Ndinyene Ekikere Christ Kaban̄a Uwọrọiso

“Owo ekededi eke oyomde ndikabade n̄kpon ke otu mbufo eyedi asan̄a-utom mbufo.”—MATTHEW 20:26.

1. Nso idi ekikere ererimbot kaban̄a uwọrọiso?

 MBIET Pharaoh Amenhotep III emi ọniọn̄de mita 18 odu ke mbọhọ obio Thebes eset (Karnak eyomfịn) ke Egypt, emi oyomde usụn̄ ke n̄kpọ nte kilomita 500 ọkpọn̄ edem usụk Cairo. Ndimenede enyịn nse akaka mbiet oro anam owo okụt nte imọ inen̄erede ikpri. Nte eyịghe mîdụhe, ẹkebot mbiet emi man anam mme owo ẹten̄e mme andikara, ndien emi owụt nte ererimbot esede uwọrọiso—ndida idem ke n̄kpọ n̄kan mbon en̄wen nnyụn̄ nsụhọde mbon en̄wen itie.

2. Nso uwụtn̄kpọ ke Jesus ekenịm ọnọ mme anditiene enye, ndien mme mbụme ewe ke nnyịn ikpobụp idem nnyịn?

² Se nte emi okpụhọrede ye se Jesus Christ ekekpepde aban̄a uwọrọiso. Okposụkedi enye ekedide “Ọbọn̄ ye Andikpep,” Jesus ama ekpep mme anditiene enye ete ke ndinam n̄kpọ nnọ mbon en̄wen anam owo ọwọrọ iso. Ke akpatre usen uwem esie ke isọn̄, Jesus ama anam se enye ekekpepde owụt ke ndiyet mbet esie ukot. Nso edinam nsụhọdeidem ke emi ekedi ntem! (John 13:4, 5, 14) Ndinam n̄kpọ nnọ mbon en̄wen m̀mê mbon en̄wen ndinam n̄kpọ nnọ fi—ewe ke afo ama akan? Ndi uwụtn̄kpọ Christ edemede fi udọn̄ ndisụhọde idem kpa nte enye okosụhọrede idem? Ke emi, ẹyak nnyịn idụn̄ọde nte ekikere Christ kaban̄a uwọrọiso okpụhọrede ye ọsọ ekikere ererimbot.

 Sọn Ekikere Ererimbot Kaban̄a Uwọrọiso

3. Mme uwụtn̄kpọ Bible ewe ẹwụt akama-mfụhọ utịp oro ekesịmde mbon oro ẹkeyomde ukpono ẹto mme owo?

³ Ediwak uwụtn̄kpọ Bible ẹwụt ke ekikere ererimbot kaban̄a uwọrọiso esisụn̄ọ ke nditaha. Kere ban̄a Haman, emi ekedide ọkpọsọn̄ ye ọwọrọiso owo ke okụre edidem Persia ke eyo Esther ye Mordecai. Udọn̄ Haman kaban̄a uwọrọiso ama ada ekesịm esuene ye n̄kpa esie. (Esther 3:5; 6:10-12; 7:9, 10) Nso kaban̄a atan̄idem Nebuchadnezzar, emi ẹketọde idat ke ini ukara esie ekenen̄erede ọsọn̄ odudu? Enye ama owụt ukwan̄ ekikere oro enye ekenyenede aban̄a uwọrọiso ke ndidọhọ ete: “Nte idịghe emi edi akamba Babylon emi ndade akwa odudu mi mbọp nnịm ke ufọk ubọn̄ mi, ye ke eke uyai ubọn̄ mi?” (Daniel 4:30) N̄ko atan̄idem Herod Agrippa I, ama ada ukpono oro ẹkpenọde Abasi enyene. ‘Ndọn̄ ẹma ẹta enye, enye onyụn̄ akpa.’ (Utom 12:21-23) Nditre ndinyene ekikere Jehovah kaban̄a uwọrọiso ama anam kpukpru iren emi ẹkpọn̄ ukara ke esuene esuene usụn̄.

