Jehovah, ‘Odudu Nnyịn ke Ini Ukụt’
Jehovah, ‘Odudu Nnyịn ke Ini Ukụt’
“Edi Jehovah anyan̄a nti owo: enye edi odudu mmọ ke ini ukụt.”—Psalm 37:39.
1, 2. (a) Nso ke Jesus ekeben̄e ke akam aban̄a mme mbet esie? (b) Nso idi uduak Abasi kaban̄a ikọt esie?
JEHOVAH edi ata ọkpọsọn̄. Enye enyene odudu ndikpeme mme anam-akpanikọ andituak ibuot nnọ enye ke usụn̄ ekededi emi enye amade. Enye akam ekeme ndidianade ikọt esie n̄kpọn̄ mbon eken ke ererimbot nnyụn̄ nnịm mmọ ke ebiet oro enyenede ifụre ye emem. Nte ededi, Jesus ọkọbọn̄ akam ọnọ Ete esie eke heaven aban̄a mme mbet esie, ete: “Mben̄eke nte Afo osio mmọ ke ererimbot efep, edi mmeben̄e nte ekpeme mmọ ke [ntak andidiọk].”—John 17:15.
2 Jehovah iyomke ‘ndisio nnyịn ke ererimbot mfep.’ Utu ke oro, uduak esie edi nnyịn ndidụn̄ ye kpukpru owo eken ke ererimbot emi man ikpatan̄a etop idotenyịn ye ndọn̄esịt inọ mmọ. (Rome 10:13-15) Edi, nte Jesus ọkọdọhọde ke akam esie, sia idụn̄de ke ererimbot emi, “andidiọk” ekeme ndinam nnyịn idiọk. Ọsọn̄ibuot ubonowo ye udịm mme idiọk spirit ẹdi ntak ọkpọsọn̄ ubiak ye ndutụhọ, ndien mme Christian ibọhọke ukụt.—1 Peter 5:9.
3. Nso ke ana mme anam-akpanikọ andituak ibuot nnọ Jehovah ẹtiene ẹsobo, edi ndọn̄esịt ewe ke nnyịn ikụt ke Ikọ Abasi?
3 Ke ini isobode mme utọ idomo oro, edi ndammana n̄kpọ ndikop mmemidem. (Mme N̄ke 24:10) Bible ọdọn̄ọ ediwak mbụk ẹban̄ade mme anam-akpanikọ oro ẹkekụtde ukụt. Andiwet psalm ọkọdọhọ ete: “Ediwak ukụt ẹsịm eti owo; edi Jehovah osio enye ke mmọ kpukpru.” (Psalm 34:19) Ih, afanikọn̄ esisịm “eti owo” n̄ko. Ukem nte David, andiwet psalm, ndusụk ini nnyịn imakam ikeme ‘ndifụm, nnyụn̄ mbụn̄ọ eti-eti.’ (Psalm 38:8) Edi, ọnọ ndọn̄esịt ndifiọk ke “Jehovah emekpere mmọ eke esịt obụn̄ọde mmọ; onyụn̄ anyan̄a mmọ eke esịt ọduọde.”—Psalm 34:18; 94:19.
4, 5. (a) Nte ekemde ye Mme N̄ke 18:10, nso ke ana nnyịn inam man Abasi ekpeme nnyịn? (b) Nso idi mme akpan usio-ukot oro ikemede ndinam man Abasi an̄wam nnyịn?
4 Ke n̄kemuyo ye akam Jesus, ke akpanikọ, Jehovah ke ekpeme nnyịn. Enye edi “odudu [nnyịn] ke ini ukụt.” (Psalm 37:39) N̄wed Mme N̄ke etịn̄ ukem ikọ oro ke ini ọdọhọde ete: “Enyịn̄ Jehovah edi ọkpọsọn̄ tower: eti owo efehe odụk ke esịt, ndien odu ke ifụre.” (Mme N̄ke 18:10) Itie N̄wed Abasi emi ayararede akpanikọ kiet aban̄ade ima ima udọn̄ oro Jehovah enyenede aban̄a mme edibotn̄kpọ esie. Abasi esinen̄ede ekpeme nti owo emi ẹsịnde ifịk ẹyom enye, nte n̄kpọ eke nnyịn ifehede ika ndidịbe ke ọkpọsọn̄ tọwa.
