Nen̄ede Da Uwem Fo nte Ọsọn̄urua Enọ
Nen̄ede Da Uwem Fo nte Ọsọn̄urua Enọ
“Iyịp Christ . . . [eyeyet] esịt mbufo, anam mbufo ẹbọhọ utom n̄kpa, ẹnyụn̄ ẹnam n̄kpọ ẹnọ Abasi uwem.”—MME HEBREW 9:14.
1. Nso iwụt ke nnyịn ida uwem nte ata ọsọn̄urua n̄kpọ?
EDIEKE ẹkpedọhọde fi etịn̄ se uwem fo akpade, afo ọkpọdọhọ ke enye akpa nso? Nnyịn ida uwem nnyịn ye eke mbon en̄wen nte ata ọsọn̄urua n̄kpọ. Oro edi ntak isikade ibịne abiausọbọ ke ini idọn̄ọde m̀mê isikade ke ini ke ini ikọdọhọ abiausọbọ odụn̄ọde nnyịn idem. Nnyịn imama ndidu uwem nnyụn̄ n̄kop nsọn̄idem. Idem ekese mbon oro ẹma ẹkesọn̄ m̀mê ẹbiomode ndo isiyomke ndikpa; mmọ ẹsisụk ẹyom ndidu uwem.
2, 3. (a) Mme N̄ke 23:22 ọdọhọ ke ana ẹnam nso? (b) Didie ke se Mme N̄ke 23:22 ọdọhọde ẹnam abuana Abasi?
2 Usụn̄ oro afo esede uwem otụk nte afo anamde n̄kpọ ye mbon en̄wen. Ke uwụtn̄kpọ, Ikọ Abasi eteme ete: “Kop uyo usọ emi okobonde fi: kûnyụn̄ usịn uka ke ndek, koro enye ọsọn̄de.” (Mme N̄ke 23:22) ‘Ndikop uyo’ idịghe sụk ndikop ke owo etịn̄ ikọ; n̄ke emi ọwọrọ ndikop ikọ nnyụn̄ nnam. (Exodus 15:26; Deuteronomy 7:12; 13:18; 15:5; Joshua 22:2; Psalm 81:13) Ntak emi Ikọ Abasi ọdọhọde akpan̄ utọn̄ ọnọ usọ ye uka? Idịghe n̄kukụre koro mmọ ẹsọn̄ọde fi m̀mê koro ẹnyenede ifiọk ẹkan fi. Ntak edi koro mmọ ẹkenọ fi uwem. Ntak edi oro ndusụk edikabade Bible ẹkabarede Mme N̄ke 23:22 ntem: “Kop uyo usọ emi ọkọnọde fi uwem.” Nte an̄wan̄ade, edieke afo adade uwem fo nte ọsọn̄urua n̄kpọ, afo ọyọfiọk ke amakama enye oro ọkọnọde fi uwem isọn.
3 Ke akpanikọ, edieke afo edide ata Christian, afo ọmọfiọk ke Jehovah enen̄ede edi ata Andinọ fi uwem. Enye anam fi ‘odu uwem’ onyụn̄ ekeme ‘ndisan̄a’ onyụn̄ edi se n̄kpọ ekemede nditụk, ‘onyụn̄ enyene uwem’ onyụn̄ ekeme ndikere mban̄a m̀mê ndinam ndutịm nnọ ini iso, ọkọrọ ye nsinsi uwem. (Utom 17:28; Psalm 36:9; Ecclesiastes 3:11, NW) Nte ekemde ye Mme N̄ke 23:22, ọfọn ‘ikop uyo’ Abasi, inyenede udọn̄ ndifiọk nnyụn̄ nnam n̄kpọ ekekem ye nte enye adade uwem utu ke ndida uwem ke usụn̄ efen.
