Mbụk Eyouwem

Okposụkedi N̄kedide Nnan, Mma N̄kụt Usụn̄!

NTE EGON HAUSER OBỤKDE

Ke mma n̄kọdọn̄ọ nnan ke ọfiọn̄ iba, mma ndikụt akpanikọ Bible oro n̄kofụmide ke ofụri ini uwem mi.

KE INI mfiakde nse se iwakde ikan isua 70 emi ẹbede, ediwak n̄kpọ oro ẹtịbede ke uwem mi ẹnam nnen̄ede n̄kop uyụhọ. Edi edieke n̄kpekemede ndikpụhọde n̄kpọ kiet ke uwem mi, n̄kpemek ndibabak ndiọn̄ọ Jehovah Abasi.

N̄kamana ke 1927 ke Uruguay, kpa ekpri idụt kiet oro etiede ekara ekara nte eben mbakara; enye odu ke ufọt Argentina ye Brazil, onyụn̄ enyene akwa ediye n̄kann̄kụk ke Mbenesụk Atlantic. Mbon Italy ye mbon Spain ẹwak ẹkan ke obio emi. Nte ededi, ete ye eka mi ẹkedi odudụn̄ ẹtode Hungary, ndien ke ini n̄kedide ata ekpri eyenọwọn̄, nnyịn ikodụn̄ ke ekpri n̄kann̄kụk oro mme owo ẹkenen̄erede ẹdiana kiet. Ufọn ikodụhe ndisịn ukpọhọde ke usụn̄ufọk m̀mê ndidọn̄ ukwak ke window nnyịn. Asari eke orụk ikodụhe ke ufọt nnyịn. Isenowo ye mme amanaisọn̄, mbubịt ye mfia—kpukpru nnyịn ikedi ufan.

Ete ye eka mi ẹkedi ifịk ifịk mbon Catholic, ndien ke ini n̄kedide isua duop, mma n̄kabade ndi andin̄wam oku ke ini edinam ido ukpono. Ke mma n̄kokpon, mma nnam utom ke okụre ufọkabasi n̄kann̄kụk nnyụn̄ ndi kiet ke otu mbon emi ẹsinọde bishop item ke edinam ufọkabasi esie. Ke mma n̄kemek ibọkusọbọ nte ubọkọkọ, ẹma ẹnọ mi ikot nditiene mbuana ke mbono ubọ ukpep emi Ufọkabasi Catholic eketịmde ke Venezuela. Nte mbiausọbọ emi ẹkebọde san̄asan̄a ukpep ke ibọkusọbọ udọn̄ọ iban, ẹkedọhọ nnyịn inam ndụn̄ọde iban̄a ibọk ukpan uyomo idịbi oro ọkọwọrọde edi ini oro.

 Se Ikebemde Iso Itụk Mi nte Eyen Ufọkn̄wed Ibọkusọbọ

Ke ini n̄kosụk ndide eyen ufọkn̄wed ibọkusọbọ, mma n̄kpep n̄kpọ mban̄a idem owo ndien ọniọn̄ emi n̄kokụtde ke nte ẹkebotde owo ama enen̄ede otụk mi. Ke uwụtn̄kpọ, ama akpa mi idem ndikụt ukeme oro idem owo enyenede ndinam unan akpa nnyụn̄ nnam idem owo afiak eketie nte eketiede ke akpa, utọ nte ke ini edidiana ekpa m̀mê ọkpọ n̄kan̄ ekemede ndifiak n̄kọri n̄kada nte enye akadade idem ke ẹma ẹkesịbe enye esisịt ẹfep.

Ke ukem ini oro, mma nsikụt ediwak mbon oro mbabuat n̄kpọntịbe ekenen̄ede ọnọmọ, nsinyụn̄ mfụhọ ke ini mmọ ẹkpan̄ade ke ntak edikịm iyịp nsịn mmọ ke idem. Nsụk nteti nte ekesisọn̄de mi nditịn̄ ikọ ye mme iman mbon udọn̄ọ emi ẹkekpan̄ade ke ntak edikịm iyịp nsịn ke idem. Ekese ini, owo ikesitịn̄ke inọ mme iman emi nte ke edikịm iyịp nsịn ke idem okowot mbonima mmọ. Utu ke oro, ẹkesinọ mmọ ntak efen. Okposụkedi ediwak isua ẹbede, nsụk nteti nte edikịm iyịp nsịn owo ke idem ekesifịnade mi tutu nsịm ubiere ke akpatre nte ke edinam emi ifọnke. Ubaha- e n̄kpọkọdiọn̄ọde ibet Jehovah kaban̄a edisana idaha eke iyịp! Oro akpakan̄wam mi ndifiọk nte ke edikịm iyịp nsịn owo ke idem inenke.—Utom 15:19, 20.