4. Anie edi ntak n̄kohodeidem oro odude ke ererimbot?

⁴ Odot ndidu uwem ke usụn̄ oro ọnọde nnyịn ukpono ye uku. Nte ededi, Devil esida udọn̄ emi anam nnyịn ikohode idem, man ibiet enye. (Matthew 4:8, 9) Kûdede ufre ute ke enye edi “abasi eyo emi,” ndien ke enye oyom ndinam mme owo ke isọn̄ ẹnyene ekikere esie. (2 Corinth 4:4; Ephesus 2:2; Ediyarade 12:9) Ke ẹfiọkde ebiet emi utọ ekikere oro otode, mme Christian ẹsọn ekikere ererimbot kaban̄a uwọrọiso.

5. Ndi inyene, akamba enyịn̄, ye uwọrọiso ẹsinọ owo uyụhọ oro ebịghide? Nam an̄wan̄a.

⁵ Ekikere kiet oro Satan esịnde ke esịt mme owo edi nte ke ndinyene akamba enyịn̄ ke ererimbot, ndidi se mme owo ẹkponode, ndinyụn̄ nnyene okụk esinam owo okop inemesịt ke uwem. Ndi oro edi akpanikọ? Ndi inyene, odudu, ye uwọrọiso ẹsinam owo okop uyụhọ ke uwem? Bible odụri nnyịn utọn̄ ete ikûyak ẹda mme utọ ekikere oro ẹbian̄a nnyịn. Enyene-ọniọn̄ Edidem Solomon ekewet ete: “Ndien nse ofụri ọkpọsọn̄ utom, ke kpukpru utom eke ọwọrọde unen, nte ke enye edi ntak emi mbọhọidụn̄ owo efịbede ufụp ye owo. Emi n̄ko onyụn̄ edi ikpîkpu n̄kpọ ye idomo eke mîwọrọke usụn̄.” (Ecclesiastes 4:4) Ediwak owo oro ẹyakde ofụri uwem mmọ ẹsịn ke ndiyom uwọrọiso ke ererimbot ẹkeme ndinyịme ke item Bible eke odudu spirit emi edi akpanikọ. Uwụtn̄kpọ kiet edi owo oro eketienede obot ubomofụm onyụn̄ anamde ndomonse ke ndiwat ubomofụm oro n̄ka ọfiọn̄. Enye ọkọdọhọ ete: “Mmanam utom ọkpọsọn̄ nnyụn̄ nnen̄ede mfiọk utom mi. Edi enye inọhọ mi inemesịt ye emem oro ebịghide.” * Edide ke mbubehe, mbre mbuba, m̀mê edinam unọ idem inemesịt, ekikere ererimbot kaban̄a uwọrọiso, inọhọ uyụhọ oro ebịghide.

 Edinam Utom ke Ima Anam Owo Ọwọrọ Iso

6. Nso iwụt ke James ye John ẹma ẹnyene ukwan̄ ekikere ẹban̄a uwọrọiso?

⁶ N̄kpọntịbe kiet ke uwem Jesus owụt se ata uwọrọiso edide. Jesus ye mme mbet esie ẹkeka Jerusalem man ẹkedụk Passover eke 33 E.N. Nte mmọ ẹkesan̄ade ke usụn̄, nditọeka iba, James ye John emi ẹkedide nditọ eyeneka eka Jesus, ẹma ẹwụt ukwan̄ ekikere oro mmọ ẹkenyenede ẹban̄a uwọrọiso. Mmọ ẹma ẹdọhọ eka mmọ ekeben̄e Jesus ete: ‘Nọ uyo ete nnyịn itie ye afo, kiet ke ubọk nnasia fo, kiet ke ufien, ke Obio Ubọn̄ Fo.’ (Matthew 20:21) Mme Jew ẹkeda editie ke ubọk nnasia m̀mê ufien nte akwa n̄kpọ ukpono. (1 Ndidem 2:19) Udọn̄ ikpọ n̄kpọ akanam James ye John ẹyom ikpọ itie. Mmọ ẹma ẹnen̄ede ẹsịn ukeme ẹyom itie odudu emi. Jesus ama ọfiọk se mmọ ẹkekerede ndien enye ama ada ifet oro enen̄ede ekikere oro mmọ ẹkenyenede ẹban̄a uwọrọiso.

