Ndi “Mbet Jehovah” Esidat Fi Esịt?
Ndi “Mbet Jehovah” Esidat Fi Esịt?
‘Ọfọfọn [“Inemesịt odu,” NW] ọnọ owo eke mbet Jehovah adatde enye esịt.’—PSALM 1:1, 2.
1. Ntak emi nnyịn mme asan̄autom Jehovah ikopde inemesịt?
JEHOVAH esin̄wam onyụn̄ ọdiọn̄ nnyịn mme anam-akpanikọ asan̄autom esie. Edi akpanikọ, nnyịn imesisobo ediwak idomo. Nte ededi, nnyịn n̄ko imenyene ata inemesịt. Emi idịghe n̄kpọ n̄kpaidem, koro nnyịn inam n̄kpọ inọ “Abasi inemesịt,” ndien edisana spirit esie anam nnyịn inyene idatesịt ke esịt nnyịn. (1 Timothy 1:11, NW; Galatia 5:22) Idatesịt ọwọrọ edinyene ata inemesịt oro otode edidori enyịn mban̄a m̀mê edinyene eti n̄kpọ. Ndien ke akpanikọ, Ete nnyịn eke heaven ọnọ nnyịn nti enọ. (James 1:17) Eyịghe idụhe nnyịn isikopde inemesịt!
2. Mme psalm ewe ke nnyịn iyom ndineme mban̄a?
2 Ẹnen̄ede ẹtịn̄ ẹban̄a inemesịt ke n̄wed Psalm. Ke uwụtn̄kpọ, ẹtịn̄ ẹban̄a emi ke Psalm 1 ye 2. Akpa mme anditiene Jesus Christ ẹkedọhọ ke David edidem Israel ekewet udiana Psalm. (Utom 4:25, 26) Andiwet akpa psalm oro owo mîsiakke enyịn̄, ọtọn̄ọ ikwọ esie eke odudu spirit ye mme ikọ emi: “Ọfọfọn [“Inemesịt odu,” NW] ọnọ owo eke mîsan̄ake ke item mme idiọk owo.” (Psalm 1:1) Ke ibuotikọ emi ye enye oro etienede, ẹyak nnyịn ineme nte Psalm 1 ye 2 ẹnọde nnyịn ntak ndidat esịt.
Ukpọhọde Inemesịt
3. Nte Psalm 1:1 ọdọhọde, nso idi ndusụk ntak oro ẹnamde owo emi abakde Abasi okop inemesịt?
3 Psalm 1 owụt ntak emi owo oro abakde Abasi okopde inemesịt. Ke ọnọde ndusụk ntak kaban̄a utọ inemesịt oro, andiwet psalm ọkwọ ete: “Ọfọfọn [“Inemesịt odu,” NW] ọnọ owo eke mîsan̄ake ke item mme idiọk owo, mînyụn̄ idaha ke usụn̄ mme anam idiọk, mînyụn̄ itiehe ke itie mbon nsahi.”—Psalm 1:1.
4. Nso usụn̄ uwem oro odotde ẹkpebe ke Zechariah ye Elizabeth ẹketiene?
4 Man inen̄ede ikop inemesịt, ana nnyịn idu uwem ekekem ye ndinen mbet Jehovah. Zechariah ye Elizabeth, emi ẹkenyenede idara idara ifet edidi ete ye eka John Andinịm Owo Baptism, ‘ẹkedi edinen ke enyịn Abasi, ẹnyụn̄ ẹsan̄a ke kpukpru mbet ye mme ewụhọ Jehovah, ẹnana ndo.’ (Luke 1:5, 6) Nnyịn imekeme ndikop inemesịt edieke itienede ukem usụn̄ uwem oro inyụn̄ isọn̄ọde isịn ‘ndisan̄a ke item mme idiọk owo’ m̀mê ndiyak idiọk item mmọ ada nnyịn usụn̄.
