Mbonusọn̄—Mme Ọsọn̄urua Nditọete Christian Nnyịn

‘Mmọ eke ẹtọde ke ufọk Jehovah ẹyesiaha ke okụre. Ẹyesụk ẹkọri ke usọn̄.’—Psalm 92:13, 14.

1. Ediwak owo ẹse mbonusọn̄ didie?

 JEHOVAH ama kpukpru mme anam-akpanikọ asan̄autom esie, ọkọrọ ye mbonusọn̄. Nte ededi, nte ibat ofụri idụt United States owụtde, kpukpru isua ẹsidiọk ndikama mîdịghe ẹfụmi se ikperede ndisịm mbonusọn̄ 500,000 ke idụt oro. Mme ukem ntọt emi ke ofụri ererimbot ẹwụt ke ẹsidiọk ndikama mbonusọn̄ ke kpukpru ebiet. N̄ka kiet ọdọhọ ke ntak mfịna emi edi “ntatara edu emi ediwak owo ẹnyenede . . . nte ke mbonusọn̄ inyeneke aba ufọn, inyeneke se ẹnamde ẹnọ owo ke ẹnyụn̄ ẹyom un̄wam ẹkaha.”

2. (a) Didie ke Jehovah ese mme anam-akpanikọ asan̄autom esie oro ẹsọn̄de? (b) Nso inem inem ikọ ke nnyịn ikụt ke Psalm 92:12-15?

² Jehovah Abasi ada mme anam-akpanikọ asan̄autom esie oro ẹsọn̄de ke n̄kpọuto. Enye ese “idem nnyịn emi odude ke esịt-esịt”—kpa idaha eke spirit nnyịn—utu ke mme unana ukeme ikpọkidem nnyịn. (2 Corinth 4:16) Nnyịn imokụt inem inem un̄wọn̄ọ emi ke Ikọ esie, kpa Bible: “Edinen owo ayasiaha nte eyop: onyụn̄ ọkọri nte cedar ke Lebanon. Ẹmetọ mmọ ke ufọk Jehovah; mmọ ẹyesiaha ke okụre Abasi nnyịn. Ẹyesụk ẹkọri ke usọn̄, ẹyesehe ẹnyụn̄ ẹsiak ikọn̄. Man ẹwụt ẹte ke Jehovah enenen.” (Psalm 92:12-15) Ndineme mme ufan̄ikọ emi oyowụt ekese n̄kpọ oro mbufo mbonusọn̄ ẹkemede nditịp nsịn man ẹsọn̄ọ mbọbọ nditọete Christian nnyịn.

“Ẹyesụk Ẹkọri ke Usọn̄”

3. (a) Ntak emi ẹmende ndinen owo ẹdomo ye eyop? (b) Didie ke mbonusọn̄ ẹkeme ‘ndisụk n̄kọri ke usọn̄’?

³ Andiwet psalm ekemen ndinen owo odomo ye eyop ‘emi ẹtọde ke okụre Abasi nnyịn.’ Mmọ “ẹyesụk ẹkọri ke usọn̄.” Edikabade en̄wen okot ntem: “Mmọ ẹyesụk ẹn̄wụm mfri ke eyo usọn̄.” (Tanakh) Nte afo unyịmeke ke emi edi ikọ nsịnudọn̄? Ndiye eyop emi ẹdade nnennen ẹkeyọyọhọ okụre mbon Edem Usiahautịn ke eyo Bible. Ke adianade ye mmọ ndidi n̄kpọ mbana, ẹma ẹnen̄ede ẹma eyop ke ntak mmọ ẹkesision̄ode ekese ifen, ndusụk mmọ ẹma ẹsision̄o ifen tutu ẹbe isua ikie. * Ke ndisọn̄ọ ndu ke utuakibuot akpanikọ, mbufo n̄ko ẹmekeme “[ndin̄wụm] mfri ke edinam kpukpru nti utom.”—Colossae 1:10.

4, 5. (a) Akpan mfri ewe ke mme Christian ẹnyene ndin̄wụm? (b) Nọ mme uwụtn̄kpọ N̄wed Abasi oro ẹban̄ade mbonusọn̄ emi ẹken̄wụmde “mfri n̄kpọk-inua.”