7. Didie ke Jesus okowụt ata uwọrọiso oro Christian ekpebịnede?

⁷ Jesus ama ọfiọk ke owo oro ẹdade nte n̄kponn̄kan m̀mê ọwọrọiso ke ererimbot ntan̄idem emi edi owo oro akarade mbon en̄wen, emi ekemede ndinyene kpukpru se enye oyomde ke ediyịp enyịn. Edi ke otu mme anditiene Jesus, se ẹdade ẹdiọn̄ọ ọwọrọiso owo m̀mê owo oro okponde edi nte enye osụhọrede idem anam n̄kpọ ọnọ mbon en̄wen. Jesus ọkọdọhọ ete: “Owo ekededi eke oyomde ndikabade n̄kpon ke otu mbufo eyedi asan̄a-utom mbufo; owo ekededi eke onyụn̄ oyomde ndidi ebeiso owo ke otu mbufo oyodụk ufụn ọnọ mbufo.”—Matthew 20:26, 27.

8. Ndidi asan̄autom ọwọrọ nso, ndien mme mbụme ewe ke nnyịn ikpobụp idem nnyịn?

⁸ Ikọ Greek oro ẹkabarede “asan̄a-utom” ke Bible ada aban̄a owo oro esịnde ifịk oyom mme usụn̄ ndinam n̄kpọ nnọ mbon en̄wen. Akpan n̄kpọ oro Jesus ekekpepde mme mbet esie edi emi: Uwọrọiso ikọn̄ọke ke ndiwụk mbon en̄wen ẹnam n̄kpọ; edi ọkọn̄ọ ke ndinam n̄kpọ nnọ mbon en̄wen ke ntak ima. Bụp idemfo ete: ‘Didie ke n̄kpakanam n̄kpọ edieke n̄kpedide James m̀mê John? Ndi n̄kpekenyịme ke ata uwọrọiso ọkọn̄ọ ke ndinam n̄kpọ nnọ mbon en̄wen ke ima esịt?’—1 Corinth 13:3.

9. Nso uwụtn̄kpọ ke Jesus ekenịm ke nte enye akanamde n̄kpọ ye mbon en̄wen?

⁹ Jesus ama owụt mme mbet esie ke nte imọ isede uwọrọiso okpụhọde ye nte ererimbot  esede. Akananam, enye ikowụtke ke imọfọn ikan mbon oro enye akan̄wamde m̀mê ndinam mmọ ẹkere ke mmimọ idi usụhọde owo. Mme owo eke kpukpru orụk—iren, iban, nditọwọn̄, ubuene, imọ, n̄kpọsọn̄ owo, ọkọrọ ye ata ndiọi owo ikokopke ndịk ndisan̄a n̄kpere enye. (Mark 10:13-16; Luke 7:37-50) Mme owo isimehe ime ye mme usụhọde owo. Edi Jesus iketiehe ntre. Okposụkedi mme mbet esie ẹkesinyenede edu ibụk ẹnyụn̄ ẹtọhọde ndusụk ini, enye ama esinen̄ede mmọ ke sụn̄sụn̄ ido, owụtde ke imọ imenen̄ede isụhọde idem inyụn̄ inyene ifụre ifụre ido.—Zechariah 9:9; Matthew 11:29; Luke 22:24-27.