Uyụhọ Otode Edin̄wam Mme Owo

Nte ini akakade, mma n̄kabade ndi asiakidem ye adausụn̄ ke ufọkibọk ke Santa Lucía. Mma nsinam utom n̄ko ke Ufọkn̄wed Emi Ẹkpepde N̄kpọ Ẹban̄a Mme Odu-Uwem N̄kpọ. Emi ama esinam nnen̄ede n̄kop uyụhọ. Mma nsin̄wam mbon udọn̄ọ, nnam ubiak mmọ osụhọde, nnyan̄a uwem ke ediwak idaha, nnyụn̄ nda mbufa owo ndụk ererimbot ebe ke ndimụm iban uman. Ke ntak ifiọk oro n̄kebemde iso nnyene mban̄a edikịm iyịp nsịn owo ke idem, mma nsifep ndikịm iyịp nsịn owo ke idem, mma nsinyụn̄ nsiak ediwak owo idem ye unana edikịm iyịp nsịn mmọ ke idem. N̄kesikere ke iyịp ndiwọrọ owo ke idem etie nte aban̄ emi odụtde mmọn̄. N̄kukụre usọbọ edi ndisịri odudu oro, idịghe ndika iso ndọn̄ mmọn̄ ke aban̄ oro.

Ndinọ Mbon Udọn̄ọ Ẹdide Mme Ntiense Usọbọ

N̄kọtọn̄ọ ndimehe ye Mme Ntiense Jehovah ke iduọk isua 1960 ke ini mmọ ẹketọn̄ọde ndidi ufọkibọk nnyịn ndisiak idem ye unana edikịm iyịp nsịn ke idem. Tutu amama ndifreke se iketịbede inọ owo udọn̄ọ kiet, asiakusụn̄ (asan̄autom uyọhọ ini) emi ekekerede Mercedes Gonzalez. N̄wan emi ama anana iyịp tutu mbiausọbọ ke ufọkibọk ufọkn̄wed ntaifiọk ikamaha ndisiak enye idem mbak idikpa. Okposụkedi iyịp ọkọwọrọde enye awak etieti, nnyịn ima isiak enye idem ke ufọkibọk nnyịn. Mfịna ndomokiet ikodụhe ke usiakidem oro, ndien enye ama aka iso anam utom usiakusụn̄ ke se iwakde ibe isua 30 tutu esịm n̄kpa esie ke enye ama ekesịm isua 86.

Ima ye udọn̄ oro Mme Ntiense ẹkewụtde ke ini mmọ ẹkpemede nditọete Christian mmọ ke ufọkibọk ama esitụk mi kpukpru ini. Ke ini nsisan̄ade nse mbon udọn̄ọ, mma nsima ndikpan̄ utọn̄ ke ini mmọ ẹtịn̄de ẹban̄a se mmọ ẹnịmde ke akpanikọ, mma nsinyụn̄ mbọ mme n̄wed mmọ. Akananam n̄kekereke nte ke mîbịghike ke nyakabade ndi eyenete mmọ eke spirit utu ke ndidi sụk abiausọbọ mmọ.

Mma nnen̄ede mmehe ye Mme Ntiense ke ini n̄kọdọde Beatriz, eyenan̄wan kiet emi ete esie ekesidide edibọ usọbọ. Ekese ke otu mbonubon  esie ẹma ẹbabuana ye Mme Ntiense, ndien ke nnyịn ima ikọdọ ndọ, enye n̄ko ama akabade edi Ntiense emi ọsọn̄de idem. Ke n̄kan̄ eken, mma nnen̄ede nsịn idem ke utom mi nnyụn̄ n̄wọrọ etop ke utom ibọkusọbọ. Uwem ama enem etieti. N̄kọfiọkke ke ibịghike ke n̄kpọ ọmọn̄ okpụhọde uwem mi ofụri ofụri.