 ⁴ Jehovah oyom mme Christian ẹn̄wụm “mfri n̄kpọk-inua”—kpa ikọ emi ẹtịn̄de man ẹtoro enye ye mme uduak esie. (Mme Hebrew 13:15) Ndi emi abuana fi nte owo usọn̄? Ke akpanikọ abuana.

⁵ Bible ọdọn̄ọ mme uwụtn̄kpọ mbonusọn̄ oro ẹkenọde ikọ ntiense ye unana ndịk ẹban̄a enyịn̄ Jehovah ye mme uduak esie. Moses ama ebe isua “ata ye duop” ke ini Jehovah ekemekde enye ete edi prọfet ye andida ke ibuot imọ. (Psalm 90:10; Exodus 4:10-17) Usọn̄ ikọbiọn̄ọke prọfet Daniel ndinọ ikọ ntiense ye unana ndịk mban̄a itie edikara Jehovah. Etie nte Daniel ama ebe isua 90 ke ini Belshazzar ọkọdọhọde enye asiak se utịbe utịbe ubọkn̄wed oro ke ibibene ọkọwọrọde. (Daniel, ibuot 5) Ndien nso kaban̄a akanieren apostle John? Ke utịt utịt utom oro enye akanamde ke ediwak isua, ẹma ẹsịn enye ke ufọk-n̄kpọkọbi ke Isuo Patmos “ke ntak ikọ Abasi, ye ikọ ntiense [aban̄ade] Jesus.” (Ediyarade 1:9) Afo emekeme nditi ediwak owo ke Bible emi ẹken̄wụmde “mfri n̄kpọk-inua” ke eyo usọn̄ mmọ.—1 Samuel 8:1, 10; 12:2; 1 Ndidem 14:4, 5; Luke 1:7, 67-79; 2:22-32.

6. Didie ke Jehovah ada mbonusọn̄ etịn̄ ntịn̄nnịm ikọ ke ukperedem ini emi?

⁶ Ke okotde oto Joel, prọfet Hebrew, apostle Peter ọkọdọhọ ete: “Abasi ọdọhọ ete, Ama ekem ke ukperedem ini, nyan̄wan̄a Spirit Mi ndori kpukpru obụkidem [esịnede “mbiowo,” m̀mê mbonusọn̄]: . . . mmọ ẹyenyụn̄ ẹtịn̄ prophecy.” (Utom 2:17, 18; Joel 2:28) Nte ekemde ye ikọ oro, ke ukperedem ini emi, Jehovah amada mbonusọn̄ emi ẹdude ke otu mbon oro ẹyetde aran ye ke otu “mme erọn̄ en̄wen” atan̄a mme uduak esie. (John 10:16) Ndusụk mmọ ẹmesọn̄ọ ẹda ẹn̄wụm mfri Obio Ubọn̄ ke ata ediwak isua.

7. Tịn̄ nte mbonusọn̄ ẹkade iso ndin̄wụm mfri Obio Ubọn̄ kpa ye unana nsọn̄idem.

⁷ Kere ban̄a Sonia, emi ọkọtọn̄ọde utom nte asuanetop uyọhọ ini Obio Ubọn̄ ke 1941. Kpa ye uyịre uyịre udọn̄ọ anyan ini, enye ama esinịm mme ukpepn̄kpọ Bible ke ufọk esie. Sonia ọkọdọhọ ete: “Edikwọrọ eti mbụk edi ubak uwem mi. Ke nditịm ntịn̄, enye enịm mi uwem. Nditreke enye.” Esisịt ini emi ekebede, Sonia ye Olive, adiahaeka esie, ẹma ẹneme etop Bible emi ọnọde idotenyịn ẹnọ Janet emi ọkọdọn̄ọde udọn̄ọ n̄kpa, ke ini mmọ ẹkesobode ke itie ubet owo ke ufọkibọk. Eka Janet emi edide enyene-ifịk owo Catholic ama enen̄ede ama ima ima udọn̄ oro ẹkenyenede ke idem eyen esie tutu enye enyịme ukpepn̄kpọ Bible, ndien idahaemi enye ke anam ata eti n̄kọri. Nte afo emekeme ndida ukem ifet oro n̄n̄wụm mfri Obio Ubọn̄?

