Leta Oro Ẹwetde Ẹnọ Ẹsọk Noah

“EDIMA Noah, mmokot mban̄a fi ediwak ini ke Bible ye nte afo ọkọkọn̄de ubom emi ẹkedade ẹnyan̄a fi ye ubon fo ke ini Ukwọ.”

Emi edi ntọn̄ọikọ leta oro n̄kaiferi isua 15 emi ekerede Minnamaria ekewetde ke udomo uwetn̄kpọ oro ẹkediomide ẹnọ nditọ ufọkn̄wed isua 14 esịm 21. Itieutom ubọ leta ke Finland, N̄ka Mme Andikpep Usem Finnish, ye N̄ka Finland Oro Esede Aban̄a Uwet N̄wed ẹkediomi udomo emi. Ẹkeyom mme andiwet udomo emi ẹwet leta ẹban̄a n̄wed. Mmọ ẹkenyene ndiwet leta mmọ nnọ ẹsọk andiwet n̄wed oro m̀mê owo emi n̄wed oro etịn̄de n̄kpọ aban̄a. Mme andikpep ẹma ẹmek se iwakde ibe leta 1,400 ke otu mme leta oro nditọ ufọkn̄wed mmọ ẹkewetde ẹnyụn̄ ẹnọ ẹsọk kọmiti esede n̄kpọ aban̄a udomo oro. Ekem, kọmiti oro ama emek leta kiet oro ekemende akpa, emek leta duop oro ẹkemende ọyọhọ iba, onyụn̄ emek leta duop en̄wen oro ẹkemende ọyọhọ ita. Minnamaria ama okop inemesịt ke leta imọ ndikesịne ke otu oro ẹkemende ọyọhọ ita.

Ntak emi Minnamaria, n̄kaiferi eyen ufọkn̄wed, ekewetde leta esie ọnọ ẹsọk Noah, eren emi okodude uwem ke n̄kpọ nte isua 5,000 emi ẹkebede? Enye ọdọhọ ete: “Bible ekedi akpa n̄wed oro okodụkde mi ekikere. Mmenen̄ede mmehe ye mme owo oro ẹtịn̄de ẹban̄a ke Bible. Mmokot ekese mban̄a mmọ tutu ekpere nditie nte n̄kpọ eke mmọ ẹsụk ẹdude uwem. N̄kemek Noah koro uwem esie ama enen̄ede aduai owo idem onyụn̄ okpụhọde ye okịmmọ.”

Leta oro Minnamaria ekewetde ọnọ ẹsọk Noah eketre ye mme ikọ emi: “Afo osụk ededi uwụtn̄kpọ mbuọtidem ye n̄kopitem. Usụn̄ uwem fo esịn udọn̄ ọnọ kpukpru mbon oro ẹkotde Bible ndinam mbuọtidem mmọ ọsọn̄.”

Leta oro uyen emi esikotde Bible ewetde mi enen̄ede owụt ke akpanikọ Bible “enyene uwem, onyụn̄ ananam n̄kpọ” ke idem mme owo, n̄kpri ye ikpọ.—Mme Hebrew 4:12.