5 Ke ini ikụtde ukụt, didie ke nnyịn ikeme ndifehe n̄koyom ukpeme nto Jehovah? Ẹyak nnyịn ineme akpan usio-ukot ita oro ikemede ndinam man Jehovah an̄wam nnyịn. Akpa, ana nnyịn ibọn̄ akam inọ Ete nnyịn eke heaven. Udiana, ana nnyịn inam n̄kpọ ke n̄kemuyo ye edisana spirit esie. Ndien ọyọhọ ita, ana nnyịn inyịme ndutịm Jehovah ebe ke ndibuana ye ekemmọ mme Christian emi ẹkemede nditehede ube ukụt nnyịn.
Odudu Oro Akam Enyenede
6. Didie ke ata mme Christian ẹse akam?
6 Ndusụk mbiausọbọ ẹsidọhọ mme owo ẹbọn̄ akam nte usọbọ mfụhọ ye mfịghe. Okposụk ekemede ndidi akpanikọ nte ke owo ndidu ke ndobo ndobo ebiet n̄kere n̄kpọ nte n̄kpọ eke ọbọn̄de akam ekeme ndisụhọde mfịghe, uyo mme n̄kpọ-obot ye edinuak owo edem ẹkeme ndisụhọde mfịghe n̄ko. Ata mme Christian idaha akam nte ekpri n̄kpọ ebe ke ndida enye nte ikpîkpu usọbọ ntụk. Nnyịn ida akam nte ukpono ukpono nneme oro inyenede ye Andibot. Akam esịne edituak ibuot nnọ Abasi ye edinyene mbuọtidem ke enye. Ih, akam edi ubak utuakibuot nnyịn.
7. Nso ke ndibọn̄ akam ye uko ọwọrọ, ndien didie ke mme utọ akam oro ẹn̄wam nnyịn ndiyọ ukụt?
7 Ana akam nnyịn asan̄a ye uko, m̀mê mbuọtidem, oro inyenede ke Jehovah. Apostle John ekewet ete: “Nnyịn imonyụn̄ ibụre ifiọk iban̄a Enye, ite, edieke nnyịn iben̄ede n̄kpọ ekededi nte ekemde [ye] uduak Esie, Enye ọbiọn̄ utọn̄ ke eben̄e nnyịn.” (1 John 5:14) Jehovah, Akakan Andidu, kpa ata ọkpọsọn̄ Abasi kierakiet, esinen̄ede ọnọ san̄asan̄a n̄kpan̄utọn̄ ke akam mme andituak ibuot nnọ enye. Ndikam mfiọk nte ke edima Abasi nnyịn esikpan̄ utọn̄ ọnọ nnyịn ke ini isiande enye mme editịmede esịt ye mme mfịna nnyịn esidọn̄ nnyịn esịt.—Philippi 4:6.
8. Ntak emi mme anam-akpanikọ Christian mîkpedehede ikop bụt m̀mê ndikere ke mmimọ idotke ke ini ẹbọn̄de akam ẹnọ Jehovah?
8 Mme anam-akpanikọ Christian ikpedehede ikop bụt, ikere ke mmimọ idotke, m̀mê ndinana mbuọtidem ke ini ẹbọn̄de akam ẹnọ Jehovah. Edi akpanikọ, ke ini ikpude idem nnyịn m̀mê ke ini mme mfịna ẹkande nnyịn ubọk, isiwakke ndidọn̄ nnyịn ndibọn̄ akam nnọ Jehovah. Ke mme utọ ini oro ọkpọfọn nnyịn iti ke Jehovah ‘esitua ikọt esie emi ẹtụhọde, mbọm’ onyụn̄ ‘ọdọn̄ mbon nsụk-idem esịt.’ (Isaiah 49:13; 2 Corinth 7:6) Ini ọkpọsọn̄ ubiak ye ukụt ke oyom nnyịn inen̄ede ida uko ika ibịne Ete nnyịn eke heaven nte ebiet ubọhọ.