Nnanenyịn Ọwọrọ Mi

Kiet ke otu ndiọkn̄kan n̄kpọ emi ekemede nditịbe nnọ asiak idem edi enye ndidọn̄ọ nnan. Oro edi se iketịbede inọ mi. Ke mbuari, mma nnyene mfịna ke enyịn mi mbiba—mma ndọn̄ọ nnan ndien n̄kọfiọkke m̀mê nyekeme ndifiak n̄kụt usụn̄. Ke ẹma ẹkesiak mi enyịn ẹma, mma nna do ke bed ye n̄kpọ oro ẹkedade ẹbọp mi enyịn mbiba nnyụn̄ mfụhọ etieti. N̄ketie nte owo emi mînyeneke ufọn aba nnyụn̄ nnana idotenyịn tutu esịm udomo oro n̄kebierede ndiwot idem. Sia n̄kodude ke ọyọhọ enyọn̄ inan̄, mma nsụhọde ke bed nnyụn̄ mfiọn̄ọ ubọk ke ibibene nsan̄a, nyom window. N̄koyom ndifrọ nduọ n̄kpa. Edi utu ke ndisan̄a n̄kesịm ebiet emi window odude, n̄kasan̄a n̄kọwọrọ usụn̄otop ufọkibọk, ndien nurse kiet ama edi edida mi akayak ke bed mi.

N̄kodomoke aba ndinam utọ n̄kpọ oro. Edi ke ntak n̄kọdọn̄ọde nnan, mma n̄ka iso ndikop mfụhọ ye iyatesịt. Ke ini oro n̄kosụk ndide nnan, mma nnam en̄wọn̄ọ nnọ Abasi nte ke edieke ndikemede ndifiak n̄kụt usụn̄, nyokot ofụri Bible mma. Nte ini akakade, mma ntọn̄ọ ndikụt n̄kpọ nsịtnsịt, nnyụn̄ n̄keme ndikot n̄wed. Edi n̄kekemeke ndinam utom aba nte asiak idem. Nte ededi, enyene n̄ke kiet ẹsitopde ke Uruguay ẹte “No hay mal que por bien no venga” “Ndusụk idiọkn̄kpọ idịghe idiọk.” N̄kodu ke idaha ndikụt nte ikọ oro edide akpanikọ.

Idiọk Ntọn̄ọ

N̄koyom ndidep The Jerusalem Bible nsiondi eke ikpọ abisi, ekem mma ndidiọn̄ọ ke Mme Ntiense Jehovah ẹnyene Bible emi mîsọn̄ke urua ndien akparawa Ntiense kiet ama enyịme ndida enye nsọk mi. Ke ndan̄nsiere, enye ama akama Bible oro ada ke enyịnusụn̄ ufọk mi. N̄wan mi ama eberede usụn̄ etịn̄ ikọ ye enye. Mma nsịne ke esa mfiori nte edieke edide n̄wan mi ekpe enye okụk Bible esie, m̀mê nso ke enye osụk ada ke esa mi anam, ntre mma ndọhọ enye ọnyọn̄, ufọn ndiketetịn̄ ikodụhe, enye ama ọsọsọp ọnyọn̄. N̄kọfiọkke nte ke kpa owo emi edin̄wam mi ke uwem.

Usen kiet mma n̄n̄wọn̄ọ un̄wọn̄ọ oro mmen̄kekemeke ndinam nnọ n̄wan mi. Ntre man nnọ enye utịp ke ntak oro nnyụn̄ nnam enye okop inemesịt, mma ndọhọ enye ke mmọn̄ ntiene enye n̄ka Editi n̄kpa Christ eke isua oro. Ke usen oro ama ekedi edisịm, mma nti se n̄kọn̄wọn̄ọde nnyụn̄ ntiene enye n̄ka edinam oro. Ufan ufan idaha oro n̄kosobode ye nte ẹkedarade mi ima ima ẹma ẹtụk mi. Ke ini etịn̄ikọ ọkọtọn̄ọde nditịn̄ ikọ, ama akpa mi idem ndikụt nte ke ekedi kpa akparawa oro n̄kaduatde nte ọnyọn̄ ke ufọk mi. Utịn̄ikọ esie ama otụk mi etieti, ndien ama enen̄ede afịna mi nte n̄kanamde n̄kpọ ye enye nsọn̄ido nsọn̄ido. Nso ke n̄kpanam man nnem enye esịt?

Mma ndọhọ n̄wan mi okot enye edi udia ke ufọk nnyịn, edi n̄wan mi ama ọnọ ekikere ete: “Nte afo ukereke ke ekpenen̄ede ọfọn edieke afo okotde enye ke idemfo? Kam da mi, enye ayasan̄a edi.” N̄wan mi ama enen. Enye ama asan̄a edi edikọm nnyịn onyụn̄ enyịme ikot oro ye idatesịt.

