Ewe Ido Ukpono ke Afo Ekpemek?

‘NSIO NSIO ido ukpono ẹdi nsio nsio usụn̄ emi ẹdade owo ẹsịm ukem ebiet. Mmọn̄ọ, ndi idịghe Abasi kiet kpọt odu?’ Ediwak owo emi ẹdọhọde ke edi akpan n̄kpọ ndibuana ye ido ukpono, edi ke inamke n̄kpọ m̀mê ewe ido ukpono ke owo emek ndibuana, ẹnyene ekikere emi.

Ikọ emi ekeme nditie nte esịne ifiọk ke akpa ini oro okopde, sia edide akpanikọ nte ke Abasi kiet kpọt odu, kpa Ata Ọkpọsọn̄. (Isaiah 44:6; John 17:3; 1 Corinth 8:5, 6) Nte ededi, nnyịn ikemeke ndifụmi mme in̄wan̄-in̄wan̄ ukpụhọde—m̀mê mme ntuaha—oro ẹdude ke ufọt mme otu ido ukpono oro ẹdọhọde ke inam n̄kpọ inọ ata Abasi. Mme edinam mmọ, mme edinịm ke akpanikọ mmọ, mme ukpepn̄kpọ mmọ, ye mme n̄kpọ oro mmọ ẹyomde ẹto mme andibuana ẹnen̄ede ẹkpụhọde. Mme ukpụhọde emi ẹnen̄ede ẹkponi tutu mbon oro ẹdude ke otu ido ukpono kiet ikemeke ndifiọk m̀mê ndinịm se mme otu ido ukpono efen ẹkpepde ẹnyụn̄ ẹnịmde ke akpanikọ.

Ke n̄kan̄ eken, Jesus ọkọdọhọ ete: “Abasi edi spirit: ndien mme andituak ibuot nnọ Enye ẹnyene ndituak ibuot ke spirit ye ke akpanikọ.” (John 4:24) Ndi ndituak ibuot nnọ Abasi ke akpanikọ odu ke n̄kemuyo ye nsio nsio ekikere emi mme owo ẹnyenede ẹban̄a owo emi Abasi edide, se mme uduak esie ẹdide, ye nte enye oyomde ẹtuak ibuot ẹnọ imọ? Ndi owụt ifiọk ndinịm ke usụn̄ oro nnyịn ituakde ibuot inọ Ata Ọkpọsọn̄ Abasi ibeheke enye?

Ata Mme Christian ke Eset ye Idahaemi

Ndusụk ini mme Christian akpa isua ikie ẹma ẹsinyene nsio nsio ekikere ẹban̄a mme n̄kpọ. Ke uwụtn̄kpọ, apostle Paul eketịn̄ aban̄a mbon Corinth ete: “Mbon ufọk Chloe ẹma ẹsian mi ẹban̄a mbufo, nditọ-ete mi, ẹte utọk ke odu ke otu mbufo. Ikọ emi ọwọrọ ntem ete, mbufo kiet kiet ẹdọhọ ẹte, Ami nda ke n̄kan̄ Paul, m̀mê, Ami nda ke n̄kan̄ Apollos, m̀mê, Ami nda ke n̄kan̄ Cephas, m̀mê, Ami nda ke n̄kan̄ Christ.”—1 Corinth 1:11, 12.

Nte Paul akada nsio nsio ekikere emi nte ekpri n̄kpọ? Ndi owo kiet kiet okodụk ọkpọkpọ afan̄ oro adade esịm edinyan̄a? N̄wan̄ansa-o! Paul ọkọdọhọ ete: “Mmada enyịn̄ Ọbọn̄ nnyịn Jesus Christ n̄kpe mbufo ubọk, nditọ-ete, nte mbufo kpukpru ẹnyene ikọ-inua kiet, ubahade okûnyụn̄ odu ke otu mbufo; edi mbufo ẹtọn̄ọ ntak ẹkabade ẹfọn ẹma ke edinyene esịt kiet ye ekikere kiet.”—1 Corinth 1:10.

