Ukara Obio Ubọn̄ Abasi​—Ata Idem N̄kpọ Mfịn

“Didie ke ediwak idụt, emi ẹnyenede nsio nsio ido edinam ye nsio nsio idaha uforo ẹkeme ndinyịme ye kiet eken? Ẹdọhọ ke en̄wan oro otode ekondo efen kpọt edidian ubonowo ọtọkiet.”—The Age, n̄wedmbụk n̄kpọntịbe Australia.

EN̄WAN oro otode ekondo efen? Edide utọ en̄wan oro ayadian kpukpru mme idụt ererimbot ọtọkiet m̀mê ididianke, ntịn̄nnịm ikọ Bible etịn̄ aban̄a en̄wan oro ekperede, emi edidiande kpukpru mme idụt ererimbot ọtọkiet. Ndien, ke akpanikọ, en̄wan emi edito akakan udịmekọn̄ emi ẹdude ke ererimbot efen.

Edidem David eke Israel eset ama etịn̄ ntịn̄nnịm ikọ aban̄a idaha ererimbot emi. Enye akada odudu spirit Abasi ewet ete: “Ndidem ererimbot ẹdaha ẹda, mbọn̄ ẹnyụn̄ ẹbono ẹdụk odu ẹban̄a Jehovah ye Messiah esie, ẹte, ‘Ẹyak nnyịn ibụn̄ n̄kpọkọbi mmọ, inyụn̄ ikịbi urụk mmọ ke idem nnyịn iduọk.’” (Psalm 2:2, 3; Utom 4:25, 26) Tịm fiọk ete ke ndidem ererimbot ẹyebono ẹdụk odu ẹban̄a Jehovah, kpa Andibot ekondo, ye Messiah esie, m̀mê Edidem oro enye emekde, Jesus Christ. Didie ke oro editịbe?

Nte ekemde ye ubatini Bible ye ntịn̄nnịm ikọ oro ẹsude, ẹma ẹwụk Obio Ubọn̄ Abasi ke heaven ẹnyụn̄ ẹmek Jesus Christ ndidi Edidem ke 1914. * Ke ini oro, mme idụt ererimbot ẹkenyene ekikere kiet. Utu ke ndisụk ibuot  nnọ obufa ukara Obio Ubọn̄ Abasi, mmọ ẹkesịn idem ke en̄wan unyan̄a ukara—kpa Ekọn̄ Ererimbot I.

Didie ke Jehovah Abasi ese utọ edinam mme andikara oro? “Enye etie ke enyọn̄ asak: Ọbọn̄ ababian̄a mmọ. Ndien enye ọdọhọ ye mmọ ke iyatesịt esie, onyụn̄ ada ikan̄ ifụtesịt esie esịn mmọ ndịk.” Ekem, Jehovah ọyọdọhọ Eyen esie, Edidem Obio Ubọn̄ oro ẹyetde aran, ete: “Ben̄e mi, ndien nyọnọ fi mme idụt ke udeme fo, nyọnọ mme utịt ererimbot, nte afo ada enyene. Afo ayanuak mmọ ke esan̄ ukwak; onyụn̄ obom mmọ nte n̄kpọ eke obot-eso anamde.”—Psalm 2:4, 5, 8, 9.

Edida esan̄ ukwak nnuak mme idụt oro ẹbiọn̄ọde Abasi mi edida itie ke Armageddon, m̀mê Har–Magedon. Ediyarade, kpa akpatre n̄wed Bible, okot n̄wọrọnda n̄kpọntịbe emi “ekọn̄ akwa usen Abasi, Andikara kpukpru n̄kpọ,” emi ẹditan̄de “ndidem kpukpru ekondo” ẹbok ọtọkiet. (Ediyarade 16:14, 16) Ke idak ndausụn̄ mme demon, mme idụt ererimbot ẹyediana kiet kaban̄a uduak kiet—ndin̄wana ye Ata Ọkpọsọn̄ Abasi.