9. Nso udeme ke mbuọtidem enyene ke akam oro ibọn̄de inọ Abasi?
9 Man inen̄ede ibọ ufọn ito akam, ana nnyịn inyene ata mbuọtidem. Bible ọdọhọ ke “owo eke asan̄ade ekpere Abasi enyene ndinịm ete Enye ododu, onyụn̄ edi Andinọ mmọ emi ẹyomde Enye utịp.” (Mme Hebrew 11:6) Mbuọtidem idịghe ikpîkpu edinịm ke Abasi odu. Ata mbuọtidem abuana edinen̄ede nnịm ke Abasi enyene ukeme ye udọn̄ ndinọ nnyịn utịp ke ntak oro ikopde item esie. “Enyịn Jehovah ke esese ndinen owo, utọn̄ Esie onyụn̄ ọbiọn̄ọ eseme mmọ; edi Jehovah asasak iso ese mmọ emi ẹnamde idiọk.” (1 Peter 3:12) Nditi kpukpru ini nte ke Jehovah enen̄ede ekere aban̄a nnyịn anam akam nnyịn enen̄ede enyene se ọwọrọde.
10. Edieke anade Jehovah ọsọn̄ọ nnyịn idem ke n̄kan̄ eke spirit, ana akam nnyịn etie didie?
10 Jehovah esikop akam nnyịn ke ini ibọn̄de ke ofụri esịt. Andiwet psalm ekewet ete: “Nda ofụri esịt nseme; yere mi, O Jehovah; nyenịm mme ewụhọ fo.” (Psalm 119:145) Ke mîbietke akam mbubịk oro ẹsibọn̄de ke ediwak ido ukpono, akam nnyịn idịghe enyọn̄ enyọn̄ m̀mê se mîtoho esịt. Ke ini nnyịn ibọn̄de akam ke “ofụri esịt” inọ Jehovah, ikọ nnyịn ẹnen̄ede ẹnyene se ẹwọrọde ẹnyụn̄ ẹnyene uduak. Ke ima ikọbọn̄ utọ akam ofụri esịt oro, nnyịn iyọtọn̄ọ ndikop idem inem emi otode editop ‘mbiomo nnyịn nnọ Jehovah.’ Ndien nte Bible ọn̄wọn̄ọde, “enye ayakama” nnyịn.—Psalm 55:22; 1 Peter 5:6, 7.
Spirit Abasi Edi Andin̄wam Nnyịn
11. Nso idi usụn̄ kiet oro Jehovah esiyerede nnyịn ke ini ikade iso ‘ndiben̄e’ un̄wam esie?
11 Jehovah idịghe Andikop akam kpọt enye edi n̄ko Andiyere akam. (Psalm 65:2) David ekewet ete: “Ke usen ukụt mi ke ndiseme nnọ fi, koro afo eyeyere mi.” (Psalm 86:7) Mmọdo, Jesus ama esịn udọn̄ ọnọ mme mbet esie ete ẹka iso “ẹben̄e” un̄wam Jehovah koro ‘Ete mmọ ke heaven’ “ediyak Edisana Spirit ọnọ mmọ eke ẹben̄ede Enye.” (Luke 11:9-13) Ih, anamutom odudu Abasi anam n̄kpọ nte andinọ ikọt esie ibetedem m̀mê ndọn̄esịt.—John 14:16.
