Ndi Ekem Nditre Ndinam Mme Owo Idiọk edi Unamke Eti Unọ Mmọ?

“KÛNAM mbon en̄wen se afo mûyomke mmọ ẹnam fi.” Ẹdọhọ ke Confucius, ọwọrọetop andikpep otode China emi ekedide n̄ko owo akwaifiọk, eketịn̄ ikọ ido uwem emi. Mfịn, ke n̄kpọ nte isua 2,500 ẹma ẹkebe, ediwak owo ẹsụk ẹnenịm ke akpanikọ nte ke owo edi eti owo edieke enye mînamke mbon en̄wen idiọk.

Edi akpanikọ, edumbet Confucius emi enyene ufọn. Ke n̄kan̄ eken, Bible etịn̄ n̄kpọ en̄wen aban̄a edu uwem ye itie ebuana owo. Ke adianade ye edinam idiọkn̄kpọ ndian owo, Bible ọdọhọ ke editre ndinam se akpanade ẹnam edi idiọkn̄kpọ n̄ko. James, Christian mbet oro ekewet ete: “Mmọdo owo emi ọfiọkde ndinam eti n̄kpọ, ndien mînamke, editre ndinam oro edi idiọkn̄kpọ ọnọ enye.” (James 4:17) Utu ke nditeme mme Christian ẹtre ndinam mbon en̄wen idiọk kpọt, Jesus Christ ọkọnọ item ete: “Sededi mbufo ẹyomde owo ẹnam ye mbufo, ẹnam kpa ntre ye mmọ; koro emi edi ibet ye mme prophet.”—Matthew 7:12.

Ata akpa uduak Abasi ekedi ofụri ubonowo ndinam n̄kpọ ye kiet eken nte mmọ ẹkpemade ẹnam ye mmimọ. Enye ama enịm mfọnn̄kan uwụtn̄kpọ ke ndikere mban̄a mfọnọn̄kpọ mbon en̄wen ke usụn̄ oro enye okobotde mme owo: “Abasi obot owo esịn ke mbiet esiemmọ, ke mbiet Abasi ke obot enye; eren ye n̄wan ke obot mmọ.” (Genesis 1:27) Oro ọwọrọ ke ntak ima Abasi ama ọnọ mme owo ubieresịt, emi, ke ini ẹnen̄erede ẹnọ ukpep, edinọde mmọ ndausụn̄ ndinam n̄kpọ ye mbon en̄wen nte mmọ ke idemmọ ẹkpemade ẹnam ye mmimọ.

Mfịn, mbon ibụk oro mîkereke iban̄a mbon en̄wen ẹtụhọde ediwak owo emi mînyeneke idotenyịn m̀mê un̄wam. Nte an̄wan̄ade, se ẹyomde akan edikam ntre ndinam mbon en̄wen idiọk edi, utu ke oro, oyom ẹnam se ifọnde ẹnọ mmọ ẹnyụn̄ ẹn̄wam mmọ. Ke ntak emi, Mme Ntiense Jehovah ẹnen̄ede ẹnam n̄kpọ ke unyịmesịt man ẹn̄wam mbon en̄wen ẹkpep ẹban̄a utịbe utịbe idotenyịn oro ẹkụtde ke Ikọ Abasi. Ke ini mmọ ẹdade eti mbụk Bible ẹka edem mbọhọidụn̄ mmọ, ima anam mmọ ẹnam emi, ẹnamde ye mbon en̄wen se mmọ ẹkpemade ẹnam ye mmimọ.