5. Nso ikeme ndin̄wam nnyịn mbak idisan̄a ke “usụn̄ mme anam idiọk”?
5 Edieke nnyịn isịnde ekikere mme idiọkowo, nnyịn ‘ididaha ke usụn̄ mme anam idiọk.’ Ke nditịm ntịn̄, nnyịn idimaha ndidu ke ebiet emi mmọ ẹsiwakde ndidu—ke mme ebiet oburobụt edinam unọ idem inemesịt m̀mê mme itie oro ẹwọrọde idiọk etop. Nso ke ikpanam edieke isobode idomo editiene mme idiọkowo mbuana ke edinam oro mîkemke ye N̄wed Abasi? Do, ẹyak nnyịn ibọn̄ akam iyom un̄wam Abasi man inam n̄kpọ ke n̄kemuyo ye mme ikọ apostle Paul emi: “Ẹkûbọp idem utịn̄e-utịn̄e ye mmọ eke mînịmke ke akpanikọ. Nso udeme ke edinen ido enyene ye ukwan̄ido? Nso [ebuana] ke un̄wana enyene ye ekịm?” (2 Corinth 6:14, 15a) Edieke nnyịn iberide edem ke Abasi inyụn̄ inyenede “edisana esịt,” nnyịn iyesịn edu ye usụn̄ uwem mme idiọkowo iyonyụn̄ inyene nti uduak ye nti udọn̄, ọkọrọ ye “ata mbuọtidem.”—Matthew 5:8; 1 Timothy 1:5.
6. Ntak emi nnyịn ikpekpemede idem ye mbon nsahi?
6 Man inem Jehovah esịt, inaha nnyịn idede ‘itie ke itie mbon nsahi.’ Ndusụk owo ẹda uten̄e Abasi ẹnam n̄kpọ nsahi, edi ke “ukperedem ini” emi, nsahi mbon mfiakedem, oro ẹkedide mme Christian ke mbemiso, esinen̄ede awak ndisan̄a ye emiom. Apostle Peter ama odụri ekemmọ mme andinịm ke akpanikọ utọn̄ ete: “Ndima, . . . ke akpa itie, ẹfiọk emi ẹte, ke ukperedem ini mbon nsahi ẹyeda nsahi ẹdi; mmọ ẹyesan̄a ke mme idiọk itọn̄ mmọ, ẹnyụn̄ ẹdọhọ ẹte, Edidi eke Enye ọkọn̄wọn̄ọde ete iyedi enye? Koro tọn̄ọ nte mme ete ẹkede idap, kpukpru n̄kpọ ẹtie kpasụk nte ẹketiede toto ke editọn̄ọ ererimbot.” (2 Peter 3:1-4) Edieke nnyịn mîdehede ‘itie ke itie mbon nsahi,’ nnyịn iyọbọhọ nsobo oro mîditreke ndisịm mmọ.—Mme N̄ke 1:22-27.
7. Ntak emi nnyịn ikpanamde se Psalm 1:1 ọdọhọde?
7 Ibọhọke nnyịn inam se ntọn̄ọikọ Psalm 1 ọdọhọde, nnyịn imekeme nditaba idaha eke spirit oro edikpep N̄wed Abasi anamde inyene. Ke akpanikọ, emi akam ekeme ndisịn nnyịn ke afanikọn̄. Nnyịn imekeme nditọn̄ọ nditaba idaha eke spirit nnyịn edieke itienede item mme idiọkowo. Ekem, nnyịn imekeme ndidụk nsan̄a ye mmọ kpukpru ini. Nte ini akade, nnyịn imakam ikeme ndikabade ndi mme anana-mbuọtidem mbon mfiakedem oro ẹdide mbon nsahi. Nte an̄wan̄ade, edinam ufan ye mme idiọkowo ekeme ndinam nnyịn ikọri edu unana uten̄e Abasi ndien emi ekeme ndibiat itie ebuana nnyịn ye Jehovah Abasi. (1 Corinth 15:33; James 4:4) Akpakam nnyịn idehede iyak oro etịbe ọnọ nnyịn!
8. Nso idin̄wam nnyịn ndiwụk ekikere ke mme n̄kpọ eke spirit?
8 Akam ayan̄wam nnyịn ndinam ekikere nnyịn owụhọ ke mme n̄kpọ eke spirit onyụn̄ an̄wam nnyịn ikûdụk nsan̄a ye mme idiọkowo. Paul ekewet ete: “Ẹkûtịmede esịt ke baba n̄kpọ kiet, edi ke kpukpru n̄kpọ, ẹsan̄a ye akam ye n̄kpe-ubọk ye ekọm, ẹsian Abasi se mbufo ẹyomde. Ndien emem Abasi, emi ayan̄ade ifiọk owo, eyekpeme mbufo esịt ye ekikere ke Christ Jesus.” Apostle oro ama esịn udọn̄ ọnọ edikere mban̄a mme n̄kpọ oro ẹdide akpanikọ, ẹnyenede ukpono, ẹnende, ẹdide edisana, ẹdotde ẹma, ẹwọrọde eti etop, eke eti ido odude, ye enye oro itoro odude. (Philippi 4:6-8) Ẹyak nnyịn inam n̄kpọ ke n̄kemuyo ye item Paul emi ikûnyụn̄ idede isụhọde idem nnyịn itie ke ndisan̄a ye mme idiọkowo.