Wụt Ukpono nọ Uwem
4. Ke ntọn̄ọ ntọn̄ọ mbụk owo, didie ke ẹkewụt ke edi akpan n̄kpọ ndiwụt ukpono nnọ uwem?
4 Ke ntọn̄ọ ntọn̄ọ mbụk owo, Jehovah ama anam an̄wan̄a nte ke imọ ikoyomke owo anam se enye amade-ma ye uwem owo. Ke ntak idiọk ufụp, Cain ama ada uwem Abel, kpa eyeneka esie oro mîkeduehe. Ndi afo ekere ke Cain ama enyene unen ndida uwem owo ntre? Abasi ikekereke ntre. Enye ama okot Cain edinam ibat, obụpde enye ete: “Afo akanam nso? uyo iyịp eyen-uka ke isọn̄ ke eseseme ọnọ mi.” (Genesis 4:10) Fiọk ete ke iyịp Abel ke isọn̄ akada aban̄a uwem esie, emi ẹkesịbede afai afai ẹduọk nte nsek ukọm, ndien enye ama eseme ọnọ Abasi ete osio usiene.—Mme Hebrew 12:24.
5. (a) Nso ukpan ke Abasi okodori ke eyo Noah, ndien mmanie ke emi akabuana? (b) Ke nso usụn̄ ke ukpan emi ekedi akpan usio-ukot?
5 Ke Ukwọ ama okokụre, ubonowo ama afiak ọtọn̄ọ uwem ye n̄kpasịp owo itiaita. Ke ikọ oro enye eketịn̄de ọnọ ofụri ubonowo, Abasi ama anam owo etịm ọfiọk nte imọ idade uwem ye iyịp ke ọsọn̄urua. Enye ọkọdọhọ ke owo ekeme ndita unam, edi odori ukpan emi: “Kpukpru se inyọnide eke ẹdude uwem ẹyedi udia mbufo; mmada kpukpru nnọ mbufo, kpa nte n̄kadade awawa ikọn̄ nnọ. Edi mbufo ẹkûta unam ye uwem esie, iyịp esie.” (Genesis 9:3, 4) Ndusụk mme Jew ẹdọhọ ke ikọ emi ọwọrọ ke owo ikenyeneke ndita unam m̀mê ndidia iyịp unam oro okosụk odude uwem. Edi nte ini akakade, ẹma ẹwụt in̄wan̄-in̄wan̄ nte ke se Abasi akakpande ekedi edidia iyịp man ẹdu uwem. Nte ededi, ewụhọ oro Abasi ọkọnọde Noah ekedi akpan usio-ukot ke edisu n̄kokon̄ uduak Esie kaban̄a iyịp—kpa uduak oro edinamde mme owo ẹnyene nsinsi uwem.
6. Didie ke Abasi akada Noah ọsọn̄ọ etịn̄ nte Imọ idade uwem ke ọsọn̄urua?
6 Abasi ama aka iso ete: “Nditreke ndiyom iyịp mbufo eke uwem mbufo; nyoyom enye ke ubọk kpukpru unam, ye ke ubọk owo; nyoyom uwem owo ke ubọk eyen-ete esie. Ama edi owo eke ọduọkde iyịp owo, owo ọyọduọk iyịp esie: koro ke mbiet Abasi ke enye akanam owo.” (Genesis 9:5, 6) Afo emekeme ndikụt ke se ẹketịn̄de ẹnọ ofụri ubonowo mi nte ke Abasi ọdọhọ ke iyịp owo ada aban̄a uwem owo. Andibot ọnọ owo uwem, ndien owo ndomokiet inyeneke unen ndida uwem emi, oro iyịp adade aban̄a. Edieke owo ekededi owotde owo nte Cain okowotde, Andibot enyene unen ‘ndiyom’ uwem owotowo oro.
