Ubonowo Oyom nte Ekpenemde Abasi Esịt

“IDỤHE ebiet ndomokiet oro owo mînịmke ke Abasi odu; ẹda Abasi nte enye oro okobotde onyụn̄ akarade kpukpru n̄kpọ. Emi edi akpanikọ idem ke mme ebiet oro mme owo ẹkoide-koi ẹdọhọ ke Abasi idụhe.” Ntre ke John Bowker ewet ke n̄wed esie oro God—A Brief History. Ke usụn̄ kiet m̀mê en̄wen, mme owo ẹsidụn̄ọde ẹyom owo emi Abasi edide ẹnyụn̄ ẹyom nte ẹkpenyenede mfọn esie. Ke ofụri ererimbot, ediwak owo ẹnen̄ede ẹyom nte ẹkpenemde Abasi esịt. Nte ededi, mmọ ẹnam emi ke nsio nsio usụn̄ etiene se mmọ ẹnịmde ke akpanikọ.

Ndusụk owo ẹnịm ke n̄kukụre se ẹyomde man owo enyene mfọn Abasi edi ndidu eti uwem. Mbon en̄wen ẹkere ke imekeme ndinyene unyịme Abasi ke ndifọn mfọn ye mme ubuene. N̄ko-n̄ko, ediwak miliọn owo ẹkere ke imekeme ndida mme usọrọ ye mme edinam ido ukpono nnem Abasi esịt.

Ke n̄kan̄ eken, odu mbon oro ẹkerede ke mmimọ ikemeke ndisan̄a n̄kpere Abasi—ke enye oyom usụn̄ akaha m̀mê ke enye inyeneke ini inọ ikpîkpu edibotn̄kpọ nte owo. Ẹdọhọ ke Epicurus owo akwaifiọk Greece eset, ekekere ke ‘mme abasi ẹyom usụn̄ ẹkaha ẹkpọn̄ mme owo tutu mmọ inyeneke n̄kpọ ndomokiet ndinam ye mme owo.’ Nte ededi, ediwak owo oro ẹnyenede utọ ekikere emi ẹdi mbon ido ukpono. Ndusụk mmọ ẹkam ẹkeme ndiwa mme uwa nnyụn̄ nnam mme edinam eken man ẹnem mme ete ete mmọ oro ẹkekpan̄ade esịt.

Afo ekere didie? Ndi Abasi enen̄ede ekere aban̄a ukeme oro nnyịn isịnde ndinyene mfọn esie? Ndi se nnyịn inamde ekeme nditụk Abasi nnyụn̄ nnem enye esịt?

 [Ebiet ẹdade ndise ẹto ke page 2]

IKPAEDEM: Ẹbọ Ẹto ROE/Anglo-Australian Observatory, David Malin okosio mme ndise emi