Ini oro ubonowo edidụkde odu aban̄a Abasi ke asan̄a ekpere usọp usọp. Mbọm mmọ, inua-okot edidianakiet mmọ ididaha ufọn ndomokiet isọk mmọ. Utu ke oro, edinam mmọ edidi ntọn̄ọ emem oro ubonowo eketiede ebet ke anyan ini. Didie ke edi ntre? Ke akpatre ekọn̄ oro, Obio Ubọn̄ Abasi “ayanuak onyụn̄ ama kpukpru mme idụt emi, ndien enye ayada ke nsinsi.” (Daniel 2:44) Obio Ubọn̄ Abasi kpọt, idịghe ndutịm ukara owo ekededi, edida emem ofụri ererimbot ọsọk ubonowo.

Akpan Andikara Obio Ubọn̄

Ukara emi edi Obio Ubọn̄ oro ediwak mbon oro ẹnyenede esịt akpanikọ ẹsibọn̄de akam ẹben̄e, ẹte: “Yak Ubọn̄ Fo edi; yak inam uduak Fo; nte ẹnamde ke heaven, yak inam ke isọn̄ kpasụk ntre.” (Matthew 6:10) Utu ke ndidi ikpîkpu ekikere esịt owo, Obio Ubọn̄ Abasi edi ata ukara oro ama akananam mme utịbe edinam toto ke ini oro ẹkewụkde enye ke heaven ke 1914. Ẹyak nnyịn ineme iban̄a ndusụk akpan n̄kpọ oro ẹwụtde ke Obio Ubọn̄ Abasi edi ata idem n̄kpọ mfịn.

Akpa kan̄a, Obio Ubọn̄ emi enyene okopodudu ikpehe ukara emi Edidem Jesus Christ oro ẹkedoride ke ebekpo edide ibuot. Ke 33 E.N., Jehovah Abasi ama emek Jesus Christ ete edi Ibuot esop Christian. (Ephesus 1:22) Toto ke ini oro, Jesus amakama itie ibuot esie ke eti usụn̄, ke ntre owụtde ukeme esie ndikama ukara. Ke uwụtn̄kpọ, ke ini akamba akan̄ okodude ke Judea ke akpa isua ikie, esop Christian ama anam n̄kpọ usọp usọp man an̄wam nditọete. Ẹma ẹnọ Barnabas ye Saul ẹto Antioch ẹda etịbe emi ẹketịpde ẹsọk nditọete ke Judea.—Utom 11:27-30.

Nnyịn imekeme ndidori enyịn ke Jesus Christ ayanam se ikande oro, sia ẹma ẹkewụk ukara Obio Ubọn̄. Ini ekededi oro afanikọn̄—unyekisọn̄, akan̄, ukwọ, obot nsụn̄ikan̄ ndibomo, m̀mê oyobio—ẹtịbede, esop Mme Ntiense Jehovah ẹsinam n̄kpọ usọp usọp man ẹn̄wam ekemmọ mme andinịm ke akpanikọ ye mbon en̄wen oro ẹdude ke mme ebiet emi unọmọ esịmde. Ke uwụtn̄kpọ, ke ini akama-nsobo unyekisọn̄ ọkọnọmọde El Salvador  ke January ye February 2001, ẹma ẹnam ndutịm unọ un̄wam ke ofụri idụt oro, ndien otu Mme Ntiense Jehovah ẹtode Canada, Guatemala, ye United States ẹma ẹnọ un̄wam. Ẹma ẹfiak ẹbọp itie utuakibuot mmọ ita ọkọrọ ye ufọkidụn̄ oro ẹwakde ẹbe 500 ke ata ekpri ibio ini.

Mme Andidu ke Idak Ukara Obio Ubọn̄ Abasi

Tọn̄ọ ẹkewụk enye ke 1914, Ukara Obio Ubọn̄ eke heaven amatan̄ mme andidu ke idak esie emi ẹtode ofụri ererimbot obok ọtọkiet. Emi osu n̄wọrọnda ntịn̄nnịm ikọ emi Isaiah ekewetde ete: “Ama ekem ke utịt eyo, obot ufọk Jehovah [utuakibuot akpanikọ esie oro emenerede ke enyọn̄] oyowụhọ ke enyọn̄ ikpọ obot; . . . ndien kpukpru mme idụt ẹyebụn̄ọ ẹdụk ke esịt.” Ntịn̄nnịm ikọ emi owụt ke “ediwak obio” ẹyedọk obot oro ẹnyụn̄ ẹnyịme mme ukpepn̄kpọ ye ewụhọ Jehovah.—Isaiah 2:2, 3.