9. Okposụkedi nnyịn isọnde ndiọi edinam, didie ke nnyịn idomo ndin̄wam kpukpru orụk owo?
9 Okposụkedi nnyịn isọnde ndiọi edinam, nnyịn imesida usọ inọ mbon en̄wen ikọ ntiense, idem kpa nte apostle Paul eketịn̄de “aban̄a edinen ido, ye mfara idem, ye ikpe eke edidide,” ọnọ Felix, andikara emi Rome ekemekde. (Utom 24:24, 25; Colossae 4:6) Nnyịn imesikwọrọ eti mbụk Obio Ubọn̄ inọ kpukpru orụk owo, inyụn̄ inam n̄kpọ ye mmọ ke mfọnido. Nnyịn imenịm ke akpanikọ ite ke “kpukpru mmọ emi ẹkenịmde ẹnọ nsinsi uwem” ẹyekabade ẹdi mme andinịm ke akpanikọ ẹnyụn̄ ẹyak ibet Abasi adat mmọ esịt.—Utom 13:48.
Mbet Jehovah Adat Enye Esịt
10. Nso ikeme ndin̄wam ndinam se nnyịn ikotde ke ini ọkpọkpọ ukpepn̄kpọ ọsọn̄ọ owụhọ nnyịn ke esịt ye ekikere?
10 Andiwet psalm aka iso nditịn̄ mban̄a owo oro okopde inemesịt ete: “Mbet Jehovah adat enye esịt; enye onyụn̄ osụk ekere mbet esie ke uwemeyo ye ke okoneyo.” (Psalm 1:2) Nte mme asan̄autom Abasi, “mbet Jehovah adat [nnyịn] esịt.” Ke ini inamde ọkpọkpọ ukpepn̄kpọ inyụn̄ itiede ikere se ikpepde, edieke ikemede, nnyịn imekeme ndikot mme ikọ uyo ọwọrọ. Ndikot ikọ uyo ọwọrọ ke ini ikotde ikpehe N̄wed Abasi ekededi ayan̄wam ndinam se nnyịn ikotde ọsọn̄ọ owụhọ nnyịn ke esịt ye ekikere.
11. Ntak emi nnyịn ikpokotde Bible ke “uwemeyo ye ke okoneyo”?
11 “Asan̄autom emi anamde akpanikọ, onyụn̄ enyenede ọniọn̄” esịn udọn̄ ọnọ nnyịn ndikot Bible kpukpru usen. (Matthew 24:45) Ke ntak oro inyenede ọkpọsọn̄ udọn̄ ndinen̄ede mmehe ye etop oro Jehovah enyenede ọnọ ubonowo, ọfọn nnyịn ndikot Bible ke “uwemeyo ye ke okoneyo”—ih, idem ke ini nnyịn mîkemeke ndide idap ke ntak kiet m̀mê eken. Peter ama eteme nnyịn ete: “Nte nsek-nditọ, ẹyom ata mmọn̄-eba Spirit, man mbufo ẹda enye ẹkọri ẹsịm edinyan̄a.” (1 Peter 2:1, 2) Ndi afo emesikop idatesịt ndikot Bible kpukpru usen onyụn̄ etie ekere Ikọ Abasi ye mme uduak esie ke okoneyo? Andiwet psalm ama anam ntre.—Psalm 63:6.
12. Nso ke nnyịn idinam edieke mbet Jehovah adatde nnyịn esịt?
12 Nsinsi inemesịt nnyịn ọkọn̄ọ ke ibet Abasi ndidat nnyịn esịt. Ibet esie ẹfọn ẹma ẹnyụn̄ ẹnen, ndien akamba udori oto ke edinịm mmọ. (Psalm 19:7-11) Mbet oro James ekewet ete: “Owo eke owụkde enyịn ese ata edifọn ibet Abasi emi anamde owo ọwọrọ ufụn, onyụn̄ ọsọn̄ọde ada ke esịt, idịghe andikokop emi efrede, edi edi andinanam; owo emi oyokụt edidiọn̄ ke edinam esie.” (James 1:25) Edieke mbet Jehovah enen̄erede adat nnyịn esịt, usen ndomokiet idibehe oro nnyịn mîdikereke iban̄a mme n̄kpọ eke spirit. Ke akpanikọ, ọyọdọn̄ nnyịn ndidụn̄ọde “nditụn̄ọ n̄kpọ Abasi” nnyụn̄ nnịm mme ufọn n̄kpọ Obio Ubọn̄ akpa ke uwem nnyịn.—1 Corinth 2:10-13; Matthew 6:33.