7. Ntak emi nnyịn ikpenyenede udọn̄ iban̄a se Abasi eketịn̄de ọnọ Noah aban̄a iyịp?
7 Ke etienede se enye eketịn̄de, Abasi ikoyomke owo ada iyịp anam n̄kpọ ke ukwan̄ usụn̄. Ndi akanam emekere se ikedide ntak? Ih, ntak emi Abasi ekesede iyịp ke utọ usụn̄ emi? Ke nditịm ntịn̄, ibọrọ mbụme emi enyene n̄kpọ ndinam ye ata akpan ukpepn̄kpọ Bible. Enye edi ata akpan isọn̄ ukpepn̄kpọ Christian, okposụkedi ediwak ufọkabasi ẹkoide-koi ẹfụmi enye. Ewe ukpepn̄kpọ edi oro, ndien didie ke enye abuana uwem, mme ubiere, ye mme edinam fo?
Iyịp—Didie ke Ẹkpeda Enye Ẹnam N̄kpọ ke Nnennen Usụn̄?
8. Ke Ibet oro ẹkenọde Israel, nso ukpan ke Jehovah okodori ke nte ẹkpedade iyịp ẹnam n̄kpọ?
8 Jehovah ama ọnọ ọyọhọ ntọt aban̄a uwem ye iyịp ke ini enye ọkọnọde Israel Ibet. Ke ndinam emi, enye ama anam usio-ukot efen efen ke ndisu uduak esie. Enyene ndidi afo ọmọfiọk ke Ibet oro ama oyom ẹsida mme utọ n̄kpọ nte inuakudia, aran, ye wine ẹwa uwa ẹnọ Abasi. (Leviticus 2:1–4; 23:13; Numbers 15:1–5) Ẹma ẹsiwa mme unam n̄ko. Kop se Abasi eketịn̄de aban̄a mmọ: “Uwem unam [odu] ke iyịp: ami mmonyụn̄ nda enye, ndori ke itie-uwa nnọ mbufo, ndisio isop nnọ ukpọn̄ mbufo: koro edide iyịp osio isop ọnọ ukpọn̄. Mmọdo ndọhọde nditọ Israel, nte, Baba ofụri ukpọn̄ mbufo kiet okûdia iyịp.” Jehovah ama adian do ete ke edieke atautop m̀mê ọtọin̄wan̄ owotde unam ndita, enye ekenyene ndiduọk iyịp esie nnyụn̄ nda ntan mfụk. Sia isọn̄ edide udoriukot Abasi, ndiduọk iyịp ke isọn̄ owụt ke andiduọk ọdiọn̄ọ ke uwem oro afiak ebịne Ọnọ-Uwem.—Leviticus 17:11–13; Isaiah 66:1.
9. Nso ikedi n̄kukụre usụn̄ oro Ibet ekenyịmede ẹda iyịp ẹnam n̄kpọ, ndien ntak ẹkenamde emi?
9 Ibet emi ikedịghe ikpîkpu edinam ido ukpono oro mînyeneke se ọwọrọde ọnọ nnyịn. Ndi ama okụt ntak oro ẹkedọhọde nditọ Israel ẹkûdia iyịp? Abasi ọkọdọhọ ete: “Mmọdo ndọhọde nditọ Israel, nte, Baba ofụri ukpọn̄ mbufo kiet okûdia iyịp.” Nso ikedi ntak? Abasi ọbọrọ ete: “Ami mmonyụn̄ nda [iyịp], ndori ke itie-uwa nnọ mbufo, ndisio isop nnọ ukpọn̄ mbufo.” Ndi omokụt ke emi anam nnyịn ifiọk ntak emi Abasi ọkọdọhọde Noah ke owo inyeneke ndidia iyịp? Andibot ekemek ndida iyịp nte ata akpan n̄kpọ oro ẹnịmde ẹnọ san̄asan̄a n̄kpọ kiet kpọt, kpa se ikemede ndinyan̄a ediwak uwem. Iyịp n̄ko ama enyene akpan utom ndinam, oro edi edifụk mme idiọkn̄kpọ (usio-usop). Ntre, ke idak Ibet, n̄kukụre itie oro Abasi akayakde ẹda iyịp ẹnam n̄kpọ ekedi ke itieuwa man ẹda ẹsio isop ẹnọ nditọ Israel oro ẹkeyomde Jehovah efen ọnọ mmimọ.