Editan̄ mbok emi anam ata n̄wọrọnda esop odu ke eyo nnyịn, oro edi, otu nditọete Christian eke ofụri ererimbot emi ẹwakde ẹbe 6,000,000, emi ẹdude ke se iwakde ibe idụt 230 ke ererimbot. Ke ikpọ mbono ofụri ererimbot eke Mme Ntiense Jehovah, idem esikpa mme owo ndikụt ima, emem ye edidianakiet emi ẹsidude ke otu mmọ, emi akande ubahade eke idụt, eke ido edinam, ye eke usem. (Utom 10:34, 35) Nte afo unyịmeke ute ke mbemiso ukara ekemede ndinam ediwak ekpụk ẹdiana ọtọkiet ke emem, ke ana enye enen̄ede enyene ukeme ye iwụk onyụn̄ edi ata ata ukara?

Obio Ubọn̄ Abasi ye Unọ Ukpep

Kpukpru ukara ẹnyene mme idaha oro mmọ ẹyomde nditọisọn̄ ẹsịm, ndien kpukpru owo oro ẹyomde ndidu ke idak ukara oro ana ẹsịm mme idaha oro. Ukem ntre, Obio Ubọn̄ Abasi enyene mme idaha oro anade kpukpru owo oro ẹdotde ndidu ke idak esie ẹsịm. Nte ededi, imemke utom ndinam ata ediwak owo emi ẹnyenede nsio nsio idaha ke uwem ẹnyịme ẹnyụn̄ ẹsịm mme ukem idaha. Do, ẹkụt n̄kpọ efen mi oro ọsọn̄ọde ke Obio Ubọn̄ Abasi edi ata idem n̄kpọ—eti ndutịm unọ ukpep esie oro esịmde onyụn̄ okpụhọrede esịt ye ekikere mme owo.

Didie ke ukara Obio Ubọn̄ anam akwa utom emi? Ebe ke ndida usụn̄ oro mme apostle ẹkedade ẹnam utom ukwọrọikọ, “ke ufọk ke ufọk” ye ke ndikpep owo kiet kiet Ikọ Abasi. (Utom 5:42; 20:21) Usụn̄ unọ ukpep emi okụt unen adan̄a didie? Jacques Johnson, oku Catholic, ama ewet ke n̄wedmbụk n̄kpọntịbe Canada eke urua ke urua aban̄a ukeme oro enye ekesịnde ndikpan n̄wan kiet ndikpep n̄kpọ ye Mme Ntiense Jehovah. Enye ekewet ete: “Esịt ama enen̄ede ọdiọk mi, mma nnyụn̄ ndifiọk ke ndikanke ke en̄wan emi. Mma ndifiọk ke iban Ntiense Jehovah emi ẹma ẹda ediwak ọfiọn̄ oro ẹkebede ẹnyene eti itie ebuana ye obufa ekaeyen  emi akakamade eyen ke ubọk mi. Mmọ ẹma ẹdiana kiet ẹnọ enye un̄wam, ẹnam ufan ye enye, ẹkọri eti itie ebuana oro otụkde esịt. Ikebịghike, enye ama akabade edi ifịk ifịk andibuana ke ido ukpono mmọ ndien n̄kekemeke ndinam n̄kpọ ndomokiet ndibiọn̄ọ oro.” Ukem nte etop Bible oro Mme Ntiense Jehovah ẹkekpepde ye nti edu Christian mmọ ẹketụkde esịt akani owo Catholic emi, kpa ntre n̄ko ke ẹsitụk esịt ediwak miliọn owo ke ofụri ererimbot.

