N̄kpọ-Ata Edinọ Nditọ Ukpep Mfịn

EDI isọn̄ isọn̄ mbubịteyo, andinyene itie unyamudia eben̄e idem ndiberi itie unyamudia esie nnyọn̄. Ekem iban iba ye ekpri eyenọwọn̄ ẹdụk ẹdi ẹnyụn̄ ẹdidọhọ enye ada udia ọsọk mmimọ. Sia andinyene itie unyamudia enen̄erede akpa mba, ọdọn̄ enye ndidọhọ mmọ ke imeberi itie unyamudia, edi ekem enye ebiere ndinyam udia nnọ mmọ. Ke adan̄aemi iban iba emi ẹdiade udia ẹnyụn̄ ẹnemede nneme, ekpri eyenọwọn̄ oro efehe akanade itie unyamudia, ayak inịn̄e inịn̄e uyo esie ọduọn̄ọ ke isọn̄ onyụn̄ edịghi mmọ ke ikpat. Utu ke eka esie ndikpan enye, enye atuak inua imam. Ke ini mmọ ẹnyọn̄de, andinyene itie unyamudia oro akpade mba mi ọkpọri isọn̄ emi ekpri eyen oro ekedehede.

Nte afo ekemede ndifiọk, ata ata n̄kpọntịbe eke enyọn̄ emi owụt ke ediwak ubon isinen̄ekede inọ nditọ mmọ ukpep. Nsio nsio ntak ẹdu kaban̄a emi. Ndusụk ete ye eka ẹnana ukpan ẹkaha, ẹyakde nditọ mmọ ẹnam se ẹmade, ẹkerede ke ẹkpenyene ndibọk nditọ ke usụn̄ oro ọnọde mmọ ifụre. Mîdịghe ke ntak oro mme ete ye eka ẹnyenede ekese ndinam, mmọ ikemeke ndibiat ini nnọ nditọ mmọ ntịn̄enyịn ye ukpep oro mmọ ẹyomde. Ndusụk ete ye eka ẹkere ke eyen ndibọ ukpep ke ufọkn̄wed enen̄ede edi akpan n̄kpọ, ntre mmọ ẹsinọ eyen mmọ ifụre oro mînyeneke adan̄a amakam edi eyen enyene eti ibọrọ udomo onyụn̄ ebe odụk ọwọrọetop akamba ufọkn̄wed.

Edi, ndusụk owo ẹdọhọ ke oyom ẹnen̄ede mme edumbet ye mme idaha ido uwem mme ete ye eka ye eke n̄kaowo ke ofụri ofụri. Mmọ ẹdọhọ ke nditọwọn̄ ẹtọn̄ọ ndibuana ke kpukpru orụk ubiatibet ye nte ke afai ufọkn̄wed ke ọtọn̄ọ ndikọri kpukpru usen. Ntem, etubom ufọkn̄wed sekọndri kiet ke Seoul, Republic of Korea, ama ọsọn̄ọ etịn̄ nte ke ẹkpenyene ndiwụk ntịn̄enyịn ke edikpep nditọwọn̄ ẹfori edu mmọ. Enye ọkọdọhọ ete: “Ẹkpenyene ndibem iso n̄kpep mmọ nti edu uwem ndien ekem ẹkpep mmọ ndikọ ifiọk.”

Ediwak ete ye eka oro ẹyomde eyen mmọ odụk akamba ufọkn̄wed onyụn̄ okụt unen ke uwem ẹfụmi item oro ẹnọde mi. Edieke afo edide ete m̀mê eka, nso orụk owo ke afo oyom eyen fo edi? Ndi oyom eyen fo ọkọri akabade edi akwa owo oro enyenede eti ido uwem onyụn̄ ekemede ndibiom mbiomo? Owo emi ekerede aban̄a mbon en̄wen, ekemede ndikpụhọde nda ekekem ye mme idaha, onyụn̄ enyenede in̄wan̄-in̄wan̄ edu? Edieke edide ntre, mbọk kot ibuotikọ oro etienede.