“Ẹnam man Ẹfiọk Enyịn̄ Jehovah”

KE OFỤRI ererimbot, ẹwụt esịtekọm ẹban̄a Enyọn̄-Ukpeme ye nsan̄a esie, Awake!, ke ntak udia eke spirit oro ẹdọn̄ọde ke mmọ ye ukpep oro mmọ ẹnọde. Leta oro etienede mi, oro kiet ke otu mme andikot ke France ekewetde ke ndondo emi owụt orụk esịtekọm emi:

“Ami ndi n̄kaiferi emi otode Africa, n̄konyụn̄ nnen̄ekede n̄ka n̄wed. Esisịt ini emi ekebede, mma ntọn̄ọ ndikot mme magazine mbufo. Sia mme ibuotikọ mmọ ẹdemerede owo udọn̄, mmedi ndifiọk ufọn edikot n̄wed. Mbufo ẹmenam mi mfiọk nsio nsio ikọ nnyụn̄ n̄keme ndiwet leta emi ndudue mîwakke.

“Idem akpa mi ndikụt nte mbufo ẹwetde kpukpru n̄kpọ oro ẹban̄ade mme owo, ekondo, ye Andibot. Mme ibuotikọ emi ẹnen̄ede ẹn̄wan̄a tutu ẹnam owo akabade edi enyene-ifịk andikot n̄wed. Idụhe owo efen ekededi oro enyenede ukeme ndikpep kpukpru orụk owo n̄kpọ ke ukem ini ntre.

“Idem esikpa mi n̄ko ke ini mfiọkde ke owo inamke ndomokiet ke otu emi ke ntak udori edi ke ẹnam man ẹfiọk enyịn̄ Jehovah. Mmọfiọk ke mbufo ẹmenyene unyịme esie, mmọdo ẹsọsọn̄ọ-o. Mbọk ẹka iso ndida odudu Andibot nnọ mme owo ukpep.”

Mme Ntiense Jehovah ẹnam utom unọ ukpep Bible mmọ idahaemi ke idụt 235. Ẹsio Enyọn̄-Ukpeme ke usem 148 ẹnyụn̄ ẹsio Awake! ke usem 87. Owo imịn̄ke mme magazine emi man ẹda itoro ẹsọk owo ekededi. Ẹwet item Bible ye ekemini ntọt oro ẹdọn̄ọde ke mmọ man ẹkpono Andibot, emi ọdọhọde ete: “Ami ndi Jehovah . . . emi n̄kpepde fi usụn̄ udori.” (Isaiah 48:17) Afo akpakam asan̄a ke usụn̄ udori ebe ke ndikot Edisana N̄wed Abasi kpukpru ini ọkọrọ ye mme un̄wam ukpep Bible emi.