8. Didie ke Caleb oro ama ọkọsọn̄ okowụt mbuọtidem ke Jehovah, ndien didie ke mme Christian oro ẹsọn̄de ẹkeme ndikpebe uwụtn̄kpọ esie?

⁸ Ebede ke ndisịn idem uko uko ke utom Obio Ubọn̄ kpa ye mme unana ukeme ẹtode usọn̄, mme Christian oro ẹsọn̄de ẹkpebe uwụtn̄kpọ Caleb, kpa anam-akpanikọ eyen Israel emi akasan̄ade ye Moses ke isua 40 ke wilderness. Caleb ekedi isua 79 ke ini enye ekebede Akpa Jordan odụk Isọn̄ Un̄wọn̄ọ. Ke ama eketiene udịmekọn̄ Israel oro ekesinyenede edikan an̄wana ekọn̄ ke isua itiokiet, enye ọkpọkọduọk odudu ke se enye akanamde. Edi enye ikanamke ntre, enye ama ọdọhọ uko uko ete ẹnọ imọ ọkpọsọn̄ utom edibọ ‘mme obio emi ẹkponide, ẹnyụn̄ ẹnyenede  ibibene’ ke Obot Judah, kpa obio emi mme Anakim, ata ikpọ owo, ẹkedụn̄de. Ye un̄wam Jehovah, Caleb ama “[ọbọ] mmọ itie, kpa nte Jehovah ọkọdọhọde.” (Joshua 14:9-14; 15:13, 14) Tịm fiọk ete ke Jehovah odu ye afo kpa nte enye okodude ye Caleb, nte afo akade iso ndin̄wụm mfri Obio Ubọn̄ ke eyo usọn̄. Ndien edieke afo ọsọn̄ọde ada anam akpanikọ, enye ọyọnọ fi itie ke obufa ererimbot oro enye ọn̄wọn̄ọde.—Isaiah 40:29-31; 2 Peter 3:13.

“Ẹyesehe Ẹnyụn̄ Ẹsiak Ikọn̄”

9, 10. Didie ke mme Christian oro ẹsọn̄de ẹka iso ẹsọn̄ idem ke mbuọtidem ẹnyụn̄ ẹnyene odudu ke n̄kan̄ eke spirit? (Se ekebe oro odude ke page 13.)

⁹ Ke odụride owo ntịn̄enyịn owụt nte mme asan̄autom Jehovah oro ẹsọn̄de ẹn̄wụmde mfri, andiwet psalm ọkọkwọ ete: “Edinen owo ayasiaha nte eyop: onyụn̄ ọkọri nte cedar ke Lebanon. Ẹyesụk ẹkọri ke usọn̄, ẹyesehe ẹnyụn̄ ẹsiak ikọn̄.”—Psalm 92:12, 14.

¹⁰ Didie ke afo ekeme ndika iso n̄kop odudu ke n̄kan̄ eke spirit kpa ye oro ọsọn̄de? Akpan n̄kpọ oro esinamde eyop odu uwem ebịghi edi enye ndinyene mmọn̄ kpukpru ini. Kpasụk ntre, mmọn̄ akpanikọ Bible oro afo enyenede ke ndikpep Ikọ Abasi ye ke ndibuana ye esop esie ekeme ndinịm fi uwem. (Psalm 1:1-3; Jeremiah 17:7, 8) Odudu oro afo enyenede ke n̄kan̄ eke spirit anam fi edi n̄kpọuto ọnọ ekemmọ mme andinịm ke akpanikọ. Kam se nte emi ekedide ntre ye akanieren Akwa Oku oro, Jehoiada.

11, 12. (a) Nso akpan n̄kpọ ke Jehoiada akanam ke eyo obio ubọn̄ Judah? (b) Didie ke Jehoiada akada odudu esie emenede utuakibuot akpanikọ ke enyọn̄?

