Mme Utịben̄kpọ Jesus Akpanikọ m̀mê N̄ke?

“ẸDA ediwak owo eke ẹnyenede demon ẹsọk Enye [Jesus Christ]: Enye onyụn̄ ada ikọ inua Esie ebịn mme demon ọduọk, onyụn̄ anam kpukpru mbon udọn̄ọ ẹkop nsọn̄idem.” (Matthew 8:16) “Enye [Jesus] edemede asua ọnọ ofụm, onyụn̄ ọdọhọ inyan̄ ete, Dobo, na sụn̄. Ndien ofụm odobo, mmọn̄ onyụn̄ ana sụn̄-n̄.” (Mark 4:39) Afo ese mme ikọ emi didie? Ndi afo emenịm ke mmọ ẹwụt mme n̄kpọ oro ẹkenen̄erede ẹtịbe, mîdịghe ndi afo ekere ke mmọ ẹdi ndamban̄a ikọ, kpa ikpîkpu n̄ke?

Ediwak owo mfịn ẹnen̄ede ẹyịk ke mme utịben̄kpọ Jesus ẹma ẹtịbe. Etie nte n̄kọri oro ẹnamde ke ifiọk ntaifiọk utọ nte edision̄o ukwak usen̄kpọ ndi, edidụn̄ọde ikpaenyọn̄, ye ifiọk udiọn̄ nsenubon, iyakke mme owo ẹnịm mme mbụk utịben̄kpọ ye mme n̄kpọntịbe oro ẹkande ukeme owo.

Ndusụk owo ẹkere ke mme mbụk utịben̄kpọ ẹdi se ẹkerede-kere m̀mê n̄ke. Nte ewetn̄wed oro ẹdọhọde nte odụn̄ọrede “ata” Jesus ọdọhọde, mme mbụk ẹban̄ade mme utịben̄kpọ Jesus ẹdi ukem ye “etop unyam n̄kpọurua” ndida nsuan Ido Ukpono Christ.

Ndusụk owo ẹda mme utịben̄kpọ Jesus nte ata ata abian̄a. Ndusụk ini ẹsikam ẹdọhọ ke Jesus ke idemesie ekedi owo abian̄a. Nte Justin Martyr eke ọyọhọ isua ikie iba E.N. ọkọdọhọde, mbon oro ẹkụtde ndudue ẹnọ Jesus “ẹma ẹkam ẹkot enye ebre mfọni ye owo abian̄a.” Ndusụk owo ẹdọhọ ke Jesus “ikanamke mme utịben̄kpọ esie nte prọfet mme Jew, edi ke akanam nte  ebre mfọni, emi ọkọbọde ukpep ke temple mme okpono ndem.”

Ndinam Se Mîkemeke Nditịbe An̄wan̄a

Afo emekeme ndikere ke mme utọ eyịghe oro ẹwụt akpan ntak emi mme owo ẹmen̄ede ndinịm mme utịben̄kpọ ke akpanikọ. Se idude edi nte ke ọsọsọn̄ mmọ ndinịm, m̀mê ndinyịme nte ke ẹkeme ndida odudu oro akande eke owo nnam mme utọ utịben̄kpọ oro. Akparawa kiet emi okotde idemesie owo emi mîdiọn̄ọke m̀mê Abasi odu m̀mê idụhe ọkọdọhọ ete: “Mme utịben̄kpọ isitịbeke—ikanke-kan oro.” Ekem enye ama okot oto ikọ David Hume, owo akwaifiọk eke ọyọhọ isua ikie 18, kpa eyen Scotland, emi ekewetde ete: “Utịben̄kpọ edi edibiat mme ibet obot.”

Nte ededi, ndusụk owo ẹnen̄ede ẹkpeme mbak ẹdidọhọ ke utịben̄kpọ ikemeke nditịbe. The World Book Encyclopedia okot utịben̄kpọ “n̄kpọntịbe oro owo mîkemeke ndida mme ibet obot oro ẹfiọkde nnam an̄wan̄a.” Nte ekemde ye ukabade oro, edika ufụm enyọn̄, ndutịm usuanetop ilektrọnik, ye edida satellite ndụn̄ọde n̄kpọ ẹkpeketie ata ediwak owo ke isua ikie emi ẹkebede nte “mme utịben̄kpọ.” Ke akpanikọ, iwụtke ifiọk ndidọhọ ke mme utịben̄kpọ ikemeke nditịbe n̄kukụre sia nnyịn mîkemeke ndida ifiọk oro inyenede idahaemi nnam mmọ ẹn̄wan̄a.

Edieke nnyịn idụn̄ọrede ndusụk uyarade N̄wed Abasi oro ẹnyenede ebuana ye mme utịben̄kpọ oro ẹdọhọde ke Jesus Christ akanam, nso ke nnyịn idikụt? Nte mme utịben̄kpọ Jesus ẹdi akpanikọ m̀mê n̄ke?