Nneme oro nnyịn ikenyenede ke mbubịteyo oro enye ekedide ekedi ntọn̄ọ ediwak ukpụhọde ke uwem mi. Enye ama owụt mi n̄wed Akpanikö oro Adade osim Nsinsi Uwem, * ndien mma n̄wụt enye ukem n̄wed oro itiokiet. Nsio nsio mbon udọn̄ọ emi ẹdide Mme Ntiense ẹkenọ mi ke ufọkibọk, edi akananam n̄kokotke mmọ. Mma mbụp ediwak mbụme mbemiso udia ye ke ima ikadia udia ima, tutu esịm ata okoneyo—enye ama ada Bible ọbọrọ mmọ kpukpru. Nneme emi ama ebịghi tutu eyo ọtọn̄ọ ndisiere. Mbemiso enye ọnyọn̄de, akparawa emi ama ọdọhọ ke imọn̄ ida n̄wed Akpanikö ikpep mi Bible. Ikada ọfiọn̄ ita ikpep n̄wed oro ima inyụn̄ ika iso ye n̄wed “Babylon the Great Has Fallen!” God’s Kingdom Rules! * Ke oro ebede, mma  nyak uwem mi nnọ Jehovah nnyụn̄ nna baptism.

Uwem Mi Ama Afiak Enyene Ufọn

Ke ntak edikabade ndi nnan, ‘enyịn esịt mi’ ama okụt akpanikọ Bible oro n̄kofụmike tutu esịm ini oro! (Ephesus 1:18) Ndidi ndifiọk Jehovah ye ima ima uduak esie ẹma ẹkpụhọde uwem mi ofụri ofụri. Uwem mi ama afiak enyene ufọn mma nnyụn̄ n̄kop inemesịt. Mman̄wam mme owo ke n̄kan̄ eke obụk ye ke n̄kan̄ eke spirit nnyụn̄ n̄wụt mmọ nte ẹkemede ndidu uwem mbịghi ke isua ifan̄ emi osụhọde ọnọ editịm n̄kpọ emi nnyụn̄ ndu uwem ke nsinsi ke obufa editịm n̄kpọ.

Ami ke nnanam n̄kpọ mban̄a ibọkusọbọ tutu esịm mfịn, mmonyụn̄ nnam ndụn̄ọde mban̄a mme n̄kpọndịk emi ẹdude ke edikịm iyịp nsịn ke idem, ukpụhọ ibọkusọbọ, unen emi owo udọn̄ọ enyenede, ye ukpepn̄kpọ aban̄ade ido unọ usọbọ. Mmesinyene mme ifet ndibuana ntọt emi ye mbiausọbọ n̄kann̄kụk ke ini ẹnọde mi ikot ndinọ utịn̄ikọ ke mme ibuọt nneme emi ke mme mbono ubọ ukpep ibọkusọbọ. Ke 1994, mma ndụk akpa akwa mboho emi ẹkenịmde ẹban̄a edinọ usọbọ ye unana edikịm iyịp nsịn ke idem ke Rio de Janeiro, Brazil, nnyụn̄ nnọ utịn̄ikọ ke nte ẹkemede ndinam n̄kpọ ke ini owo enyenede uwọrọiyịp. Ubak ntọt oro ama odu ke ibuotikọ oro n̄kewetde, “Una propuesta: Estrategias para el Tratamiento de las Hemorragias” (Usọ Usọbọidem Oro Akpande Uwọrọiyịp), emi ẹkesiode ke magazine ibọkusọbọ oro Hemoterapia.

Ndisọn̄ọ Nda ke Idak Mfịghe

Ke ntọn̄ọ ntọn̄ọ, eyịghe oro n̄kenyenede mban̄a edikịm iyịp nsịn ke idem ekenen̄ede ọkọn̄ọ ke ifiọk ntaifiọk. Nte ededi, ke ini ami ke idemmi n̄kedide owo udọn̄ọ ke ufọkibọk, mma n̄kụt nte ọsọn̄de ndisịn ndinyịme edikịm iyịp nsịn ke idem nnyụn̄ nsọn̄ọ nda ke mbuọtidem ke idak ọkpọsọn̄ mfịghe emi ẹtode mbiausọbọ. Ke mma n̄kenyene ifehesịt, mma nda se ikande hour iba nnam idaha mi an̄wan̄a asiak idem. Enye ekedi eyen ata ufan mi ndien abiausọbọ emi ama ọdọhọ ete ke imọ idinyịmeke ami n̄kpa edieke imọ ikụtde ke edikịm iyịp nsịn ke idem ayanyan̄a mi. Mma mbọn̄ akam ke esịt nnọ Jehovah, ndọhọ enye an̄wam abiausọbọ emi ọfiọk onyụn̄ okpono idaha mi idem ọkpọkọm enye inyịmeke ye oro. Ke akpatre, abiausọbọ oro ama enyịme ndikpono ubiere mi.