10. Ntak emi iyịp unam mîkekemeke ndimen mme idiọkn̄kpọ mfep ofụri ofụri, edi nso ke mme uwa oro ẹkewade ke idak Ibet ẹketi mme owo?
10 Edinam emi idịghe esen n̄kpọ inọ mme Christian. Ke etịn̄de aban̄a ndutịm Abasi kaban̄a edida iyịp nnam n̄kpọ ke Ibet, Christian apostle Paul ekewet ete: “Osụk esisịt ẹda iyịp ẹnam kpukpru n̄kpọ ẹsana, nte ido ibet edide; ndien ke ediduọk iyịp mîdụhe, edidahado inyụn̄ idụhe.” (Mme Hebrew 9:22) Paul ama anam an̄wan̄a nte ke mme uwa oro ẹkedọhọde ẹwa ikekemeke ndinam nditọ Israel ẹfọn ẹma, ẹnyụn̄ ẹnana idiọkn̄kpọ. Enye ekewet ete: “Ẹda mme uwa oro ẹnam owo ẹti mme idiọk-n̄kpọ ke isua ke isua. Koro iyịp enan̄ ye ebot ikemeke-keme ndimen mme idiọk-n̄kpọ mfep.” (Mme Hebrew 10:1–4) Kpa ye oro, mme utọ uwa oro ẹma ẹnyene ufọn. Mmọ ẹma ẹti nditọ Israel nte ke mmọ ẹkedi mme anamidiọk oro ẹkeyomde se ikande uwa unam man ẹfen mme idiọkn̄kpọ mmọ ofụri ofụri. Edi edieke iyịp oro akadade aban̄a uwem unam mîkekemeke ndifụk mme idiọkn̄kpọ owo ofụri ofụri, ndi iyịp ekededi ekpekeme ndinam oro?
Usọbọ Oro Ọnọ-Uwem Ọnọde
11. Nnyịn isan̄a didie ifiọk ke iyịp unam oro ẹkesiwade ẹkeda ẹban̄a n̄kpọ?
11 Ibet oro ekenen̄ede anyan ubọk owụt n̄kpọ oro edikam inen̄erede isu uduak Abasi. Paul okobụp ete: “Nso ke ikpọdọhọ ndien iban̄a ibet?” Enye ama ọbọrọ ete: “Ẹkeda ibet ẹdisịn, man ndudue owụt idem, tutu Eyen oro ẹken̄wọn̄ọde un̄wọn̄ọ ẹnọ Enye edidi; ẹkeda mme angel ẹnọ ibet, ke ubọk owo emi esịnede ke ufọt [kpa Moses].” (Galatia 3:19) Paul ama afiak ewet kpasụk ntre ete: “Ibet [enyene] ukpọn̄-ukpọn̄ mbiet nti n̄kpọ eke ẹdidide, [inyụn̄] inyeneke idem n̄kpọ oro.”—Mme Hebrew 10:1.
12. Didie ke nnyịn ikeme ndikụt nte uduak Abasi kaban̄a iyịp ayararede?
12 Ke nditịn̄ ibio ibio, ti ete ke Abasi ama ọnọ ewụhọ ke eyo Noah ete ke mme owo ẹkeme ndita unam, edi mmọ ikenyeneke ndidia iyịp. Nte ini akakade, Abasi ama ọdọhọ ke “uwem unam [odu] ke iyịp.” Ih, Abasi ekemek ndibat iyịp nte se idade iban̄a uwem onyụn̄ ọdọhọ ete: “Ami mmonyụn̄ nda [iyịp], ndori ke itie-uwa nnọ mbufo, ndisio isop nnọ ukpọn̄ mbufo.” Nte ededi, utịbe utịbe uyarade efen efen oro ẹwụtde uduak Abasi kaban̄a iyịp ẹkenyene ndiwụt idem. Ibet ekenyene ukpọn̄-ukpọn̄ mbiet nti n̄kpọ eke ẹdidide. Nso ikedi oro?