Enye Ebiet Eto
13-15. Ke nso usụn̄ ke nnyịn ikeme ndibiet eto oro ẹtọde ke mben akpa mmọn̄?
13 Andiwet psalm aka iso nditịn̄ mban̄a eti owo ete: “Enye ebiet eto eke ẹtọde ke mben akpa mmọn̄, eke osion̄ode mfri esie ke ekem ini; ikọn̄ esie inyụn̄ iken̄eke; ndien kpukpru se enye anamde ọwọrọ usụn̄.” (Psalm 1:3) Nnyịn oro inamde n̄kpọ Jehovah imosobo nsọn̄ọn̄kpọ ke uwem kpa nte kpukpru mme anana-mfọnmma owo eken ẹsobode. (Job 14:1) Nnyịn imekeme ndisobo ukọbọ ye nsio nsio idomo eken oro ẹtụkde mbuọtidem nnyịn. (Matthew 5:10-12) Nte ededi, ye un̄wam Abasi, nnyịn imekeme ndiyọ mme idomo emi uforo uforo, kpa nte ọkpọsọn̄ ofụm mîsikemeke ndiwụbede okopidem eto.
14 Eto oro ẹtọde ke mben akpa mmọn̄ isiyemekede ke ini ọkpọsọn̄ eyo m̀mê ke ini unana edịm. Edieke nnyịn ibakde Abasi, Jehovah Abasi emi enyenede akaka odudu ọyọnọ nnyịn ukeme. Paul okoyom un̄wam oto Abasi, anamde enye ọdọhọ ete: “Mmenyene ukeme ndinam kpukpru n̄kpọ ke odudu Andisọn̄ọ mi idem.” (Philippi 4:13) Ke ini edisana spirit Jehovah adade nnyịn usụn̄ onyụn̄ ọsọn̄ọde nnyịn idem, nnyịn idiyemekede, oro edi, nnyịn idinanake mfri m̀mê ndikpa ke n̄kan̄ eke spirit. Nnyịn iyon̄wụm mfri ke utom Abasi iyonyụn̄ ision̄o mbun̄wụm spirit esie.—Jeremiah 17:7, 8; Galatia 5:22, 23.
15 Ke ndida orụk ikọ Hebrew oro ẹkabarede “ebiet,” andiwet psalm ada ikọ oro owụtde nte n̄kpọ kiet ebietde efen etịn̄ ikọ. Enye emen n̄kpọ iba oro ẹdide isio odomo ye kiet eken, okposụkedi mmọ ẹnyenede akpan edu kiet. Mme owo idịghe ukem ye mme eto, edi ana in̄wan̄-in̄wan̄ nte ke nsọn̄idem emi eto oro ẹtọde ke mben akpa mmọn̄ enyenede ama eti andiwet psalm aban̄a uforo eke spirit mbon oro “mbet Jehovah adatde [mmọ] esịt.” Edieke ibet Abasi adatde nnyịn esịt, mme usen nnyịn ẹkeme nditie nte mme usen eto. Ke akpanikọ, nnyịn imekeme ndidu uwem ke nsinsi.—John 17:3.
16. Ntak emi ‘kpukpru se nnyịn inamde ọwọrọde usụn̄,’ ndien didie?
16 Nte nnyịn idomode ndidu edinen uwem, Jehovah an̄wam nnyịn ndiyọ mme idomo ye nsọn̄ọn̄kpọ. Nnyịn imokop inemesịt inyụn̄ in̄wụm mfri ke utom Abasi. (Matthew 13:23; Luke 8:15) ‘Kpukpru n̄kpọ oro nnyịn inamde ọwọrọ usụn̄’ koro se inen̄erede ibehe nnyịn edi ndinam uduak Jehovah. Sia mme uduak esie ẹsikụtde unen kpukpru ini, mme ewụhọ esie ẹnyụn̄ ẹdatde nnyịn esịt, nnyịn imoforo ke n̄kan̄ eke spirit. (Genesis 39:23; Joshua 1:7, 8; Isaiah 55:11) Emi edi ntre idem ke ini ikụtde afanikọn̄.—Psalm 112:1-3; 3 John 2.