12. Didie ke spirit Abasi ekeme ndin̄wam nnyịn ke ini etiede nte mme mfịna ẹkan nnyịn ubọk?
12 Idem ke ini isobode mme idomo, spirit Abasi ekeme ndinọ nnyịn “akwa ubom odudu.” (2 Corinth 4:7) Apostle Paul, emi ọkọyọde ekese mfụhọ mfụhọ idaha, ama etịn̄ uko uko ete: “Mmenyene ukeme ndinam kpukpru n̄kpọ ke odudu Andisọn̄ọ mi idem.” (Philippi 4:13) Kpasụk ntre, ediwak Christian mfịn ẹma ẹfiak ẹkop nsọn̄idem ke n̄kan̄ eke spirit ye eke ntụk nte ibọrọ akam oro mmọ ẹkebọn̄de ẹkpe Abasi ubọk. Ediwak ini, ke ima ikọbọ un̄wam ito spirit Abasi, mme mfịna oro ẹnen̄erede ẹkama mfụhọ isitiehe aba nte se ikande owo ubọk. Ke ntak odudu oro Abasi ọnọde, nnyịn imekeme nditịn̄ nte apostle Paul eketịn̄de ete: “Nnyịn ikop mfịghe ke kpukpru edem, edi idụhe ke mbaba; ẹfịna nnyịn ekikere, edi itiehe ke n̄kịm-enyịn; ẹsịn nnyịn enyịn, edi Abasi ikpọn̄ke nnyịn, ẹyịbi nnyịn ẹduọk ke isọn̄, edi ibiatke nnyịn uwem.”—2 Corinth 4:8, 9.
13, 14. (a) Didie ke Jehovah ada Ikọ esie edi odudu nnyịn? (b) Didie ke afo ndida mme edumbet Bible nsịn ke edinam an̄wam fi?
13 Edisana spirit ama ọnọ odudu n̄ko ẹda ẹwet ẹnyụn̄ ẹtịm Ikọ Abasi ẹnịm ke ufọn nnyịn. Didie ke Jehovah ada Ikọ esie edi odudu nnyịn ke ini ukụt? Usụn̄ kiet edi ndinọ nnyịn ekikere ye ọniọn̄. (Mme N̄ke 3:21-24) Bible ọnọ ukeme ukere n̄kpọ ye ekikere nnyịn ukpep. (Rome 12:1) Ebede ke ndikot nnyụn̄ n̄kpep Ikọ Abasi kpukpru ini, ke adianade ye edida enye nsịn ke edinam, nnyịn imekeme “[ndikọ] ifiọk ndidiọn̄ọ se ifọnde ye se idiọkde.” (Mme Hebrew 5:14) Ekeme ndidi odu ini oro mme edumbet Bible ẹken̄wamde fi ndinam nti ubiere ke ini okosobode nsọn̄ọn̄kpọ. Bible esinọ nnyịn ọniọn̄ oro ekemede ndin̄wam nnyịn inyene nti usọbọ ke mme mfịna oro ẹkamade mfụhọ.—Mme N̄ke 1:4.
14 Ikọ Abasi ọnọ nnyịn n̄kpọ efen oro ọnọde nnyịn odudu—idotenyịn edinyan̄a. (Rome 15:4) Bible asian nnyịn ete ke idiọk n̄kpọ idikaha iso ke nsinsi. Se ededi ukụt oro ẹsịmde nnyịn ẹdi ke ibio ini. (2 Corinth 4:16-18) Nnyịn imenyene “idori-enyịn nsinsi uwem; eke Abasi, emi mîkemeke ndisu nsu, ekebemde nsinsi ini iso ọn̄wọn̄ọ.” (Titus 1:1b, 2) Edieke idatde esịt ke idotenyịn oro kpukpru ini inyụn̄ itide nyayama ini iso oro Jehovah ọn̄wọn̄ọde, nnyịn iyenyene ime ke ukụt.—Rome 12:12; 1 Thessalonica 1:3.
Esop—Ima Oro Abasi Amade Nnyịn
15. Didie ke mme Christian ẹkeme ndin̄wam kiet eken?
15 N̄kpọ efen oro Jehovah ọnọde nnyịn emi ekemede ndin̄wam nnyịn ke ini ukụt edi mme ufan oro nnyịn inyenede ke esop Christian. Bible ọdọhọ ete: “Ufan amama ufan kpukpru ini, edi eyen-eka [eke amanade] ọnọ ini nnan-enyịn.” (Mme N̄ke 17:17) Ikọ Abasi esịn udọn̄ ọnọ kpukpru owo ke esop ete ẹkpono ẹnyụn̄ ẹma kiet eken. (Rome 12:10) Apostle Paul ekewet ete: “Owo okûyom ufọn esie, edi oyom ufọn owo en̄wen.” (1 Corinth 10:24) Ndinyene utọ edu oro ekeme ndin̄wam nnyịn ndiwụk ekikere ke ufọn mbon en̄wen utu ke mme idomo nnyịn. Ke ini nnyịn in̄wamde mbon en̄wen, idịghe mmọ kpọt ke nnyịn in̄wam, edi nnyịn ke idem nnyịn n̄ko iyokop inemesịt ye uyụhọ oro ẹnamde ikeme ndiyọ mme mfịna nnyịn.—Utom 20:35.