¹¹ Etie nte Jehoiada ama ebe isua ikie ke ini Ọbọn̄ An̄wan Athaliah emi okoyomde ikpọ n̄kpọ akadade ubọn̄ ke Judah ke odudu, ebe ke ndiwot nditọ nditọ esiemmọ. Nso ke akanieren Jehoiada akanam? Ke ufan̄ isua itiokiet enye ye n̄wan esie ẹma ẹdịp Joash, n̄kukụre adiakpa ufọk ubọn̄, ke temple. Ekem, ke ata ndyọ ndyọ usụn̄, Jehoiada ama atan̄a ke Joash emi ekedide isua itiaba edi edidem onyụn̄ ọdọhọ ẹwot Athaliah.—2 Chronicles 22:10–12; 23:1-3, 15, 21.

¹² Jehoiada ama ada odudu esie nte owo emi ekekpemede edidem emenede utuakibuot akpanikọ ke enyọn̄. Enye ama “anam ediomi ke ufọt idem esie, ye kpukpru mbio-obio, ye edidem, ete ẹdi ikọt Jehovah.” Ke Jehoiada ama ọkọnọ ewụhọ, ẹma ẹwụri ufọk Baal, nsunsu abasi oro ẹnyụn̄ ẹwụri mme itieuwa, ye mbiet esie, ẹnyụn̄ ẹwot mme oku esie. Jehoiada n̄ko ama eteme Joash afiak ọtọn̄ọ mme utom temple onyụn̄ ọdiọn̄ temple oro ama akabiara ke anyan ini. “[Joash] anam se inende ke iso Jehovah ke ofụri ini esie oro Jehoiada oku etemede enye.” (2 Chronicles 23:11, 16-19; 24:11-14; 2 Ndidem 12:2) Ke ini enye akakpade ke ama ekesịm isua 130, ẹma ẹnọ Jehoiada n̄wọrọnda ukpono ke ndibụk enye ke otu ndidem koro “enye akanamde Israel eti n̄kpọ, ke n̄kpọ Abasi, ye ke n̄kpọ ufọk [Abasi].”—2 Chronicles 24:15, 16.

13. Didie ke mme Christian oro ẹsọn̄de ẹkeme ‘ndinam eti n̄kpọ, ke n̄kpọ Abasi, ye ke n̄kpọ ufọk Abasi’?

¹³ Ekeme ndidi unana nsọn̄idem m̀mê mme idaha en̄wen iyakke fi anam se akpanamde man emenede utuakibuot akpanikọ ke enyọn̄. Idem edieke edide ntre, afo omosụk ekeme ‘ndinam eti n̄kpọ, ke n̄kpọ Abasi, ye ke n̄kpọ ufọk esie.’ Afo emekeme ndinyene ifịk mban̄a ufọk Jehovah eke spirit ke ndidụk nnyụn̄ mbuana ke mme mbono esop ye ke ndiwọrọ an̄wautom ke ini ekededi oro afo ekemede. Afo ndisọsọp mbọ item Bible nnyụn̄ nsọn̄ọ nda nnam akpanikọ nnọ “asan̄autom emi anamde akpanikọ, onyụn̄ enyenede ọniọn̄” nnyụn̄ nnam akpanikọ nnọ esop ọyọsọn̄ọ mbọbọ nditọete Christian. (Matthew 24:45-47) Afo emekeme n̄ko ndidemede ekemmọ mme andituak ibuot nnọ “ima ye nti utom.” (Mme Hebrew 10:24, 25; Philemon 8, 9) Afo edidi edidiọn̄ ọnọ mbon en̄wen edieke afo anamde n̄kpọ ke n̄kemuyo ye item apostle Paul emi: “Kpep n̄kani owo ete ẹfara ke idem, ẹtie uku-uku, ẹnyene eti ibuot, ẹnyụn̄ ẹkop idem ke mbuọtidem,  ye ima, ye ime. Kpep n̄kani iban n̄ko ete, ẹsan̄a ke ido uten̄e, ẹkûdi mbon ẹbiari, ẹkûnyụn̄ ẹyak mmịn akan mmọ, edi ẹdi mme ọnọ nti item.”—Titus 2:2-4.

