasi.’ Ifiọk ererimbot idin̄wamke fi asan̄a ekpere Abasi. Enye edi “ndisịme ke iso Abasi.”—1 Corinth 1:20, 21; 3:19.
20. Ntak mîwụtke eti ibuot ndiyom ndikpebe mbon oro mîtuakke ibuot inọ Jehovah?
20 Ke ini afo esede ndise nditọwọn̄ oro biọn̄ ọdọn̄de, ndi akanam ọdọn̄ fi nditie nte mmọ? Ke akpanikọ idọn̄ke! Edi ndusụk uyen ke ubon Christian ẹyom nditie nte mme owo oro ẹtiede biọn̄ ke n̄kann̄kụk mmọ. Eyedi mme utọ uyen oro ẹkere ke mme uyen ererimbot inyeneke mfịna ye nte ke mmọ ẹdia uwem. Mmọ ẹfre ke mme uyen oro ẹda nsannsan ẹkpọn̄ Jehovah. (Ephesus 4:17, 18) Mmọ ẹfre n̄ko ẹban̄a ndiọi utịp editie biọn̄ ke n̄kan̄ eke spirit. Ndusụk utịp emi ẹdi edimen idịbi ini uyen ye mme utịp oro oburobụt ido, edin̄wọn̄ sika, ukpammịn, ye edida n̄kpọsọn̄ ibọk ke idiọk usụn̄ ẹnyenede ke ikpọkidem ye ke ntụk. Editie biọn̄ ke n̄kan̄ eke spirit edi ntak edu nsọn̄ibuot, unana idotenyịn, ye unana ndausụn̄ ke uwem.
21. Didie ke nnyịn ikeme ndikpeme idem mbak idikpebe idiọk edu mbon oro mîtuakke ibuot inọ Jehovah?
21 Mmọdo, ke ini odude ke ufọkn̄wed ye mbon oro mîdịghe ekemmọ mme andituak ibuot nnọ Jehovah, kûyak edu mmọ ẹkan fi ubọk. (2 Corinth 4:18) Ndusụk mmọ ẹyekam ẹtịn̄ ndek ndek ikọ ẹdian n̄kpọ eke spirit. Ke adianade do, ndutịm usuanetop ẹsision̄o n̄kari n̄kari etop ẹdi, emi owụtde ke ọfọn ndinam oburobụt ido, ndikpa mmịn, m̀mê nditịn̄ ndek ndek ikọ. N̄wana ye utọ odudu oro. Ka iso ndidụk nsan̄a ye mbon emi ‘ẹyịrede mbuọtidem ye eti esịt ẹkama.’ Yọhọ “kpukpru ini ke utom Ọbọn̄.” (1 Timothy 1:19; 1 Corinth 15:58) Nyene ekese ndinam ke Ufọkmbono Obio Ubọn̄ ye ke an̄wautom. Ke ini odude ke ufọkn̄wed, buana ke utom usiakusụn̄ unọ un̄wam ke ini ke ini. Nen̄ede se n̄kpọ ke enyịn eke spirit ntem, ndien afo udusehekede.—2 Timothy 4:5.
22, 23. (a) Ntak emi uyen Christian esiwakde ndinam mme ubiere oro mîn̄wan̄ake mbon en̄wen? (b) Nso ke ẹsịn udọn̄ ẹnọ mme uyen ẹte ẹnam?
22 Ndise n̄kpọ ke enyịn eke spirit ekeme ndinam fi anam mme ubiere oro mîn̄wan̄ake mbon en̄wen. Ke uwụtn̄kpọ, uyen Christian kiet ama enyene enọ ubre ikwọ onyụn̄ esimen akpa ke kpukpru udomo oro enye eketiede ke ufọkn̄wed. Ke ama okokụre n̄wed, enye ama etiene ete esie anam utom ediyet window nnọ mme owo man enye ekpekeme ndinam utom oro enye ekemekde nte ọkwọrọ eti mbụk uyọhọ ini, m̀mê asiakusụn̄. Ikan̄wan̄ake mme andikpep esie ntak emi enye akanamde utọ ubiere oro, edi nnyịn imọfiọk ke an̄wan̄a fi edieke edide afo amasan̄a ekpere Jehovah.
23 Nte afo ekerede aban̄a nte akpadade mme ọsọn̄urua ifet ini uyen fo anam n̄kpọ, ‘n̄wana yom eti isọn̄ nọ idemfo ke ini iso, man afo okpomụm uwem eke edide ata uwem akama.’ (1 Timothy 6:19) Biere ‘nditi Andibot fi ke ini afo edide akparawa’—ye ke ofụri eyouwem fo. Oro edi n̄kukụre usụn̄ edikụt unen ke ndisịn itiat idakisọn̄ nnọ ini iso, kpa ini oro mîdinyeneke utịt tutu amama.
Nso Idi Ubiere Fo?
• Ewe item eke odudu spirit an̄wam mme uyen ndisịn itiat idakisọn̄ nnọ ini iso mmọ?
• Nso idi ndusụk usụn̄ emi uyen ekemede ‘ndisan̄a n̄kpere Abasi’?
• Nso idi ndusụk ubiere emi uyen ekemede ndinam emi ẹkemede nditụk ini iso esie?
[Mme Mbụme Ukpepn̄kpọ]
[Mme ndise ke page 15]
Nte afo ayayak mme ọkpọkpọ udọn̄ ẹda ofụri odudu ye nduaidem uyen fo?
[Ndise ke page 16, 17]
Mme uyen Christian emi ẹdide ọniọn̄ ẹnam enyịn eke spirit mmọ ẹn̄wan̄a