13. Ntak emi n̄kpa Jesus ekedide akpan n̄kpọ?
13 Ata idem n̄kpọ ọkọkọn̄ọ ke n̄kpa Jesus Christ. Afo ọmọfiọk ke ẹma ẹtụhọrede Jesus ẹnyụn̄ ẹwot enye ke eto. Enye akakpa nte abiatibet. Paul ekewet ete: “Ke adan̄aemi nnyịn ikodude kan̄a ke mmem-idem, ke edikem ini Christ akpa ke ibuot mmọ emi mîten̄eke Abasi. . . . Abasi etịm ayarade ima eke amade nnyịn, ke emi Christ akpade ke ibuot nnyịn ke adan̄aemi nnyịn isụk idide mme idiọk owo kan̄a.” (Rome 5:6, 8) Ke ndikpa ke ibuot nnyịn, Christ ama ọnọ ufak oro ofụkde mme idiọkn̄kpọ nnyịn. Ufak oro edi ata isọn̄ ukpepn̄kpọ Christian. (Matthew 20:28; John 3:16; 1 Corinth 15:3; 1 Timothy 2:6) Nso ebuana ke emi enyene ye uwem ye iyịp, ndien didie ke enye abuana uwem fo?
14, 15. (a) Didie ke ndusụk edikabade ẹsọn̄ọ ẹtịn̄ ẹban̄a n̄kpa Jesus ke Ephesus 1:7? (b) Ewe akpan n̄kpọ ke Ephesus 1:7 ke mme edikabade emi mîsioho iwụt?
14 Ndusụk ufọkabasi ẹsitịn̄ kpukpru ini ẹban̄a n̄kpa Jesus, mme aka ufọkabasi ẹsikam ẹdọhọ ẹte, “Jesus akakpa ọnọ mi.” Se nte ndusụk edikabade Bible ẹkabarede Ephesus 1:7: “Enye ye n̄kpa esie ẹnam nnyịn inyene edinyan̄a, oro edi, edimen mme idiọkn̄kpọ nnyịn mfep.” (The American Bible, eke Frank Scheil Ballentine, 1902) “N̄kpa Christ osio nnyịn ke ufụn, onyụn̄ anam ẹfen mme idiọkn̄kpọ nnyịn.” (Today’s English Version, 1966) “Edi ke Christ onyụn̄ ebe ke enye ye uwem esie oro enye akawade ke ẹda ẹsio nnyịn ke ufụn, ubọhọ-ufụn oro ọwọrọde edifen mme idiọkn̄kpọ.” (The New Testament, eke William Barclay, 1969) “N̄kpa Christ anam ẹfen mme idiọkn̄kpọ nnyịn ẹnyụn̄ ẹsio nnyịn ke ufụn.” (The Translator’s New Testament, 1973) Afo emekeme ndikụt nte mme edikabade emi ẹsọn̄ọde ẹtịn̄ ẹban̄a n̄kpa Jesus. Edi ndusụk owo ẹkeme ndidọhọ, ‘Ih, n̄kpa Jesus enen̄ede edi akpan n̄kpọ. Ntre nso ikwan̄a ye mme edikabade emi?’