Edi akpanikọ, owo ikemeke ndinyenyịk mme owo man ẹnịm ukem n̄kpọ ke akpanikọ. Edidianakiet esidu n̄kukụre ke ini mme owo ẹtịn̄de enyịn ẹdụn̄ọde mme n̄kpọ, ẹsịm ukem ubiere, ẹnyụn̄ ẹnyịme ubiere oro. Ntem,  ọkpọkpọ edikpep Ikọ Abasi ye udọn̄ ofụri esịt ndida se ẹkpepde nsịn ke edinam ẹdi mme akpan usio-ukot ke ndinyene orụk edidianakiet oro Paul eketịn̄de aban̄a. Ndi ẹkeme ndikụt utọ edidianakiet oro? Nte ima ikokụt, Abasi amanam n̄kpọ ye ikọt esie nte otu ke anyan ini. Ndi ẹkeme ndifiọk otu oro mfịn?

Mme Ufọn Edibuana ye Nnennen Otu

David andiwet psalm ama obụp ini kiet ete: “Jehovah, anie edidụn̄ ke tent fo? Anie editie ke edisana obot fo?” Ke akpanikọ, oro edi mbụme emi anamde owo ekere n̄kpọ. David ama ọbọrọ ete: “Owo eke asan̄ade nte ọfọnde ama, onyụn̄ amade edinen ido, onyụn̄ ọdọhọde akpanikọ ke esịt esie.” (Psalm 15:1, 2) Owo ndinen̄ede mfiọk Bible ayanam enye ọdiọn̄ọ ido ukpono emi anamde mme n̄kpọ oro Abasi oyomde. Ekem, ebede ke ndibuana ye otu oro, owo ekeme ndinyene inem inem ebuana ye mbon oro ẹdianade kiet ẹtuak ibuot ẹnọ Abasi “ke spirit ye ke akpanikọ.”

Mme Ntiense Jehovah ẹwụt ke mme owo ẹkeme ndinịm ukem n̄kpọ ke akpanikọ nnyụn̄ nnam n̄kpọ ke edidianakiet idem ke ererimbot mfịn oro mîdianake kiet. Mbon oro ẹkebuanade ke ediwak nsio nsio ido ukpono ẹnyụn̄ ẹtode nsio nsio ekpụk ẹdu ke otu mmọ. Ndusụk Ntiense ẹkedi mbon oro mîkenịmke ke Abasi odu m̀mê mbon oro mîkọdiọn̄ọke m̀mê Abasi odu m̀mê idụhe. Ndien mbon eken ikakam idaha ido ukpono nte akpan n̄kpọ. Mme owo ẹtode nsio nsio ido ukpono ye ekpụk, emi ẹkenyụn̄ ẹnịmde nsio nsio ukpepn̄kpọ ke akpanikọ mi ẹnyene edidianakiet eke ido ukpono idahaemi, kpa n̄kpọ emi ananade mfịn ke ererimbot.

Se inamde utọ edidianakiet oro odu edi Ikọ Abasi, kpa Bible. Edi akpanikọ, Mme Ntiense Jehovah ẹfiọk ke mmimọ ikemeke ndibiere nnọ mbon efen se mmọ ẹdinamde. Edi, mmọ ẹwụt esịtekọm ẹban̄a ifet oro mmimọ inyenede ndin̄wam mbon en̄wen ẹkpep Bible man otodo se mmọ ẹmekde ke mme n̄kpọ ẹban̄ade utuakibuot ẹkpewụhọ ke eti itiat idakisọn̄. Ke usụn̄ emi, ediwak owo efen efen ẹkeme nditiene ndia mme ufọn emi ẹtode edituak ibuot nnọ Abasi “ke spirit ye ke akpanikọ.”

Mfịn ndiọi odudu ye mme etabi ẹkeme ndinọmọ owo ini ekededi. Ntre, edi akpan n̄kpọ ndimek eti nsan̄a. Bible ọdọhọ ke “owo eke asan̄ade ye mme enyene-ibuot eyenyene ibuot” ye nte ke “idiọk nsan̄a ababiat eti ido.” (Mme N̄ke 13:20; 1 Corinth 15:33) Ndibuana ye ata mme andituak ibuot nnọ Abasi enen̄ede ekpeme owo. Mmọdo, Bible eti nnyịn ete: “Ẹyak nnyịn inyụn̄ ikere nte ikpedemerede kiet eken inọ ima ye nti utom; ikûnyụn̄ isịn ndisop idem ọtọ kiet, nte edu ndusụk owo edide, edi inọ kiet eken item; ndien mbufo ẹkpedọdiọn̄ ẹnam ntem, adan̄a nte ẹkụtde ẹte usen oro ke asan̄a ekpere.” (Mme Hebrew 10:24, 25) Nso edidiọn̄ ke edi ntem ke ini mme ufan akpanikọ, oro edi nditọete eke spirit, ẹn̄wamde kiet eken ke ima ima usụn̄ man ẹbiom mme mbiomo oro Abasi ọnọde mmọ!