14. Nso ke mme esenyịn Christian oro ẹnamde utom ẹbịghi ẹkeme ndinam man ẹmenede utuakibuot akpanikọ ke enyọn̄?

¹⁴ Ndi afo amanam utom nte ebiowo esop ke ediwak isua? Ebiowo kiet oro anamde utom ebịghi eteme ete: “Da ọniọn̄ oro afo ọkọde ke ediwak isua nam n̄kpọ ke ntatubọk. Deme utom nọ mme owo, nyụn̄ buana ifiọk fo ye mbon oro ẹmade ndikpep n̄kpọ . . . Domo ndikụt ukeme oro mbon en̄wen ẹnyenede. N̄wam mmọ ẹfori mme ukeme oro. Sịn itiat idakisọn̄ nọ ini iso.” (Deuteronomy 3:27, 28) Ata udọn̄ oro afo enyenede ke utom edikwọrọ Obio Ubọn̄ oro akade-ka iso nditara ayada ekese ufọn ọsọk ekemmọ nditọete Christian nnyịn.

“Ẹwụt Ẹte ke Jehovah Enenen”

15. Didie ke mme Christian oro ẹsọn̄de “ẹwụt ẹte ke Jehovah enenen”?

¹⁵ Mme asan̄autom Abasi oro ẹsọn̄de ẹsida idatesịt “ẹwụt ẹte ke Jehovah enenen.” Edieke afo edide Christian oro ọsọn̄de, ikọ ye edinam fo ẹkeme ndiwụt mbon en̄wen nte ke ‘Jehovah edi akwa itiat fo, ndien ukwan̄-n̄kpọ idụhe enye ke esịt.’ (Psalm 92:15) Eyop esinọ ikọ ntiense ke ndopuyo aban̄a ata nti edu Andibot enye. Edi Jehovah ọmọnọ fi n̄wọrọnda ifet ete etịn̄ ikọ ntiense aban̄a imọ ọnọ mbon oro ẹdụkde utuakibuot akpanikọ idahaemi. (Deuteronomy 32:7; Psalm 71:17, 18; Joel 1:2, 3) Ntak edide akpan n̄kpọ ndinam emi?

16. Ewe uwụtn̄kpọ Bible anam an̄wan̄a nte ‘ediwụt ke Jehovah enenen’ edide akpan n̄kpọ?

¹⁶ Ke Joshua, adausụn̄ Israel, ama “okonyụn̄ akabade edi akani-eren, onyụn̄ ọsọn̄ eti-eti” enye “okot ofụri Israel ye mbiowo mmọ, ye mme ikpọ owo mmọ, ye mme ekpe-ikpe mmọ, ye mme andidaha mmọ, ẹdi,” onyụn̄ eti mmọ ndinen n̄kpọ oro Abasi akanamde. Enye ọkọdọhọ ete: “Baba eti ikọ kiet eke Jehovah Abasi mbufo ọkọdọhọde aban̄a mbufo, ikpụhu: kpukpru ẹma ẹsu ẹnọ mbufo.” (Joshua 23:1, 2, 14) Ikọ emi ama ọsọn̄ọ Israel idem ndinam akpanikọ ke ekpri ibio ini. Nte ededi, ke Joshua ama akakpa, “emana efen emi  mîfiọkke Jehovah, mînyụn̄ ifiọkke n̄kpọ emi enye akanamde ọnọ Israel . . . ẹdaha ẹda. Ndien nditọ Israel ẹnam idiọk ke enyịn Jehovah, ẹnyụn̄ ẹnam n̄kpọ Baalim.”—Judges 2:8-11.

