Ndifọn Ido ke Ini Afanikọn̄

“ẸYAK nnyịn ifọn ido ye kpukpru owo,” ntem ke apostle Paul ọkọdọhọ, “akpan-akpan ye mmọ emi ẹtode ke ufọk mme andinịm ke akpanikọ.” (Galatia 6:10) Mme Ntiense Jehovah ke ofụri ererimbot ẹnen̄ede ẹdomo ndida edumbet emi nsịn ke edinam, ẹfọnde ido ye kpukpru owo, akpan akpan ye ekemmọ mme andinịm ke akpanikọ. Ẹsikụt emi ndien ndien ke ini afanikọn̄. Ẹyak nnyịn ikere iban̄a mme uwụtn̄kpọ ndondo emi ke idụt ita.

Ke December 2002, ọkpọsọn̄ oyobio emi usọp esie ekedide kilomita 300 ke hour kiet ama ọnọmọ Guam. Oyobio emi ama abiat ediwak ufọk onyụn̄ owụri ndusụk ofụri ofụri. Esop mme Ntiense Jehovah do ẹma ẹsọsọp ẹdiomi otu mbonutom ndin̄wam ubon Mme Ntiense oro oyobio emi ọkọnọmọde akan. N̄kọk itieutom Guam ama ọnọ mme n̄kpọutom ye mme owo man ẹkediọn̄ mme ufọk oro ẹkebiarade, n̄kọk itieutom Hawaii ama an̄wam n̄ko. Urua ifan̄ tọn̄ọ oyobio oro akabara, otu mme anamusọ eto ẹma ẹto Hawaii ẹdi man ẹdin̄wam ke utom edifiak mbọp, ndien nditọete ẹtode Guam ẹma ẹbọ nduọkodudu ke itieutom mmọ man ẹn̄wam nditọete oro ẹketode-to ẹdi mi. Idara idara edu edidianakiet emi ekedi ikọ ntiense ọnọ kpukpru owo do.

Ke mbọhọ Mandalay, emi odude ke Myanmar, ikan̄ ama obụbede ekpere Ufọkmbono Obio Ubọn̄. Ufọk eyenete n̄wan kiet emi mîsiwọrọke an̄wautom aba ama ada ekpere. Ofụm ekefịme aka n̄kan̄ ufọk esie, ntre enye ama efehe aka ufọkmbono okoyom un̄wam. Ẹkesụk ẹdiọn̄ ufọkmbono oro ke ubọk ini oro, ke ntre ediwak nditọete ẹma ẹdu do. Idem ama akpa mmọ ndikụt eyenete an̄wan emi sia mmọ mîkọfiọkke ke enye okodụn̄ ke n̄kann̄kụk oro. Nditọete ẹma ẹsọsọp ẹkesion̄o n̄kpoduoho ke ufọk eyenete an̄wan oro ẹkebon ke eti itie. Ke ini ebe esie, emi mîkedịghe Ntiense, okokopde aban̄a ikan̄ oro, enye ama efehe edi ufọk onyụn̄ edikụt nte nditọete ẹsede ẹban̄a ikọt ufọk esie. Enye ama okop inemesịt onyụn̄ owụt esịtekọm sia mme inọ ẹsimade ndiyịp n̄kpọ owo ke mme utọ idaha oro. Mfọnido oro nditọete ẹkewụtde mi ama anam eyenete an̄wan emi ye eyen esie eren ẹfiak ẹdibuana ye esop Christian, ndien mmọ ke ẹdụk kpukpru mbono esop idahaemi.

Ke isua utom emi ekebede, akan̄ ama omụm ediwak owo ke Mozambique ke ntak unana edịm ye n̄kpan̄a mfri in̄wan̄. Ọfis n̄kọk itieutom Mme Ntiense Jehovah do ama anam n̄kpọ usọp usọp ke ndinọ mbon unana udia. Ẹkesinọ udia ke Ufọkmbono Obio Ubọn̄ esisịt ini ke mbono esop ama akasuana. Eyenete an̄wan kiet emi ọbọkde nditọ ikpọn̄ ọkọdọhọ  ete: “N̄kasan̄a ye mfụhọ ndi mbono esop sia mmen̄kọfiọkke se ndinọde nditọ mi ẹdia ke ima inyọn̄ idi.” Ima ima un̄wam oro nditọete ẹkenọde ama ọsọsọp esịn udọn̄ ọnọ enye. Enye ọkọdọhọ ete: “Eketie mi nte nset ke n̄kpa!”

Mme Ntiense ‘ẹsifọn ido’ n̄ko ke n̄kan̄ eke spirit ebe ke ndibuana etop Bible oro ọnọde ndọn̄esịt ye idotenyịn. Mmọ ẹnịm ikọ emi ke akpanikọ ukem nte enyene-ọniọn̄ owo oro ekenịmde anyan ini ko, ete: “Edi owo eke okopde [ọniọn̄ Abasi] oyodụn̄ ke ifụre, oyonyụn̄ etie sụn̄ anana ndịk idiọk n̄kpọ.”—Mme N̄ke 1:33.

[Mme ndise ke page 31]

1, 2. Ndideme udia nnọ mbon unana ke Mozambique

3, 4. Oyobio ke Guam ama abiat ediwak ufọk

[Mme Ebiet Ẹdade N̄kpọ Ẹto]

Eyenọwọn̄, ufien: Andrea Booher/FEMA News Photo; n̄wan, enyọn̄: AP Photo/Pacific Daily News, Masako Watanabe