Ntọt Mme Anditan̄a Obio Ubọn̄

‘Be Di Di Nyan̄a Nnyịn’

KE JULY 2000, ẹma ẹdọhọ Mme Ntiense oro ẹsemde usem German ke Austria, Germany, ye Switzerland ẹwọrọ ẹka Bolivia. Ntak-a? Koro mbon Mennonite emi ẹsemde usem German, emi ẹdụn̄de ke n̄kpri obio oro ẹyomde usụn̄ ke n̄kpọ nte kilomita 300 ọtọn̄ọde ke Santa Cruz, Bolivia, ẹma ẹtọn̄ọ ndinyene udọn̄ ke Bible.

N̄kpọ nte Mme Ntiense 140 ẹma ẹyere ikot oro. Ndusụk ẹkedu do ke urua ifan̄, mbon en̄wen ẹdu isua kiet m̀mê akande oro. Ke ndinam ntre, mmọ ẹkenyene ukem edu mme isụn̄utom akpa isua ikie oro ẹkeyerede ikot emi: “Be di ke Macedonia, di nyan̄a nnyịn.”—Utom 16:9, 10.

Utom ukwọrọikọ etie didie do? Ebiowo kiet ke esop emi odude do ọdọhọ ete: “Ekeme ndida owo n̄kpọ nte hour itiaita ndiwat ke ubomisọn̄ oro ẹkotde jeep ke usụn̄ oro owo mîsịnke itai n̄ka kiet ke otu n̄kpri obio 43 mbon Mennonite. Ndika mme ikpehe oro ẹyomde usụn̄ ẹkan esida usen inan̄, ẹsinyụn̄ ẹna ke tent ndusụk okoneyo. Edi esinen̄ede odot ẹsịn ukeme emi, koro akananam owo ndomokiet ke otu mmọ ikopke eti mbụk.”

Ke ntọn̄ọ ntọn̄ọ, ediwak mbon Mennonite ikamaha ẹsidi ẹdise mmimọ. Edi ndisịn ukeme ndien ndien amanam mmọ ẹfiọk se Mme Ntiense ẹdade ẹsọk mmọ. Ke uwụtn̄kpọ, ọtọin̄wan̄ kiet ama ọdọhọ ke imọ imokot Awake! ke ufan̄ isua kiet. Ekem enye ama adian do ete: “Mmọfiọk ke ediwak ikọt nnyịn inyịmeke ye se mbufo ẹtịn̄de, edi ami mmenịm ke enye edi akpanikọ.” Ke ekpri obio efen, eren kiet ama ọdọhọ ete: “Ndusụk mbọhọidụn̄ mi ẹdọhọ ke mbufo ẹdi mme nsunsu prọfet, mbon efen ẹte ke mbufo ẹnyene akpanikọ. Nyom ndidụn̄ọde ke idemmi.”

Idahaemi esop usem German emi enyenede mme asuanetop 35, esịnede mme ọkwọrọikọ uyọhọ ini 14 odu ke Bolivia. Kan̄a ke emi, n̄kani mbon Mennonite 14 ẹmekabade ẹdi mme asuanetop Obio Ubọn̄, ndien owo 9 efen ẹsidụk mme mbono esop kpukpru ini. Akanieren kiet emi akanade baptism ke ndondo emi ọkọdọhọ ete: “Nnyịn imenen̄ede ikụt ndausụn̄ Jehovah. Enye ọmọnọ nditọete oro ẹsemde usem German, emi ẹnyenede mbufiọk ẹdi ẹdin̄wam nnyịn. Nnyịn imokop idatesịt etieti.” Eyenan̄wan akanieren oro emi edide isua 17, emi ama akana baptism n̄ko, adian do ete: “Ifiopesịt n̄kparawa nditọete oro ẹkedide mi ebebe owo. Ata ediwak mmọ ẹdi mme asiakusụn̄, ẹnyụn̄ ẹda ini ye okụk mmọ ẹn̄wam mbon en̄wen. Ọdọn̄ mi ndikpebe mmọ.”

Ke akpanikọ, mbon oro ẹsịnde ukeme ‘ndibe ndi’ ndin̄wam ẹnyene akwa idatesịt ẹnyụn̄ ẹkop uyụhọ.