17. Jehovah anam n̄kpọ didie ye ikọt esie ke eyomfịn?

¹⁷ Idịghe ikọ ntiense oro mme asan̄autom Abasi oro ẹsọn̄de ẹdade inua ẹtịn̄ anam esop Christian mfịn ọsọn̄ọ ada. Edi, ẹsisọn̄ọ mbuọtidem oro nnyịn inyenede ke Jehovah ye ke mme un̄wọn̄ọ esie ke ini nnyịn ke idem nnyịn ikopde “ikpọ n̄kpọ” emi enye anamde ọnọ ikọt esie ke ukperedem ini emi. (Judges 2:7; 2 Peter 1:16-19) Edieke edide afo amabuana ye esop Jehovah ke ediwak isua, afo emekeme nditi ini oro ibat mme anditan̄a Obio Ubọn̄ ke obio m̀mê idụt mbufo ekedide ata esisịt m̀mê ini emi ẹkenen̄erede ẹbiọn̄ọ utom ukwọrọikọ. Ke akpatre, afo omokụt nte Jehovah emende mme n̄kpọ ubiọn̄ọ efep onyụn̄ ‘anam’ n̄kọri ke ibat mme anditan̄a Obio Ubọn̄ ‘awara.’ (Isaiah 54:17; 60:22) Afo omokụt nte ẹnamde mme akpanikọ Bible ẹn̄wan̄a omonyụn̄ okụt nte ẹkade iso ndinam edinen̄ede ke esop Abasi oro ẹkụtde ke enyịn. (Mme N̄ke 4:18; Isaiah 60:17) Ndi afo emesisịn udọn̄ ọnọ mbon en̄wen ebe ke ndibụk ifiọkutom fo emi ẹban̄ade ndinen n̄kpọ oro Jehovah anamde? Emi ekeme ndisọn̄ọ mbọbọ Christian nnyịn didie ntem!

18. (a) Tịn̄ eti ufọn oro ‘ediwụt ke Jehovah enenen’ ekemede ndinyene ke idem mbon en̄wen. (b) Didie ke afo ke idemfo okụt ke Jehovah enenen?

¹⁸ Nso kaban̄a mme idaha emi afo okụtde ima ima edikere mban̄a ye ndausụn̄ Jehovah ke ọkpọkpọ uwem fo? (Psalm 37:25; Matthew 6:33; 1 Peter 5:7) Eyenete an̄wan kiet oro ọsọn̄de emi ekerede Martha esisịn udọn̄ ọnọ mbon en̄wen ke ndidọhọ: “Se ededi oro etịbede, kûkpọn̄ Jehovah. Enye oyomụm fi akama.” Item emi ama enyene akwa ufọn ọnọ Tolmina, kiet ke otu nditọ ukpepn̄kpọ Bible Martha emi akanade baptism ke ntọn̄ọ ntọn̄ọ 1960. Tolmina ọdọhọ ete: “Idem ama enen̄ede emem mi ke ini ebe mi akakpade, edi ikọ oro ama anam mi mbiere ke ndifiakke mbono esop ndomokiet. Jehovah ama onyụn̄ enen̄ede ọsọn̄ọ mi idem.” Tolmina ọmọnọ ediwak nditọ ukpepn̄kpọ Bible esie item emi n̄ko. Ih, ke ndinọ nsịnudọn̄ nnyụn̄ mbụk ndinen n̄kpọ oro Jehovah anamde, afo emekeme ndinen̄ede nnam mbuọtidem ekemmọ mme andinịm ke akpanikọ ọkọri.

Jehovah Ada Mbonusọn̄ Oro Ẹnamde Akpanikọ ke Ọsọn̄urua

19, 20. (a) Jehovah ese utom mme asan̄autom esie oro ẹsọn̄de didie? (b) Nso ke idineme ke ibuotikọ oro etienede?

¹⁹ Ererimbot mfịn, oro owo mînyeneke  esịtekọm, inyeneke ini inọ mbonusọn̄. (2 Timothy 3:1, 2) Edieke ẹtide mmọ, edi ke ntak se mmọ ẹkenamde ke ini edem—se mmọ ẹkedide, utu ke se mmọ ẹdide idahaemi. Ke edide isio, Bible ọdọhọ ete: “Abasi ikwan̄ake nte efrede utom mbufo ye ima enyịn̄ Esie eke mbufo ẹwụtde, ke emi mbufo ẹkenamde n̄kpọ ẹnọ ikọt Abasi, ẹnyụn̄ ẹsụk ẹnanam.” (Mme Hebrew 6:10) Edi akpanikọ, Jehovah Abasi eti utom esịt akpanikọ oro afo akanamde ke ini edem. Edi enye aka iso ndida fi n̄ko ke ọsọn̄urua ke ntak se afo akade iso ndinam ke utom esie. Ih, enye ada mbonusọn̄ oro ẹnamde akpanikọ nte mme Christian oro ẹn̄wụmde mfri, ẹkopde nsọn̄idem ke n̄kan̄ eke spirit, ẹnyụn̄ ẹkopde odudu—kpa mbon oro ẹwụtde ke enye enyene odudu.—Philippi 4:13.