Etie nte Mme Idiọkowo Ẹforo
17, 18. (a) Andiwet psalm emen mme idiọkowo odomo ye nso? (b) Idem ọkpọkọm mme idiọkowo ẹforo ke n̄kan̄ obụkidem, ntak emi mmọ mînyeneke ifụre oro ebịghide?
17 Uwem mme idiọkowo okpụhọde didie ntem ye eke nti owo! Ekeme nditie nte ke mme idiọkowo ẹforo ke n̄kan̄ obụkidem ke ndusụk ini, edi mmọ iforoke ke n̄kan̄ eke spirit. Ẹkụt emi in̄wan̄-in̄wan̄ ke se andiwet psalm akade iso nditịn̄: “Mme idiọk owo itiehe ntem; edi mmọ ẹbiet mbio eke ofụm asuande. Mmọdo mme idiọk owo mîdidaha ke ikpe [“mîdinyeneke utebeikpe,” NW], mme anam-idiọk idinyụn̄ idaha ke esop nti owo.” (Psalm 1:4, 5) Tịm fiọk ete ke andiwet psalm ọdọhọ, “mme idiọk owo itiehe ntem.” Ikọ esie ọwọrọ ke mmọ itiehe nte mme abak-Abasi, emi ima ikememen idomo ye eto oro on̄wụmde mfri onyụn̄ odude uwem ebịghi.
18 Idem ọkpọkọm mme idiọkowo ẹforo ke n̄kan̄ obụkidem, mmọ inyeneke ifụre oro ebịghide. (Psalm 37:16; 73:3, 12) Mmọ ẹbiet anana-ibuot owo inyene oro ke n̄ke Jesus, emi ọkọdọhọde Jesus ọdọhọ eyeneka imọ abahade akpa ete mmimọ. Edi Jesus ama ọdọhọ mbon oro ẹkekopde ikọ esie ete: “Ẹtịm ẹkpeme idem mbufo ke kpukpru orụk edisịn esịt ke n̄kpọ owo: koro owo enyene se enyenyene, uwem esie isịneke enye ke ubọk.” Jesus ama anam ọkpọikọ nneme esie an̄wan̄a ke ndidọhọ ke in̄wan̄ owo inyene kiet ama ọfọn n̄kpọ etieti tutu enye aduak ndiwụri mme ufọk-ubon udia esie nnyụn̄ mbọp se ikponde ikan man obon inyene esie. Ke enye ama akanam kpukpru emi okụre, enye ama aduak ndidia, ndin̄wọn̄ nnyụn̄ ndat esịt. Edi Abasi ama ọdọhọ ete: “Afo anana ibuot, ẹyekpak ukpọn̄ fo ke ubọk fo ke okoneyo emi; ndien anie edidia n̄kpọ eke ọkọkọde enịm?” Ke ndisọn̄ọ ntịn̄ ọkpọikọ nneme esie, Jesus ama adian do ete: “Ntem ke etie ye owo eke ọkọde inyene ọnọ idem esie, edi mînyeneke inyene ke n̄kan̄ Abasi.”—Luke 12:13-21.
19, 20. (a) Tịn̄ nte ẹkesidịghide ẹnyụn̄ ẹsakde n̄kpasịp ke eset. (b) Ntak emi ẹmende mme idiọkowo ẹdomo ye mbio?
19 Mme idiọkowo inyeneke “inyene ke n̄kan̄ Abasi.” Ke ntak emi, mmọ inyeneke ifụre ye iwụk ukem nte mbio wheat. Ke Israel eset, ke ẹma ẹkekpen̄e wheat, ẹma ẹsitan̄ mmọ ẹka itie udịghi n̄kpasịp, mbatmbat isọn̄ oro ekesiwakde ndidi enyọn̄ obot. Mme unam ẹma ẹsidụri n̄kpọ udịghi n̄kpasịp emi ekenyenede edisọp edet itiat m̀mê ukwak ke idak mmọ man ẹnuak mme eto wheat oro n̄ken̄e n̄ken̄e ẹnyụn̄ ẹsion̄o idem wheat ke ikpọk. Ekem, ẹma ẹsikama udọk mbakara ẹsak mmọ ke ndiwobi mmọ ntop ke enyọn̄ ke ini ofụm ofụmede. (Isaiah 30:24) Mme idem wheat ẹma ẹsifiak ẹduọn̄ọ ke itie udịghi n̄kpasịp, ke adan̄aemi ofụm ọkọkpọride eto obon n̄kan̄ kiet onyụn̄ emende mbio efep. (Ruth 3:2) Ke oro ebede, ẹma ẹsifiak ẹsak wheat oro man ẹsion̄o n̄kwaitiat ye mme mbio eken, ke emi, wheat oro ama odot se ẹtan̄de ẹka ubet ubon n̄kpasịp m̀mê se ẹkọkde ẹda ẹnam udia. (Luke 22:31) Edi ofụm ama ọkpọri mbio oro efep.
