Ukpọhọde Edidu Inem Inem Uwem Oro Ebịghide

ẸSIDỌHỌ ke “kpukpru owo ẹma ndidi akwa owo, edi idụhe owo ndomokiet oro amade ndisọn̄.” Ediwak owo oro ẹkperede isua ukpọn̄ utom ẹsidori enyịn ndinyene ekese ini nnọ idem mmọ nnyụn̄ nnyene esisịt n̄kpọ ndinam. Kpa ye oro, mmọ ẹsikop ndịk ndidu uwem oro ananade uduak mînyụn̄ inyeneke se ọwọrọde. Mmọ n̄ko ẹsikop editịmede esịt ẹban̄a edidu ikpọn̄, unana inemesịt, ye unana nsọn̄idem.

Nso ndien idi ukpọhọde inem inem uwem? Nti ufan ye ubon oro ẹnyenede ima ẹsin̄wam ndinam n̄kpri ye ikpọ owo ẹkop inemesịt. Idịghe se mbon en̄wen ẹnamde man owo usọn̄ okop inemesịt enen̄ede edi akpan n̄kpọ. Se ikam idide akpan n̄kpọ ikan edi se owo usọn̄ ekemede ndinam nnọ mbon en̄wen.

Ndụn̄ọde oro ẹkenamde ke anyan ini ye mme ọdọ ndọ 423 oro ẹdide mbonusọn̄ ama owụt ke “ndinam n̄kpọ nnọ mbon en̄wen ekeme ndinam nnyịn ke idem nnyịn idu uwem ibịghi.” Stephanie Brown emi akanamde ndụn̄ọde oro anam an̄wan̄a ete: “Mme ibọrọ ndụn̄ọde emi ẹwụt ke idịghe se nnyịn idiade ito itie ebuana nnyịn ye mbon en̄wen anam itie ebuana emi enen̄ede enyene ufọn; edi edi se nnyịn inamde inọ mmọ.” Emi ekeme ndisịne ndin̄wam mbon en̄wen ke utomufọk, ndise mban̄a nditọwọn̄, ndika utom nnọ owo, ndimen owo ke n̄kpọisan̄, m̀mê ndikpan̄ utọn̄ nnọ owo oro oyomde nditịn̄ ikọ nnọ nnyịn.

Ke n̄kpọ nte isua 2,000 emi ẹkebede, Jesus Christ ama ọdọhọ ete: “Inemesịt okpon ke ndinọnọ akan ke ndibọbọ.” (Utom 20:35, NW) Ukpọhọde edidu inem inem uwem oro ebịghide ikọn̄ọke ke ediwak okụk oro owo enyenede ke itie unịm okụk m̀mê ke ibọkusọbọ ye udia oro mîyakke owo ọsọp ọsọn̄. Utu ke oro, enye ọkọn̄ọ ke owo ndida ini, odudu, ye ukeme esie nnam n̄kpọ nnọ mbon en̄wen.

Nte ededi, oyoyom se ikande edinam n̄kpọ nnọ mbon en̄wen man ibọhọ usọn̄, udọn̄ọ, ye n̄kpa. Obio Ubọn̄ Abasi kpọt edisio mme utọ n̄kpọ oro ifep. Ke ini ukara Obio Ubọn̄, udọn̄ọ ididụhe aba ndien idem “n̄kpa idinyụn̄ idụhe aba.” (Ediyarade 21:3, 4; Isaiah 33:24) Ke akpanikọ, mme okopitem ubonowo ẹyedu uwem inemesịt ke nsinsi ke paradise isọn̄. (Luke 23:43) Mme Ntiense Jehovah ẹdat esịt ndinam mbon en̄wen ẹfiọk ukpọhọde N̄wed Abasi oro ekemede ndinam owo odu inem inem uwem oro ebịghide.