10. Didie ke ofụri uwem Jesus okowụt ke enye ama awa idem anam n̄kpọ ọnọ mbon en̄wen?

¹⁰ Uwụtn̄kpọ n̄waidem oro akakan Eyen Abasi ekenịmde owụt se uwọrọiso enen̄erede edi. Jesus ikedịghe isọn̄ man ẹnam n̄kpọ ẹnọ enye, edi ekedi man enye anam n̄kpọ ọnọ mbon en̄wen, ọkọkde “nsio-nsio udọn̄ọ” onyụn̄ ebịnde mme demon ọduọn̄ọ. Okposụkedi ekesikopde mmemidem onyụn̄ oyomde nduọkodudu, enye ama esibem iso oyụhọ udọn̄ mbon en̄wen, utu ke eke esie, onyụn̄ esịn ofụri ukeme ndidọn̄ mmọ esịt. (Mark 1:32-34; 6:30-34; John 11:11, 17, 33) Ima ama onụk enye ndin̄wam mbon en̄wen ke n̄kan̄ eke spirit, asan̄ade ediwak kilomita ke usụn̄ oro etiede ntọn̄ ntọn̄ man ọkwọrọ eti mbụk Obio Ubọn̄. (Mark 1:38, 39) Nte eyịghe mîdụhe, Jesus akada edinam n̄kpọ nnọ mbon en̄wen nte ata akpan n̄kpọ.

Kpebe Nsụhọdeidem Christ

11. Mme edu ewe ke ẹyom ẹto nditọete oro ẹmekde nte mme esenyịn ke esop?

¹¹ Ẹma ẹsọn̄ọ ẹwụt ata eti edu oro mme esenyịn Christian ẹkpenyenede, ke utịt utịt iduọk isua 1800, ke ini ẹkemekde irenowo oro ẹsan̄ade-san̄a nte mme andida ke ibuot esop Abasi man ẹse ẹban̄a udọn̄ ikọt Abasi. Nte Zion’s Watch Tower eke September 1, 1894, ọdọhọde, ẹkeyom irenowo oro “ẹsụhọrede idem—mbak mmọ ẹdikohode idem . . . ẹyom itoro idemmọ, edi ẹsụhọrede idem ẹkwọrọ Christ—utu ke ndikwọrọ ifiọk idemmọ, edi ẹda odudu ẹkwọrọ Ikọ Christ ke ata mmemmem usụn̄.” Nte an̄wan̄ade, ata mme Christian ikpedehede iyom ifetutom ndida nyụhọ udọn̄ idemmọ m̀mê ndida nyom uwọrọiso, odudu, nnyụn̄ n̄kara mbon en̄wen. Ebiowo oro osụhọrede idem esiti ke utom imọ edi “eti utom,” idịghe akwa itie ndida ubọn̄ nsọk idemesie. (1 Timothy 3:1, 2) Kpukpru mbiowo ye mme asan̄autom unamutom ẹkpenyene ndisụhọde idem nsịn ukeme nnam n̄kpọ nnọ mbon en̄wen nnyụn̄ nda iso ke ndinam edisana utom, ẹnịmde nti uwụtn̄kpọ ẹnọ mbon en̄wen ndikpebe.—1 Corinth 9:19; Galatia 5:13; 2 Timothy 4: 5.

