Ndi Abasi Edi Ntak Mfịna Nnyịn?

KE INI eyenan̄wan Marion oro ama okokpon ọwọrọ owo akadade enyene-ndịk unan ke mfre, Marion ama anam se ediwak nnyịn ikpanamde. * Enye ama ọbọn̄ akam ọnọ Abasi eben̄e un̄wam. Marion ọdọhọ ete: “Ntịghi ini oro akanam enyịn anande mi nnyụn̄ n̄kopde ndobo ntre.” Nte ini akakade, idem eyen esie ama ọdọdiọn̄ ọdiọk, ndien emi ama anam Marion ọtọn̄ọ ndinyene eyịghe mban̄a Abasi. Enye ama eseme ete: “Nso iwọrọ mi ntem?” Ikan̄wan̄ake enye ntak emi Abasi ima oro ekerede aban̄a mme owo ọkpọkpọn̄de eyen esie.

Ekese owo ẹsisobo ukem afanikọn̄ oro Marion okosobode mi. Anana-ibat owo ke ofụri ererimbot ẹsikere ke Abasi ọkpọn̄ mmimọ ke ini afanikọn̄. Kop se Lisa ọkọdọhọde ke ẹma ẹkewot eyeyen esie: “Se isụk ifịnade mi edi ‘ntak emi ABASI ayakde ndiọi n̄kpọ ẹtịbe.’ Mbuọtidem mi ke Abasi ikpaha ofụri ofụri, edi isọn̄ke aba nte ekesisọn̄de.” Kpasụk ntre, ke ibak ibak n̄kpọ mmọn̄eyet ama eketịbe ọnọ nsek eyeneren esie, n̄wan kiet ama ọdọhọ ete: “Abasi ikọdọn̄ke mi esịt ke se iketịbede. Enye ikowụtke ke imekere iban̄a m̀mê nditua mi mbọm ke usụn̄ ekededi.” Enye ama adian do ete: “Tutu amama ndifenke nnọ Abasi.”

Ndusụk owo ẹkop idiọkesịt ẹban̄a Abasi ke ini ẹkụtde se iwọrọde inọ ekondo. Mmọ ẹkụt nte unana ye biọn̄, mbon itọkekọn̄ emi mînyeneke idotenyịn, anana-ibat nditọwọn̄ oro AIDS owotde mme ete ye eka, ye miliọn mme owo oro ẹdọn̄ọde mme udọn̄ọ eken ẹyọhọde ediwak idụt. Ke ini utọ n̄kpọ mmọn̄eyet emi m̀mê efen ẹtịbede, ediwak owo ẹsidọhọ ke Abasi edi ntak sia etiede nte ke enye idọn̄ke enyịn.

Nte ededi, se idude edi nte ke idịghe Abasi edi ntak mfịna ubonowo. Ke akpanikọ, imenyene eti ntak ndinịm ke Abasi ọmọn̄ ọsọp etre mfịna oro esịmde ubonowo. Nnyịn isịn udọn̄ inọ fi ite okụbọde aka ibuotikọ oro etienede onyụn̄ okụt ke Abasi enen̄ede ekere aban̄a nnyịn.

[Ikọ idakisọn̄]