16. Didie ke kpukpru Christian ẹkeme ndisịn udọn̄ nnọ kiet eken?
16 Nditọete oro ẹkọride ẹsịm ọyọhọ idaha ẹkeme ndinyene akpan udeme ke ndisọn̄ọ kiet eken idem. Man ẹnam ntre, ana mmọ ẹnam mme owo ẹkeme ndisan̄a n̄kpere mmọ ẹnyụn̄ ẹnọ idemmọ unyịme unyịme. (2 Corinth 6:11-13) Esop esinen̄ede ọbọ ufọn ke ini kpukpru owo ẹfakde ifet ẹtoro mme uyen, ẹsọn̄ọde mbufa mme andinịm ke akpanikọ idem, ẹnyụn̄ ẹsịnde udọn̄ ẹnọ mbon oro ẹkopde mfịghe. (Rome 15:7) Ima nditọete ayan̄wam nnyịn n̄ko ndifep edu edinyene eyịghe mban̄a kiet eken. Nnyịn ikpenyeneke ndisọsọp mbiere ke mme owo ndinyene ndutan̄uyo edi idiọn̄ọ mmeme eke spirit. Paul ama eteme mme Christian nte odotde ete “ẹsọn̄ọ mbon iduọ-esịt idem.” (1 Thessalonica 5:14) Bible owụt ke idem mme anam-akpanikọ Christian ẹkeme ndikụt ukụt.—Utom 14:15.
17. Mme ifet ewe ke nnyịn inyene ndisọn̄ọ mbọbọ nditọete Christian?
17 Mme mbono esop Christian ẹdi ata eti ifet ẹnọ nnyịn ndidọn̄ kiet eken esịt nnyụn̄ nsịn udọn̄ nnọ mmọ. (Mme Hebrew 10:24, 25) Inaha ẹnyene inem inem ebuana emi ke mme mbono esop kpọt. Utu ke oro, ikọt Abasi ẹsiyom mme ifet ndibuana ye kiet eken ke nsio nsio idaha. Ke ini mme mfụhọ mfụhọ idaha ẹdemerede, nnyịn iyọsọsọp in̄wam kiet eken koro ima inyenyene itie ufan oro ọsọn̄de nte itai ye aban̄. Apostle Paul ekewet ete: “Edibahade okûdu ke ikpọkidem; edi . . . kpukpru ndido ẹkpekere kiet eken. Ntem edieke ndido kiet okopde ndutụhọ kpukpru ndido eken ẹtiene enye ẹkop ndutụhọ; edieke ẹnyụn̄ ẹnọde ndido kiet ubọn̄, kpukpru ndido eken ẹtiene enye ẹdara.”—1 Corinth 12:25, 26.
18. Nso ekikere ke ikpefep ke ini esịt ọduọde nnyịn?
18 Ndusụk ini, nnyịn imekeme ndikere ke esịt ọduọ nnyịn akaha ndibuana ye ekemmọ mme Christian. Nnyịn ikpenyene ndibiọn̄ọ utọ ekikere oro mbak nnyịn iditaba ndọn̄esịt ye un̄wam oro ekemmọ mme andinịm ke akpanikọ ẹkemede ndinọ. Bible ọtọt nnyịn ete: “Owo ido esie ebịne se enye oyomde; [ayadaha] aka iso, ikereke item.” (Mme N̄ke 18:1) Abasi ọnọ nnyịn nditọete nnyịn man owụt ima oro enye amade nnyịn. Edieke nnyịn ifiọkde ima ima enọ emi, eyefịghede nnyịn ke idem ke ini ukụt.
Ka Iso Nyene Idotenyịn
19, 20. Didie ke N̄wed Abasi an̄wam nnyịn ifep ndikere ke idotenyịn idụhe?
