Nte Ikọ Abasi Esisọn̄ọ Fi Idem?

KE INI osobode mme n̄kpọ-ata, didie ke afo esiyọ? Jesus ndiketi nnennen itie N̄wed Abasi ama an̄wam enye ndiyọ mme idomo Satan. (Matthew 4:1-11) Kpasụk ntre, ke ini Edidem David okosobode idomo, Ikọ Abasi ama ọsọn̄ọ enye idem. Enye ọkọdọhọ ete: “Ke uwak ekikere emi ẹdude mi ke esịt ndọn̄esịt fo enem mi esịt.”—Psalm 94:19.

Ke ukem usụn̄ oro, nditi itie N̄wed Abasi oro imade ikan ekeme ndinọ nnyịn ndọn̄esịt mîdịghe ọsọn̄ọ nnyịn idem ke ini isobode mme n̄kpọ-ata. Ke uwụtn̄kpọ, Rex, emi edide isua 89 idahaemi, ọkọtọn̄ọ utom ukwọrọikọ uyọhọ ini ke 1931. Edi, enye ọdọhọ ete: “Ediwak ini esitie mi nte ndotke ke ini ẹnọde mi san̄asan̄a utom ndinam.” Didie ke enye ọkọyọ? “Mma nti itie N̄wed Abasi oro mmade n̄kan, Mme N̄ke 3:5, emi ọdọhọde ete: ‘Buọt idem fo ye Jehovah ke ofụri esịt fo; ndien kûberi edem ke asian fo.’ Nditi nnyụn̄ nda itie N̄wed Abasi emi nsịn ke edinam ama an̄wam mi ndinam utom mi uforo uforo.”

N̄kparawa owo n̄ko ẹsibọ ufọn edinyene itie N̄wed Abasi oro mmọ ẹmade ẹkan. Jack, emi edide isua itiokiet, ọdọhọ ke itien̄wed oro imọ imade ikan edi Matthew 24:14. Itie N̄wed Abasi emi esisịn udọn̄ ọnọ enye ndisan̄a ye ete ye eka esie n̄ka ukwọrọikọ. Enye ọdọhọ ete: “Mmesima ndisan̄a ye ete ye eka mi ye eyeneka mi an̄wan n̄kọkwọrọ ikọ kpukpru Saturday.”

Ukem nte Jesus, ndi afo ndusụk ini emesisobo mme n̄kpọ-ata oro ẹdomode mbuọtidem fo nnennen nnennen? Do Philippi 4:13 ekeme ndidi kiet ke otu itie N̄wed Abasi emi afo edimade akan. Ukem nte Edidem David, ndi afo emesinyene “uwak ekikere”? Do, nditi Philippi 4:6, 7 ekeme ndin̄wam fi ọyọ. Ndi afo emesikere ndusụk ini ete ke utom emi imọ inamde inọ Abasi edi ikpîkpu? Do, nditi 1 Corinth 15:58 ọyọsọn̄ọ fi idem.

Ke ndimụm nnennen itie N̄wed Abasi ndọn̄ ke ibuot, nnyịn iyak Ikọ Abasi enyene odudu ke uwem nnyịn. (Mme Hebrew 4:12) Mme utọ itie N̄wed Abasi emi inen̄erede ima mi ẹkeme ndisọn̄ọ nnyịn idem ẹnyụn̄ ẹdọn̄ nnyịn esịt.—Rome 15:4.