Ukpep Obio Ubọn̄ emi ọkọn̄ọ ke Bible, ọsọn̄ọde eyịre ke mme edumbet ye mme idaha ido uwem Bible. Enye ekpep mme owo ndima nnyụn̄ n̄kpono kiet eken, inamke n̄kpọ m̀mê nso idi idaha mmọ ke uwem. (John 13:34, 35) Enye n̄ko an̄wam mme owo ndinam item emi: “Ẹkûnyụn̄ ẹkabade ẹbiet eyo emi, edi ẹyak mbufo ẹkpụhọde, oto ke edinam emi ẹnamde esịt mbufo edi obufa, man mbufo ẹdomo ẹfiọk se uduak Abasi edide, uduak Abasi eke edide eti, onyụn̄ enemde owo esịt, onyụn̄ ọfọnde ama.” (Rome 12:2) Ediwak miliọn owo ẹnyene emem ye idatesịt idahaemi ye nyayama idotenyịn kaban̄a ini iso, sia mmọ ẹkpọn̄ n̄kani usụn̄ uwem mmọ ẹnyụn̄ ẹkop inemesịt ndidu uwem ekekem ye mme ibet ye edumbet ukara Obio Ubọn̄.—Colossae 3:9-11.

Magazine emi, Enyọn̄-Ukpeme, edi ata akpan n̄kpọ kiet oro an̄wamde ndinam edidianakiet odu ke ofụri ererimbot. Ebede ke eti ndutịm ukabade n̄wed ye ukwak umịn̄n̄wed oro ẹmịn̄de ediwak usem, ẹsisio mme akpan ibuot ukpepn̄kpọ Enyọn̄-ukpeme ke usem 135 ke ukem ini, ke ntre, se ibede mbahade 95 eke ikie ke otu mme andikot Enyọn̄-Ukpeme ẹkeme ndikpep ibuot ukpepn̄kpọ emi ke usem mmọ ke ukem ini.

Ewetn̄wed kiet edide owo Mormon ama ewet aban̄a utom ukwọrọikọ oro enen̄erede okụt unen akan eke ufọkabasi mmọ. Enye akasiak Enyọn̄-Ukpeme ye Awake!, oro Mme Ntiense Jehovah ẹsiode, nte magazine oro ọkwọrọde ikọ akan onyụn̄ ọdọhọ ete: “Owo ndomokiet ikemeke ndidọhọ ke Enyọn̄-Ukpeme m̀mê Awake! edi magazine emi anamde owo odu ke ndueidem—utu ke oro, mmọ ẹnam owo odu ke edidemede, kpa se mmensiwakke ndikụt ke mme n̄wed ido ukpono eken. Se ẹmịn̄de ke Enyọn̄-Ukpeme ye Awake! ẹdi akpanikọ, mme andiwet ẹda ini ẹdụn̄ọrede, ẹnyụn̄ ẹdi se inen̄erede itịbe.”

Akpakịp uyarade ẹdu oro ẹwụtde ke Obio Ubọn̄ Abasi edi ata ukara oro akarade mfịn. Mme Ntiense Jehovah ẹkop inemesịt ndibuana “gospel Ubọn̄ Abasi emi” ifịk ifịk ye mbọhọidụn̄ mmọ, ẹnọde mmọ ikot ndikabade ndi mme andidu ke idak esie. (Matthew 24:14) Ndi afo amama utọ idotenyịn oro? Afo emekeme ndibọ edidiọn̄ otode edibuana ye mbon oro ẹbọde ukpep ẹnyụn̄ ẹdomode ndidu uwem ekekem ye mme idaha Obio Ubọn̄. Akande oro, afo emekeme ndinyene idotenyịn edidu ke idak ukara Obio Ubọn̄ ke obufa ererimbot oro ẹn̄wọn̄ọde, emi ‘edinen ido edidụn̄de.’—2 Peter 3:13.

[Ikọ idakisọn̄]

[Ndise ke page 4, 5]

Mme idụt ẹma ẹsịn idem ke ekọn̄ ererimbot ke 1914

[Mme ndise ke page 6]

Ndutịm unọ un̄wam unyịmesịt edi uyarade ima Christian

[Ndise ke page 7]

Mme Ntiense Jehovah ke ofụri ererimbot ẹsibọ ukem ukpep

—