Ndi Akam Fo Ekeme Ndikpụhọde N̄kpọ?

ANIE ke otu nnyịn akanam mîsoboke idiọk idaha oro enye mîkemeke ndikara? Bible owụt ke apostle Paul ama ọfiọk ke akam ekeme ndikpụhọde utịp mme utọ afanikọn̄ oro.

Ke ini ẹkesịnde Paul ke ufọk-n̄kpọkọbi ke Rome ke unana ntak, enye ama ọdọhọ ekemmọ mme andinịm ke akpanikọ ete ẹbọn̄ akam ẹban̄a imọ, adiande do ete: “Nsọn̄ọ mben̄e mbufo nte ẹdọdiọn̄ ẹnam ntem, man ẹkpenam n̄wara mfiak ntiene mbufo.” (Mme Hebrew 13:18, 19) Ke idaha en̄wen, Paul ama enyene mbuọtidem nte ke Abasi ọyọbọrọ akam oro ẹkebọn̄de man ẹsọp ẹsio imọ ke ufọk-n̄kpọkọbi. (Philemon 22) Ikebịghike ẹma ẹsio Paul ke ufọk-n̄kpọkọbi, enye ama onyụn̄ afiak ọtọn̄ọ utom isụn̄utom esie.

Edi ndi akam enen̄ede ekeme ndikpụhọde mfịna fo? Ekeme ndikpụhọde. Nte ededi, ti ete ke akam idịghe ikpîkpu edinam ido ukpono. Enye edi ata ata nneme oro inemede ye edima Ete nnyịn eke heaven oro okopde odudu. Akpana inyene ifụre ndisiak n̄kpọ oro afịnade nnyịn ke akam, ekem ibet ke ime ndikụt nte Jehovah ọbọrọde.

Ekeme ndidi Abasi idibọrọke kpukpru akam nnennen nnennen, onyụn̄ ekeme ndidi enye idibọrọke kpukpru ini ke usụn̄ m̀mê ini oro nnyịn ikodoride enyịn. Ke uwụtn̄kpọ, Paul ama ọbọn̄ akam ediwak ini aban̄a “n̄kukịm ke obụkidem” esie. Se ededi oro mfịna oro ekedide, Abasi ikọkọkke mfịna oro, edi enye ama ada ikọ nsịnudọn̄ emi ọdọn̄ Paul esịt: “Mfọn Mi ke ekekem fi; koro ẹnamde odudu Mi ọfọn ama ke mmemidem.”—2 Corinth 12:7–9.

Nnyịn n̄ko imekeme ndinyene mbuọtidem nte ke idem edieke Abasi mîkọkke akpan mfịna nnyịn, enye ekeme ‘ndisiak usụn̄ ubọhọ nnọ nnyịn ke ufọt idomo, man nnyịn ikeme ndibiom enye.’ (1 Corinth 10:13) Usen kiet, ke mîbịghike, Abasi eyetre kpukpru ndutụhọ ubonowo. Kan̄a ke emi, ndika mbịne ‘Enye emi okopde akam’ ekeme ndikpụhọde n̄kpọ.—Psalm 65:2.