12. Mme mbụme ewe ke mbon oro ẹyomde ifetutom ke esop ẹkpebụp idemmọ?

¹² Eyenete ekededi oro oyomde ifetutom ke  esop ekeme ndibụp idemesie ete: ‘Ndi mmesiyom mme ifet ndinam n̄kpọ nnọ mbon en̄wen, m̀mê nsitetie nyom mbon en̄wen ẹnam n̄kpọ ẹnọ mi? Ndi mmesinyịme ndinam nti n̄kpọ oro owo mîsọpke ikụt nnọ mbon en̄wen?’ Ke uwụtn̄kpọ, akparawa owo ekeme ndinyịme ndinọ utịn̄ikọ ke esop, edi imaha ndin̄wam mbonusọn̄. Enye ekeme ndima ndidụk nsan̄a ye iren oro ẹkamade ifetutom ke esop edi imaha ndibuana ke utom ukwọrọikọ. Ọkpọfọn utọ akparawa oro obụp idemesie ete: ‘Ndi nnen̄ede mma utom Abasi oro mme owo ẹkemede ndisọp n̄kụt nnyụn̄ ntoro mi? Ndi ndomo ndidi ọwọrọiso owo?’ Ke akpanikọ, owo ndiyom ubọn̄ idemesie idịghe edu Christ.—John 5:41.

13. (a) Didie ke uwụtn̄kpọ nsụhọdeidem esenyịn ekeme nditụk mbon en̄wen? (b) Ntak emi ẹkemede ndidọhọ ke nsụhọdeidem idịghe edu oro Christian ekpemekde-mek ndinyene?

¹³ Ke ini isịnde ọkpọsọn̄ ukeme ndikpebe nsụhọdeidem Christ, oro eyedemede nnyịn udọn̄ ndinam n̄kpọ nnọ mbon en̄wen. Kere ban̄a uwụtn̄kpọ esenyịn zone emi akasan̄ade ese nte ẹnamde utom ke kiet ke otu mme ọfis n̄kọk itieutom Mme Ntiense Jehovah. Okposụkedi mîkenyeneke ini ke ntak oro enye ekenyenede ekese ndinam, esenyịn emi ama atuak ada an̄wam akparawa eyenete oro okodomode ndidiọn̄ masịn ukịmn̄kpọ. Kop se akparawa eyenete oro ọkọdọhọde: “Idem ama enen̄ede akpa mi! Enye ama asian mi ete ke imọ ima isida ukem masịn oro inam utom ke Bethel ke ini ikedide akparawa, onyụn̄ etịn̄ nte ekesisọn̄de ndida masịn emi nnam utom. Enye ama ada ekese ini etiene mi ọdiọn̄ masịn oro, okposụkedi enye ekenyenede mme akpan n̄kpọ en̄wen ndinam. Oro ama enen̄ede otụk mi.” Akparawa eyenete oro, emi edide esenyịn idahaemi ke kiet ke otu mme ọfis n̄kọk itieutom Mme Ntiense Jehovah, ke eteti edinam nsụhọdeidem oro. Ẹyak nnyịn ikûdede ikere ke imokpon ikaha ndisụhọde idem m̀mê ndinam usụhọde utom. Utu ke oro, nnyịn ikpakam ida “nsụk-idem” isịne. Emi idịghe n̄kpọ oro inamde edieke imade. Enye edi ubak “obufa owo” oro anade mme Christian ẹmen ẹsịne.—Philippi 2:3; Colossae 3:10, 12; Rome 12:16.

Nte Ikemede Ndinyene Ekikere Christ Kaban̄a Uwọrọiso

14. Didie ke ndikere mban̄a itie ebuana nnyịn ye Abasi ye ekemmọ owo ekeme ndin̄wam nnyịn ndinyene nnennen ekikere kaban̄a uwọrọiso?

¹⁴ Didie ke nnyịn ikeme ndinyene nnennen ekikere kaban̄a uwọrọiso? Usụn̄ kiet edi ndikere mban̄a itie ebuana nnyịn ye Jehovah Abasi. Akwa ubom, odudu, ye ọniọn̄ esie ẹnam enye enen̄ede okon̄ akan mme ikpîkpu owo. (Isaiah 40:22) Ndikere mban̄a itie ebuana nnyịn ye mbon en̄wen an̄wam nnyịn n̄ko ndisụhọde idem. Ke uwụtn̄kpọ, nnyịn imekeme ndifiọk ndusụk ubọkọkọ n̄kan mbon en̄wen, edi mmọ ẹkeme ndifọn n̄kan nnyịn ke ndusụk ikpehe uwem oro ẹnen̄erede ẹdi akpan n̄kpọ, mîdịghe nditọete Christian nnyịn ẹkeme ndinyene ndusụk edu oro nnyịn mînyeneke. Ke akpanikọ, sụn̄sụn̄ edu ye nsụhọdeidem isiyakke ediwak mbon oro ẹsọn̄de urua ke enyịn Abasi ẹmenede idem ke enyọn̄.—Mme N̄ke 3:34; James 4:6.