20 Kpa nte idem wheat ẹkeduọn̄ọde ke itie udịghi n̄kpasịp ndien ẹtan̄ ẹkebon ke ubet ubon n̄kpasịp ke adan̄aemi ofụm ọkọkpọride mbio efep, kpa ntre nti owo ẹyesụhọ ke adan̄aemi ẹdisobode mme idiọkowo ẹfep. Ke akpanikọ, nnyịn imokop inemesịt nte ke ibịghike mme utọ idiọkowo oro ididụhe aba. Ke ẹma ẹkesobo mmọ ẹfep, mme owo oro mbet Jehovah adatde mmọ esịt ẹyebọ akpakịp edidiọn̄. Ke akpanikọ, Abasi ọyọnọ mme okopitem ubonowo nsinsi uwem ke akpatre.—Matthew 25:34-46; Rome 6:23.
Ẹdiọn̄ “Usụn̄ Nti Owo”
21. Didie ke Jehovah ‘ọfiọk nti owo’?
21 Akpa psalm etre ye mme ikọ emi: “Jehovah [ọfiọk] usụn̄ nti owo: edi usụn̄ mme idiọk owo ayabiara.” (Psalm 1:6) Didie ke Abasi ‘ọfiọk nti owo’? Ọfọn, edieke nnyịn isịnde ukeme ndidu edinen uwem, nnyịn imekeme nditịm nnịm nte ke Ete nnyịn eke heaven okụt uwem uten̄e Abasi oro nnyịn idude onyụn̄ ada nnyịn nte mme asan̄autom esie oro enye enyịmede. Do, nnyịn imekeme ikponyụn̄ inyene nditop kpukpru ọkpọsọn̄ ekikere nnyịn ndori enye ke idem inyenede mbuọtidem nte ke enye ekere aban̄a nnyịn.—Ezekiel 34:11; 1 Peter 5:6, 7.
22, 23. Nso iditịbe inọ mme idiọkowo ye nti owo?
22 “Usụn̄ nti owo” edidu ke nsinsi, edi ubiereikpe Jehovah eyesịm mme idiọkowo oro mîkabakede esịt ndien mmọ ẹyetak. Ntem “usụn̄,” m̀mê usụn̄ uwem mmọ eyetiene mmọ ebe efep. Nnyịn imekeme ndinyene mbuọtidem nte ke mme ikọ David emi ẹyesu: “Osụk esisịt idiọk owo ididụhe: ndien ke afo etịn̄de enyịn ke ebiet esie, enye ididụhe. Edi mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt. Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Psalm 37:10, 11, 29.
23 Nso inemesịt ke nnyịn idikop ntem edieke inyenede ifet ndidu ke paradise isọn̄ oro mme idiọkowo mîdụhe aba! Ke ini oro, mbon nsụhọdeidem ye nti owo ẹyenyene ata emem koro “mbet Jehovah” ayadat mmọ esịt kpukpru ini. Nte ededi, mbemiso ini oro, ẹnyene ndinam ‘ewụhọ Jehovah.’ (Psalm 2:7a) Ibuotikọ oro etienede ayan̄wam nnyịn ndifiọk se ewụhọ oro edide ye se enye ediwọrọde ọnọ nnyịn ye ofụri ekpụk ubonowo.
Didie ke Afo Ọkpọbọrọ?
• Ntak emi owo oro abakde Abasi okopde inemesịt?
• Nso iwụt ke mbet Jehovah adat nnyịn esịt?
• Didie ke owo ekeme ndibiet eto eke ẹtọde ke mben akpa mmọn̄?
• Didie ke usụn̄ nti owo okpụhọrede ye usụn̄ mme idiọkowo?
[Mme Mbụme Ukpepn̄kpọ]
[Ndise ke page 11]
Akam ayan̄wam nnyịn itre ndidụk nsan̄a ye mme idiọkowo
[Ndise ke page 12]
Ntak emi eti owo ebietde eto?