15 Ke akpanikọ, edieke mme edikabade emi ẹkpedide n̄kukụre edikabade oro afo enyenede, do, afo akpataba ata akpan n̄kpọ, ndien emi ikpayakke fi enen̄ede ọfiọk etop Bible. Mme utọ edikabade oro iyakke owo ọfiọk ke mme akpasarade ikọ oro ẹkedade ẹwet Ephesus 1:7 esịne ikọ Greek emi ọwọrọde “iyịp.” Ntem, ediwak Bible ẹkabade ata ukem ukem se ikodude ke akpasarade uwetn̄kpọ, nte Edisana Ŋwed Abasi Ibom, emi ọdọhọde ete: ‘Nnyịn inyụn̄ inyene ubọhọ-ufụn nnyịn ke Enye oto ke iyịp Esie, kpa edifen mme idiọk-n̄kpọ nnyịn, adan̄a nte mfọn Esie awakde.’
16. Nso ke ikọ oro “iyịp Esie” ekpenyene nditi nnyịn?
16 Ikọ oro “iyịp Esie” enen̄ede enyene se ọwọrọde ndien emi ekpenyene nditi nnyịn ediwak n̄kpọ mban̄a iyịp. Se ẹkeyomde ikedịghe sụk owo ndikpa, idem n̄kpa mfọnmma owo oro Jesus ikedịghe n̄kukụre se ẹkeyomde. Enye okosu se Ibet akadade aban̄a, akpan akpan se ikadade itie ke Usen Usio-Isop. Ẹma ẹsiwa mme unam oro Ibet eketemede ke akpan usen oro. Ekem, akwa oku ekenyene ndida ndusụk iyịp unam emi ndụk Ata Edisana ikpehe ke efe m̀mê temple, nnyụn̄ n̄kenịm iyịp oro do nnọ Abasi, nte n̄kpọ eke enye okodude ke iso Abasi.—Exodus 25:22; Leviticus 16:2–19.
17. Didie ke Jesus okosu se Usen Usio-Isop akadade aban̄a?
17 Jesus okosu se Usen Usio-Isop akadade aban̄a, nte Paul akanamde an̄wan̄a. Akpa, enye ọkọdọhọ ke akwa oku Israel ekenyene ndidụk Ata Edisana Ebiet ini kiet ke isua ye iyịp eke enye awade “aban̄a idem esie ye ndudue mbio-obio.” (Mme Hebrew 9:6, 7) Kpasụk ntre, ke ẹma ẹkenam enye eset nte owo eke spirit, Jesus ama ebe odụk ata heaven. Nte owo eke spirit oro mînyeneke obụk ye iyịp, enye ama ebe akada ke “iso Abasi . . . kaban̄a nnyịn.” Nso ke enye ọkọnọ Abasi? Idịghe n̄kpọ eke obụk, edi ekedi n̄kpọ oro enen̄erede enyene ufọn. Paul ama aka iso ete: “Ke adan̄aemi Christ ekedide nte Akwa Oku . . . , Enye inyụn̄ idaha iyịp ebot ye enan̄ isan̄a ibe idụk, edi ada iyịp Esiemmọ odụk ke Edisana Ebiet ini kiet kpọt, ke Enye ama ọkọbọ nsinsi ufak ọnọ owo. Koro edieke iyịp ebot ye eke nyara enan̄, . . . anamde mmọ ẹsana ke obụkidem; n̄wan̄waedinso ke iyịp Christ, emi ke odudu nsinsi Spirit akawade Idem Esie ọnọ Abasi nte ata edisana uwa, ediyet esịt mbufo, anam mbufo ẹbọhọ utom n̄kpa, ẹnyụn̄ ẹnam n̄kpọ ẹnọ Abasi uwem.” Ih, Jesus ọkọnọ Abasi ekọmurua iyịp uwem esie.—Mme Hebrew 9:11–14, 24, 28; 10:11–14; 1 Peter 3:18.