15. Didie ke nsọn̄ọnda ikọt Abasi owụt ke owo ndomokiet ikpekereke ke imọfọn ikan mbon en̄wen?

¹⁵ Ifiọkutom Mme Ntiense Jehovah oro ẹkeyọde ukọbọ ke ntak mbuọtidem mmọ ẹnen̄ede ẹnam n̄kpọ emi an̄wan̄a. Ediwak ini, mbon oro ẹdade nte mme usụhọde owo ke ererimbot ẹsisọn̄ọ ẹda ye Abasi ke ini ẹsobode ikan̄-ikan̄ idomo. Nditie n̄kere mme utọ  uwụtn̄kpọ oro ekeme ndin̄wam nnyịn isụhọde idem ikûnyụn̄ ‘ikere ke imedi n̄kpọ ikan nte ikpekerede.’—Rome 12:3. *

16. Didie ke kpukpru owo ke esop ẹkeme ndikpebe uwụtn̄kpọ Jesus kaban̄a uwọrọiso?

¹⁶ Oyom kpukpru mme Christian, n̄kpri ye ikpọ, ẹdomo ndinyene ekikere Christ kaban̄a uwọrọiso. Ediwak utom ẹdu oro anade ẹnam ke esop. Kûfan̄a ke ini ẹdọhọde anam mme utom oro ẹtiede nte usụhọde utom. (1 Samuel 25:41; 2 Ndidem 3:11) Mme ete ye eka, ndi ẹmesisịn udọn̄ ẹnọ nditọ mbufo ndinam utom ekededi oro ẹnọde mmọ idara idara, edide ke Ufọkmbono Obio Ubọn̄, ke itie mbono circuit m̀mê eke mbono District? Ndi mmọ ẹsikụt mbufo ẹnamde mme usụhọde utom? Eyenete kiet, oro anamde utom idahaemi ke ibuot itieutom ofụri ererimbot eke Mme Ntiense Jehovah, eti uwụtn̄kpọ ete ye eka esie. Enye ọdọhọ ete: “Usụn̄ oro mmọ ẹsinamde utom edinam Ufọkmbono Obio Ubọn̄ asana ama anam mi ndiọn̄ọ ke mmọ ẹda enye ke akpan n̄kpọ. Ediwak ini, mmọ ẹma ẹsinọ idemmọ unyịme unyịme ndinam mme utom oro ẹnyenede ufọn ẹnọ esop m̀mê otu nditọete, inamke n̄kpọ m̀mê utom oro ekekpri adan̄a didie. Edu emi an̄wam mi ndinyịme utom ekededi oro ẹdọhọde nnam mi ke Bethel.”

17. Ke mme usụn̄ ewe ke iban oro ẹsụhọrede idem ẹkeme ndidi edidiọn̄ nnọ esop?

¹⁷ Esther emi ekedide ọbọn̄ an̄wan ke Obio Ukara Persia ke ọyọhọ isua ikie ition M.E.N., ama enịm ata eti uwụtn̄kpọ ọnọ nnyịn ke ndinam udọn̄ mbon enwen ebem eke esiemmọ iso. Okposụkedi okodụn̄de ke ufọk ubọn̄, enye ama enyịme ndisịn uwem esie ke itiendịk ke n̄kemuyo ye uduak Abasi ke ntak ikọt Esie. (Esther 1:5, 6; 4:14-16) Inamke n̄kpọ m̀mê nso idi idaha mmọ ke n̄kaowo, iban Christian mfịn ẹkeme ndiwụt ukem edu Esther ebe ke ndidọn̄ mbon oro ẹkopde mfụhọ esịt, ndika n̄kese mbon udọn̄ọ, ndibuana ke utom ukwọrọikọ, ndinyụn̄ mbere ye mbiowo. Nso edidiọn̄ ke mme utọ osụhọde-idem nditọete iban oro ẹdi ntem ẹnọ esop!