Ottmar enyịme ke ikọ emi edi akpanikọ. Okposụkedi ẹkebọkde enye ke ubon Catholic ke Germany, enye ama etre ndika ufọkabasi. Enye ọdọhọ ete: “Ini ekededi oro n̄kakade ufọkabasi, n̄kekwe ufọn ndomokiet.” Kpa ye oro, enye okosụk enyenyene mbuọtidem ke Abasi. Ekem enye ama osobo ye Mme Ntiense Jehovah onyụn̄ enịm ke mmọ ẹdi ata mme asan̄autom Abasi. Enye ama okụt ke oyom imọ isibuana ye mmọ. Idahaemi enye ọdọhọ ete: “Sia nsịnde ifịk ke esop ofụri ererimbot, mmenyene emem esịtidem ye eke ekikere. Ke ẹn̄wam mi sụn̄sụn̄ ndinen̄ede nnyene nnennen ifiọk Bible. Emi edi ata ọsọn̄urua n̄kpọ ọnọ mi.”

Ikot Ẹnọde Mbon Oro Ẹyomde Akpanikọ

Mme owo oro ẹdianade kiet nte otu ẹnam utom ẹkeme ndinen̄ede nnam ekese n̄kan mme owo oro ẹdade ikpọn̄ ẹnam utom. Ke uwụtn̄kpọ, Jesus ama ọnọ mme mbet esie item unyọn̄ emi: “Mbufo ẹka ẹkenam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ Ete ye Eyen ye Edisana Spirit: ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo: ndien sese, Ami ndodu ye  mbufo kpukpru ini, tutu esịm utịt ererimbot.” (Matthew 28:19, 20) Ẹkpesan̄a didie ẹnam utọ utom oro uforo uforo edieke ndausụn̄ m̀mê esop mîkpodụhe? Owo akpasan̄a didie anam item N̄wed Abasi emi edieke enye okpodomode ndida ke idem nnam n̄kpọ Abasi?

Ke isua emi ekebede, Mme Ntiense Jehovah ke ofụri ererimbot ẹma ẹsuan ikpọ ye n̄kpri n̄wed, ndiye uduot n̄kpri n̄wed 91,933,280, ọkọrọ ye magazine 697,603,247, ke ntre ẹdade etop Ikọ Abasi ẹsọk ata ediwak owo ke idụt 235. Nso n̄wọrọnda uyarade oro owụtde ke otu emi enen̄erede adiana kiet ekeme ndinam ekese akan ukeme oro owo kiet kiet esịnde ke idemesie ke emi edi ntem!

Ke adianade ye edisuan mme n̄wed Bible, Mme Ntiense Jehovah ẹsinịm ukpepn̄kpọ Bible mfọn man ẹn̄wam mme owo ẹnen̄ede ẹfiọk se Abasi oyomde. Isua oko, ke ẹbaharede ukem ukem, ẹma ẹsinịm orụk ukpepn̄kpọ Bible oro 5,726,509 ye mme owo m̀mê mme otu ke urua kiet kiet. Ukpepn̄kpọ Bible emi aman̄wam ata ediwak owo ndinyene ata eti isọn̄ emi an̄wamde mmọ ndimek ido ukpono emi mmọ ẹkpekade. Imesịn udọn̄ inọ fi ite ekpep mme n̄kpọ oro Abasi oyomde emi ẹdude ke Bible. Ke ama akanam oro, afo emekeme ndimek ido ukpono fo.—Ephesus 4:13; Philippi 1:9; 1 Timothy 6:20; 2 Peter 3:18.

Edieke afo oyomde ndinem Abasi esịt, oyom abuana ye ido ukpono—edi idịghe ye otu m̀mê n̄ka ido ukpono ekededi. Oyom afo ada nnennen ifiọk Bible, idịghe mme ukpepn̄kpọ oro mînyeneke isọn̄ m̀mê n̄kop-nte, emek ido ukpono fo. (Mme N̄ke 16:25) Kpep se ẹyomde ẹto ido ukpono akpanikọ. Men mmọ domo ye se afo enịmde ke akpanikọ. Ndien ekem mek ido ukpono fo tiene oro.—Deuteronomy 30:19.

[Mme ndise ke page 7]

Mme Ntiense Jehovah ẹdiana kiet ke ererimbot oro mîdianake kiet