Mme Mbụme Ẹtode Mme Andikot

Nso ke ikọ Jesus ọkọwọrọ ke ini enye ọkọdọhọde mme mbet esie ete: “Mma n̄kụt Satan otode ke enyọn̄ ọduọ nte emịnen̄-mịnen̄”?

Jesus ndikosụk mmek mbet 70 edi oro, onyụn̄ “ọdọn̄ mmọ ẹsan̄a iba iba ẹbem Enye iso, ẹka ẹkedụk ke kpukpru obio ye ebiet, eke Enye ke Idem Esie oyomde ndika.” Ke ini mbet 70 emi ẹkenyọn̄de ẹdi, mmọ ẹma ẹdat esịt ẹban̄a unen oro mmọ ẹkekụtde ke utom mmọ. Mmọ ẹma ẹdidọhọ Jesus ẹte: “Ọbọn̄, kpa mme demon ẹsụk ibuot ẹnọ nnyịn ke enyịn̄ Fo.” Jesus ama ọdọhọ ke ebe oro ete: “Mma n̄kụt Satan otode ke enyọn̄ ọduọ nte emịnen̄-mịnen̄.”—Luke 10:1, 17, 18.

Ke akpa, ekeme nditie nte Jesus eketịn̄ aban̄a n̄kpọ oro ama eketetịbe. Edi, isua 60 ke ukperedem ke Jesus ama eketịn̄ ikọ eke enyọn̄ emi, akanieren apostle John ama etịn̄ ukem ikọ oro ete: “Ẹsio akwa dragon ẹduọk ke isọn̄, kpa akani urụkikọt oro ẹkotde enye ẹte, andidori ikọt Abasi ikọ ye Satan, andibian̄a ofụri ererimbot; ẹsio enye ẹduọk ke isọn̄, ẹnyụn̄ ẹsion̄o mme angel esie ẹduọn̄ọ ye enye.”—Ediyarade 12:9.

Ke ini John ekewetde ikọ emi, Satan okosụk odụn̄ ke heaven. Nnyịn isan̄a didie ifiọk? Koro Ediyarade edi n̄wed ntịn̄nnịm ikọ, idịghe n̄wed mbụkeset. (Ediyarade 1:1) Ntem, idem ke eyo John, owo ikosioho kan̄a Satan ke heaven iduọk ke isọn̄. Ke akpanikọ, uyarade owụt ke emi eketịbe esisịt ini ke ẹma ẹkedori Jesus ke ebekpo nte Edidem Obio Ubọn̄ Abasi ke 1914. *—Ediyarade 12:1-10.

Ntre, ntak emi Jesus eketịn̄de aban̄a edisio Satan ke heaven nduọk nte n̄kpọ emi ama eketetịbe? Ndusụk nditọ ukpepn̄kpọ ẹdọhọ ke Jesus akasua ọnọ mbet esie sia ikọ mmọ okowụtde edu ntan̄idem. Ke nditịm ntịn̄, mmọ ẹkere ke enye akakam ọdọhọ ete: ‘Mbufo ẹmekan mme demon, edi ẹkûnam inua. Satan ama akabade edi owo ntan̄idem, ndien oro ama anam enye ọsọp ọduọ.’

Nnyịn ikemeke ndisọn̄ọ ntịn̄ m̀mê edi ntre m̀mê idịghe. Nte ededi, enen̄ede etie nte Jesus akadara ye mbet esie onyụn̄ etịn̄ aban̄a nte ẹdisiode Satan ẹduọk ke ini iso. Jesus ama enen̄ede ọfiọk idiọk usua oro Devil enyenede akan nte mbet esie ekededi ọkọfiọkde. Kam kere nte esịt akadatde Jesus ke ini enye okokopde ke n̄kpọsọn̄ demon ẹma ẹsụk ibuot ẹnọ mme anana-mfọnmma mbet esie! Mmọ ndikakan mme demon okowụt nte ke ini iso, Jesus emi edide Michael, kpa akwa angel ayan̄wana ye Satan onyụn̄ osio enye ke heaven ọduọk ke isọn̄.

Ke ini Jesus ọkọdọhọde ke imọ ima ikụt nte Satan ‘ọduọde,’ nte an̄wan̄ade, enye ọkọsọn̄ọ owụt ke Satan iditreke-tre ndiduọ. Emi edi ukem ye mme ntịn̄nnịm ikọ Bible oro ẹtịn̄de ẹban̄a se iditịbede ke ini iso nte n̄kpọ eke mmọ ẹma ẹketetịbe. Ke uwụtn̄kpọ, se nte Isaiah 52:13–53:12 etịn̄de ntịn̄nnịm ikọ aban̄a Messiah nte se ima iketetịbe ye nte se iditịbede ke ini iso. Anaedi Jesus okowụt mbuọtidem oro enye enyenede nte ke ẹyesio Satan ke heaven ẹduọk nte ekemde ye uduak Ete imọ. Jesus ama onyụn̄ enyene mbuọtidem nte ke ẹyekọbi Satan ye mme demon esie ke edikem ini Abasi, mbemiso ẹsobode mmọ ke nsinsi nsinsi.—Rome 16:20; Mme Hebrew 2:14; Ediyarade 20:1-3, 7-10.

[Ikọ idakisọn̄]