18. Ntak emi se Bible etịn̄de aban̄a iyịp ekpedide akpan n̄kpọ ọnọ mme Christian mfịn?
18 Akpanikọ Abasi emi anam nnyịn ifiọk mme utịbe utịbe n̄kpọ oro Bible etịn̄de aban̄a iyịp—ntak emi Abasi esede enye ntre, nte nnyịn ikpesede iyịp, ye ntak oro nnyịn ikpokponode ibet oro Abasi ọnọde kaban̄a iyịp. Ke okotde N̄wed Abasi Christian Usem Greek, afo oyokụt ẹtịn̄de n̄kpọ ekese ini ẹban̄a iyịp Christ. (Se ekebe.) Emi owụt ke kpukpru Christian ẹkpenyene ndibuọt idem ke ‘iyịp Jesus.’ (Rome 3:25) ‘Iyịp’ oro Jesus ọkọduọkde kpọt ke ẹkeme ndida mfen mme idiọkn̄kpọ nnyịn nnyụn̄ nnam nnyịn itie ke emem ye Abasi. (Colossae 1:20) Emi enen̄ede edi ntre ye mbon oro Jesus akanamde akpan ediomi ọnọ mmọ ndikara ye imọ ke heaven. (Luke 22:20, 28–30; 1 Corinth 11:25; Mme Hebrew 13:20) Kpasụk ntre ke edi ye “akwa otu owo” mfịn, emi ẹdibọhọde “akwa ukụt” ke ini iso ẹnyụn̄ ẹdara uwem nsinsi ke paradise isọn̄. Mmọ ‘ẹyet ọfọn̄idem mmọ’ ke ndamban̄a usụn̄ ‘ke iyịp Eyen-erọn̄.’—Ediyarade 7:9, 14.
19, 20. (a) Ntak emi Abasi emekde ndidori ukpan ke nte ẹdade iyịp ẹnam n̄kpọ, ndien didie ke oro okpotụk nnyịn? (b) Nso ke nnyịn ikpenyene udọn̄ ndifiọk?
19 Nte an̄wan̄ade, iyịp enen̄ede edi akpan n̄kpọ ke enyịn Abasi. Kpasụk ntre ke enye ekpedi ọnọ nnyịn. Andibot oro enen̄erede ekere aban̄a uwem enyene unen ndidori ukpan ke nte ẹdade iyịp ẹnam n̄kpọ. Sia enen̄erede ekere aban̄a uwem nnyịn, enye ebiere ndinịm iyịp nnọ ata akpan n̄kpọ kiet, n̄kukụre usụn̄ oro anamde ẹkeme ndinyene nsinsi uwem. Usụn̄ oro abuana ọsọn̄urua iyịp Jesus. Nnyịn ikpowụt esịtekọm didie ntem nte ke Jehovah Abasi anam n̄kpọ ke ufọn nnyịn ke ndida iyịp—kpa iyịp Jesus—nnam n̄kpọ ke usụn̄ oro ekemede ndinyan̄a uwem! Nnyịn ikponyụn̄ iwụt esịtekọm didie ntem inọ Jesus ke ndikọduọk iyịp esie ke uwa nnọ nnyịn! Ke akpanikọ, emi anam an̄wan̄a nnyịn ntak emi apostle John ọkọdọhọde ete: “Enye emi amade nnyịn, okonyụn̄ adade iyịp Esiemmọ atat nnyịn urụk mme idiọk-n̄kpọ nnyịn; Enye omonyụn̄ anam nnyịn idi obio Ubọn̄, idi mme oku inọ Abasi ye Ete Esie; ẹnọ Enye ubọn̄ ye edikara ekondo ke nsinsi-nsinsi. Amen.”—Ediyarade 1:5, 6.
20 Enen̄ede ebịghi tọn̄ọ nte Abasi nnyịn emi edide Ọnọ-Uwem ye akakan ke ọniọn̄ ekekere aban̄a usụn̄ edinyan̄a emi. Mmọdo, nnyịn imekeme ndibụp ite: ‘Didie ke emi okpotụk mme ubiere ye mme edinam nnyịn?’ Ibuotikọ oro etienede eyeneme mbụme emi.