Ke idaha efen, ẹkenyene ndisio mi akwa mbufụt ke efọk ikịm. Iyịp ama ọwọrọ awak etieti. Ke isan̄ enye emi n̄ko, mma nnam an̄wan̄a ntak mmenyịmeke ẹkịm iyịp ẹsịn mi ke idem, ndien okposụkedi iyịp oro ọkọwọrọde mi ke idem akawakde esịm mbahade iba ke itie ita, mbon ufọkibọk ẹma ẹkpono ubiere mi.

Ukpụhọde Edu

Nte andibuana ke N̄ka Ofụri Ererimbot Emi Esede N̄kpọ Aban̄a Ukpepn̄kpọ Ido Unọ Usọbọ, mmokop uyụhọ ndikụt ukpụhọde ke edu emi mbon ufọkibọk ye n̄ka esopikpe ẹwụtde ẹban̄a unen emi mbon udọn̄ọ ẹnyenede. Utu ke mbiausọbọ ndika iso nnyene ukara ukara edu, mmọ ẹkpono ubiere oro ọkọn̄ọde ke ifiọk. Mmọ idahaemi ẹmenọ mbon udọn̄ọ unyịme ẹte ẹmek usọbọ oro mmọ ẹyomde. Owo idaha aba Mme Ntiense Jehovah nte mbon ukwan̄ ifiopesịt emi mîdotke se ẹnọde usọbọ. Utu ke oro, ẹda mmọ nte mbon udọn̄ọ emi ẹtịmde ẹnyene ifiọk ẹnyụn̄ ẹnyenede unen oro ẹkpewụtde ukpono ẹnọ. Ke mme mbono ubọ ukpep ibọkusọbọ ye ke mme edinam TV, mme ọwọrọetop prọfesọ ẹdọhọ ẹte: “Imadara ukeme oro Mme Ntiense Jehovah ẹsịnde, n̄kpọ ẹn̄wan̄a nnyịn idahaemi . . . ” “Nnyịn imekpep n̄kpọ ito Mme Ntiense . . . ” ndien “Mmọ ẹmekpep nnyịn ndinam n̄kọri.”

 Ẹsidọhọ ke uwem edi akpan n̄kpọ akan koro ifụre, ubọhọ, ye uku ikpenyeneke ufọn ke owo mîkpodụhe uwem. Idahaemi, ediwak owo ẹnyịme mfọnn̄kan ndutịm oro ibet anamde odu, ẹfiọkde ẹte ke owo kiet kiet enyene unen, ke enye onyụn̄ edi n̄kukụre owo emi ekemede ndimek se enye amade ke idaha ekededi. Ke ntem, emi esinam ẹbem iso ẹkere ẹban̄a uku, ifụre edimek se owo amade, ye ukpepn̄kpọ ido ukpono owo. Owo udọn̄ọ enyene odudu ndinam ubiere idemesie. Ndutịm Itieutom Utịm Ntọt Ufọkibọk eke Mme Ntiense Jehovah aman̄wam ediwak mbiausọbọ ndika iso mfiọk mme n̄kpọ emi.

N̄kaiso un̄wam emi ubon mi ọnọde anam mi nnyene ufọn ke utom Jehovah nnyụn̄ n̄ka iso nnam utom nte ebiowo ke esop Christian. Nte mma n̄kebem iso ntịn̄, mmenen̄ede ntua n̄kpọfiọk nte mmen̄ketịmke mbak n̄kpep n̄kpọ mban̄a Jehovah. Kpa ye oro, mmokop idatesịt etieti nte ke enye ọnọ mi utịbe utịbe idotenyịn edidu uwem ke idak Obio Ubọn̄ Esie, ke ebiet emi ‘andidụn̄ mîdidọhọke ite, Ndọdọn̄ọ.’—Isaiah 33:24. *

[Mme Ikọ idakisọn̄]

[Ndise ke page 24]

Ke ini n̄kodude ke iduọk isua 30, nnamde utom ke ufọkibọk ke Santa Lucía

[Ndise ke page 26]

Ye n̄wan mi, Beatriz, ke 1995