Nte Akpana Enyene Ufọkabasi Emi Abuanade?

‘IDỊGHE tutu owo enyenyene ufọkabasi emi enye abuanade m̀mê akade kpukpru ini mbemiso enye enịm ke Abasi odu!’ Ntre ke ediwak owo ẹse edibuana ye ufọkabasi m̀mê esop ido ukpono ekededi. Ke nditịm ntịn̄, ndusụk owo ẹdọhọ ke mmimọ imesinen̄ede isan̄a ikpere Abasi ke ini idude ke an̄wa ise mme n̄kpọ obot ikan ini emi idụkde edinam ido ukpono ke ufọkabasi. Mfịn, ọsọ ekikere oro mme owo ẹnyenede edi ke iyomke owo abuana ye otu m̀mê esop ido ukpono mbemiso enye enịm ke Abasi odu.

Nte ededi, mbon en̄wen ẹnyene ata isio isio ekikere. Mmọ ẹdọhọ ke oyom ẹbuana ẹnyụn̄ ẹsika ufọkabasi, idem ẹdọhọde ke ndinam ntre edi akpan n̄kpọ edieke anade owo enyene mfọn Abasi. Mmọdo, ekikere aban̄ade m̀mê enen̄ede oyom owo abuana ye ido ukpono idịghe ikpîkpu edikpep n̄kpọ mban̄a ido ukpono. Ke idaha ekededi, sia emi enyenede n̄kpọ ndinam ye itie ebuana nnyịn ye Abasi, ndi ikpowụtke ifiọk ndidiọn̄ọ se idide ekikere Abasi ke n̄kpọ emi? Do, nso ke nnyịn ikeme ndikpep ke Ikọ esie, kpa Bible, mban̄a ibuot nneme emi?

Nte Abasi Akanamde N̄kpọ ye Mme Owo ke Eset

Ke n̄kpọ nte isua 4,400 emi ẹkebede, akama-nsobo ukwọ ama ọtọ emen ofụri isọn̄. Owo ikpekemeke ndisọp mfre utọ n̄kpọntịbe oro, ndien kpukpru ebiet ke ererimbot ẹnyene mme mbụkeset ẹban̄ade n̄kpọntịbe oro. Okposụkedi mme mbụk emi ẹkpụhọrede, mmọ ẹbiet kiet eken, ẹdọhọde ke ibat ibat owo ye ndusụk unam ẹkebọhọ.

Ndi mbon oro ẹkebọhọde Ukwọ oro ẹkebọhọ ke ntak mfọniso? Mbụk Bible ọdọhọ ke ikedịghe ke ntak mfọniso. Ke edide akpan n̄kpọ, Abasi ikasianke kpukpru owo iban̄a Ukwọ. Utu ke oro, enye akasian Noah, emi ọkọtọtde  mbon eyo esie aban̄a Ukwọ oro.—Genesis 6:13-16; 2 Peter 2:5.

Ubọhọ ọkọkọn̄ọ ke ndidi ubak otu oro akadianade kiet do nnyụn̄ nnyịme nditiene ndausụn̄ oro Abasi ọkọnọde Noah. Idem mme unam oro ẹkebọhọde Ukwọ oro ẹkesan̄a kiet ye otu oro. Ẹma ẹnọ Noah nnennen item ẹte etịm mme n̄kpọ oro ẹdinịmde mme unam oro uwem.—Genesis 6:17–7:8.

Ediwak isua ikie ke ukperedem, mme andito ubon Noah emi ẹkedide nditọ nditọ Shem ẹma ẹdidu ke ufụn ke Egypt. Edi uduak Abasi ekedi ndisio mmọ ke ufụn nnyụn̄ nda mmọ ndi isọn̄ oro enye ọkọn̄wọn̄ọde ọnọ ete ete mmọ Abraham. N̄ko-n̄ko, owo ikayarakede emi inọ kpukpru owo edi ẹkebem iso ẹyarade ẹnọ mbon oro ẹkemekde ẹte ẹda mmọ usụn̄—Moses ye Aaron eyeneka esie. (Exodus 3:7-10; 4:27-31) Ke ẹma ẹkefak n̄kani ifịn emi nte otu ẹsio ke Egypt, ẹma ẹnọ mmọ Ibet Abasi ke Obot Sinai ẹnyụn̄ ẹnam mmọ ẹkabade ẹdi idụt Israel.—Exodus 19:1-6.

Nditọ Israel kiet kiet ẹkebọhọ koro mmọ ẹkebuanade ye otu oro Abasi eketịmde ẹnyụn̄ ẹtiene ndausụn̄ mbon oro ẹkemekde ẹte ẹda otu emi usụn̄. Ẹma ẹkam ẹyak nditọ Egypt ẹtiene ẹbuana ye otu oro ekenyenede unyịme Abasi do. Ke ini nditọ Israel ẹkekpọn̄de Egypt, nditọ Egypt emi ẹma ẹsan̄a ye mmọ, ke ntem ẹsịnede ke otu mbon oro ẹdibọde edidiọn̄ Abasi.—Exodus 12:37, 38.

Ekem, ke akpa isua ikie, Jesus ama ọtọn̄ọ utom ukwọrọikọ, atan̄de mme owo obok nte mme mbet esie. Enye akanam n̄kpọ ye mmọ nte otu, okposụkedi enye ekesinamde n̄kpọ ye mme owo kiet kiet ke ima ima usụn̄ nte ekemde ye udọn̄ mmọ. Jesus ọkọdọhọ mme anam-akpanikọ apostle esie 11 ete: “Mbufo ẹdi mmọ emi ẹkesọn̄ọde ẹda ye Ami ke idomo Mi; kpa nte Ete Mi ekenịmde Obio Ubọn̄ ọnọ Mi, kpasụk ntre ke Ami nnyụn̄ nnịm nnọ mbufo.” (Luke 22:28, 29) Ke ukperedem, edisana spirit Abasi ama ọyọhọ mme mbet ke idem ke ini mmọ ẹkesopde idem nte otu.—Utom 2:1-4.

Mme uwụtn̄kpọ emi ẹwụt in̄wan̄-in̄wan̄ nte ke eset Abasi ekesinam n̄kpọ ye ikọt esie kpukpru ini nte otu oro ẹtịmde-tịm. Ke nditịm ntịn̄, Abasi akada ibat ibat owo oro enye ekesidade anam n̄kpọ san̄asan̄a—Noah, Moses, Jesus, ye mbon eken—etịn̄ ikọ ọnọ otu oro ekenen̄erede adiana kiet. Ufọn idụhe ndikere ke Abasi ada isio isio usụn̄ anam n̄kpọ ye mme asan̄autom esie mfịn. Nte ededi, emi edemede mbụme en̄wen: Ndi odot ndibuana ye otu ido ukpono ekededi? Nnyịn iyeneme akpan mbụme emi ke ibuotikọ oro etienede.

[Ndise ke page 4]

Toto ke eset Abasi esinam n̄kpọ ye ikọt esie nte otu oro ẹtịmde-tịm