²⁰ Nte afo emese nditọete Christian nnyịn oro ẹsọn̄de nte Jehovah esede mmọ? Ke edide ntre, ọyọdọn̄ fi ndiwụt ke amama mmọ. (1 John 3:18) Ibuotikọ oro etienede eyeneme ndusụk nti usụn̄ ndiwụt utọ ima oro ke ndinọ se mmọ ẹyomde.

[Ikọ idakisọn̄]

Nso Idi Ibọrọ Fo?

• Didie ke mbonusọn̄ ‘ẹn̄wụm mfri’?

• Ntak emi nsọn̄idem eke spirit mme Christian oro ẹsọn̄de edide ọsọn̄urua n̄kpọ?

• Didie ke mbonusọn̄ “ẹwụt ẹte ke Jehovah enenen”?

• Ntak emi Jehovah adade mme asan̄autom esie oro ẹnamde utom ẹbịghi ke ọsọn̄urua?

[Mme Mbụme Ukpepn̄kpọ]

[Ekebe ke page 13]

Nte Mmọ Ẹkade Iso Ndisọn̄ Idem ke Mbuọtidem

Nso in̄wam mme Christian oro ẹnamde utom ẹbịghi ndika iso nsọn̄ idem ke mbuọtidem nnyụn̄ nnyene odudu ke n̄kan̄ eke spirit? Kop se ndusụk mmọ ẹdọhọde mi:

“Ndikot mme itie N̄wed Abasi oro ẹnyenede n̄kpọ ndinam ye itie ebuana nnyịn ye Jehovah edi ata akpan n̄kpọ. Mmesitịn̄ Psalm 23 ye 91 ke ibuot ekese okoneyo.”—Olive, emi akanade baptism ke 1930.

“Mmesikụt nte ke mmodu ke ini ẹnọde kpukpru utịn̄ikọ baptism nnyụn̄ nnen̄ede n̄kpan̄ utọn̄ nte n̄kpọ eke ami nyomde ndina baptism. Nditi uyakidem mi nnọ edi ata akpan n̄kpọ oro anamde mi nsọn̄ọ nda nnam akpanikọ.”—Harry, emi akanade baptism ke 1946.

“Akam ofụri usen edi akpan n̄kpọ—iben̄ede un̄wam, ukpeme, ye edidiọn̄ Jehovah kpukpru ini, ‘idiọn̄ọde enye ke kpukpru usụn̄ nnyịn.’” (Mme N̄ke 3:5, 6)—Antônio, emi akanade baptism ke 1951.

“Ndikop ifiọkutom mbon oro ẹsọn̄ọde ẹda ẹnam utom Jehovah ke ata ediwak isua anam mi n̄ka iso mbiere ndisọn̄ọ nda nnam akpanikọ nnọ enye.”—Joan, emi akanade baptism ke 1954.

“Ifọnke owo ada idemesie ke akpan n̄kpọ akaha. Mfọnido Abasi oro owo mîdotke anam nnyịn inyene se ededi oro inyenede. Ndinyene ekikere emi anam nnyịn idori enyịn ke nnennen ebiet ndibọ udia eke spirit emi iyomde man iyọ tutu esịm akpatre.”—Arlene, emi akanade baptism ke 1954.

[Ndise ke page 11]

Mbonusọn̄ ẹsin̄wụm ọsọn̄urua mfri Obio Ubọn̄

[Ndise ke page 14]

Nsọn̄idem eke spirit mbonusọn̄ edi ọsọn̄urua n̄kpọ