Mme Edidiọn̄ Ẹtode Edinyene Ekikere Christ Kaban̄a Uwọrọiso

18. Edinyene ekikere Christ kaban̄a uwọrọiso ekeme ndida nso ufọn ndi?

¹⁸ Ndinyene ekikere Christ kaban̄a uwọrọiso ayada ekese ufọn ọsọk fi. Ndinam n̄kpọ nnọ mbon en̄wen ye unana ibụk ọyọnọ mmọ idatesịt ye afo nde. (Utom 20:35) Nte afo enyịmede ndisịn ifịk nnam n̄kpọ nnọ nditọete fo, afo oyokụt ke mmọ ẹyenen̄ede ẹma fi. (Utom 20:37) Akan oro, Jehovah ada se afo anamde ọnọ ekemmọ Christian nte uwa oro enemde imọ esịt.—Philippi 2:17.

19. Nso ikpedi ubiere nnyịn ke edinyene ekikere Christ kaban̄a uwọrọiso?

¹⁹ Ọkpọfọn nnyịn owo kiet kiet idụn̄ọde esịt nnyịn inyụn̄ ibụp idem nnyịn ite: ‘Ndi ami nsitịn̄ ke inua kpọt nte ke ọfọn ndinyene ekikere Christ kaban̄a uwọrọiso, mîdịghe ndi ami mmesisịn ifịk ndinanam emi n̄wụt?’ Jehovah owụt in̄wan̄-in̄wan̄ nte imọ isede mbon iseri. (Mme N̄ke 16:5; 1 Peter 5:5) Edinam nnyịn akpakam owụt ke imama ndinyene ekikere Christ kaban̄a uwọrọiso, edide ke esop Christian, ke ubon nnyịn, m̀mê ke nte inamde n̄kpọ ke usen ke usen ye ekemmọ owo—inamde kpukpru n̄kpọ inọ Abasi ubọn̄ ye itoro.—1 Corinth 10:31.

[Mme Ikọ idakisọn̄]

Nte Afo Emekeme Ndinam An̄wan̄a?

• Ntak emi nnyịn ikpọsọnde ekikere ererimbot kaban̄a uwọrọiso?

• Didie ke Jesus okowụt se uwọrọiso edide?

• Didie ke mme esenyịn ẹkpekpebe nsụhọdeidem Christ?

• Nso ikeme ndin̄wam nnyịn inyene ekikere Christ kaban̄a uwọrọiso?

[Mme Mbụme Ukpepn̄kpọ]

[Ekebe ke page 17]

Anie Enyene Ekikere Christ Kaban̄a Uwọrọiso?

Owo emi oyomde ẹnam n̄kpọ ẹnọ imọ m̀mê owo oro enyịmede ndinam n̄kpọ nnọ mbon en̄wen?

Owo emi amade uwọrọiso m̀mê owo oro enyịmede ndinam usụhọde utom?

Owo oro emenerede idemesie ke enyọn̄ m̀mê owo oro emenerede mbon en̄wen?

[Ndise ke page 14]

Akaka mbiet Pharaoh Amenhotep III

[Ndise ke page 15]

Ndi ọmọdiọn̄ọ se ikanamde Haman ọduọ?

[Mme ndise ke page 16]

Ndi emesiyom mme ifet ndinam n̄kpọ nnọ mbon en̄wen?