Didie ke Afo Ọkpọbọrọ?
• Nso ke nnyịn ikeme ndikpep nto nte Abasi esede iyịp ke mbụk abuanade Abel ye Noah?
• Ke idak Ibet, nso ukpan ke Abasi okodori ke nte ẹkpedade iyịp ẹnam n̄kpọ, ndien ntak-a?
• Didie ke Jesus okosu se Usen Usio-Isop akadade aban̄a?
• Didie ke iyịp Jesus ekeme ndinyan̄a uwem nnyịn?
[Mme Mbụme Ukpepn̄kpọ]
[Ekebe ke page 18]
EWE IYỊP ANYAN̄A UWEM?
“Ẹtịm ẹse idem mbufo, ye ofụri otu erọn̄, emi Edisana Spirit ekenịmde mbufo ke mme andikpeme mmọ, ete ẹbọk mbon ufọk Abasi, emi Enye ekedepde ke iyịp [“Eyen,” NW] Esie.”—Utom 20:28.
“N̄wan̄waedinso ndien, sia ẹma ẹnam ikpe etebe nnyịn ke emi ke iyịp Esie, ke ẹyenyan̄a nnyịn ẹsio ke iyat esịt oto ke Enye.”—Rome 5:9.
“[Mbufo ikenyeneke] idotenyịn, [ikonyụn̄] ifiọkke Abasi ke ererimbot. Edi ke emi, ke Christ Jesus, ẹma ẹnam mbufo, emi ẹkedade nsan-nsan ke ini oko, ẹsan̄a ẹkpere ke iyịp Christ.”—Ephesus 2:12, 13.
“Abasi enyịme ndidụn̄ Enye ke idem, nnyụn̄ nnam kpukpru n̄kpọ ẹkabade ẹtie ke emem ye Abasi oto ke [“iyịp oro enye ọkọduọkde ke eto ndutụhọ,” NW].”—Colossae 1:19, 20.
“Mmọdo nditọ-ete, . . . nnyịn [imenyene] uko ndibe ndụk ke Edisana Ebiet ke iyịp Jesus.”—Mme Hebrew 10:19.
“Ikadaha mbiara n̄kpọ, . . . ifak mbufo isio ke ndisịme edu uwem oro okotode mme ete ebe esịm mbufo; edi ẹkeda iyịp eke ọsọn̄de urua ẹfak mbufo, nte iyịp eyen-erọn̄ eke ananade ndo onyụn̄ ananade ntọi, kpa eke Christ.”—1 Peter 1:18, 19.
“Edieke nnyịn isan̄ade ke un̄wana, kpa nte Enye odude ke un̄wana, nnyịn imodụk ndụk ye kiet eken, ndien iyịp Jesus Eyen Esie eyet nnyịn isana ke kpukpru mme idiọk-n̄kpọ.”—1 John 1:7.
“Afo omodot ndida n̄wed, ndinyụn̄ ndianade mme ufịk-n̄kpọ esie; koro ẹkewotde Fi, Afo ama onyụn̄ ada iyịp Fo osio owo ke kpukpru esien, ye usem, ye obio, ye idụt, afak mmọ ọnọ Abasi.”—Ediyarade 5:9.
“Ẹma ẹsio enye emi odoride nditọ-ete nnyịn ikọ ẹduọk ke isọn̄. . . . Mmọ ẹma ẹkan enye oto ke iyịp Eyen-erọn̄, onyụn̄ oto ke se mmọ ẹtịn̄de nte ntiense.”—Ediyarade 12:10, 11.
[Ndise ke page 16]
Abasi ama ada Ibet anam an̄wan̄a nte ke ẹkeme ndida iyịp mfen mme idiọkn̄kpọ
[Ndise ke page 17]
Iyịp Jesus anam ẹkeme ndinyan̄a ediwak owo