“Nnyịn Iyom Ndibọrọ, ‘Ih!’”

KE NDONDO emi, ọfis n̄kọk itieutom Mme Ntiense Jehovah ke Nigeria ama ọbọ leta oro ọdọhọde ubak ubak ete:

“Anderson, eyeneren nnyịn, ama akpa ke ini ekedide isua 14. Mbemiso n̄kpa esie, enye ama ọbọk unen iba. Enye okoyom ndinyam mmọ nnyụn̄ nnọ okụk oro ẹsọk ọfis n̄kọk itieutom nte etịbe esie kaban̄a utom ukwọrọikọ ofụri ererimbot. Edi enye ama akpa mbemiso mme unen oro ẹkekemde se ẹnyamde.

“Sia udọn̄ esie ekedide ndinyam mme unen oro nnyụn̄ nnọ okụk oro ẹsọk ọfis n̄kọk itieutom, nnyịn, ete ye eka esie, ima ibọk inyụn̄ inyam mme unen oro. Nnyịn inọ okụk emi ẹsọk mbufo nte etịbe Anderson. Ke ntak un̄wọn̄ọ Jehovah, nnyịn imenyene mbuọtidem nte ke idibịghike, nnyịn iyafiak ikụt Anderson. Nnyịn iyom ndibọrọ, ‘Ih!’ ke ini enye edibụpde m̀mê ima inyam mme unen oro inyụn̄ inọ okụk ẹsọk ọfis n̄kọk itieutom. Ke akpanikọ, nnyịn imodori enyịn ndikụt Anderson ọkọrọ ye ‘akwa otu ntiense’ oro ẹdinamde ẹset.”—Mme Hebrew 12:1; John 5:28, 29.

Nte leta eke enyọn̄ emi enen̄erede owụt, ndinịm ke ediset ke n̄kpa oyodu edi idotenyịn oro ọsọn̄ọde ata mme Christian idem. Nso idatesịt ke ediwak miliọn ubon ẹdikop ntem ke ini mmọ, ukem nte ubon Anderson, ẹdidarade mbonima oro mmọ ẹketabade ke n̄kpa!—1 Corinth 15:24-26.

Ikọ Abasi owụt ke ọnọ-ndọn̄esịt idotenyịn ediset ke n̄kpa emi edidi kiet ke otu mme utịben̄kpọ oro ẹdidade itie ke mîbịghike ke edinen obufa ererimbot, ke idak Obio Ubọn̄ Abasi. (2 Peter 3:13) Bible etịn̄ aban̄a se Abasi edinamde ọnọ mme owo adan̄aoro ete: “Enye ọyọkwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebe-iso n̄kpọ ẹma ẹbe ẹfep.”—Ediyarade 21:4.