19 Ke ini idem ememde nnyịn m̀mê ikopde mfụhọ, edi mmemmem n̄kpọ ndikere ke idotenyịn idụhe. Ke uwụtn̄kpọ, ke ini afanikọn̄ esịmde ndusụk owo, mmọ ẹkeme ndinyene eyịghe mban̄a idaha eke spirit mmọ, ẹdọhọde ke nsọn̄ọn̄kpọ mmimọ edi uyarade ke Abasi imaha mmimọ. Nte ededi, ti ete ke Jehovah isidomoke owo “idomo.” (James 1:13) Bible ọdọhọ ete: “Koro [Abasi] mînamke n̄kpọ abiak owo mînyụn̄ itụkke nditọ owo ke ima esịt esie.” (Eseme 3:33) Ke edide isio, Jehovah esinen̄ede okop mfụhọ ke ini mme asan̄autom esie ẹkopde mfụhọ.—Isaiah 63:8, 9; Zechariah 2:8.
20 Jehovah edi “Ete mbọm ye Abasi kpukpru ndọn̄esịt.” (2 Corinth 1:3) Enye ekere aban̄a nnyịn, ndien enye eyemenede nnyịn enịm ke enyọn̄ ke edikem ini. (1 Peter 5:6, 7) Nditi ima oro Abasi amade nnyịn kpukpru ini ayan̄wam nnyịn ndinyene idotenyịn, akam anamde nnyịn idat esịt. James ekewet ete: “Ẹnịm ẹte edi n̄kpọ ọyọhọ idatesịt, nditọ-ete mi, ke ini nsio-nsio idomo ẹsịmde mbufo.” (James 1:2) Ntak-a? Enye ọbọrọ ete: “Koro ke ẹma ẹkedomo enye ẹfiọk ẹte ọfọn, [ẹyenọ] enye anyanya uwem, emi Ọbọn̄ ọkọn̄wọn̄ọde ndinọ mmọ emi ẹmade Enye.”—James 1:12.
21. Inamke n̄kpọ m̀mê nso nsọn̄ọn̄kpọ ẹsịm nnyịn, nso ubiọn̄ ke Abasi ọnọ mbon oro ẹnamde akpanikọ ẹnọ enye?
21 Kpa nte Jesus ọkọtọtde nnyịn, nnyịn iyokụt ukụt ke ererimbot. (John 16:33) Edi Bible ọn̄wọn̄ọ ete ke baba “ukụt . . . m̀mê ndutụhọ, m̀mê isịn-enyịn, m̀mê akan̄, m̀mê ubuene ye unana, m̀mê n̄kpọ-ndịk” idikemeke ndidianade nnyịn ke ima Jehovah ye eke Eyen esie. (Rome 8:35, 39) Ọdọn̄ nnyịn esịt didie ntem ndifiọk nte ke ukụt ekededi oro nnyịn ikụtde edi ke ibio ini! Kan̄a ke emi, ke adan̄aemi itiede ibet utịt ndutụhọ ubonowo, edima Ete nnyịn, kpa Jehovah, ke ekpeme nnyịn. Edieke nnyịn ifehede ibịne enye ikoyom ubọhọ, enye “eyedi ebiet ubọhọ mmọ eke owo ẹtụkde, ebiet ubọhọ ke ini nnanenyịn” m̀mê ini ukụt.—Psalm 9:9.
Nso ke Nnyịn Ikekpep?
• Nso ke mme Christian ẹkpedori enyịn ndikụt ke adan̄aemi ẹdụn̄de ke idiọk ererimbot emi?
• Didie ke akam ofụri esịt nnyịn ekeme ndisọn̄ọ nnyịn idem ke ini isobode mme idomo?
• Didie ke spirit Abasi edi andin̄wam?
• Nso ke nnyịn ikeme ndinam man in̄wam kiet eken?
[Mme Mbụme Ukpepn̄kpọ]
[Ndise ke page 18]
Ana iyom Jehovah nte n̄kpọ eke ifehede ika ndidịbe ke ọkpọsọn̄ tọwa
[Mme ndise ke page 20]
Mme Christian oro ẹkọride ẹsịm ọyọhọ idaha ẹsida kpukpru ifet ẹtoro ẹnyụn̄ ẹsịn udọn̄ ẹnọ kiet eken