Mme Mbụme Ẹtode Mme Andikot

Ntak emi David, kpa anam-akpanikọ asan̄autom Jehovah, ekenyịmede Michal n̄wan esie enyene owo eto, m̀mê teraphim nte ẹwụtde ke 1 Samuel 19:12, 13?

Akpa kan̄a, ẹyak nnyịn ibem iso ikere iban̄a se isịnede ke mbụk emi. Ke ini n̄wan David okokopde ke Edidem Saul ọmọn̄ owot David, enye ama anam n̄kpọ inikiet inikiet. Bible ọdọhọ ete: “Ndien Michal etie ke window osụhọde David: ndien enye efehe, aka, ọbọhọ. Ndien Michal ada owo eto, enịm ke bed, onyụn̄ enịm n̄kpọ idet ebot ke udotibuot esie, ndien ada ọfọn̄ ofụk enye.” Ke ini mme isụn̄utom Saul ẹkedide ndimụm David ke odudu mmen n̄wọrọ, Michal ama ọdọhọ mmọ ete: ‘Enye ọdọdọn̄ọ.’ N̄kari emi ama anam mmọ ẹda kan̄a ẹbiat ini, ndien emi ama ọnọ David ifet ndifehe mbọhọ.—1 Samuel 19:11-16.

Ndụn̄ọde oro mme ọdọkisọn̄ nyom n̄kpọeset ẹnamde owụt ke ini eset, owo eto m̀mê teraphim ikedịghe n̄kpọ oro ẹkesikamade ke utuakibuot kpọt, edi ẹma ẹsinyụn̄ ẹda enye ẹnam n̄kpọ ke n̄kan̄ ibet. Kpa nte n̄wedibet oro owụtde owo oro enyenede unen ndibọ inyene ye n̄kpọ-akpa, anyan ini ko owo eto m̀mê teraphim ama esiwụt enye emi enyenede unen ndibọ n̄kpọ-akpa. Nte an̄wan̄ade, ke ndusụk idaha, ebe eyen ndinyene owo eto ama ekeme ndinọ enye unen ndidia akpa ete an̄wan esie. Emi ekeme ndinam an̄wan̄a ntak emi Rachel ekemende mme teraphim ete esie (oro ẹkotde mme abasi) ye ntak emi ete esie ekenen̄ede oyom ndibọ mmọ nnyọn̄. Ke idaha enye emi n̄ko, Jacob, ebe Rachel ikọfiọkke se n̄wan esie akanamde.—Genesis 31:14-34.

Ke ini nditọ Israel ẹkekabarede ẹdi idụt, mmọ ẹma ẹbọ Ibet Duop, ndien ọyọhọ ibet iba ke Ibet emi ama enen̄ede akpan edinam ndisọi n̄kpọ. (Exodus 20:4, 5) Ke ukperedem, prọfet Samuel ama etịn̄ n̄kpọ aban̄a ibet emi ke ini enye eketịn̄de ikọ ye Edidem Saul. Enye ọkọdọhọ ete: ‘Emiom ebiet idiọn̄, itụn onyụn̄ ebiet idiọk ido ye ukpono ndem’ m̀mê, teraphim. (1 Samuel 15:23) Ke ntak emi, etie nte nditọ Israel ikesidaha teraphim nte idiọn̄ọ unen ndibọ n̄kpọ-akpa. Edi etie nte ndusụk ubon ke Israel ẹma ẹka iso ẹyịre ke akani ido mme Jew emi. (Judges 17:5, 6; 2 Ndidem 23:24) Michal ndikenyene teraphim ke ufọk okowụt ke esịt esie ikekemke ye Jehovah. Eyedi David ikenyeneke ifiọk iban̄a teraphim emi mîdịghe ekenyịme sia Michal ekedide eyen Edidem Saul.

David ama ada mme ikọ emi owụt ekikere esie kaban̄a edinọ Jehovah san̄asan̄a utuakibuot: “Jehovah omokpon, onyụn̄ ọfọn nte ẹtorode enye eti-eti: onyụn̄ ọfọn nte ẹbakde enye ẹkan kpukpru abasi. Koro kpukpru abasi mme idụt ẹdi mbiet n̄kpọ: edi Jehovah akanam enyọn̄.”—1 Chronicles 16:25, 26.

[Ndise ke page 29]

Ọyọhọ ibet iba ke Ibet Duop ama akpan edinam ndisọi n̄kpọ, utọ nte teraphim oro ẹwụtde ke ndise emi

[Ebiet Ẹdade N̄kpọ Ẹto]

Ẹda ẹto n̄wed oro The Holy Land, Eboho II, 1859