“Emi Edi Mfọnn̄kan N̄kpọ Oro Afo Ekemede Ndinam”

ALEXIS edi eyeneren isua ition emi odụn̄de ke Morelia, Mexico, ndien ete ye eka esie ke ẹkpep Bible ẹnyụn̄ ẹdụk mbono esop Mme Ntiense Jehovah. Ke adan̄aemi enye okodụkde mbono circuit ye ubon mmọ, enye ama okụt nnamn̄wụt oro akaban̄ade edikwọrọ ikọ ke ufọk ke ufọk. Enye ama okot ete esie inikiet inikiet onyụn̄ obụp enye ete: “Papa, Papa, ntak emi afo mûsukwọrọke ikọ?” Ete esie ama ọbọrọ ete: “Ami ke n̄kpep n̄kpọ man n̄kpekeme ndinam oro.” Alexis ama ọdọhọ nduaidem nduaidem ete: “Papa, emi edi mfọnn̄kan n̄kpọ oro afo ekemede ndinam.”

Ekpri eyeneren emi ama okụt ufọn edinam n̄kpọ ke n̄kemuyo ye ifiọk oro enye enyenede aban̄a Jehovah. Sia enye odụn̄de ye ndusụk n̄kpri nditọ eyeneka eka esie, enye ama ebem iso ọbọn̄ akam ọnọ Jehovah ndien ekem eneme se ete ye eka esie ẹkekpepde enye ke N̄wed Mi eke Mme Mbụk Bible ye mmọ. Okposụkedi Alexis mîkọfiọkke kan̄a ndikot n̄wed, mme ndise oro ẹnamde mme mbụk oro ẹn̄wan̄a ẹma ẹnam enye enen̄ede ọfiọk se isịnede ke n̄wed oro. Enye ama akam ọdọhọ ke ọdọn̄ imọ ndiwaha mbịne mme owo ke ufọk mmọ man ibuana se imọ ikekpepde iban̄a uduak Abasi ye mmọ.

Ke akpanikọ, kpukpru owo, n̄kpri ye ikpọ ẹkeme ndinam uwem mmọ odu ke n̄kemuyo ye se Jehovah, kpa “Edisana Abasi,” oyomde oto mmọ, ndien ke ntem ẹnyenede akakan ifet edinọ ikọ ntiense mban̄a enye ke otu mme idụt. (Isaiah 43:3; Matthew 21:16) Nte eyịghe mîdụhe, oro edi kiet ke otu mfọnn̄kan n̄kpọ oro owo ekemede ndinam.